804 sa Cagayan at Isabela, inilikas dahil sa banta ng muling pagbaha

ni Lolet Abania | November 29, 2020

Umabot sa 804 evacuees sa Isabela at Cagayan ang inilikas mula sa kanilang tirahan ngayong Linggo dahil sa panganib ng muling pagbaha sanhi ng malakas na buhos ng ulan, ayon sa ulat ng Philippine National Police Region 2.

Sinabi ni PNP Region 2 Director Police Brig. Gen. Crizaldo Nieves, ang water level ng Cagayan River malapit sa Buntun Bridge ay umabot na sa 8.48 meters, kung saan ito ay nasa Alert Level.

“May mga evacuation ngayon. Ongoing, as of this 5 a.m., may pag-ulan pa rin,” ani Nieves.

“’Yung areas kasi doon, especially 'yung pangsukat natin doon sa level ng baha sa Buntun Bridge, as of 5 a.m., is 8.48 meters,” dagdag pa niya.

Ayon pa kay Nieves, tinatayang nasa 62 pamilya o 236 indibidwal ang inilikas sa Cagayan.

Sa Isabela naman, tinatayang nasa 138 pamilya o 422 evacuees ay nagmula sa Cabatauan, habang 65 pamilya o 158 indibidwal ang inilikas sa Alicia, ayon pa kay Nieves.

Mining at illegal logging, sanhi ng baha sa Cagayan

ni Twincle Esquierdo | November 20, 2020

Sinisisi ng mga magsasaka ang black sand mining, illegal logging at illegal mining na dahilan ng pagbaha sa Cagayan. Umapela ang presidente ng Kilusang Magbubukid ng Pilipinas (KMP) na si Danilo Ramos kay House Speaker Lord Allan Velasco na isama ang black sand mining, illegal logging at illegal mining sa isasagawang House investigation.

“Comprehensive investigation ang dapat na gawin ng Kamara, dapat matapang nilang silipin ang mga nasa likod ng illegal logging at black sand mining na siyang talamak sa Cagayan, dahil ito ang siyang problema at dahilan ng paglubog ng lalawigan.

"Pahayag at panawagan ng aming grupo, itigil ang black sand mining, logging at protektahan ang kagubatan at environment," sabi ni Ramos. Ayon pa sa grupo, umapela na raw sila kay Pangulong Rodrigo Duterte na magsagawa ng dredging operation sa Cagayan River.

Nakatakda namang siyasatin ng mga mambabatas ang mga posibleng hindi pagsunod sa batas, alituntunin o regulasyon na naging dahilan ng pagbaha sa Cagayan. Bukod pa sa pagmimina, ang biglang paglabas ng tubig sa Magat Dam ay nakapinsala rin sa dalawang lalawigan ng Cagayan at Isabela.

Matatandaan din na dahil sa pagbaha ay maraming residente ng Cagayan at Isebela ang na-stranded sa bubong at tatlong araw na walang kain habang naghihintay na mailigtas sila. Ayon pa sa grupo, bawat isa sa 9.3 milyong magsasaka at mangingisda ang humihingi ng tulong sa gobyerno sa pamamagitan ng P15,000 subsidy at P10,000 cash aid.

Binanatan sa mabagal na responde sa Cagayan... P-Du30: Pinupulitika lang 'yan!

ni Ronalyn Seminiano Reonico | November 15, 2020

Sinopla ni Pangulong Rodrigo Duterte ang mga kritikong nagsasabing mabagal ang pagresponde ng pamahalaan sa mga residente ng Cagayan at Isabela na nagmakaawa ng tulong matapos ma-trap sa kani-kanyang bahay dahil sa matinding pagbaha.

Nang tanungin si P-Duterte ng mga reporter kung ano ang masasabi niya sa umano’y “mabagal” na pagresponde ng pamahalaan, aniya, “Istorya lang ‘yan. Kailangan pa ba na tumakbo rin ang gobyerno nang mabilis? You go right away and spend money, you land with the Ombudsman. So give them time to make the proper assessment and all.

“Saan ang bagal dito? Nandiyan ang pagkain, the housing, nandiyan. They are ready to implement. They have the money. Pampulitika ‘yan, sa totoo lang. That’s a political punchline.” Kumalat sa social media ang mga larawan at videos kung saan makikita ang kalunus-lunos na dinanas ng mga tao sa Cagayan at Isabela.

Mayroon ding audio record kung saan maririnig na humihiyaw, umiiyak, nagmamakaawa at nananawagan ng tulong ang mga tao na naapektuhan ng matinding pagbaha.

Pero ayon kay P-Duterte, handa ang pamahalaan sa sakuna. Aniya, "The one in charge sa mga preparations for emergency, long before dumating ‘yung typhoon, naka-deploy na ‘yang mga tao rito including the nearest, ‘yung mga makinarya, nandiyan na. “Lahat ng departamento, may contingency plan ‘yan sila.

They have the money already. Sinadya ko ‘yan.. It’s a matter of assessment. You cannot go on a spending spree without knowing what you are spending for."