Quarantine passes, kailangan pa rin sa Caloocan

ni Ronalyn Seminiano Reonico | August 23, 2021

Kinakailangan pa ring gumamit ng color-coded quarantine passes sa Caloocan City sa pagsasailalim sa National Capital Region (NCR) sa modified enhanced community quarantine (MECQ), ayon sa lokal na pamahalaan.

Ang paggamit ng mga color-coded quarantine passes ay ipagpapatuloy upang malimitahan umano ang bilang ng mga taong lumalabas para bumili ng mga pangunahing pangangailangan, ayon sa LGU.

Saad pa ni Caloocan City Mayor Oscar "Oca" Malapitan, "Nasa desisyon ng LGU ito. Hangga't hindi natin binabawi ang ating kautusan hinggil sa paggamit ng quarantine pass ay patuloy pa rin ang implementasyon nito.”

Ayon pa sa LGU, mahigpit pa ring ipatutupad ang stay-at-home policy sa mga unauthorized persons outside residence.

Saad pa ni Malapitan, "Ang simpleng pagtiyak natin na ang ating mga anak ay nasa loob ng ating mga tahanan ay malaking tulong sa ating kapulisan at maging sa ating pamahalaang lokal. Muli, magtulungan tayo laban sa COVID-19.”

Pari, nabakunahan na, patay pa rin sa COVID-19

ni Lolet Abania | July 25, 2021

Isinailalim ang San Roque Cathedral sa Caloocan City sa pansamantalang lockdown matapos na isang guest priest ang namatay nitong Sabado nang umaga.

Ayon kay Catholic Bishops’ Conference of the Philippines president-elect at Diocese of Kalookan Bishop Pablo Virgilio David, si Fr. Manuel Jadraque Jr. (“Fr. Mawe”) ng Mission Society of the Philippines ay nagpositibo sa test sa COVID-19 sa ginawang post-mortem swab testing sa kanya.

“We regret to inform you that the Caloocan City Government’s Covid Command Center has ordered the temporary lockdown of the San Roque Cathedral starting tomorrow, Sunday, July 25, which is supposed to be our celebration of the World Day for Grandparents and the Elderly People,” batay sa liham ni Bishop David.

Gayunman, sinabi ni David na ang dalawang misa ngayong Linggo ay nagsagawa ng “sine populo” (walang kongregasyon), isang alas-9:00 ng umaga at alas-5:00 ng hapon, kung saan pareho itong naka-live stream online gamit ang Facebook page ng Diocese of Kalookan. Ayon sa obispo, sumakay si Fr. Mawe sa tricycle sa Monumento para makarating sa cathedral nu'ng Sabado nang umaga. Subalit pagdating sa lugar, aniya,

“He was found unresponsive and very pale inside the tricycle.” Isinugod agad si Fr. Mawe sa ospital subalit idineklarang dead-on-arrival. Sinabi pa ni Bishop David, si Fr. Mawe, 58, ay fully vaccinated na at inakala nilang ito ay “napakalusog.”

Hiniling naman ng obispo sa city government ng Caloocan na mabigyan sila ng specimen sample mula sa yumaong pari para makapagsagawa ng genome testing at madetermina kung anong coronavirus variant ang tumama kay Fr. Mawe.

Mga pabayang opisyal, huhulihin… Mas mabigat na parusa vs. pasaway sa protocols — Roque

ni Lolet Abania | May 27, 2021

Maaaring maaresto nang walang warrant ang mga opisyal ng barangay na makikita sa mga "superspreader gatherings" o pagtitipun-tipon sa gitna ng COVID-19 pandemic, ayon sa Palasyo.

Ito ang ipinahayag ni Presidential Spokesperson Harry Roque isang araw matapos na ipag-utos ni Pangulong Rodrigo Duterte na arestuhin ang mga barangay captains na bigong ipatupad sa kanilang lugar ang health protocols, kabilang na ang pagbabawal sa mass gathering, dahil sa kapabayaan nila sa tungkulin.

“Warrantless arrest can be performed by law enforcers when the law enforcement is personally witnessing the crime. If the barangay captain is at the scene of the superspreader event, knows about it and did nothing, that is dereliction of duty,” ani Roque sa isang interview ngayong Huwebes.

Ginawa ni Pangulong Duterte ang direktiba matapos ang naiulat na mga insidente ng mass gatherings sa swimming pools sa Lungsod ng Caloocan at Quezon City na nagresulta sa mga indibidwal na nagpositibo sa test sa COVID-19.

Ayon pa kay Roque, para naman sa mga walang alam sa nangyayaring superspreader events sa kanilang lugar, maaari pa ring magsampa ng reklamo laban sa mga pabayang barangay captains sa prosecutors’ office at ihain dito ang kanilang mga depensa.

“If the prosecutor finds probable cause, the judge will issue an arrest warrant against the barangay chairman,” sabi ni Roque.

Sinabi rin ni Roque na ang mga sasaling indibidwal at mga organizers ng mga superspreader events ay mananagot din dahil sa paglabag ng mga ito sa mga local ordinances na may kaukulang parusa sa pagsuway sa quarantine protocols.

“If they are complicit, that is conspiracy [to commit a crime] because they allowed the offense to happen,” ani pa ng kalihim.

Gayunman, aniya, ang mga penalties sa ilalim ng mga local ordinances ay hindi sapat para sa indibidwal na lumabag sa ipinatutupad na kautusan.

“We need to have a national quarantine law that will spell out stiffer penalties for breach of quarantine protocol,” saad ni Roque.

Ang mga parusa sa paglabag sa quarantine protocols na itinatakda sa ilalim ng local government ordinances ay pagbabayad ng malaking halaga at administratibo gaya ng pagpapasara ng kanilang establisimyento kapag napatunayang may kasalanan o mayroong paglabag.