Pagdating ng Sinovac ng China, sasalubungin mismo ni P-Duterte

ni Lolet Abania | February 27, 2021

Personal na sasalubungin ni Pangulong Rodrigo Duterte ang 600,000 doses ng Sinovac COVID-19 vaccine ng China na nakatakdang dumating sa Linggo, February 28. Ayon kay Sen. Christopher “Bong” Go, sasamahan niya ang Pangulo sa pagtanggap ng nasabing bakuna.

“Darating na sa February 28. I think 5:00 p.m. po ay tatanggapin ni Pangulong Duterte,” ani Go. Sinabi ni Go na ang 600,000 doses ng Sinovac vaccine ay donasyon ng Chinese government sa Pilipinas.

Sa kabuuang bilang nito, 100,000 doses ang nakalaan para sa mga militar. Una nang binanggit ni Presidential Spokesperson Harry Roque na nais ng Pangulo na siya mismo ang tumanggap ng mga vaccine bilang pasasalamat sa China sa naturang donasyon.

“Gusto po nating tumanaw ng utang na loob, kaya nais sumalubong ni Presidente. Magkakaroon po ng ceremony kapag dumating na ang donated vaccines ng People’s Republic of China,” ani Roque sa Palace briefing.

Ayon pa kay Go, na siyang chair ng Senate Committee on Health, isang "simple turnover" ceremony ang magaganap sa Linggo. “Matagal na natin itong inaantay. Ako, as a legislator, talagang kinukulit ko po.

Naaawa na ako kina Vaccine Czar Secretary (Carlito) Galvez, Jr. at (Department of Health) Secretary (Francisco) Duque. Halos araw-araw ko silang nire-remind,” sabi ni Go.

16 sugatan, 3 kritikal sa nasirang flying swing

ni Lolet Abania | February 16, 2021

Labing-anim ang sugatan habang tatlo ang nasa kritikal na kondisyon matapos na isang swing ride sa amusement park sa Hunan Province sa central China ang nawasak kamakalawa nang hapon, ayon sa lokal na awtoridad sa lugar.

Naganap ang insidente bandang alas-3:40 ng hapon sa Shaoyang County sa central China.

Ayon sa opisyal ng lalawigan, nawalan ng kontrol ang "flying chair" swing ride dahil sa isang mechanical glitch na naging dahilan ng pagkahulog ng mga turistang nakasakay.

Agad na isinugod ang mga biktima sa pinakamalapit na ospital habang ang parke ay pansamantalang isinara. Patuloy na nagsasagawa ng imbestigasyon ang local authorities sa naganap na aksidente.

Swab test sa puwet, mas epektib, sinimulan sa China

ni Lolet Abania | January 28, 2021

Nagsimula na ng paggamit ng anal swab para sa COVID-19 testing ang mga mamamayan ng China.

Ayon sa Agence-France Presse, naglabas ng ulat ang China state TV na mayroon umanong ilan na nagdududa sa ganoong klase ng paraan ng pagkuha ng swab sample.

Subalit sinasabi umano ng mga doktor na mas mabisa ang nasabing sistema dahil agad nakikita ang virus.

Sa report, kabilang sa mga isinailalim umano sa anal swab ay ilang residente sa Beijing na nagpositibo sa coronavirus at mga nasa quarantine facilities kaya ito isinagawa para masuring muli.

Ayon din sa mga dalubhasa, mas epektibo umanong ma-detect ang virus sa isang tao kapag sa puwet kukunin ang swab sample kaysa sa kasalukuyang paraan na throat at nose swab.

Paliwanag din ni Li Tongzeng, senior doctor mula sa You'an Hospital sa Beijing, mas tumataas ang detection rate sa mga taong infected. Matutukoy dito nang husto ang virus na matagal manatili kumpara sa respiratory tract o kaya sa lalamunan ng isang tao.

Gayunman, may ilang residente ang nagsasabing nakakahiya ang ganitong uri ng anal swab para sa COVID testing. Aminado naman ang ilang doktor sa China, hindi na nila palalawigin ang paggamit ng anal swabs sa COVID-19 testing dahil sa isyu ng inconvenience ng mga pasyente.