Hahawiin ni Llover ang Panama sa daan ng world title fight

ni Gerard Arce @Sports News | August 16, 2025

Photo: Kanino kayo pabor, kay Pinoy Llover o kay Panamanian Luis sa bakbakan nila bukas? Abangan.    

Magmamarka ng sariling daan patungo sa karangalan ang puntiryang makamit ni undefeated Pinoy rising star Kenneth “The Lover” Llover na naghahandang sumabak sa inaasam na world title fight sa hinaharap oras na madispatsa ang isa sa kasalukuyang hadlang na si dating 2-division champion Luis “El Nica” Concepcion ng Panama sa 10-round non-title fight bukas sa Winford Resort and Casino sa Maynila.

Abang na lamang sa magaganap na kaganapan ang fighting pride ng General Trias, Cavite na habol ang umangat sa world rankings, higit na sa International Boxing Federation (IBF) belt. “Ang nakikita ko is yung IBF, kase malapit-lapit yung ranked ko dun, kaya anytime pwede tayong lumaban para sa title eliminator,” pahayag ni Llover sa harap ng media at reporters kahapon sa ginanap na Press Conference sa Winford Resort and Casino.

WORLD title fight ang tatrabahuhin ni undefeated Pinoy rising star Kenneth “The Lover” Llover (pang-4 mula kaliwa) vs. two-division champion Luis “El Nica” Concepcion nang humarap sa media kahapon para sa 10-round non-title fight bukas sa Winford Resort and Casino sa Maynila. (Gerard Arce) 

“Isang malaking pagkakataon sa career ko na aakyat si Junto Nakatani, then talagang nakikita kong magkakaharap kami ni (Tenshin) Nasukawa, kaya sabi nga eh magandang bakbakan ito kase hinahamon nila kami sa Japan nu'ng last fight ko, pero sabi ko kumuha muna sila ng belt then let’s get it on,” dagdag ni Llover kasama rin sa press conference sina head coach Dindo Campo, batikang strength and conditioning coach Alex Ariza, dating 2-division World champion at boxing promoter Gerry Penalosa, Concepcion head coach Hector Rangel, Winford President at CEO Jeffrey Evora, Director ng Public Relations ng Playtime na si Krizia Cortez at Kameda Promotions General Manager Satoshi Shima.

Nais sundan ni Llover (14-0, 9 KOs) ang impresibong first round stoppage laban kay Japanese boxer Keita Kurihara para mapanatili ang Orient-Pacific Boxing Federation (OPBF) title belt habang nais ding mapataas ng southpaw ang puwestuhan sa world rankings sa The Ring sa No.10 at No.14 sa WBC.

Tatag at tibay ni Llover 'di patitibag kay El Nica

ni Gerard Arce @Sports News | August 14, 2025

Photo: Kenneth “The Lover Boy” Llover vs Luis Concepcion - FB-RPTV

Panigurong masusubok ang katatagan at tibay ni Pinoy boxing rising sensation Kenneth “The Lover Boy” Llover na matutunghayan ng mga tagasubaybay na Pinoy kontra sa dating two-division champion Luis “El Nica” Concepcion ng Panama para sa 12-round sa darating na Linggo Agosto 17 sa Winford Resort and Casino sa Maynila.

Hindi matatawaran ang mga taong gumagabay sa karera sa pro-boxing ng 22-anyos mula General Trias, Cavite sa likod nina dating two-division World champion at boxing promoter Gerry Penalosa at batikang strength and conditioning coach Alex Ariza, habang tutok sa kabuuan ng ensayo si head coach Dindo Campo upang makuha ni Llover ang pinakaasam na tagumpay at unang suntok sa world title.

Masusukat ang matinding preparasyon at paghahanda ng unbeaten na si Llover (14-0, 9KOs) sa agresibo at puwersang mga suntok ni Concepcion (40-11, 29 KOs), na itinuturing na pinakamakinang na boksingerong makakatapat ng Pinoy boxer. Minsan ng humawak ng mga korona ang Panamanian boxer sa parehong flyweight at super-flyweight division, kaya’t panigurong masusukat ang kahusayan ng batang boksingero.

