Mga lolo’t lola, ‘wag pahirapan sa kanilang benepisyo!

ni Bong Revilla @Anak ng Teteng | Jan. 29, 2025

Nakakadismaya ang natanggap nating mga reklamo mula sa mga lolo at lola na tila ba itinataboy kapag nagpapalista sila para sa mga benepisyo sa ating batas na Expanded Centenarians Law.

Ayon sa mga natanggap nating reklamo, may mga lolo at lola na gumagastos sa pamasahe at nagbibiyahe nang malayo para sadyain ang pagpaparehistro sana. Imbes na ikatuwa ang pagpunta, napapalitan pa ng lungkot dahil sinasabihan daw ang iba sa kanila na walang budget para rito. ‘Yung iba naman daw, ni hindi man lang kinuha ang kanilang mga detalye at basta pinapabalik na lang kung malapit na ang birthday.

Huwag naman ganu’n. Ang laki ng utang na loob natin sa mga lolo at lola na may malaking ambag sa ating lipunan lalo na nu’ng kabataan nila. Marami sa mga tinatamasa natin ngayon ay bunga ng dugo’t pawis nila. Kaya sa mga lolo at lola na pupunta sa mga opisina ng National Commission of Senior Citizens (NCSC), huwag naman silang itaboy. Ang minimum na puwede n’yong gawin ay hingin ang kanilang mga personal na detalye, turuan at tulungan na maka-comply sa mga requirement kung may kulang pa sila.

Patuloy nating pinapaalalahanan ang NCSC na huwag ipagpapaliban ang pagpapatupad ng Republic Act No. 11982 o ang Expanded Centenarians Act.

Hindi naman tayo tumitigil sa pakikipag-ugnayan sa NCSC. Sa katotohanan, noong budget season nga sa Senado, personal natin silang hinarap upang hingin ang kanilang commitment na agarang ma-implement ang batas na ito. Makailang beses din tayong nakipag-usap sa Department of Budget and Management (DBM) para garantisado ang pondo. 

Kaya nga malakas ang loob natin na sabihin na sa parte natin, ginawa natin ang lahat ng ating makakakaya -- una para maisabatas ‘yan sa kabila ng mga agam-agam ng ilan noong simula at pangalawa, para mapondohan ‘yan sa 2025 GAA. ‘Ika ko nga, batas na y’an, may budget na sila, walang kahit anong excuse ang magiging acceptable pa kung hindi mapapakinabangan ‘yan ngayong taon.

Bilang ahensyang nangunguna pagdating sa pagtataguyod ng mga programang para sa kapakanan ng senior citizens sa ating bansa, inaasahan ng lahat ang agarang pagkilos ng NCSC upang maisakatuparan ang kanilang mandato na walang iba kundi isulong ang benepisyo ng ating mga senior citizen. Matagal nang naghihintay ang mga lolo at lola sa dagdag ayudang ito – na halos isang taon na nga mula nang napirmahan at naging ganap nang batas. 

Ang Expanded Centenarians Act ay magbibigay ng P10,000 cash gifts sa bawat senior citizen na aabot sa 80, 85, 90 at 95-anyos, samantalang ang mga centenarian o ang mga aabot ng 100 taong gulang ay patuloy na makakatanggap ng P100,000. 

Wala nang dahilan ang NCSC para hindi ito maipatupad. Daan-libong mga lolo at lola ang makikinabang sa ilalim ng batas. Sa madaling sabi, daan-libo rin ang aaray kung hindi nila matatanggap ang nakatakdang cash gifts para sa kanila. 

Makulit na kung makulit, pero hindi talaga natin tatantanan ang NCSC hanggang hindi nila fully implemented ang batas na ‘yan. In fact, paulit-ulit natin silang kinakausap -- maging personal at sa telepono, para makahingi ng up-to-date report sa mga plano nila. Sabi ko nga sa kanila, kailangang plantsado na ‘yan bago matapos ang January 2025. 

Ang iniiwasan natin eh, ‘yung wala na si lolo at lola saka pa lang gagawin ang pamimigay ng cash gifts. Sa mga ganitong pagkakataon kasi, time is of the essence at bawat segundo ng delay, ay hadlang sa pag-e-enjoy sana nila ng munting regalo na ito.

