P30K singil sa mga foreign employees na pumapasok ng 'Pinas, itinanggi ng BI

ni Lolet Abania | July 6, 2021

Mariing pinabulaanan ni Bureau of Immigration Commissioner Jaime Morente na nangongolekta ang ahensiya ng anumang tinatawag na “immigration assistance fee” mula sa mga foreign nationals.

Nag-isyu si Morente ng statement matapos madiskubre ng BI na isang kumpanya na nakabase sa Pilipinas ang naniningil sa kanilang mga empleyado na mga foreign nationals ng bayad para sa sinasabing immigration assistance.

Gayunman, hindi nagbanggit ang BI ng detalye tungkol sa kumpanya. “This company is allegedly charging P5,000 as airport assistance fee, another P5,000 for processing fee, and P20,000 for a Department of Foreign Affairs (DFA) Invitation Letter,” ani Morente sa isang pahayag ngayong Martes.

“It seems that this company is using the name of government agencies to be able to charge such high rates to its employees,” sabi pa ng opisyal.

Sinabi ni Morente na pinag-aaralan na nila ang posibleng isampang legal actions laban sa kumpanya.

Paalala naman ni Morente sa publiko na maging maingat at mapagmatyag laban sa mga kumakalat na mapanlinlang na aktibidades o indibidwal.

“Be wary of falling prey to these scammers. Immediately report to the authorities if you encounter such a modus,” sabi ni Morente.

No visa, no entry sa foreigner kahit may anak na Pinoy

ni Ronalyn Seminiano Reonico | May 17, 2021

Kailangan ng visa at entry exemption document ng mga foreign parents ng mga Pinoy para makapasok sa Pilipinas, ayon sa Bureau of Immigration (BI).

Ayon kay BI Commissioner Jaime Morente, hindi sakop ng Balikbayan privilege ang banyagang magulang ng mga Filipino citizens kaya kailangan nila ang visa para makapasok sa bansa.

Kailangan din ang entry exemption document mula sa Department of Foreign Affairs (DFA) o National Task Force Against COVID-19 kung nais nilang magpunta rito sa Pilipinas.

Nilinaw din ni Morente na kahit bumiyahe ang mga foreign parents kasama ang Filipino citizen nilang anak ay kailangan pa rin ang visa at entry exemption sa pagpasok sa bansa.

Pahayag pa ng BI, “Those who do fail to present a visa and an exemption document upon their arrival at the airport will be denied entry by immigration officers and they will be booked on the first available flight back to their port of origin.”

Ayon kay Morente, ang mga sakop lamang ng Balikbayan privilege ay ang mga “Filipinos and former Filipinos, as well as their foreign spouse and children, who are traveling with them.”

Maaaring makapasok sa Pilipinas ang mga biyaherong eligible sa Balikbayan privilege nang visa-free “with an authorized stay of one year.”

Paalala naman ni BI Port Operations Division Chief Atty. Carlos Capulong sa mga banyagang pupunta ng Pilipinas, “They must present a pre-booked accommodation in an accredited quarantine hotel or facility upon their arrival at the airport.”

Airlines, binalaan sa mga dayuhang galing sa bansang banned sa ‘Pinas

ni Lolet Abania | May 10, 2021

Pinaalalahanan ng Bureau of Immigration ang mga airlines na tiyaking ang mga dayuhan na maaaring makapasok sa bansa lamang ang papayagang sumakay sa kanilang mga flights na patungo sa Pilipinas.

“We reiterate that only foreigners with valid and existing visas are allowed to enter the country. The entry of foreign tourists is still temporarily restricted,” ani BI Commissioner Jaime Morente.

Ayon kay Morente, ang mga dayuhan na kasalukuyang ipinagbabawal na pumasok sa bansa ay hindi pinapayagan pagdating pa lamang sa airport habang agad na pinasasakay sa flight pabalik sa pinanggalingang bansa.

Ayon din sa bureau, ang mga airlines ay posible ring pagmultahin at i-sanction dahil sa pagpayag sa tinatawag na “improperly documented aliens” na nasa flight.

“We are thankful that they have been very supportive, and understands that the IATF (Inter-Agency Task Force for the Management of Emerging Infectious Diseases) deems these actions necessary to curb the further spread of COVID-19 and its variants in our country,” saad ni Morente.

Ipinagbabawal na pumasok sa bansa ang mga biyahero na galing sa India, Pakistan, Nepal, Bangladesh, at Sri Lanka epektibo hanggang Mayo 14.

Gayunman, ayon sa BI, ang mga dayuhan lamang na kuwalipikado sa balikbayan privilege ang exempted sa pagkuha ng entry visas. Kabilang sa mga balikbayan ay mga Pinoy at mga dating Filipino, kanilang dayuhang asawa at mga anak na kasama nilang bumiyahe.

Sinabi pa ng BI na maaari silang pumasok at manatili sa bansa nang isang taon kung saan ito ay visa-free.

Ipinatutupad din ng bureau ang IATF Resolution 114 na kinakailangang lahat ng darating na pasahero sa bansa ay sasailalim sa 14-day quarantine, kung saan ang unang 10 araw ay isasagawa sa isang quarantine facility.

“Following this, arriving aliens will be required to present a 10-day booking in an accredited quarantine facility,” ani BI Port Operations Division Chief Carlos Capulong.

“Failure to present a confirmed booking will result in exclusion,” dagdag ni Capulong.