3 concerned citizens, nagreklamo... Kongresista sa Bulacan, sinampahan ng kasong "vote-buying"

ni Zel Fernandez | April 30, 2022

Kinasuhan ng “vote buying” ang isang kandidato sa pagka-kongresista sa Bulacan, siyam na araw bago ang 2022 elections.

Tatlong concerned citizens ang nagsampa ng kasong paglabag sa Commission on Elections (Comelec) Election Code laban kay Congressional Candidate Jose Antonio Sy-Alvarado sa Office of the Provincial Prosecutor.

Ayon sa isa sa tatlong complainants na kinilalang si Alberto Domingo, saksi sila sa talamak umanong pamimili ng boto ng kandidato sa Brgy. Pungo, Calumpit, Bulacan noong Abril 12.

Paglalahad ng mga nagreklamo kay Alvarado, lumantad sila kasunod ng panawagan ni Pangulong Rodrigo Duterte at ng Bulacan Provincial government na dapat magkaroon ng malinis, tapat at matiwasay na halalan sa darating na Mayo 9.

Kaugnay nito, ang ihinaing reklamo ng mga testigo ay may kinalaman sa mas pinaigting pang “Multi- Sectoral Anti-Vote Buying Campaign” na inilunsad sa lalawigan upang bantayan ang anumang iregularidad sa kasagsagan ng eleksiyon.

Nagmiting sa Mandaluyong... 19 mayors, tiniyak ang ‘landslide win’ ni BBM sa Bulacan

ni Zel Fernandez | April 26, 2022

Sa isang post ng Partido Federal ng Pilipinas Facebook page noong Sabado, Abril 23, idineklara umano ng 19 na incumbent mayors at mayoralty candidates mula sa lalawigan ng Bulacan ang ‘landslide win’ ni presidential candidate Bongbong Marcos, Jr. sa kani-kanilang lugar sa 2022 national elections sa Mayo 9.

Sa pakikipagpulong ng mga Bulacan mayors kay Marcos sa kanyang punong-tanggapan sa Mandaluyong nitong Biyernes, ibinigay umano ng mga alkalde ang garantiya ng pagkapanalo nito sa darating na halalan bilang susunod na pangulo ng bansa.

Kaugnay nito, pormal ding iniabot ng mga lokal na opisyal ng Bulacan ang kanilang pinirmahang manifesto ng pagsuporta kay Marcos at sa running-mate nitong si vice presidential candidate Mayor Inday Sara Duterte.

"Sa amin po iisa lang ang message. Panalo na, kaya lang ‘di tayo puwedeng matulog. At the end of the day bantay pa rin," pahayag ni incumbent Guiguinto Mayor Ambrosio Boy Cruz, Jr., na siyang pangulo ng League of Municipalities of the Philippines-Bulacan Chapter.

Ayon pa sa naturang FB post, kabilang sa grupo ng mga mayor na dumalo sina Christian D. Natividad ng Malolos, Vergel Meneses ng Bulakan, Mayor Amboy Manlapaz ng Hagonoy at mayoral candidate Flordeliza Cruz-Manlapaz, Ferdie Estrella ng Baliuag, Francis Albert Juan ng Bustos, at Henry Villarica ng Meycauayan.

Kasama ring dumalo sina Ricardo Silvestre ng Marilao, Edwin Santos ng Obando at mayoralty candidate Esperanza Santos, Guiguinto mayoralty candidate Agatha Paula Cruz, Crispin Castro ng Pandi, Eladio Gonzales, Jr. ng Balagtas, Jose Santiago, Jr. ng Bocaue, Arthur Robes ng San Jose Del Monte City, Eric Tiongson ng San Miguel, Jocell Casaje ng Plaridel, Mary Ann Marcos ng Paombong, at ang kinatawan ni Norzagaray Mayor Ade Cristobal na si Leo Nicolas.

Dahil dito, malugod na pinasalamatan ni Marcos ang mga alkalde at mga kandidato sa pagka-alkalde sa kanilang pag-endorso, kasabay ng paggigiit ng pangangailangan sa mahigpit na pagbabantay sa darating na eleksiyon.

"Ako naman tuluy-tuloy pa rin ang lakad ko, pero mababawasan na dahil andito na tayo sa tinatawag na endgame," pahayag ni Marcos.

Samantala, kinumpirma naman ng chief-of-staff at tagapagsalita ni Marcos na si Atty. Vic Rodriguez na kanila nang sinimulan ang training program ng PFP para sa mga poll watchers, at nagde-deploy na rin ang partido ng mga fully-trained volunteers sa buong bansa.

Dagdag pa ni Bongbong, "Palabasin at hikayatin natin sila (mga botante sa Bulacan) upang bumoto. Iyan naman talaga ang isa sa pinakaimportante sa darating na eleksiyon.”

Gayundin, bagaman maganda umano ang datos ni Marcos sa probinsiya, ayon sa ulat ng mga Bulacan mayors, mahigpit pa rin nitong paalala na maging mapagmatyag upang masawata ang mga magtatangkang manipulahin ang resulta ng 2022 elections sa lalawigan.

Pahayag naman ni Cong. Rida Robes ng nag-iisang distrito ng Lungsod ng San Jose Del Monte na nakipagpulong kay Marcos, "Alam natin kung ano ang kailangan ng tao. You have a good heart. You can really lead the country. All we have to do is support you, to let the people vote for you. For all of us here in our own districts, we have to make this campaign real."

Ilan sa mga dumalo sa campaign rally ng Uniteam sa Bulacan, nawalan ng wallet at cellphone

ni Jasmin Joy Evangelista | March 9, 2022

Ilan sa mga dumalo sa campaign rally ni presidential aspirant Ferdinand “Bongbong” Marcos Jr. sa Sta. Maria, Bulacan ang umakyat sa stage upang ianunsiyo ang nawalang cellphone at wallet at nakiusap na maibalik ang mga ito.

Matapos ang rally noong Martes ng hapon, umakyat ang isang lalaki sa stage at nakiusap na maibalik ang kanyang cellphone.

"Parang awa niyo na po, pakisauli na lang po, babayaran ko po. Please lang po," pakiusap ng lalaki.

Umakyat din sa stage ang isang overseas Filipino worker upang ipanawagan ang Nawala niyang wallet. Sinabi nito na kailangan niya ang mga identification card na laman nito at ayos lang kahit hindi maibalik ang laman nitong pera.

"Hello po, sino po nakakita ng wallet? May OFW ID po 'yun, pakisauli na lang po... Kailangang-kailangan ko po 'yun, kahit hindi na sauli 'yung pera," aniya.

Sa ngayon ay wala pang pahayag ang kampo ni BBM hinggil sa insidente.