Bulkang Taal, ibinaba na sa Alert Level 2

ni Ronalyn Seminiano Reonico | July 24, 2021

Ibinaba na sa Alert Level 2 (decreased unrest) ang volcanic status ng Bulkang Taal mula sa Alert Level 3 (magmatic unrest), ayon sa tala ng Philippine Institute of Volcanology and Seismology (PHIVOLCS).

Ayon sa Taal Volcano Bulletin ng PHIVOLCS, naitala ang 3 volcanic earthquake at mahinang background tremor sa bulkan sa nakalipas na 24 oras na pagmamanman simula alas- 5:00 AM kahapon hanggang alas-5:00 nang umaga ngayong araw.

Patuloy pa ring naglalabas ng mataas na lebel ng volcanic sulfur dioxide (SO2) at steam-rich plumes ang Bulkang Taal na umaabot sa taas na 900 meters mula sa main crater nito.

Saad ng PHIVOLCS, “DOST-PHIVOLCS reminds the public that at Alert Level 2, sudden steam or gas-driven explosions, volcanic earthquakes, minor ashfall, and lethal accumulations or expulsions of volcanic gas can occur and threaten areas within and around Taal Volcano Island (TVI).”

Patuloy pa ring ipinagbabawal ng PHIVOLCS ang “Pagpasok sa TVI, lalo na sa main crater at Daang Kastila fissures, pamamalagi sa lawa ng Taal, at paglipad ng anumang aircraft malapit sa tuktok ng bulkan.”

95 pagyanig dahil sa Bulkang Taal, naitala

ni Ronalyn Seminiano Reonico | July 23, 2021

Naitala ng Philippine Institute of Volcanology and Seismology (PHIVOLCS) ang 95 volcanic earthquakes sa Bulkang Taal kabilang ang 68 volcanic tremors na may habang 1 hanggang 17 minuto sa nakalipas na 24 oras na pagmamanman simula alas-5 nang umaga kahapon hanggang alas-5 AM ngayong araw.

Patuloy pa ring naglalabas ng volcaninc sulfur dioxide at steam-rich plumes ang Bulkang Taal na umaabot sa taas na 900 metro mula sa main crater nito bago mapadpad patungo sa hilagang silangan at silangan.

Patuloy namang nakataas sa Alert Level 3 ang bulkan at ayon sa PHIVOLCS, “Sa kalagayang ito, ang magma na nanunuot sa main crater ay maaaring magdulot ng malakas na pagsabog.

“Pinaaalalahanan ng DOST-PHIVOLCS ang madla na ang Taal Volcano Island o TVI ay isang PERMANENT DANGER ZONE (PDZ) at pagpasok sa TVI at high-risk barangays ng Agoncillo at Laurel ay dapat na maigting na ipagbawal dahil sa panganib ng pyroclastic density currents at volcanic tsunami kung sakaling magkaroon ng malakas na pagputok.”

Pansamantala ring ipinagbabawal ng ahensiya ang lahat ng aktibidad sa Taal Lake at nagbabala rin ang PHIVOLCS sa mga residente sa paligid nito na mag-ingat sa posibleng ashfall at vog at maging handa sa posibleng evacuation kapag lumala ang aktibidad ng bulkan.

35 pagyanig dahil sa Bulkang Taal

ni Ronalyn Seminiano Reonico | July 22, 2021

Nakapagtala ang Philippine Institute of Volcanology and Seismology (PHIVOLCS) ng 35 volcanic earthquakes sa Bulkang Taal sa nakalipas na 24 oras na pagmamanman simula alas-5:00 nang umaga kahapon hanggang alas-5 AM ngayong Huwebes at nananatiling nakataas ang Alert Level 3.

Kabilang sa naitalang 35 volcanic earthquakes ang 17 tremors na may habang 1 hanggang 49 minuto.

Patuloy pa ring naglalabas ng volcanic sulfur dioxide (SO2) ang Bulkang Taal at nakapagtala ang PHIVOLCS ng 5,286 tonelada noong Sabado.

Umaabot naman sa 900 metro ang taas ng steam-rich plumes mula sa main crater ng bulkan bago mapadpad sa silangan dulot ng upwelling ng mainit na volcanic gas.

Samantala, patuloy na ipinagbabawal ng PHIVOLCS ang “Pagpasok sa Taal Volcano Island o TVI at high-risk barangays ng Agoncillo at Laurel, pamamalagi at paglaot sa lawa ng Taal, at paglipad ng anumang aircraft malapit sa tuktok ng bulkan.”

Saad pa ng PHIVOLCS, “Ang Alert Level 3 (Mataas na aktibidad) ay kasalukuyang nakataas sa Taal Volcano. Sa kalagayang ito, ang magma na nanunuot sa main crater ay maaaring magdulot ng malakas na pagsabog.”