107 residente, lumikas matapos ang pagputok ng Bulkang Taal

by BRT @News | October 9, 2026

Photo: Courtesy Mayor Cindy Reyes

Lumikas ang 29 pamilya o 107 residente sa Agoncillo, Batangas, matapos ang bahagyang pagputok ng Bulkang Taal nitong Huwebes ng gabi, Oktubre 8.

Ayon sa Philippine Coast Guard (PCG), pansamantalang nanunuluyan ang mga evacuee sa socio-civic center sa Barangay Pansipit matapos maapektuhan ng ashfall ang mga barangay ng Bilibinwang at Banyaga.

Sinabi ng PHIVOLCS na tumagal ng limang minuto ang phreatomagmatic eruption na nagsimula alas-6:06 ng gabi. Umabot sa 4,000 metro ang taas ng ibinugang abo at usok.

Pinayuhan naman ng Department of Health ang publiko, lalo na ang may sakit sa paghinga, na umiwas sa abo.

Nananatili sa Alert Level 1 ang Bulkang Taal.

Ayuda para sa mga apektado ng Mayon, handa na — DSWD

ni Jeff Tumbado @News | May 4, 2026

Photo: DSWD

Inihayag ng Department of Social Welfare and Development (DSWD) na mahigit 300,000 family food packs at iba pang pangunahing pangangailangan ang nakaantabay para sa mga residenteng naapektuhan ng pag-aalburoto ng Bulkang Mayon.

Umabot na umano sa 301,311 family food packs ang nai-preposition hanggang alas-6 ng umaga kahapon para sa mga residente ng Albay na tinamaan ng makapal na ashfall mula sa bulkan.

Nakaantabay na rin ang 27,322 ready-to-eat food boxes at 15,156 non-food items na handa nang ipamahagi anumang oras.

Naglaan na rin ang DSWD ng P11,304,150 para sa emergency cash transfer, habang P28,305,450 naman ang inilabas para sa cash-for-work (CFW) program.

Ayon sa ahensya, mahigit 2,169 magsasaka na naapektuhan ng mga nakaraang aktibidad ng Bulkang Mayon ang nakatanggap ng tulong sa ilalim ng CFW program.

Phreatic eruption, naitala sa Bulkang Bulusan

ni V. Reyes | Apr. 29, 2025

Photo: Bulusan Volcano - Sorsogon PIO/Juban MDRRMO

Apektado ng ashfall ang ilang bayan sa Sorsogon kasunod ng phreatic eruption sa Bulkang Bulusan sa Sorsogon, Lunes ng umaga.

Ayon sa Sorsogon Provincial Information Office, partikular na apektado ng ashfall ang mga bayan ng Juban at Irosin.

Nabatid din mula kay Philippine National Police Region 5 Director Andre Dizon, na mahigit sa 100 indibidwal o 33 pamilya sa mga apektadong barangay ang inilikas na.

Sinasabing makapal na abo ang bumalot sa mga Barangay Puting Sapa at Buraburan sa bayan ng Juban habang katamtaman sa Brgy. Guruyan at iba pang barangay.

Inabisuhan na rin ang mga motorista na magdahan-dahan sa pagbiyahe sa mga kalsadang apektado ng ashfall.

Alas-4:36 ng madaling-araw nang maganap ang phreatic eruption sa Bulkang Bulusan na tumagal hanggang alas-5 ng madaling-araw.

Ang phreatic eruption ay ang pagbuga ng usok o steam bunga ng pag-init ng tubig sa ilalim ng lupa na nadikit o maaaring lumapit sa magma.

Sa impormasyon mula sa Philippine Institute of Volcanology and Seismology (PHIVOLCS), inabot ng hanggang 4.5 kilometro ang pagbunga mula sa bunganga ng bulkan.

Nakataas na ngayon ang Alert Level 1 (Low-level unrest) sa Bulkang Bulusan kasunod ng pagsabog.

Inabisuhan na rin ang mga lokal na pamahalaan at ang publiko na sundin ang pinaiiral na 4-kilometer radius permanent danger zone.

"Vigilance in the 2-kilometer Extended Danger Zone (EDZ) on the southeast sector must be exercised due to the possible impacts of volcanic hazards such as PDCs, ballistic projectiles, rockfall, avalanches and ashfall on these danger areas," dagdag pa ng PHIVOLCS.