20 K Ivermectin galing India, hinarang sa NAIA

ni Mary Gutierrez Almirañez | May 6, 2021

Dalawampung libong tabletas ng Ivermectin at iba pang undeclared regulated drugs ang naharang sa Ninoy Aquino International Airport (NAIA) ngayong araw, May 6.

Ayon sa Bureau of Customs, nanggaling ang mga gamot sa New Delhi, India at idineklara sa shipment bilang mga food supplements, multivitamins at multi-mineral capsules.

Paliwanag naman ni Director Jesusa Joyce N. Cirunay ng Center for Drug Regulation and Research, ang mga pinapayagan lamang na Ivermectin sa bansa ay ‘yung galing sa importer na idi-distribute sa mga ospital na aprubado ang compassionate special permit (CSP).

Aniya, "In case Ivermectin has been granted authorization, a valid License to Operate (LTO) as Drug Importer and Emergency Use Authorization (EUA) or Certificate of Product Registration (CPR) shall be presented."

Sa ngayon ay 5 ospital na ang pinahihintulutan ng Food and Drug Administration (FDA) upang ipainom ang Ivermectin sa kanilang pasyenteng may COVID-19, buhat nu’ng maaprubahan ang isinumiteng CSP.

Gayunman, patuloy pa ring ipinagbabawal ang ilegal na pag-inom at pagdi-distribute ng Ivermectin sa bansa hangga’t hindi pa napatutunayan sa clinical trial test ang effectivity nito.

30 M kilong baboy na nakalusot, buking, BOC kinuwestiyon

ni Mary Gutierrez Almirañez | April 15, 2021

Kinuwestiyon ni Senator Francis Pangilinan ang 30 milyong kilo ng baboy na nakalusot sa record ng Bureau of Customs (BOC), gayung naitala iyon ng Bureau of Animal Industry (BAI), batay sa panayam sa kanya ngayong umaga, Abril 15.

Aniya, “’Yan ang gusto nating ipaliwanag, posibleng smuggling ‘yan dahil ito ‘yung mga dokumentong isinumite sa Committee on Agriculture sa Senate ng Bureau of Animal Industry at ng Bureau of Customs. Hindi pareho.”

Paliwanag niya, “256 million kilos ang pumasok sa bansa last year. Sa record nila, 225 million kilos lang. So, kulang ng 30 million.”

Nilinaw ni Sen. Pangilinan na kapag hindi iyon naipaliwanag ng BOC ay ituturing na smuggled ang 30 milyong kilo ng baboy na hindi nai-report sa Senate. Kinuwestiyon din niya kung paano iyon mapapatawan ng buwis kung walang rekord.

Sabi pa niya, “Kinakailangan, lahat ng imported goods ay dumaan sa Customs. Eh, ito, wala sa record ng Customs… Kulang ng 30 million kilos ng karneng imported. So, ano ‘yun?”

Iginiit din niya ang mahigit 5,020 foot containers na hindi nainspeksiyon ng BOC, batay sa iniulat ng Department of Agriculture at Compliance and Regulatory Enforcement for Security and Trade Office (CREST-O) sa naganap na hearing nitong Lunes.

“Sila ang nag-report n’yan, ha? Hindi galing sa ‘min ‘yan. DA created CREST-O para nga mabusisi itong mga imports na ito. Du’n lumalabas ‘yung bogus na mga importer. 'Yung address, mali ‘yung address. Walang kapasidad. Sila mismo ang nagsabi, 5,020 footers ng karne ang maaaring nakalusot na mga importer na ito na bogus.”

Sa ngayon ay wala pang sagot ang Bureau of Customs hinggil sa nakalusot na 30 milyong kilo ng baboy, kung saan mahigit $90 million ang naging discrepancy, mula sa $3 per kilo ng baboy.

P3-M ecstasy at marijuana, nasabat sa Pasay

ni Ronalyn Seminiano Reonico | April 6, 2021

Nasabat ng Bureau of Customs (BOC)-Port of Ninoy Aquino International Airport (NAIA) ang tinatayang aabot sa P3 milyong halaga ng ecstasy at kush marijuana ngayong Martes sa ilang warehouses sa Pasay City.

Sa tulong ng BOC Customs Anti-illegal Drugs Task Force (CAIDTF), Philippine Drug Enforcement Agency (PDEA), at NAIA Inter-Agency Drug Interdiction Task Group (NAIA-IADITG), nasabat ang 1,681 tablets ng ecstasy na tinatayang nagkakahalagang P2,857,700 na ayon sa awtoridad, “Found concealed inside a microwave oven.”

Aabot naman sa halagang P159,600 ang nasabat na 133 grams ng kush marijuana na natagpuan sa loob ng isang metal toy box.

Ayon pa sa BOC, “In sum, the seized ecstasy and marijuana have an aggregate value of P3,017,300.”

Sa tala ng Customs, napag-alaman na mula sa Netherlands ang ecstasy at ang recipient ay taga-Quezon City, habang ang kush marijuana naman ay mula sa USA na ang recipient ay naka-address sa Pasay City.

Nai-turn-over na sa PDEA ang mga naturang parcels upang makapagsagawa ng case profiling at posible rin umanong sampahan ng kasong paglabag sa Comprehensive Dangerous Drugs Act (Republic Act 9165) in relation to Section 119 (restricted importation) at Section 1401 (unlawful importation) ng Republic Act 10863 o ang Customs Modernization and Tariff Act (CMTA) ang mga sangkot sa insidente.