Checkpoint niragasa ng tricycle, 2 pulis sapul

by Mai Ancheta @News | August 26, 2026

Photo: File / Police Checkpoint - PNP Quezon Municipal Police Station

Sugatan ang dalawang pulis na nagmamando sa isang checkpoint makaraang salpukin ng 54-anyos na lasing na tricycle driver habang minamaneho ang kanyang “bao-bao” sa Brgy. Poblacion, Quezon, Bukidnon.

Batay sa inisyal na imbestigasyon, ang dalawang pulis ay abala na nag-i-inspect sa mga dumadaang sasakyan nang dumating ang bao-bao  na mabilis ang takbo at sinagasaan ang dalawang pulis.

Dahil sa lakas ng pagkakasalpok, tumilapon ang dalawang pulis at nagtamo ng mga sugat sa katawan.

Walang tinamong sugat ang driver, subalit naobserbahan ng mga nagrespondeng awtoridad na nasa impluwensiya ito ng alak.

Inilagay sa kustodiya ng Quezon Municipal Police Station ang suspect para sa dagdag na imbestigasyon.

Checkpoint, tinakasan.. 15-anyos na binatilyo, patay, angkas sugatan sa motor

ni Lolet Abania | January 19, 2022

Isang 15-anyos na lalaki ang namatay habang sugatan ang 19-anyos na kanyang angkas nang sumemplang ang kanilang motorsiklo, matapos na takasan ang isang police checkpoint sa Quezon City ngayong Miyerkules ng madaling-araw.

Nakaposisyon ang checkpoint sa bahagi ng Banawe corner Calamba Streets, alinsunod sa ipinatutupad na Oplan Sita ng mga awtoridad.

Ayon sa mga police officers na naka-duty, sisitahin lamang nila ang dalawang binatilyo dahil sa wala silang suot na mga helmet.

Subalit sa halip na huminto sa checkpoint ang mga binatilyo, pinaharurot pa ng takbo ang kanilang motor. Agad naman silang hinabol ng mga naka-duty na mga pulis.

“They disobeyed deliberately the Oplan Sita and they sped off instead. However our TMRU (Tactical Motorcycle Riders Units) conducted the chase... The suspects, while being chased, they drew their firearm. Accidentally the firearm dropped,” ani Police Lieutenant Colonel Tyrone Valenzona, commander ng La Loma Police.

Umabot ang habulan sa C3 Road sa Caloocan City hanggang sa maaksidente ang motorsiklo ng dalawang binatilyo.

Sa salaysay ng 19-anyos na angkas, pinahihinto na niya ang kaibigan pero itinuloy pa rin nitong pinaharurot ang motor.

“Ayaw niya na ring pigilan, ayaw na niyang ihinto. Natatakot lang din po kaya niyakap ko na lang din siya. Noong nasa dulo na po, dire-diretso na po kami nu’n. Hindi namin akalain ‘yung lubak. Doon na po kami tumilapon. Doon na, nagdugo-dugo na ‘yung ulo

niya,” sabi ng binatilyo na nagtamo naman ng mga sugat sa kaliwang binti at balikat.

Ayon sa pulisya, isang caliber .38 pistol ang kanilang nakumpiska, kung saan itinapon umano ito ng 19-anyos na binatilyo sa gilid ng kalsada.

Gayunman, itinanggi ito ng binatilyo at hindi umano sa kanya ang baril.

Mahaharap ang binatilyong suspek sa mga reklamong disobedience at illegal possession of firearms in relation to Omnibus Election Code.

Checkpoints sa NCR, inalis na — PNP

ni Lolet Abania | September 15, 2021

Inihayag ngayon ni Philippine National Police (PNP) Chief Police General Guillermo Eleazar na walang itatakdang mga checkpoints sa National Capital Region (NCR) kapag isinailalim na ang rehiyon sa Alert Level 4 bukas, Huwebes.

Sa isang interview, sinabi ni Eleazar na ang pagde-deploy nila ng mga pulis ay nakatuon na lamang sa mga lugar na nasa ilalim ng granular lockdowns. “Wala na tayong checkpoint sa operation dahil narinig naman natin ng uniform naman itong Level 4 [Alert Level 4 in NCR],” ani Eleazar .

Paliwanag pa ni Eleazar na ang pagpapatupad ng granular lockdowns ay hindi na bago sa kapulisan dahil sa may 50 lugar sa Metro Manila ang kasalukuyang nakasailalim sa naturang restrictive measure.

Una nang inianunsiyo nitong Martes ni Department of Interior and Local Government (DILG) Secretary Eduardo Año na ang NCR ay isasailalim sa Alert Level 4 simula sa Huwebes sa gitna ng COVID-19 pandemic.

Sa ilalim ng Alert Level 4, ang ikalawang pinakamataas na alert level sa bagong scheme ng pamahalaan, ay iyong may mga kaso ng COVID-19 na mataas ang bilang o nadaragdagan pa habang ang kabuuang mga kama at ICU beds ay nasa high utilization rate.

Ang mga hindi pinapayagan o bawal lumabas ng kanilang bahay na nasa ilalim ng Alert Level 4 ay mga edad 17 pababa, mga 66-anyos pataas, mga mayroong immunodeficiencies, comorbidities, o iba pang may panganib sa kalusugan, mga buntis.

Ang mga indibidwal naman na papayagan o maaaring lumabas ng bahay ay iyong mga kukuha o bibili ng mga essential goods at services, o magtatrabaho sa mga industriya o opisina na pinayagang mag-operate ng gobyerno.

Gayundin, sa ilalim ng Alert Level 4, ang intrazonal at interzonal travel para sa mga indibidwal ay maaaring payagan subalit nakadepende ito sa ipinatutupad na regulasyon ng LGU na destinasyon o nais na puntahan.