Unang Rizal monument sa Alberta, Canada, pinasinayaan

ni Lolet Abania | October 26, 2021

Umabot sa 400 indibidwal mula sa mga lugar sa buong Alberta, Canada ang dumalo para saksihan ang makasaysayang paglalahad ng unang monumento ng pambansang bayani ng Pilipinas na si Dr. Jose Rizal sa lugar nitong weekend.

Ayon sa isang news release mula sa Department of Forein Affairs (DFA), ang main feature ng nasabing monumento ay isang three-foot bust ni Dr. Rizal na obra ng kilalang Filipino sculptor na si Toym Imao ng Manila.

Ang bust o busto, rebultong anyo ni Rizal, ay nakalagay sa itaas ng isang pitong-talampakang pedestal na nababalutan ng granite at matatagpuan sa isang 36 x 38 feet spot sa Nose Creek Regional Park, kung saan sa naturang lugar ay isinasagawa ang karamihan sa Filipino community gatherings.

Naging posible ang proyektong ito sa pagtutulungan ng Philippine Consulate General (PCG), ang Airdrie City Council, ang Filipino Airdrie Association (FAA), at ang seven-man Rizal Monument Project Team (RMPT).

Ayon kay Calgary Consul General Zaldy Patron, ang statue ay inilunsad upang bigyang parangal ang Philippine heritage at kultura ng mga matitiyaga at masisipag na mga Pilipino sa Alberta.

Pinangunahan ang unveiling ceremony nina Patron, Alberta Associate Minister of Immigration and Multiculturalism Muhammad Yaseen, Airdrie Mayor Peter Brown, at FAA President Mr. Jun Martin.

Ang pagpapasinaya ng monumento ni Rizal sa Alberta, Canada, ang pinakamalaking cultural diplomacy project ng Philippine Consulate General na naitala sa ngayon.

Turistang 'di bakunado, bawal sa Canada

ni Ronalyn Seminiano Reonico | July 9, 2021

Hindi muna tatanggap ang Canada ng mga foreign tourists na hindi pa bakunado laban sa COVID-19, ayon kay Prime Minister Justin Trudeau.

Nang matanong ng mga reporter si Trudeau kung maaari bang makapasok ng bansa ang mga unvaccinated tourists, aniya, "I can tell you right now that's not going to happen for quite a while."

Gayunpaman, ayon kay Trudeau, pinag-aaralan nang payagang makapasok sa Canada ang mga fully vaccinated na laban sa COVID-19.

Aniya, "The next step we'll be looking at what measures we can allow for international travelers who are fully vaccinated.

"We will have more to say in the coming weeks."

Samantala, umabot na sa 78% ng mga edad 12 pataas sa Canada ang nakatanggap na ng unang dose ng bakuna kontra COVID-19, ayon sa health officials. Nasa 44% naman ng mga edad 12 pataas ang fully vaccinated na.

Surplus na COVID-19 vaccines ng Canada, gustong bilhin ng ‘Pinas

ni Lolet Abania | June 28, 2021

Nagpahayag ng intensiyon ang Pilipinas na kunin ang ilang natitirang COVID-19 vaccines mula sa Canada bilang bahagi ng pagsisikap ng gobyerno na magkaroon ng mas maraming supply ng bakuna.

Sa isang Palace news conference ngayong Lunes, sinabi ni Philippine Ambassador to Canada Rodolfo Robles na mayroong inaasahang surplus ang Canada ng tinatayang 100 milyong doses ng COVID-19 vaccines.

“We are being listed among those who are interested to partake of the excess of the 100 million (doses). They expect to have a full vaccination of everybody by the middle of the fourth quarter,” ani Robles.

“Before the end of the year, we will know how [much] excess Canada will have. I am really watching with an eagle eye on the prospect of getting some excess directly from Canada.”

Ang United States of America (USA), na kalapit na bansa ng Canada, ay isinama na ang Pilipinas sa listahan ng mga bansang makatatanggap ng bahagi ng kanilang donasyong milyong doses ng COVID-19 vaccines, kung saan nai-pledge ito ni US President Joe Biden nito lamang buwan.

Noong nakaraang linggo, binanggit naman ni Manila Ambassador to Washington Jose Manuel Romualdez na nasa 800,000 hanggang 1 milyong doses ng COVID-19 vaccines ang maide-deliver sa Pilipinas sa susunod na buwan.

Samantala, naitanong ni Robles sa Medicago, isang Canadian biopharmaceutical company, ang tungkol sa pagkakaroon ng isang vaccine manufacturing plant sa Pilipinas.

“I offered our pharmaceutical ecozone in Bulacan, I think and I gave them all the perks of having manufacturing [operations] in the Philippines like free taxes, free capital importations and the like,” sabi ni Robles.

Aniya pa, inaasahan niya na ang negosasyon ay agarang magpapatuloy kapag ang non-disclosure agreement na nais ng Medicago ay pinirmahan na ng gobyerno. Ang Medicago ay kasalukuyang nagde-develop ng isang plant-based COVID-19 vaccine.