4 na bearded dragons, nakumpiska sa Pampanga

ni Lolet Abania | January 30, 2022

Nakakumpiska ang Bureau of Customs (BOC) ng apat na buhay na bearded dragons sa isang shipment na idineklarang tupperware sa Port of Clark sa Pampanga.

Ayon sa BOC, ang naturang shipment ay dumating noong Enero 27 na nagmula sa Malaysia. Isinailalim ito sa X-ray scanning, at may lumabas na mga “suspicious images”, kaya agad na nagsagawa ng 100% physical examination ang bureau.

Nakakuha sa ginawang inspeksyon ng dalawang babae at dalawang lalaking buhay na bearded dragons na nakalagay sa mga plastic containers.

Sinabi ng BOC na ang mga misdeclared shipment ay inimport ng walang kaukulang Sanitary and Phytosanitary Certificate and Veterinary Health Certificate mula sa Department of Environment and Natural Resources (DENR).

Maaaring masampahan ng paglabag sa Section 118 (g), 119 (f), 1113 (l, j) at 1400 ng Republic Act (RA) number 10863 o ang Customs Modernization and Tariff Act and RA 9147 o ang Wildlife Resources Conservation and Protection Act ang consignee nito, habang inaalam na rin ng mga awtoridad ang tungkol dito.

Ayon pa sa BOC, ang mga bearded dragons ay nai-turn over na sa DENR para sa rehabilitation at pag-aalaga sa mga nasabat na shipment.

Giit naman ni District Collector Alexandra Lumontad, patuloy ang Port of Clark ng BOC para protektahan ang mga border laban sa importasyon ng mga smuggled o puslit na wildlife species upang matigil ang illegal wildlife trade sa bansa.

P5.2 M halaga ng ecstasy tablets, nakumpiska, 2 taga-QC, arestado

ni Lolet Abania | January 23, 2022

Arestado ang dalawang babaeng residente ng Quezon City nitong Sabado, matapos na makakumpiska ang mga awtoridad sa Port of Clark ng tinatayang P5.2 milyong halaga ng ecstasy tablets na nakatago sa isang parcel na idineklarang “solar lights for home use.”

Una rito, isang joint operation ang ikinasa ng mga operatiba, kung saan nakasabat sila ng kabuuang 3,054 piraso ng ecstasy tablets na ipinadala mula sa Zaandam, Netherlands patungong Port of Clark.

Kabilang sa mga law-enforcement agencies na nagsagawa ng operasyon ang Bureau of Customs (BOC) ng Port of Clark, Customs Anti-Illegal Drug Task Force (CAIDTF), Enforcement and Security Service (ESS), Customs Intelligence and Investigation Services (CIIS), X-ray Inspection Project (XIP), at ang Philippine Drug Enforcement Agency (PDEA).

Ayon sa BOC, ang naturang shipment na consigned sa isang indibidwal na may address sa Quezon City ay naharang nang dumating ito noong Huwebes, Enero 20, habang nagsagawa sila ng i-X-ray scanning nito.

Nagbigay naman ng indikasyon ang K9 sniffing unit ng PDEA ng posibleng pagkakaroon ng illegal drugs sa nasabing kargamento.

Sa physical examination na pinangunahan ng BOC, tumambad ang tatlong piraso ng solar lights, isang heating cushion, at anim na plastic pouches ng hinihinalang ilegal na droga na nabalutan ng duct tape at nakatago sa pagitan ng mga linings ng corrugated box.

Sa isinagawa pang inspeksyon ayon sa BOC, nakakuha naman sila ng anim na plastic pouches ng nasa 10 gramo ng watak-watak na piraso ng asul at pink tablets ng hinihinalang party drugs o ecstasy.

Gayundin, lumabas sa field testing na isinagawa ng CAIDTF Clark personnel sa pamamagitan ng isang Rigaku Ramman Chemical Analyzer na positibo ang resulta nito ng pagkakaroon ng tinatawag na “Mixture of Cotton MDMA” o ecstasy.