Pasensya na rin sa NCSC kung pinupukpok ko kayo hinggil dito dahil lubhang malapit sa akin ang mga lolo at lola natin kaya nga sinikap nating tutukan at isulong itong Expanded Centenarians Law. Kung paanong hindi natatapos ang mga ginagawa ng inyong lingkod sa pagsasabatas nito at sa pagsisigurado na mapondohan ito, ganu’n din ang inaasahan natin sa NCSC na hindi natatapos sa plano at listahan ang obligasyon nila. 

Marami pa tayong pangarap para sa mga senior citizen na sana ay maisakatuparan sa lalong madaling panahon hangga’t nandiyan pa sila.

May kasabihan nga na aanhin pa ang damo kung patay na ang kabayo. Kaya sa NCSC, sana ay kumilos na tayo.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Mahigpit na batas kontra child pornography, ipatupad

ni Bong Revilla @Anak ng Teteng | Jan. 27, 2025

Hindi bago ang isyu ng pornograpiya sa ating lipunan. Sa katotohanan, simula nang sumibol ang internet, naging kasing dali na nga ng pagpindot sa keyboard at mouse ang paglaganap ng tila kanser na maituturing sa ating lipunan na ito.

Higit isang dekada na ang lumipas simula nang maglabas ang National Telecommunications Commission (NTC) ng Guidelines para sa mga Internet Service Providers (ISPs) sa pagpapatupad ng Republic Act (RA) 9775 na kilala rin bilang Anti-Child Pornography Act of 2009 – ang batas na naglalayong bigyang proteksyon ang mga kabataan laban sa mga pang-aabuso sa kanila, lalo sa panahon ngayon na sa isang click lamang ay puri at dangal na nila ang nakasalalay. 

Batay sa guidelines, minandato na ang lahat ng ISPs ay lagyan ng available technology program o software na maaaring humarang o sumala sa lahat ng websites na nagtataglay ng child pornography materials. Ang ISPs ay dapat na makabitan ng nabanggit na features sa loob ng 120 araw mula sa pagkakasumite ng listahan ng kahit tatlong magandang klase ng teknolohiya sa Inter-Agency Council Against Child Pornography para sa pagsusuri.

Sa kabila nito, batay sa report ng United Nations Children’s Fund (UNICEF), sa taong 2021 nga lang ay nasa 2 milyong kabataang Pilipino ang naging biktima ng sexual abuse at exploitation. Ayon pa sa organisasyong International Justice Mission, noong 2022, tinatayang 1 sa 100 batang Pilipino ang nabiktima ng online sexual exploitation -- o halos kalahating-daang milyong kabataang Pinoy. Noong nakaraang taon naman ay napaulat ang Pilipinas bilang top global source ng child pornography. At nagtala rin ang Globe Telecom Inc. noong 2024 ng 61% na pagtaas ng mga blocked sites, at 51% na pagtaas ng mga child porn URLs sa unang bahagi pa lamang ng taon.

Sinasabing ang biglang pagdami ng mga kaso ng online sexual abuse and exploitation sa mga kabataan ay nagsimula noong panahon ng pandemya. Pandemic within a pandemic nga itong ituring lalo noong kasagsagan ng kaso ng COVID-19. Ayon din sa UNICEF, billion-dollar industry talaga ang child pornography at ang mga batang Pinoy talaga ang paboritong inilalako at pinagsasamantalahan online, na may mga insidente pa na mismong mga magulang ang nagtutulak na gumawa ng kalaswaan sa harap ng camera.

Parang apoy na naglalagablab, patuloy ang paglaganap ng kanser ng lipunang ito na tumutupok sa buhay at kinabukasan ng ating mga kabataan. Ultimo nga daw sanggol na ilang buwang gulang pa lamang ay pinagkakakitaan na ng mga masasamang loob.

Malaking bagay na maituturing sa labang ito kontra pornograpiya ang filter na nabanggit para kahit paano ay maibsan ang napakabilis na pagpasok sa mga websites na ito.

Meron din naman tayong cybercrime operatives sa Philippine National Police (PNP), maging sa sa National Bureau of Investigation (NBI), na maaaring aktibong makipagtulungan sa NTC na labanan ang pornograpiya.

Aminado naman ang NBI na sadyang napakalawak na ng sexual exploitation sa bansa at tinawag na nga nila itong cottage industry at napakarami ng ‘cybersex dens’ ang mga sinalakay sa magkakahiwalay na lugar.

