Claire dela Fuente, inatake sa puso, pumanaw na sa edad 62

ni Mary Gutierrez Almirañez | March 30, 2021

Pumanaw na ang 62-anyos OPM icon na si Claire dela Fuente dahil sa cardiac arrest, ayon sa kumpirmasyon ng mga kamag-anak niya ngayong Martes nang umaga, Marso 30.

Batay sa tweet ng ABS-CBN showbiz reporter na si MJ Felipe, “Relatives of the singer confirmed her passing thru composer and music producer Jonathan Manalo who is close to the family."

Matatandaang muling umingay ang pangalan ni Claire matapos masangkot ang anak niya sa pagkamatay ng flight attendant na si Christine Dacera. Taong 1997 nang bumenta ang una niyang album at nasundan pa iyon ng 7 albums sa mga sumunod na taon.

Kabilang sa mga sumikat niyang kanta ay ang jukebox hit na Sayang, Minsan-Minsan at Nakaw Na Pag-ibig. Kinilala rin siya bilang The Karen Carpenter of the Philippines, Queen of Tagalog Songs at Jukebox Queen kasama sina Imelda Papin, Eva Eugenio at Didith Reyes.