Agad na dinala ang mga representative samples mula sa mga tableta na itinurn-over sa PDEA para isailalim sa chemical laboratory analysis, kung saan nakumpirma na ang mga naturang tableta ay Methylenedioxymethamphetamine o ecstasy.

Isang warrant of arrest para sa indibidwal na responsable sa shipping at importation ng contraband items ang inisyu ng mga awtoridad dahil sa paglabag nito sa Comprehensive Dangerous Drugs Act of 2022, at Customs Modernization and Tariff Act.

Nitong Sabado ng gabi, isang entrapment operation ang isinagawa ng joint elements ng PDEA, CAIDTF, ESS, at CIIS sa isang Evelyn Sotto na umano package consignee na residente ng Tandang Sora, Quezon City.

Nagpanggap ang mga undercover operatives na mga empleyado ng isang courier company kung saan ide-deliver ang package na naglalaman ng party drugs.

Ayon sa PDEA-Region 3, nagresulta ang operasyon sa pagkakaaresto kay Jennifer Abas na umano’y gumagamit ng pangalang Evelyn Sotto bilang pseudonym.

Inaresto rin si Genevie Abas na katuwang naman ng consignee sa pagtanggap ng parcel.

Ang mga nakumpiskang ilegal na droga ay nai-turn-over na sa PDEA para sa proper disposition, habang ang mga suspek ay nakatakda naman sa inquest proceedings at nahaharap sa pormal na reklamo dahil sa paglabag sa Section 4 ng Comprehensive Dangerous Drugs Act of 2002.

P30 milyon halaga ng pekeng gamot, nasabat ng BOC; suspek arestado

ni Jasmin Joy Evangelista | January 12, 2022

Nahuli ng Bureau of Customs (BOC) ang suspek na nagbebenta ng halos 30 milyong halaga ng pekeng mga gamot tulad ng Biogesic, Neozep, Bioflu, Immunpro, Ivermectin, Phenokinon F Injection, Medicol, Planax, Alaxan FR, MX3, at iba pa noong Enero 5.

Kasama ng BOC sa nasabing operasyon ang Philippine Drug Enforcement Agency (PDEA), National Intelligence Coordinating Agency (NICA), Intelligence Service Armed Forces Of the Philippines (ISAFP), at Philippine Coast Guard (PCG).

Sinabi ng Customs na kinumpirma ng Food and Drug Administration (FDA) at Unilab Pharmaceuticals na peke ang mga gamot.

Nakalagay ang mga pekeng gamot sa isang karton na may Chinese characters at natagpuan sa dalawang storage sa 7434B at 7434C Highland St., Marcelo Green Village at 27 Pearl St., Severina Subdivision, Km 18, Brgy. Marcelo, Paranaque City.

Kinilala ang suspek na si Adel Rajput, isang Pakistani national, 31 taong gulang at residente sa Caloocan City.

Dinala si Adel Rajput sa Paranaque City Prosecutors' Office para i-inquest at nahaharap sa mga kasong violation of Sec. 1401 (Unlawful Importation/Exportation), Sec. 1113 (Property Subject to Seizure and Forfeiture) paragraph (l) (5) in relation to Sec. 118 (Prohibited Importation and Exportation) paragraph (e) of the CMTA, and the violation of Republic Act No. 8293 (Intellectual Property Code of the Philippines and its Pertinent Rules and Regulations).

Ang visa ng suspek ay sasailalim sa revocation process sa Bureau of Immigration.

“We received reports about the presence of counterfeit items. It’s not just items, but medicines. We acted on this immediately because this can pose a health threat. They are selling these to unsuspecting people whose only hope is to buy authentic medicines for themselves and their loved ones,” ani Raniel Ramiro, Customs Deputy Commissioner of Intelligence Group.

Ang mga nakumpiskang pekeng gamot ay dinala sa BOC para sa imbestigasyon at inventory.

Noong Nov. 24, 2021, nakumpiska rin ng BOC ang mga pekeng gamot sa isang warehouse sa Pasig City kabilang ang Alaxan, Tuseran Forte, Propan, at Diatabs na nagkakahalagang P50 milyon.