Ang PNP Anti-Cybercrime Unit ay may pahayag din na ang Pilipinas ay isa na umanong billion dollar global child cybersex industry dahil sa sobrang kahirapan lalo pa noong panahon ng pandemya.

Halos ganito rin ang nilalaman ng ulat ng States of the World’s Children na pinamagatang “Children in a Digital World,” na tumatalakay sa oportunidad at delikadong sitwasyon ng mga bata online.

Isa sa tatlong internet users umano sa buong mundo ay bata. May mga pagkakataon pa ngang hindi nasusubaybayan ng mga magulang ang mga ito na lubhang napakadelikado dahil sa isang click, maaari nilang ma-access ang pornograpiya -- o maging sila mismo ay mabiktima ng mga mapagsamantala.

Habang lumalago nga ang teknolohiya, tila nagiging mas mabagsik din ang mga kawatan sa pag-iwas sa pangil ng batas. 

Hindi naman tayo umaasa sa himala. Ngunit sa haba ng taning na ibinigay ng pamahalaan ay hindi natin maiiwasang umasa na agaran nang masupil ang child pornography lalo sa panahong ito na mas mahaba ang inilalaang oras ng mga kabataan sa harap ng cellphone, computer o tablet. Sa isang digital na mundo kung saan bahagi ng buhay, pag-aaral at maging trabaho ang teknolohiya, ang mahigpit na pagpapatupad sa mga batas at alituntuning pumapalibot sa pagkitil sa pornograpiya ang pinakamabisang sandata natin laban sa tila hindi mapigil na paglaganap nito. 

Sa kabila ng lahat ng ginagawa ng ating pamahalaan upang labanan ang problemang ito, hindi ito sapat kung hindi nito katuwang ang mga magulang at pamilya ng mga kabataan. Kung kaya’t hinihikayat natin ang mga nagbabantay sa mga kabataan na tutukan at bantayan ang “screen time” ng kanilang mga anak upang hindi sila magkaroon ng access sa pornograpiya sa isang banda, at wala ring access sa kanila ang mga masasamang loob sa kabilang banda.

Ang pandemya ng pornograpiya ay isang malawakang suliraning kailangang supilin mula puno hanggang ugat. Sa ating sanib-puwersang pakikibaka laban dito, nawa ay wala nang musmos ang mahuhulog sa patibong ng mga halang ang kaluluwa. 

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Para raw mauna sa listahan… SEN. BONG, GINAMIT ANG NAME BILANG APELYIDO SA BALOTA, PINALAGAN NG NETIZENS

ni Julie Bonifacio @Winner | Jan. 24, 2025

Photo: Bong Revilla Jr. FB, IG

Nabuhay na naman ang dugo ng mga bashers ni Sen. Ramon “Bong” Revilla  Jr. sa pag-aapruba na gamitin ang pangalang ‘Bong Revilla’ sa kanyang pagtakbo sa May election.

Ayon sa abogado ni Sen. Bong na si Atty. George Garcia, inaprubahan daw ng Cavite Regional Trial Court Branch 19 ang paggamit as registered family name ng re-electionist senator sa pangalang Bong Revilla noong 2009.

“It is perfectly legal,” sabi pa ng lawyer ni Sen. Bong. 

Ipinag-react pa ng mga netizens ang rason na nabasa nila na lumabas sa X kahapon.

“So that he will be on top of the alphabetical list of senatorial candidates in the ballots,” ang dahilan kaya raw nagpalit ng apelyido si Sen. Bong.

Nasa number 11 na ang pangalan ni Sen. Bong sa listahan ng senatorial candidates ng Comelec.

Palag ng netizen, “Walang hiya ang Comelec. Ginawang apelyido ni Bong Revilla ang “Bong” para lang maiangat ang numero niya sa listahan ng mga kandidato sa balota upang madali itong makita ng mga botante. This must be questioned!”

“Ta** ina. 2009 pa lang naging opisyal na apelyido na pala ni Bong Revilla ang ‘BONG REVILLA’”

Aniya, “But the fact here is that this should not have been approved in the first place. It is clearly political and unfair to the electoral process, and to other candidates.

Pero may mga nagdepensa naman kay Sen. Bong, “Sir, korte po yata nag-decide nito, at hindi Comelec.

