CHED pinahintulutan na ang muling pagte-training ng mga student athletes

ni Jasmin Joy Evangelista | December 14, 2021

Pinahintulutan na ng Commission on Higher Education at Department of Health ang pagbabalik ng in-person training ng mga student-athlete.

Kasabay nito ay naglabas ng memorandum ang CHED at DOH hinggil sa guidelines ng collegiate athletic training sa gitna ng COVID-19 pandemic.

Base sa guidelines, ang mga student-athletes na magpa-participate sa mga training ay kailangang fully-vaccinated. Isasailalim din sila sa bubble, at mananatili roon sa buong duration ng training.

"Generally, the protocols for the sports training is the same protocols that we have for the limited face-to-face classes. Observance of minimum health protocols, the retrofitting of facilities, vaccinated students and faculty," ani CHED chairman Popoy De Vera.

"Then ensuring that, if somebody gets sick, there are protocols in terms of the committee that will look into it, health professionals in the school that will check on the condition of the student-athletes or coaches, etc. Contact tracing, referral to local government," dagdag niya.

Hindi required ang COVID testing sa mga student-athletes, at nakadepende ito sa m strategies ng mga paaralan.

Ang mga paaralang kabilang sa UAAP at NCAA ay magsasagawa pa rin ng antigen at RT-PCR tests para student-athletes bilang precautionary measure.

“Hindi nila ma-require, to be fair to all member-schools. However, as mentioned kanina, that's one thing that we're imposing. Kaya lang medyo costly siya, even for our context," paliwanag ni Atty. Rebo Saguisag, executive director ng UAAP.

"What we're doing is alternate, parang antigen, antigen, on the third week it will be RT-PCR. Pero hindi siya mawawala, andoon siya, and this has been insisted upon by our biosecurity officer. Talagang standards are higher than those imposed by the JMC (Joint Memorandum Circular)."

UMaasa naman si NCAA chairman Manuel Castellano na muling magbabalik ang mga kompetisyon sa March 2022.

"We've been waiting for this... This is our passion, this is what we love to do. And at least we're a step closer to the resumption of competition," aniya.

Samantala, sa muling pagbabalik ng in-person classes at trainings, sinabi ni Health Secretary Francisco Duque na naka-monitor ang mga health officials at mga eksperto sa banta ng Omicron variant at siniguro ang publiko na wala pang nade-detect sa bansa.

Alamin: Mga kailangan sa muling pagbubukas ng klase sa kolehiyo

ni Jasmin Joy Evangelista | October 22, 2021

Tinalakay sa Senado ang pagbubukas ng limited face-to-face classes sa mga kolehiyo at state universities sa gitna ng pandemya.

Pinatitiyak ng mga mambabatas ang kahandaan ng mga eskuwelahan sakaling payagan na ito.

Nakadepende raw ang pagbubukas ng klase sa sitwasyon ng COVID-19 sa isang lugar, ayon kay Commission on Higher Education (CHED) Chairman Prospero de Vera.

“We have to make our campuses COVID resilient when we ask our students to come in at scheduled times," ani de Vera.

Salitan at hindi puwedeng sabay-sabay o 100 percent na papasok ang mga estudyante, depende sa populasyon ng mga mag-aaral.

May mga mekanismo na raw ang mga local government units at pinaplantsa na ang limited face-to-face classes, kung saan ang mga eskuwelahan daw ang mag-a-apply sa CHED kung papayagan na silang magbukas para dito.

May mga lugar daw kasi na hindi papayag ang mga magulang at ang LGU na pumasok sa paaralan dahil sa takot pa rin sa COVID-19.

Dagdag pa rito, kailangan din daw pataasin ang vaccination rate sa mga kabataan.

Ayon kay Health Undersecretary Myrna Cabotaje, ibabase ang pagbubukas ng face-to-face classes sa estado ng vaccination ng mga estudyante sa isang lugar.

“I-divide yung classes, so you can have all the vaccinated in one class and then those unvaccinated will go online. And then pwede naman, the next group parang bubble type," paliwanag ni Cabotaje.

"You can have the vaccinated for one week or two weeks, then you can have the unvaccinated in another one or two weeks. We do not want to disenfranchise the unvaccinated. We want to push with the vaccination," aniya.

Safety seal sa mga kolehiyo at unibersidad, inihirit ng CHED

ni Lolet Abania | June 17, 2021

Pinag-aaralan ng Commission on Higher Education (CHED) na mabigyan ng “safety seal” certifications ang mga kolehiyo at unibersidad na nagsasagawa ng limitadong in-person classes habang may pandemya.

Ayon kay CHED Chairman Prospero “Popoy” De Vera, ang nasabing sertipiko ang magsisilbing patunay na ang eskuwelahan ay ligtas at sumusunod sa itinatakdang health protocols.

“Pinag-uusapan po namin sa commission iyan. Gagawa tayo ng safety seal, na lahat ng eskuwelahan na papayagang mag-face-to-face, puwedeng lagyan noon,” ani De Vera sa isang press conference ngayong Huwebes.

“Kailangang gumawa tayo ng mas detalyadong guidelines for joint monitoring by CHED and ng local governments para alam nating siguradong iyong standards are being met,” dagdag ni De Vera.

Nag-iisyu na ang gobyerno ng mga safety seals sa mga malls at iba pang establisimyento para tiyakin sa mga customers na ang kanilang kumpanya ay nakakasunod sa public health standards laban sa pagkalat ng COVID-19.

Gayundin, si Quezon City Mayor Joy Belmonte na dumalo sa press conference ay sumasang-ayon sa proposal ni De Vera.

“Kaisa ninyo kami (city government) sa pagpapaspas ng pag-iinspeksiyon ng ating mga paaralan at sisiguruhin po natin na compliant lahat ng schools bago po tayo magbukas,” ani Belmonte.

Samantala, hinimok na rin ni De Vera ang mga kolehiyo at unibersidad na simulan ang retrofitting ng kanilang pasilidad bilang paghahanda sa limitadong face-to-face classes sa ibang degree programs.

Sa ngayon, pinayagan ng gobyerno ang medical at allied health programs na magsagawa ng limited in-person instruction dahil nangangailangan ito ng on-site training.

Ayon kay De Vera, kinukumpleto na rin ng CHED ang mga datos hinggil sa safety ng mga estudyante ng medical at allied health habang isinasagawa nila ang face-to-face instruction, kung saan magiging basehan ito kung maaari nang palawigin sa ibang degree programs ang pagkakaroon ng physical classes.