Bulkang Taal, alert level 2 pa rin, pagyanig tuloy

ni Mary Gutierrez Almirañez | March 25, 2021

Nakapagtala ang Bulkang Taal ng 268 na volcanic earthquakes at 243 na volcanic tremor sa nakalipas na 24 oras, batay sa Philippine Institute of Volcanology and Seismology (PHIVOLCS) ngayong umaga, Marso 25.

Ayon pa kay Phivolcs Director Renato Solidum, “Kailangan pong gawin ay pag-ingatan ang aktibidad ng Taal, kasi sa Alert Level 2 ay ine-evaluate natin ang kanyang kondisyon, constantly. Posible naman po na magkaroon ng mga stream-driven o phreatic eruption at paglabas ng gas na delikado na sa mga tao kung sila ay nasa isla.”

Giit pa niya, “Kailangan din nating bantayan ang magma kung umuusad at lalabas ba talaga d’yan sa bulkan. Kung sakaling ito ay lalabas, tinitignan natin kung ito ba ay magiging explosive o ‘di kaya ay dahan-dahang magkakaroon lang ng lava.”

Sa nakalipas na araw ay kapansin-pansin ang dumaraming bilang ng volcanic earthquakes ngunit iginiit naman niyang iyon ay ‘by process’ at hindi dumidiretso.

Paliwanag pa niya, “Sa kasalukuyan po, nakikita natin na maliit pa lang po ang volume ng magma na nasa malapit sa ibabaw at hindi po tuluy-tuloy ang kilos kaya walang paglindol na nangyari nang mahabang oras.

Sa sitwasyon na ito, kung magpapatuloy at umusad muli ang magma, puwede naman ang magmatic eruption. Pero uulitin ko, ang magmatic eruption, puwede pong hindi explosive, puwede ring explosive.

Dahil sa maliit pa ang volume na ating nakikita, hindi pa natin nakikita ‘yung kasingtulad pa nu’ng 2020. Mangyayari po ito na maging explosive kung may umusad na bagong magma sa ilalim at mag-resupply. Iyon po ang babantayan natin.” Sa ngayon ay nananatili sa Alert Level 2 ang Bulkang Taal.

Ipinaliwanag din ni Solidum na hindi lamang ang bilang ng volcanic earthquakes ang dapat tignan, pati na rin ang pamamaga ng bulkan sapagkat hindi ito katulad nu’ng mga nakaraang aktibidad ng Taal na halatang namamaga.

Ang importante sa alert level, aniya, ay ang corresponding action na ginagawa ng mga residente at kung sakaling magkaroon ng stream driven explosion ay mas ligtas umano sapagkat wala nang mga tao sa paligid ng bulkan dahil maaga silang nakalikas.

2,015 beses na pagyanig ng Bulkang Taal, naitala mula Pebrero

ni Lolet Abania | March 24, 2021

Nagbabala ang Philippine Institute of Volcanology and Seismology (Phivolcs) sa publiko matapos na magtala ang Bulkang Taal ng tinatawag na ‘increase seismic activity’ na posibleng magdulot ng magmatic eruption ng bulkan.

Sa isang bulletin na inilabas ngayong Miyerkules, simula noong Pebrero 13, nakapagtala ang Phivolcs ng kabuuang 2,015 volcanic tremors, 734 low-frequency volcanic earthquakes at 18 hybrid earthquake events.

Ayon sa Phivolcs, isang "harmonic tremor associated with magma migration" ang nangingibabaw na klase ng lindol simula noong March 19 na siyang nagaganap sa Bulkang Taal at sa paligid nito.

"Most earthquake events occurred at shallow depths of (less than) 2 kilometers although some large earthquakes were generated in the deeper 2-6 kilometers region beneath the Taal Volcano Island (TVI) edifice," ani Phivolcs.

"Overall seismic energy release has markedly increased since yesterday afternoon compared to previous seismic swarms," dagdag pa ng ahensiya. Iniulat din ng ahensiya na noong nakaraang linggo, napakataas ng inilalabas na sulfur dioxide gas ng bulkan na umabot na sa 1,184 tons kada araw gaya nitong Linggo.

Sinabi pa ng Phivolcs na ang mga parameter na ito ay nagpapahiwatig na posibleng magkaroon ng magmatic eruption. "Ground deformation of TVI and the Taal Caldera region in general has remained steady and at slight inflationary trends since February 2021," ani Phivolcs.

"The above parameters indicate that magma has been migrating across shallow depths beneath TVI, increasing the possibilities of magmatic eruption," paliwanag ng ahensiya.

Nananatili naman sa Alert Level 2 ang Taal Volcano o "increased unrest." Naglabas na rin ng rekomendasyon ang Phivolcs na ang pagpasok sa Taal Volcano Island, Taal’s Permanent Danger Zone o PDZ, lalo na sa bisinidad na malapit sa Main Crater at sa Daang Kastila fissure, at mga residente, gayundin ang pamamangka sa Taal Lake ay mahigpit na ipinagbabawal.

"Local government units are advised to continuously assess and strengthen the preparedness of previously evacuated barangays around Taal Lake in case of renewed unrest," pahayag ng ahensiya.

"Civil aviation authorities must advise pilots to avoid flying close to the volcano as airborne ash and ballistic fragments from sudden explosions and wind-remobilized ash may pose hazards to aircraft," dagdag pa ng Phivolcs.

Bulkang Taal, naka-Alert Level 2, mga ililikas, bawal magsiksikan

ni Mary Gutierrez Almirañez | March 10, 2021

Ipinahahanda na ng Batangas City ang masterlist ng mga pamilyang ililikas sa evacuation center bilang preparasyon sa posibleng pagsabog ng Bulkang Taal, ayon sa pahayag ni Disaster Risk Reduction and Management Officer Rod dela Roca kaninang umaga, Marso 10.

Aniya, ang mga bayan ng San Pascual, Bauan at Batangas City ay puwedeng maging takbuhan ng mga residenteng maaapektuhan ng pagsabog, habang ang mga ililikas naman sa eskuwelahan ay 6,500 katao lamang ang maaaring tanggapin para maiwasan ang pagsisiksikan dahil 600 classrooms lamang mayroon ang paaralan.

Iginiit din niyang dadaan muna sa medical ang lahat ng mag-e-evacuate at hindi sila basta magpapapasok sa evacuation center sapagkat kailangan pa ring masunod ang health protocols. Sakaling may makitang sintomas o positibo sa COVID-19 ay kaagad na ididiretso ang indibidwal sa isolation facility.

Sa ngayon ay nananatili sa Alert Level 2 ang Bulkang Taal matapos makapagtala ng 51 na pagyanig kada isa hanggang 4 na minuto sa nakalipas na 24 oras. Mahigpit pa ring ipinagbabawal ang paglapit sa main crater nito.