20 outage incidents, naitala sa Halalan 2022 – Meralco

ni Lolet Abania | May 9, 2022

Nakapagtala ang Manila Electric Co. (Meralco), ang pinakamalaking power distributor ng bansa, ng tinatayang 20 outage incidents sa kanilang mga franchise area ngayong Halalan 2022, Mayo 9.

“We have so far recorded 20 outage incidents, most of which were isolated troubles,” ayon sa Meralco sa isang statement, at dagdag pang pahayag nito, “outages were immediately addressed and restored accordingly.”

Batay sa Meralco ang mga apektadong sites ay ang mga sumusunod:

• Metro Manila: Sta. Ana, Sta. Mesa, at Tondo sa Manila, Valenzuela City, Batasan sa Quezon City, at Talon sa Las Piñas City

• Cavite: Cavite City, Naic, at Amadeo

• Batangas: Batangas City

• Bulacan: Hagonoy, San Francisco, San Jose del Monte

• Rizal: Antipolo at Cainta

“As of 12 noon, power has been fully restored in all affected areas,” saad ng Meralco.

“[It would be on] full alert until the conclusion of the elections,” ani power distributor.

“Our crew, field personnel and customer care groups immediately respond to calls from election officers,” sabi pa ng kumpanya.

Samantala, ang National Electrification Administration (NEA) ay nakapag-record naman ng 201 power interruptions sa buong bansa mula alas-4:00 ng madaling-araw hanggang alas-11:00 ng umaga ngayong Mayo 9.

Batay sa kanilang power monitoring report para sa national at local elections hanggang alas-11:00 ng umaga, ayon sa NEA may kabuuang 201 interruptions ang nai-record nationwide, na may average duration ng 70 minuto.

May kabuuang 1,456 barangay — 437 sa Luzon, 251 sa Visayas, at 768 sa Mindanao - ang apektado ng power interruptions na naitala mula alas-4:00 ng madaling-araw hanggang alas-11:00 ng umaga.

Paalala naman ng Meralco sa mga volunteers na nakatalaga sa mga polling precincts at para maiwasan ang insidente ng overloading, “not to bring additional appliances like electric fans and electric kettles.”

“Nonetheless, our customers can rest assured that we have contingency measures in place so that we can immediately address any emergency and trouble,” sabi ng Meralco.

“We have more than 270 generator sets and more than 500 flood lights ready to be deployed,” dagdag ng kumpanya.

Sakop ng franchise area ng Meralco ang 36 lungsod at 75 munisipalidad, kabilang na ang Metro Manila, ang mga lalawigan ng Rizal, Cavite, Bulacan, at ilang portions ng mga probinsiya ng Pampanga, Batangas, Laguna, at Quezon.

Mga botante, nabahala... Brownout sa Valenzuela at Palawan ngayong Halalan 2022

ni Zel Fernandez | May 9, 2022

Sa kasagsagan ng eleksiyon ngayong araw sa buong bansa, magkahiwalay na insidente ng brownout ang kinumpirma ng Valenzuela PIO at Palawan Electric Cooperative.

Ayon sa ulat, nawalan umano ng kuryente sa T. De Leon Elementary School dahil sa transformer problem.

Kaugnay nito, sinubukan umanong gamitin ang mga VCM batteries kasabay ng brownout na nangyari sa General Tiburcio De Leon Elementary School.

Kagyat namang rumesponde ang mga tauhan ng MERALCO at ang City Engineers Office upang ayusin ang insidente ng power interruption na nakaantala sa ginaganap na halalan sa naturang presinto ng Valenzuela.

Samantala, nakaranas din umano ng pagkawala ng kuryente sa mga bayan ng Aborlan, Narra at Puerto Princesa, Palawan ngayong araw ng halalan, simula alas:7:30 ng umaga.

Apektado ng naturang brownout ang Brgy. Malinao hanggang Brgy. Dumangueña at ang Brgy. Jose Rizal sa Aborlan, sakop ng DMCI-Aborlan Recloser hanggang Brgy. Tagbarungis, Puerto Princesa City.

Kasalukuyan nang tinutukoy ng PALECO ang sanhi ng pagkawala ng kuryente sa mga nabanggit na lugar sa Palawan.

Mga polling precincts, iniinspeksiyon na... NEA: 'Walang brownout sa eleksiyon'

ni Zel Fernandez | May 3, 2022

Tiniyak ng National Electrification Administration (NEA) na hindi umano magkakaaberya ang suplay ng kuryente sa mga polling precincts sa gaganaping eleksiyon sa darating na Mayo 9.

Pagbabahagi ng NEA, ongoing ang isinasagawang pag-iinspeksiyon ng mga electric cooperatives sa mga silid-aralan sa iba’t ibang bahagi ng bansa na gagamitin bilang presinto ngayong nalalapit na 2022 elections.

Paniniguro ng NEA, ginagawa nito ang lahat upang maiwasan ang brownout o ang pagkakaroon ng power outage sa kasagsagan ng halalan sa bansa.

Gayundin, mayroon na umanong mga nakalatag na plano ang mga electric cooperatives bilang tugon sa hindi inaasahang emergency power interruption sa kalagitnaan ng isasagawang botohan.

Ang pahayag ng NEA ay bilang tugon sa pagkabahala ng mga botante na posible umanong gamiting daan sa pandaraya ngayong eleksiyon ang pagkawala ng kuryente sa panahon ng halalan sa bansa.