Kahit 2 beses nang nabakunahan… No swab test, no entry sa Boracay

ni Lolet Abania | June 9, 2021

Sinimulan ng mga awtoridad ang mahigpit na pagpapatupad ng liquor ban sa Boracay at natitirang bahagi ng Aklan ngayong Miyerkules.

Ito ay matapos na mag-isyu si Aklan Governor Florencio Miraflores ng executive order hinggil sa health protocols na kinakailangang sundin sa gitna ng pagtaas ng bilang ng COVID-19 cases sa lalawigan.

Gayundin, masusi nilang mino-monitor at tsine-check kung ang dumarating na mga turista ay may kumpletong requirements bago pumasok sa kanilang lugar. Kamakailan, pitong turista ang inaresto matapos magpakita ng mga pekeng negative RT-PCR test results.

Ayon kay Miraflores, kailangan ng negative RT-PCR test result bago payagang makapasok sa Boracay ang isang turista kahit pa ito ay fully vaccinated na kontra-COVID-19.

Base sa tally ng Malay Tourism Office, mula June 1 hanggang June 6, ang bilang ng mga turistang dumating sa Boracay ay 2,905.

Sa bilang na ito, 1,760 turista ay mula sa National Capital Region, 550 galing sa Calabarzon, at 230 mula sa Central Luzon. Ang kanilang SWAT teams ang umiikot sa buong isla ng Boracay upang tiyakin ang seguridad ng mga turista at residente.

Higit 700 turista mula NCR Plus, dumagsa sa Boracay

ni Ronalyn Seminiano Reonico | June 6, 2021

Dumagsa ang mahigit 700 turista mula sa NCR Plus sa Boracay noong Sabado matapos luwagan ng pamahalaan ang quarantine restrictions sa Metro Manila at kalapit na probinsiya.

Ayon sa Civil Aviation Authority of the Philippines, 718 ang mga turista mula sa NCR Plus.

Siniguro naman ni Transportation Secretary Arthur Tugade ang mahigpit na pagpapatupad ng mga safety and health protocols sa mga paliparan.

Kamakailan ay inaprubahan ng pamahalaan ang mga leisure activities sa NCR Plus papunta sa mga lugar na nasa ilalim ng general community quarantine (GCQ) at modified GCQ simula noong June 1 hanggang 15. Inalis na rin ng pamahalaan ang age restrictions ngunit kailangan ding sundin ang mga health protocols at ang mga ipinatutupad na guidelines ng local government units (LGUs).

Turista mula NCR Plus, puwede na sa Boracay

ni Ronalyn Seminiano Reonico | June 1, 2021

Maaari nang magpunta sa Boracay ang mga turista mula sa NCR Plus areas na binubuo ng Metro Manila, Bulacan, Cavite, Laguna at Rizal simula ngayong araw, June 1 hanggang sa June 15, ayon sa Malay Tourism Office.

Sa Facebook post ng Malay Tourism Office, anila, “IATF-EID Resolution 118A now ALLOWS NCR+ tourists to Boracay beginning today until June 15, 2021 while Metro Manila, Bulacan, Cavite, Laguna, Rizal are on GCQ with Restrictions.”

Saad pa ng Malay Tourism Office, kung papalawigin pa ang pagsasailalim sa NCR Plus sa general community quarantine (GCQ) pagkatapos ng June 15, tuloy pa rin silang tatanggap ng mga turista mula sa mga lugar na nasasakupan nito.

Anila pa, “NOTE: If NCR+ becomes plain GCQ after June 15, it would be a continuous take off. If NCR+ goes up again to MECQ, it may stop leisure movements again.

“Other tourists coming from other GCQ/MGCQ areas are always accepted in Boracay.”

Paalala pa ng Malay Tourism Office, “Check with the airlines for flight availability.

“The same local government unit (LGU) requirements and guidelines apply.”