“To be fair, sumusunod lang ‘yung Comelec.”

“1998 pa legally na-change ang name ni Bong Revilla so bakit issue ito bigla? Mema lang.” 

Kinorek naman ng isang netizen ang 1998 to 2009.

Samantala, ayaw nang patulan ng kampo ni Sen. Bong ang pamba-bash sa kanya dahil halata naman daw naghahanap lang ng butas ang iba lalo’t palapit na ang eleksiyon.

Jose Mari Bautista ang totoong pangalan ni Sen. Bong kaya kung ito ang kanyang gagamitin, mas malapit sana ang numero niya sa balota.

Pero matagal na niyang ginagamit ang “Bong Revilla” as screen name at ito rin ang ginamit ng kanyang namayapang ama na si Sen. Ramon Revilla, Jr..

Nagpapasalamat na lang si Sen. Bong dahil ramdam niya ang suporta ng mga taong sumasalubong sa kanya sa lahat ng mga napupuntahan niya.

---

Masyado raw kasing prangka…

ARNELL, AMINADONG TALO ‘PAG KUMANDIDATO 

Nagtataka si OWWA Administrator Arnell Ignacio sa balitang tatakbo siya sa May elections this year. Marami kasi ang pumupuri sa trabaho niya sa government office for the past eight years.  

Sa ginanap na mediacon ng Timeless… Music & Laughter (TM&L) post-Valentine dinner concert sa Century Park Hotel last Wednesday, nagsalita na si Arnell tungkol sa nababalitang pagtakbo niya sa nalalapit na halalan.  

Pahayag ni Arnell, “Alam mo, ang daming nagtatanong sa ‘kin n’yan pero wala sa isip ko ‘yun. Akala lang nila na I’m really working so hard dahil meron akong ibang pakay. Eh, wala.  

“Eh, working hard is my nature. ‘Yun ang libangan ko. Saka ang position, ganyan kalaki ang responsibilidad. Destiny ‘yan. Kahit ano pa’ng gawin mo, magtitiwarik ka’t lahat, ibigay sa ‘yo lahat ng resources, ‘pag ‘di ibinigay sa ‘yo, hindi sa ‘yo.”  

Matagal na rin naman since huling nag-run si Arnell for a public position.  

“Flop naman ako,” seryosong biro ni Arnell. 

Sey niya, “Saka hindi, ‘yun naman, nahatak lang naman ako doon. Ang tagal-tagal na noon.”  

Na-traumatize ba siya sa huli niyang pagtakbo for public office?  

Sagot niya, “No, not at all. Masyado lang ano, ‘yung ugali ko lang kasi, masyado akong frank. Hahaha!”  

Nature na yata ni Arnell na ‘pag may nagyaya sa kanya, ang dali niyang hatakin gaya na lang sa back-to-back concert niya with The New Minstrels Fifth Generation.  

“Bigla na lang akong may tiket, ‘di ba? Hahaha! Eh, pero ano, eh, the best will all come out of arrangements like this. And ano ‘to, eh, palagay ko, this will be more of a reunion of very, very good friends.  

“Pero teka, dito ako ninenerbiyos—kasama ko ang The New Minstrels. Ang gagaling ng mga ‘to, ‘di ba? O, fifth generation ng The New Minstrels ang makakasama ko. Ang inabutan ko ata, first. Hahaha! Kaya ‘yung mga hinahanap ko, wala na,” saad ni Arnell.  

Ilan sa 5th generation ng The New Minstrels na makakasama ni Arnell sa TM&L sina Atty. Rene Puno, Alynna, at Chad Borja.  

Si Atty. Rene ay isang soulful crooner at si Alynna naman ang Sensual Siren of Songs.  

Si Chad needs no further introduction kasi sumikat talaga siya during his time through his classic song na rin na maituturing, ang Ikaw Lang. 

Ipapakilala naman sa TM&L ang mga komedyante na bumubuo sa ‘Kabaong Gang’ na sina Fumi, Bernie Batin, Leo Bruno, at Janna Trias, plus, a performance like no other from Ms. Christi Fider.  

Gaganapin ang Timeless… Music & Laughter sa Grand Ballroom ng Century Park Hotel sa Manila on February 15, Saturday. Dinner at 6 PM, this is produced by movie actress and producer Ms. Liz Alindogan.