Magulang, negative sa test… Beybi, patay sa COVID-19 sa Cagayan

ni Lolet Abania | August 17, 2021

Isang 11-buwang gulang na sanggol ang namatay dahil sa COVID-19 sa bayan ng Santa Praxedes, Cagayan.

Ayon sa Santa Praxedes Rural Health Unit and Birthing Center, ito ang unang kaso ng nasawi dahil sa COVID-19 sa nasabing bayan.

Batay sa nai-post sa Facebook ng SPRHU, nasawi ang beybi nito lamang Sabado, Agosto 14.

Unang isinugod ang sanggol noong Agosto 3 sa Northern Cagayan District Hospital matapos na makaranas ng pag-ubo, sipon at hirap sa paghinga.

Noong Agosto 6, isinailalim ang beybi sa RT-PCR test at makalipas ang tatlong araw, lumabas ang resulta nito na positibo sa COVID-19.

Nitong Sabado, tuluyang namatay ang sanggol habang ginagamot sa naturang ospital.

Patuloy naman ang ginagawang contact tracing ng municipal health office ng Cagayan para matukoy ang mga posibleng nakasalamuha pa ng beybi.

Gayunman, lumabas sa mga swab tests na negatibo sa COVID-19 ang pamilya, kaanak at mga close contact ng sanggol kaya palaisipan pa rin kung paano nito nakuha ang nakamamatay na sakit.

Pinayuhan naman ng lokal na pamahalaan ng Cagayan ang mga residente lalo na ang mga authorized person outside residence o APOR na dobleng ingat ang kanilang gawin kontra-COVID-19.

Samantala, hanggang nitong Linggo, Agosto 15, nakapagtala ng 23 bagong kaso ng COVID-19 sa Santa Praxedes kung saan umakyat na sa 38 ang aktibong kaso ng sakit.

67 healthcare workers sa Tuguegarao City, may COVID

ni Lolet Abania | August 14, 2021

Nasa 67 healthcare workers ang nagpositibo sa test sa COVID-19 habang isa ang naitalang tinamaan ng Delta variant sa Tuguegarao City sa Cagayan.

Sa Laging Handa briefing ni Tuguegarao City Mayor Jefferson Soriano ngayong Sabado, sinabi nitong sa 77 frontliners, 67 healthcare workers ang nagpositibo sa swab test sa virus at karamihan sa kanila ay asymptomatic at symptomatic mild cases lamang.

“We have a Delta variant case as of the other night as confirmed to me by the DOH [Department of Health]. But I am sure it is not only one, because the patient was with other members in their household that tested positive,” ani Soriano. “But I’m almost sure, we have more than one Delta variant in Tuguegarao City,” dagdag niya.

Ayon kay Soriano, ang isang kaso ng Delta variant ay nakarekober na habang patuloy ang contact tracing sa mga naging close contacts ng pasyente. Sinabi rin ng mayor na mayroong 773 active COVID-19 cases ang Tuguegarao at nasa 63 ang bagong kaso na nai-record nitong Biyernes.

“We have an occurring problem regarding our healthcare utilization rate, as well as the staff who will monitor our isolation units. Hospitals and isolation units are in full capacity,” saad ni Soriano.

Umapela naman si Soriano sa national government para sa nakalaang cash aid sa 22,790 pamilyang apektado sa Tuguegarao City dahil sa enhanced community quarantine (ECQ), kung saan isinailalim ang lugar sa pinakamahigpit na restriksiyon mula Agosto 12 hanggang 21.

Gayunman, ayon kay Soriano, mahigit sa 30,000 indibidwal sa kabuuang 75,000 na naka-register sa vaccination program ng siyudad ang nabakunahan na. “In the A1 [healthcare workers] category, 78% were vaccinated. In A2 [senior citizens] we had a difficulty, only 61% of the more than 20,000 senior citizens were vaccinated. In the A3 category [persons with comorbidity], we have 95% vaccinated. We are already at A4 [frontline personnel in essential sectors] with 27%,” ani Soriano.

Dine-in resto, tourist spots at outdoor sports, oks na sa NCR Plus at iba pang lugar

ni Mary Gutierrez Almirañez | May 14, 2021

Inilabas na ng Inter-Agency Task Force (IATF) ang mga bagong guidelines na ipatutupad sa ilalim ng general community quarantine (GCQ) ‘with heightened restrictions’ sa NCR Plus Bubble at iba pang lugar simula May 15 hanggang 31, ayon sa inianunsiyo ni Presidential Spokesperson Harry Roque kagabi.

Kabilang sa pinahihintulutan ay ang mga sumusunod:

• 20% capacity sa mga indoor dine-in services at 50% capacity sa outdoor o al fresco dining

• 30% capacity sa mga outdoor tourist attraction

• 30% capacity sa mga personal care services, katulad ng salon, parlor at beauty clinic

• 10% capacity sa mga libing at religious gathering

• Pinapayagan na rin ang outdoor sports, maliban sa may physical contact na kompetisyon

Mananatili pa rin namang bawal ang mga sumusunod:

• entertainment venues katulad ng bars, concert halls, theaters

• recreational venues, katulad ng internet cafes, billiard halls, arcades

• amusement parks, fairs, playgrounds, kiddie rides

• indoor sports courts

• indoor tourist attractions

• venues ng meeting, conference, exhibitions

Higit sa lahat, bawal magtanggal ng face mask at face shield kapag nasa pampublikong lugar. Bawal ding lumabas ang mga menor-de-edad at 65-anyos pataas, lalo na kung hindi authorized person outside residency (APOR).

Patuloy pa ring inoobserbahan ang social distancing sa kahit saang lugar at ang limited capacity sa mga pampublikong transportasyon.

Maliban sa Metro Manila, Bulacan, Rizal, Cavite, at Laguna ay isasailalim din sa GCQ ang Apayao, Baguio City, Benguet, Kalinga, Mountain Province, Abra, Cagayan, Isabela, Nueva Vizcaya, Batangas, Quezon, Puerto Princesa, Iligan City, Davao City, at Lanao del Sur hanggang sa katapusan ng Mayo.

Mananatili naman sa modified enhanced community quarantine (MECQ) ang Santiago City, Quirino, Ifugao, at Zamboanga City.