P-BBM, lumipad sa Melbourne para sa ASEAN-Australia Special Summit

ni Angela Fernando - Trainee @News | March 3, 2024

Lumipad si Pangulong Ferdinand "Bongbong" Marcos Jr. nitong Linggo ng umaga patungong Melbourne, Australia upang dumalo sa ASEAN-Australia Special Summit.

Layunin ng Special Summit na gunitain ang ika-50 anibersaryo ng relasyon ng ASEAN at Australia, ayon sa Department of Foreign Affairs (DFA).

Nagpahayag si DFA Assistant Sec. Daniel Espiritu, na ang Special Summit ay isang pagkakataon para sa pamahalaan na ipakita ang pangunahing posisyon ng 'Pinas sa mga panrehiyon at internasyonal na isyu.

Dagdag niya, maaaring hikayatin ni Marcos ang Australia na manatiling nakatuon sa mapayapang paglutas ng mga alitan at panatilihin ang respeto sa internasyonal na kaayusan.

Ugnayan ng ‘Pinas at Australia, dapat palakasin — PBBM

ni Eli San Miguel - Trainee @News | February 29, 2024

Sinabi ni Pangulong Marcos na mahalaga ang ugnayan sa pagitan ng Pilipinas at Australia para sa pagtugon at paglutas sa 'geopolitical polarities' at sa mga kompetisyon para sa kapangyarihan na maaaring makasama sa kapayapaan sa rehiyon.

Ipinahayag ito ni Marcos noong nagsalita siya sa Parliament of Australia in Canberra nitong Huwebes ng umaga.

"Geopolitical polarities and strategic competitions threaten our hard-won peace even as we remain beset by unresolved inequities and inequalities within and amongst nations," ani Marcos.

"Powerful and transformative technologies can destabilize our political and social order, climate change threatens our very existence. These tectonic shifts are acutely felt in the Indo-Pacific," dagdag niya.

Ayon kay Marcos, dapat magkaisa ang dalawang bansa upang labanan ang mga pagtatangkang pabagsakin ang batas at kapayapaan na itinatag mula pa noong World War II.

"It has become crucial for us now to envision the shape, the breadth, and the depth of our strategic partnership and how it must move forward as we weather the storms of global volatility," paliwanag niya.

"This is why our strategic partnership has grown more important than ever. We must reinforce each other's strengths... We must oppose actions that clearly denigrate the rule of law," dagdag niya.

Bumisita si Marcos sa Canberra para sa two-day State Visit na paanyaya ng pamahalaan ng Australia.

P-BBM nakalipad na patungong Australia, VP Sara, Officer-in-charge

ni Angela Fernando - Trainee @News | February 28, 2024

Lumipad na patungong Canberra, Australia si Pangulong Ferdinand Marcos Jr., nitong umaga ng Miyerkules para magbigay ng pahayag sa Australian Parliament para sa naging imbitasyon ni Gov-Gen. David Hurley.

Matatandaang bumisita bilang kinatawan ng Australia si Hurley sa 'Pinas sa dinaluhang inagurasyon ni Marcos nu'ng 2022.

Nilinaw ng Pangulong umaasa siyang magkakaroon ng matibay na relasyon ang bansa at ang Australia na umabot na sa 70 taon.

Layon din ni Marcos na palakasin pa ng dalawang bansa ang depensa at seguridad sa gitna ng kanilang lumalawak na relasyon.

Ayon kay Pres. Marcos, ang kanyang pagbisita ay maaaring maging daan upang mapalawak ang kooperasyon ng Australia matapos ang naganap na pirmahan ng tatlong kasunduan.

Itinalaga naman ng presidenteng Officer-in-charge ang bise presidenteng si Sara Duterte habang nasa Australia pa si Marcos.