“Sa hangin ko naman masasabi kong 101% naman talaga gawa ng sa training nga. Hindi rin talaga ako nagpapabaya siyempre of course lalo’t andiyan 'yung mga pioneer ko sina boss Gerry Penalosa at sir Alex Ariza, talagang ipinupush niya ako sa training na parang imposible pero nagiging posible,” pahayag ni Llover.

Nais sundan ni Llover ang impresibong first round stoppage laban kay Japanese boxer Keita Kurihara para mapanatili ang Orient-Pacific Boxing Federation (OPBF) bantamweight title nitong nagdaang Marso 24 sa Korakuen Hall sa Tokyo, Japan, habang nais mapataas ng southpaw ang kanyang puwestuhan sa world rankings sa No.9 sa The Ring at International Boxing Federation (IBF) 118-pound belt na kapwa hawak ni undefeated Japanese boxer Juntp Nakatani.       

Panalo ni Ancajas vs. Casero pagkasa sa world title fight

ni Gerard Arce @Sports News | August 4, 2025

Photo: Ang dikdikang bakbakan nina Jerwin Ancajas at Ruben Dario Casero na pagsapit sa Round 4 ay dumurugo na ang kanang sentido ng Uruguayan dahil sa accidental headbutt. (screenshotpix)

Matamis na pagbabalik sa U.S. ang naging tagumpay ng dating world champion na si Jerwin “Pretty Boy” Ancajas matapos daigin si Uruguayan boxer Ruben Dario “El Mariachi” Casero sa bisa ng majority decision sa 8th-round super-bantamweight bout kahapon (oras sa Pilipinas) sa Thunder Studios sa Long Beach, California. 

Nagamit ng kaliweteng tubong Panabo City, Davao del Norte ang masistemang pamamaraan kontra Uruguayan boxer upang kontrolin ang takbo ng laban upang makita ng dalawang hurado ang 80-72 at ang nakadidismayang 76-76 na desisyon ng isang hurado para sa ikatlong sunod na panalo ni Ancajas.

Bumira ng epektibong mga banat na kumbinasyon sa katawan at mukha si Ancajas upang mahigitan ang katunggali upang tuluyang talunin ang 32-anyos na tubong Colonia, Uruguay at tapusin ang mahigit 6 na buwang paghihintay para sa dating super-flyweight world titlist.

Dahil sa panibagong panalo ay lalapit sa panibagong tsansa sa world title fight ang 33-anyos na southpaw na nasundan ang panalo kontra kababayang si Richie Mepranum sa bisa ng second round knockout, na muling binubuhay ang karera matapos ang dalawang beses na pagkabigo para sa panibagong world title belt.

“Mag-uusap kami ulit ni sir Sean (Gibbons). Big fight na daw (ang susunod na laban). Sana world title fight,” pahayag ng trainer at manager ni Ancajas na si Joven Jimenez sa panayam ng Bulgar Sports kahapon na dismayado man sa iniskor ng isang hurado ay nirerespeto na lamang ito. “Hindi. Pero ‘yun ang tingin ng isang judge tanggapin na lang.”

May pagkakataong makatapak muli sa world championship ang 5-foot-6 boxer na minsang nabigo sa pagkuha ng world title fight para sa dating korona na International Boxing Federation (IBF) 115-pounds kontra Fernando Daniel Martinez ng Argentina at Japanese Takuma Inoue para sa bakanteng World Boxing Association (WBA) bantamweight title.  

Umaasang mahahanapan ng panibagong world title o interim title fight si Ancajas na napapabilang sa No.5 sa World Boxing Organization (WBO), No.6 sa IBF, at No.8 sa WBA, na pare-parehong tangan ni reigning undisputed 122-lbs champion Naoya “The Monster” Inoue. “Jerwin needs to come out of it with a win, and then we’re looking at a world title fight in his next fight. At 33, he doesn’t have time to waste, but if he wins the fight, he’s in line for an IBF or WBA (title fight),” wika ni Gibbons, na  President ng MP Promotions at kinikilalang international matchmaker, sa isang report bago ang laban.