Ancajas, bagong kampeonato ang kursunadang banatan

ni Gerard Arce @Sports | June 9, 2023

Pagsisikapan ng husto ni dating super-flyweight World champion Jerwin “Pretty Boy” Ancajas na muling makasungkit ng kampeonato sa bagong kategorya na bantamweight division na siksik ang kondisyon katulong ang renowned strength and conditioning coach na si Angel “Memo” Heredia.

Matapos maging pangunahing problema sa magkasunod na pagkatalo laban kay reigning International Boxing Federation (IBF) 115-pound champion Fernando “Pumita” Martinez ng Argentina ang kanyang timbang, kinakitaan ng panibagong sigla at lakas ang 31-anyos mula Panabo, Davao de Norte na masiglang bumabanat sa ensayo at sparring sessions kasama sina head trainer at manager Joven Jimenez at Mexican trainer Heredia.

“Nagustuhan namin si coach Memo dahil high energy palagi siya. Gaganahan talaga ang boxer at pinapaliwanag niya lahat ang ginagawa kung ano ang purpose,” paliwanag ni Jimenez.

Nakatakdang sumuntok muli ang 5-foot-5 southpaw laban sa hindi pa pinapangalanang kalaban sa undercard battle nina undefeated Filipino boxer Jade “Hurricane” Bornea at Martinez sa Minnesota sa U.S. sa Hunyo 24.

“Sa ngayon po maganda ang condition niya at gusto niya ang laban na timbang ngayon. Ganitong panahon noon ay hirap na hirap na siya, pero ngayon naghuhubad ng t-shirt kapag nag-eensayo,” ani Jimenez na kasalukuyang nagsasanay sa Las Vegas, Nevada kasama ang iba pang Filipinong boksingero na kinabibilangan nina Jonas “Zorro” Sultan at dating World challenger Vincent “Asero” Astrolabio.

Sakaling manaig sa mga darating na laban sa 118-lbs si Ancajas ay mabibigyan ito ng pagkakataon na makalaban sa World title, matapos mapabilang ito sa No.8 ranked sa IBF at World Boxing Association (WBA). Kasalukuyang hinahawakan din ito ng MP Promotions ng nag-iisang eight-division World champion Manny “Pacman” Pacquiao at ni president at international matchmaker Sean Gibbons.

Jerusalem, dedepensahan ang WBO crown vs. Collazo sa U.S.

ni Gerard Arce @Sports | April 22, 2023

Puspusan sa pagsasanay at nalalapit ng makuha ang inaasam na kondisyon ni reigning at defending World Boxing Organization (WBO) minimumweight champion Melvin “Gringo” Jerusalem bilang preparasyon sa kanyang nalalapit na laban kontra undefeated Puerto Rican Oscar “El Pupilo” Collazo sa Mayo 27 sa California sa Estados Unidos.

Puspusang nagsasanay si Jerusalem (20-2, 12KOs) sa Zip Boxing Gym sa Banawa, Cebu City kasama ang kanyang head coach na si Michael Domingo, kasamang nag-sparring sina reigning Oriental and Pacific Boxing Federation light-flyweight titlist Joey Canoy at utol ni dating World challenger Jeo “Santino” Santisima na si Gabriel.

Inilahad ni Domingo ang ginawang pagsasanay ng kanilang koponan sa Japan, kung saan naka-ensayo nila sina amateur boxer Kiyoto Narukami at dating WBO world light-flyweight at flyweight champion Kosei Tanaka nitong nagdaang Marso.

“So far so good naman yung training niya and nasa 70-80% na rin kami sa nagagawa naming sparring,” pahayag ni Domingo, na dating may tangan ng WBO oriental bantamweight title at national champion. “Mga three weeks pa kami dito sa Cebu, tapos babalik ulit kami ng Japan para sa aming one-month training.”

Pinag-aaralan ring lumipad ang mga ito patungong Estados Unidos upang makapagsanay kasama sina world title challenger Jade Bornea at dating long-time IBF super-flyweight titlist Jerwin “Pretty Boy” Ancajas.

Ang 29-anyos mula Manolo Fortich, Bukidnon ang naging kauna-unahang Filipino na kampeon ngayong taon matapos tapusin ang halos anim na buwang pagkabokya ng Pilipinas sa boxing World title ng patumbahin si Japanese boxer Masataka Taniguchi nung Enero 6 sa bisa ng second round TKO sa EDION Arena, Osaka Prefectural Gymnasium sa Osaka, Japan.

Suarez, masusubukan ang tikas laban kay Fleming

ni Gerard Arce @Sports | February 24, 2023

Masusubok sa isang mabigat na laban si unbeaten Filipino Olympian Charly “Kings Warrior” Suarez kontra sa wala ring talong si Paul “2 Gunz” Fleming ng Australia para sa apat na regional titles na magsisilbing daan upang mapalapit ito sa inaasam na World title fight ngayong taon.

Mapapalabanan ang 34-anyos na tubong San Isidro, Davao del Norte para sa bakanteng IBF Inter-Continental, IBO Inter-Continental, WBA Oceania, WBC Asian super-featherweight title sa Marso 15 sa Kevin Betts Stadium, Mount Druitt sa Sydney, Australia.

Mayrong 14-0 winning streak ang 2016 Rio Olympics at three-time Southeast Asian Games gold medalist na kakapanalo lamang ng dalawang regional title na IBF Asia at WBA Asia nitong nagdaang Disyembre 10, 2022 kontra Defry Palulu ng Indonesia na nagtapos sa second TKO na ginanap sa The Grand Ho Tram Strip, Vung Tau, Vietnam, habang napagwagian naman ni Fleming ang mga paglalabanang titulo sa kababayang si Jackson Jon England noong Marso 23, 2022 sa bisa ng unanimous decision.

“Kung sakaling makuha ko ito, papasok ako sa mas mataas na rankings, basta sa lahat ng rankings, anytime yan this year makalaro tayo ng World championship,” pagbubunyag ni Suarez ng maging pangunahing bisita ito sa programang Bulgar Sports TV: Sports Beat noong Miyerkules ng umaga. “One day at a time lang. Darating din yan, [basta] laging iniisip namin na lahat ng laban ko ay huli na para lagi kong iniisip na 100% dapat lagi ang aking laban.”

Sinabi ni Suarez na nakatutok sila sa paghahanda kontra kay Fleming, na minsang sumabak sa 2008 Beijing Olympics na may mabigat na rekord na 28 panalo at 18 rito ay nagmula sa knockouts na nagsimulang sumabak noong Nobyembre 2018.

Kasalukuyang nasa ika-8th ranked sa IBF si Suarez at No. 32 sa WBC, habang nasa 13th si Fleming, No.10 sa WBA at No.29 sa WBC.