29 volcanic quake sa nakalipas na 24-oras, naitala sa Bulusan Volcano — PHIVOLCS

ni Lolet Abania | June 6, 2022

Umabot sa kabuuang 29 volcanic earthquakes ang na-monitor sa Bulusan Volcano sa Sorsogon sa nakalipas na 24 oras, ayon sa Philippine Institute of Volcanology and Seismology (PHIVOLCS) ngayong Lunes.

Sa kanilang 5AM volcano bulletin, sinabi pa ng PHIVOLCS na ang phreatic eruption ay nai-record ng alas-10:37 ng umaga nitong Linggo na tumagal ng 17 minuto.

Ayon sa PHIVOLCS, ang plume mula sa crater ng Bulusan Volcano ay umabot ng hanggang 150 metrong taas saka pumailanglang patungong hilagang kanluran. Ani pa ng PHIVOLCS,

“The volcano edifice was also inflated.” Nananatili ring nakataas sa Alert Level 1 ang buong Bulusan Volcano. Ipinagbawal naman ng PHIVOLCS sa publiko, ang pumasok sa 4-kilometer-radius sa Permanent Danger Zone (PDZ) gayundin, hindi maaaring pumasok ng walang pag-iingat sa Extended Danger Zone (EDZ).

Ayon kay PHIVOLCS Director at Science Undersecretary Renato Solidum Jr., na ang danger zone sa Bulusan ay kanilang in-extend ng hanggang dalawa pang kilometro.

“Nagdagdag tayo ng dalawang kilometro sa southeast sector EDZ kasi doon sa side na ‘yun may mga bitak din ng mga nakaraang eruption na nagkaroon din ng pagsabog doon,” ani Solidum sa isang interview ngayong Lunes. Sinabi pa ni Solidum na may nai-record namang “steaming” mula sa northwest vent ng bulkan kung saan maaaring magkaroon din ng pagsabog.

Ang mga munisipalidad ng Juban, Casiguran, at Irosin ay apektado ng ashfall dahil sa Bulusan Volcano, ayon pa kay Solidum.

Nagbabala naman ang opisyal sa mga residenteng naninirahan malapit sa mga ilog sa posibleng pagkakaroon ng lahar, sakaling bumuhos ang malakas na ulan.

“’Yung mga bahay po na nasa gilid ng mga ilog, kapag maulan po ay puwedeng maanod ang mga abo na nadeposito sa gilid ng bulkan at magkaroon ng lahar kaya kailangan pag-ingatan din lalong-lalo na kung malakas ang ulan,” paliwanag ni Solidum.

14 hikers, na-rescue sa Mount Bulusan

ni Lolet Abania | June 5, 2022

Labing-apat na hikers mula sa Cavite, ang nailigtas ng mga awtoridad na nasa paanan ng Mount Bulusan nang sumabog ang naturang bulkan ngayong Linggo ng umaga.

Agad na rumesponde ang mga tauhan ng Municipal Disaster Risk Reduction and Management Office (MDRRMO) ng bayan ng Barcelona, Sorsogon sa lugar at tinulungan ang mga hikers na makaalis sa paanan ng bulkan.

Ayon kay Barcelona MDRRMO chief Leo Paul Ferreras, alas-11:00 ng umaga nitong Sabado, sinimulan ng mga hikers ang kanilang pag-akyat sa Mount Bulusan, kung saan nag-umpisa silang maglakad sa Barangay San Ramon.

Nabatid ng mga miyembro ng MDRRMO, ang sitwasyon ng mga hikers habang nagpapatrolya sa mga barangay na malapit sa bulkan, para pagsabihan ang mga residente na sila ay dapat nang magsilikas.

Bandang alas-10:37 ng umaga ngayong Linggo, naitala ang phreatic eruption o pagsabog ng Bulusan Volcano, ang unang pagputok simula noong 2017. Naging tahimik mula noon ang bulkan matapos ang eruption nito.

Ayon sa PHIVOLCS, dalawang bayan sa Sorsogon, ang Juban at Casiguran ay nakararanas na ng ashfall. Nai-report din ng local disaster authorities ng pagkakaroon ng ashfall sa tatlong barangay sa bayan ng Irosin. Sa ngayon, wala pang nai-report ang mga awtoridad sa kabuuang bilang ng mga residenteng nagsilikas.

Itinaas sa Alert Level 1.. Mount Bulusan sa Sorsogon, nag-alburoto — PHIVOLCS

ni Lolet Abania | June 5, 2022

Naitala ang pagsabog ng Mount Bulusan sa Sorsogon ngayong Linggo ng umaga, ayon sa Philippine Institute of Volcanology and Seismology (PHIVOLCS).

Agad na itinaas ng PHIVOLCS ang alert status ng Bulusan Volcano sa Alert Level 1 (low-level unrest) mula sa dating 0 (normal). “Alert Level 1 status is now raised over Bulusan Volcano, which means that it is currently in an abnormal condition,” pahayag ng PHIVOLCS.

Ayon kay PHIVOLCS Director at Science Undersecretary Renato Solidum Jr., naitala ang phreatic eruption ng alas-10:37 ng umaga at tumagal ng 16 minuto.

“Kanina, nagkaroon ng phreatic eruption ang Bulusan Volcano... ‘Yung pagsabog ay sanhi ng pagpapakulo ng tubig sa ilalim ng crater. Tumagal ito ng 16 minutes at patuloy natin itong sinusubaybayan,” sabi ni Solidum sa isang radio interview ngayong Linggo.

Sa isang bulletin kalaunan, na inisyu ng alas-11:40 ng umaga, sinabi ng PHIVOLCS na ang eruption ay tumagal ng humigit-kumulang sa 17 minuto, habang isang steam-rich grey plume na umabot sa isang kilometrong taas ang naobserbahan mula sa munisipalidad ng Juban, bago ito pumailanglang pakanluran.

“Hindi naman kataasan ang taas ng pagsabog. May mga maitim o dark gray na eruption cloud na nakikita na umuusli sa crater nito na hindi naman kataasan. Posible itong mangyari sa Bulusan (Volcano) na madalas magkaroon ng phreatic eruption,” saad ni Solidum.

“With the ongoing activity ng Bulusan, magtataas tayo ng Alert Level 1 [we will raise it to Alert Level 1],” sabi ni Solidum na aniya pa, napansin din nila na tumaas ang bilang ng volcanic earthquakes ng bulkan na umabot sa 77 beses sa magdamag.

Ayon pa sa PHIVOLCS, “a phreatic eruption refers to a steam-driven explosion that occurs when water beneath the ground or on the surface is directly heated by hot rocks or new volcanic deposits (e.g. pyroclastic density currents, lava) or indirectly by magma or magmatic gas.” Nakapagtala naman ng ashfall sa Juban at Casiguran, sabi ng PHIVOLCS.

Sa report ng Municipal Disaster Risk Reduction and Management Office (MDRRMO), apat na barangay sa Irosin ay nakaranas din ng ashfall. Paalala naman ni Solidum sa mga residente, dapat nang iwasan ang four-kilometer radius ng permanent danger zone dahil lubhang mapanganib sa nasabing lugar sa ngayon.

“Furthermore, people living within valleys and along river/stream channels especially on the southeast, southwest and northwest sector of the edifice should be vigilant against sediment-laden stream flows and lahars in the event of heavy and prolonged rainfall should phreatic eruption occur,” pahayag pa ng PHIVOLCS.