Gamit na hiringgilya, pinaglaruan... 7 bata, nagpositibo sa COVID

ni Lolet Abania | January 29, 2022

Pitong bata na pinaglaruan ang medical waste na kanilang natagpuan sa bisinidad sa kanilang lugar ang nagpositibo sa test sa COVID-19 ngayong Sabado, sa bayan ng Virac, Catanduanes.

Isinailalim ng mga awtoridad sa antigen test ang mga bata na nasa edad 3 hanggang 11, matapos na paglaruan ang mga gamit nang syringes o mga hiringgilya na itinapon sa baybayin ng Barangay Concepcion.

Isa babae naman na namataang pinagagalitan ang mga bata dahil sa pinaglalruan ng mga ito ang mga medical waste ay na-infect din sa COVID-19.

Sinabi ni Concepcion Barangay Chairman Anthony Arcilla na naka-isolate na ang mga bata at binigyan na rin ng mga bitamina at gamot.

Aniya, nakatakdang sumailalim sa RT-PCR testing ang mga ito sa Lunes.

Matatandaang unang natagpuan ang mga medical waste sa kahabaan ng baybayin ng Concepcion ngayon buwan.

Ayon sa mga barangay officials, inako na ng laboratoryo kung saan nanggaling ang naturang basura ang responsibilidad sa insidente at humingi na rin ng paumanhin sa ginanap na village council session.

Nabatid naman ng village council, na ang representative ng laboratoryo na dumalo sa sesyon ay nagpositibo sa test sa COVID-19, kaya ang mga council members na naging close contact ng lab representative ay sumailalim na rin sa quarantine.

Edad 8 at 9, pinatay ng sariling ama

ni Mary Gutierrez Almirañez | June 3, 2021

Patay ang magkapatid na babaeng edad 8 at 9 matapos saksakin ng sariling ama sa loob ng kanilang bahay sa Barangay Western Poblacion, Baras, Catanduanes kagabi, June 2.

Ayon sa ulat, nakatanggap ng tawag ang Barangay Poblacion mula sa isang residente at sinabing maglalaslas umano ang kanyang asawa. Kaagad namang rumesponde ang barangay upang kumpirmahin ang tawag at pigilan ang paglalaslas, ngunit nadatnan nilang duguan at nakahandusay na sa loob ng bahay ang magkapatid.

Salaysay pa ng mga awtoridad, inatake umano sila ng suspek gamit ang kutsilyo kaya binaril nila ito at pinatamaan sa hita.

Pagkadakip sa suspek ay isinugod nila sa ospital ang mag-aama, subalit dead on arrival na ang magkapatid.

Kapag nakalabas naman sa ospital ang ama ay nakatakda itong sampahan ng kaso dahil sa pagpatay sa dalawang anak.

Sa ngayon ay hindi pa rin malinaw ang dahilan ng pagpatay nito sa magkapatid.

Bicol, sentro uli ni 'Bising'

ni Mary Gutierrez Almirañez | April 17, 2021

Itinaas sa blue alert status ang Catanduanes at kasalukuyan na ring naghahanda ang ilang lokal na pamahalaan sa Bicol region sa pagdating ng bagyong Bising, ayon kay Governor Joseph Cua ngayong araw, Abril 17.

Aniya, “As soon as mag-declare na ng red alert level, magkakaroon tayo ng forced evacuation.”

Ikinabahala ni Cua ang magiging epekto ng bagyong Bising sa kanilang lugar, sapagkat aniya’y hindi pa sila nakakabangon mula sa Bagyong Rolly noong nakaraang taon.

Sabi pa niya, “Ito na naman ang Bising na mukhang delikado sa laki ng diametro nito. Kahit ang gitna nito, tumama sa dagat, abot pa rin ang buong Bicol region nito kaya nakakatakot po dahil sa laki ng diametro. At 'yung expected rains na dala nito, 600 to 900 millimeters kaya medyo 'yun pa rin ang nangangamba tayo, dahil nga at 240 millimeters na ulan, 24 hours n’yan, nagla-landslide na tayo. Ito, 600 to 900 mm kaya talagang nakakatakot.”

Kabilang ang Catanduanes sa mga lugar na nasa Tropical Cyclone Wind Signal No. 1.

Samantala, dalawang dam naman sa bayan ng Palapag sa Northern Samar ang nagbawas ng tubig bilang paghahanda sa parating na bagyo.

Nagpalabas na rin ng kautusan ang ilang lokal na pamahalaan para pansamantalang ipagbawal ang pagpapalaot ng mga mangingisda. Ipinagbawal din ang pagbibiyahe sa dagat upang maiwasan ang disgrasya.

Ayon sa Philippine Atmospheric, Geophysical and Astronomical Services Administration (PAGASA), huling namataan si Bising dakong alas-10 kaninang umaga, na may layong 645 kilometers sa silangan ng Maasin City, Southern Leyte.

May taglay itong hangin na 185 kilometers per hour na malapit sa sentro at may pagbugso na hanggang 230 kph. Ito ay kasalukuyang kumikilos papuntang northwestward sa bilis na 20 kph.