8 sugatan sa salpukan ng ambulansiya at bus sa EDSA

ni Ronalyn Seminiano Reonico | June 5, 2021

Walo ang sugatan matapos magsalpukan ang bus at ambulansiya sa EDSA Shaw tunnel noong Biyernes nang gabi.

Ayon kay Metropolitan Manila Development Authority (MMDA) Traffic Chief Bong Nebrija, isinugod sa Mandaluyong City Medical Center ang walong sugatan sa insidente.

Aniya, pumasok sa bus lane ang ambulansiya na saktong pagdating naman ng bus.

Saad ni Nebrija, “Papasok siya to get in the busway para mapabilis din siya, ma-traffic. May paparating na bus. Ewan ko kung nakita niya, sabi niya, nakita niya, pero apparently, hindi niya iniwasan.”

Nang bumangga umano ang bus sa ambulansiya ay tumaob ito.

Aniya, “Natanggal po ‘yung portion ng center island natin and so many barriers have been knocked down again, ano? At tumaob pa ‘yung ambulansiya.”

Nilinaw din ni Nebrija na priority pa rin ang mga bus sa bus lane.

Pahayag ni Nebrija, “Ang sinasabi ko, even though they could use it, they are not the priority. Ang priority pa rin is ‘yung bus. So if they want to use it and there’s a bus coming in, they need to give way to the bus.

“Eh, lalung-lalo na itong ambulansiyang ito, wala namang laman. Ang kine-claim niya, may pi-pickup-in siyang pasyente. I do not know what’s the level of emergency nu’ng pi-pickup-in niya.”

Samantala, sugatan sa insidente ang driver ng bus, konduktor at anim na mga sakay nitong pasahero.

Patuloy pa ring isinasagawa ang imbestigasyon sa insidente.

Bus sinilaban ng pasahero, 3 patay, 4 sugatan

ni Ronalyn Seminiano Reonico | June 3, 2021

Tatlo ang patay at apat ang sugatan matapos silaban ng isang pasahero ang bus habang binabaybay ang Mlang sa Cotabato ngayong Huwebes, bandang alas-4 nang hapon.

Ayon kay Mlang Disaster Risk Reduction and Management Officer Bernardo Tayong, hindi pa nakikilala ang tatlong pasaherong nasawi sa insidente.

Aniya pa sa isang radio interview, “They were trapped.”

Ayon sa awtoridad, pagmamay-ari ng Yellow Bus Lines (YBL) ang naturang bus at habang nasa biyahe patungong Tacurong City, Sultan Kudarat, nagbuhos umano ng gasolina ang isang pasahero sa sahig at sinilaban ito gamit ang disposable lighter at kaagad tumalon sa pinto.

Nagtamo naman ng serious burns ang apat pang pasahero na isinugod sa ospital ng mga rumesponde.

Samantala, nagsasagawa na ng imbestigasyon ang awtoridad sa insidente.

Hindi pa rin malinaw sa ngayon kung nahuli na ang suspek.

Bus nahulog sa kanal, 45 patay

ni Ronalyn Seminiano Reonico | February 17, 2021

Patay ang 45 katao na lulan ng pampasaherong bus sa Madhya Pradesh, India ngayong Martes nang umaga matapos itong mahulog sa 30-feet deep na kanal, ayon sa awtoridad.

Tinatayang aabot sa 60 katao ang sakay ng bus at hindi pa natutukoy ng awtoridad ang dahilan ng pagkahulog nito mula sa tulay. Pitong katao naman ang kumpirmadong ligtas kabilang na ang driver ng bus.

Pahayag ni District Police Superintendent Dharamveer Singh, "We have so far found 37 bodies and they have been sent for autopsy. Search and rescue operations are underway.”

Gumamit ng mga rescue boats at life jackets ang State Disaster Response Force (SDRF) sa isinagawang search and rescue operations.

Nakuha ang pitong katawan mula sa kanal at may isang babae na naisugod pa sa ospital ngunit binawian din ng buhay. Sa inisyal na imbestigasyon, nawalan diumano ng kontrol ang driver ng bus bago nahulog sa kanal.

Ipinatigil naman ni Madhya Pradesh Chief Minister Shivraj Singh Chouhan ang lahat ng gawain sa state capital kabilang na ang cabinet meeting upang matutukan ang insidente.

Aniya pa, "The entire state is standing with those affected." Samatala, ipinag-utos ni Prime Minister Narendra Modi na bigyan ng 200,000 rupees ($2,750) ang pamilya ng mga nasawi.