Bulkang Taal nakapagtala ng dalawang mahinang pagsabog ngayong araw

ni Jasmin Joy Evangelista | March 27, 2022

Nagkaroon ng dalawang mahinang phreatomagmatic eruptions ang Bulkang Taal kaninang madaling araw, ayon sa Philippine Institute of Volcanology and Seismology (PHIVOLCS).

"Nagkaroon uli po ng mga pagsabog na mga maliit lamang, between 400 to 800 meters ang taas ng plume, kaninang 4:34 at 5:04 ng umaga," ani PHIVOLCS director at Science Undersecretary Renato Solidum sa panayam ng Super Radyo dzBB.

"Pagkatapos po noon, wala pang sumunod. At pinapakita lang ng bulkan na ito pa rin ay posibleng magkaroon ng pagsabog kaya kailangang pag-ingatan," dagdag niya.

Ayon pa kay Solidum, posibleng may kasamang abo ang naturang dalawang minor eruption.

"Posibleng may kasamang abo 'yon pero dahil maliit lamang ay baka hindi na mapansin sa labas ng crater," aniya.

Kahapon, Sabado, ay itinaas sa Alert Level 3 ang Bulkang Taal dahil sa magmatic unrest.

Ito ay matapos na ang main crater ay nag-generate ng "short-lived phreatomagmatic burst" at 7:22 a.m which was "followed by nearly continuous phreatomagmatic activity that generated plumes 1500 m accompanied by volcanic earthquake and infrasound signals," ayon sa PHIVOLCS.

Sa ngayon ay mananatiling nakataas ang Alert Level 3 sa Bulkan.

"Sapat po sa kasalukuyan ang Alert Level 3," ani Solidum.

Sa website ng PHIVOLCS, nakasaad na ang ibig sabihin ng Alert Level 3 ay: "magma is near or at the surface, and activity could lead to hazardous eruption in weeks. Danger zones may be expanded up to eight (8) kilometers from the active crater.”

Sinabi rin ni Solidum na posibleng ibaba sa Alert Level 2 ang Bulkang Taal kung hihinto ang mga pagsabog at bababa ang parameters.

"Kung may pag-akyat ng magma at umaangat ang island at dumadami ang volcanic earthquakes, kung nakikita natin 'yan, puwedeng tumaas sa alert level 4," aniya.

Hindi naman aniya kasinlakas ng pagsabog noong January 2020 ang mga naitalang eruptions ngayon dahil mabagal lamang ang galaw ng magma.

"Compared sa January 2020 eruptions na ang mga pagsabog ay napaka-explosive, itong nangyari last year at ngayon, ang magma na umakyat sa Taal ay mabagal ang kilos at may time na mai-release ang sulfur dioxide na kasama ang magma. Hindi nagkaroon ng masyadong pressure," paliwanag pa niya.

PCG naka-heightened alert matapos isailalim sa Alert Level 3 ang Bulkang Taal

ni Jasmin Joy Evangelista | March 26, 2022

Naka-heightened alert ngayon ang Philippine Coast Guard (PCG) matapos isailalim sa Alert Level 3 ang Bulkang Taal.

Ito ay ipinag-utos ni PCG Commandant Coast Guard Admiral Artemio Abu dahil sa phreatomagmatic burst ng bulkan bandang 7 a.m. ngayong araw.

Nag-dispatch na ng deployable reaponse group ang PCG Station sa Batangas upang i-monitor ang sitwasyon sa paligid ng bulkan.

Ipinag-utos din ni Abu sa PCG Sub-Stations sa Talisay at San Nicolas na magsagawa ng forced evacuation sa mga mangingisdabat fish cage workers sa Taal Lake.

Naka-standby na rin ang dalawang PCG trucks sa Batangas upang i-assist ang mga apektadong residente sa paglikas.

Ngayong araw ay itinaas ng PHIVOLCS sa Alert Level 3 ang status ng Bulkang Taal dahil sa magmatic unrest.

Ipinag-utos ng mga awtoridad ang agarang paglikas at ipinagbawal ang anumang aktibidad malapit sa bulkan.

Smog sa mga lugar sa Luzon, may bad effect sa kalusugan

ni Lolet Abania | August 18, 2021

Nakararanas ng matataas na volcanic smog o vog ang maraming lugar sa Luzon matapos na magbuga ng sulfur dioxide (SO2) ang dalawang nag-aalburotong bulkan, ang Taal Volcano at ang submarine volcano na Fukutoku-Okanoba ng Japan, ayon sa Department of Science and Technology - Philippine Institute of Volcanology and Seismology (DOST-PHIVOLCS).

Patuloy na naglalabas ng SO2 ang dalawang bulkan habang nananatiling madilim ang paligid dahil sa maitim at hazy ang hangin, kung saan magdudulot ito ng masamang epekto sa kalusugan.

Ang mga lugar na nakararanas ng vog ay Ilocos Norte, Ilocos Sur, La Union, Pangasinan, Abra, Apayao, Benguet kabilang na ang Baguio City, Ifugao, Kalinga, Mountain Province, Cagayan, Isabela, Nueva Vizcaya, Zambales, Pampanga, Bulacan, Bataan, Metro Manila, Cavite, Laguna, Batangas, Rizal, Quezon, Oriental Mindoro, Occidental Mindoro, Romblon.

Pinapayuhan naman ang publiko na manatili na lamang sa loob ng bahay para maiwasan ang masamang epekto ng vog.