Hackers non-stop, mga ahensya ng gobyerno, ligtas pa ba?

ni Bong Revilla @Anak ng Teteng | August 23, 2024

Masyado nang nalalantad sa kahihiyan ang iba’t ibang ahensya ng pamahalaan hinggil sa sunud-sunod na pag-atake ng mga hacker at ngayon ay kinumpirma naman ng Department of Information and Communications Technology (DICT) na nitong nakaraang Miyerkules ay hindi na rin nakaligtas ang website ng Senado.

Noong Martes pa ng gabi natiktikan ng cybersecurity group Deep Web Konek ang ginawang pagpasok ng DeathNote Hackers sa information technology system ng Senado.

Napag-alaman naman ng DICT na kinalikot umano ng grupo ang mga usernames at logs ng mga empleyado sa Senado.

Tiniyak naman ni DICT Asec. Renato Paraiso na naresolba na ang nasabing hacking subalit patuloy pa rin silang nakikipag-ugnayan sa Senado upang mapalakas ang kanilang cybersecurity.

Ilan sa mga ahensya ng gobyerno na na-hack ng nasabing grupo ay ang Bureau of Customs (BOC).

Noong nakaraang taon, na-hack ang Philippine Health Insurance Corp (PhilHealth) kung saan milyun-milyong datos ng mga miyembro ang nakompromiso.

Ang masakit sa sunud-sunod na pangyayaring ito ay tila wala namang paghahandang isinasagawa ang DICT para pigilan ito at sa halip ay proud na proud pa silang inaanunsiyo na may ahensya na namang na-hack.

Nakakaalarma na ang sunud-sunod na pangyayari at ang gustong marinig ngayon ng publiko ay mahuli na ang mga salarin sa likod ng walang humpay na hacking na ito.

Sabagay kamakailan lamang ay may nasakoteng grupo ng mga hacker ang National Bureau of Investigation (NBI) at sa kauna-unahang pagkakataon ay may naaresto, kaya posibleng matimbog din ang mga umatake sa website ng Senado kung ang NBI din ang tututok dito.

Apektado ang mga empleyado ng Senado hinggil sa naganap na hacking dahil hindi pa natin alam sa ngayon kung ano na naman ang magiging epekto nito — na sana ay wala namang grabe kaya dalangin nating masakote na ang mga walang respetong hacker na ito sa lalong madaling panahon. 

Pilit nating inuunawa ang DICT na hindi talaga sapat ang kanilang kapasidad para pigilan ang pag-atake ng mga hacker ngunit naniniwala ako sa kakayahan ng bagong pamunuan ng NBI na sa tulong ng DICT ay mahuhuli rin ang mga masasamang-loob na ito.

Masyado nang hinahamon ng mga hacker na ito ang kakayahan ng pamahalaan kaya marapat lang na pag-ukulan natin ito ng pansin para maiharap sa media ang pagmumukha ng mga iyan at masampahan ng kaso.

Hangga’t pinapalampas kasi natin ang pag-atakeng ito ng mga hacker ay tiyak na mauulit at mauulit ang kanilang pagtatangka dahil natutuwa silang hiyain ang mga ahensya ng pamahalaan at ipakita sa buong mundo ang ating kahinaan.

Medyo nagpahinga saglit ang mga hacker na ito nang mahuli ng NBI ang ilan sa mga ito at isa nga ay editor pa umano ng kilalang pahayagan kaya ngayon ay muli na namang sumusubok ang mga hacker para patunayang nakatsamba lang ang NBI na makatiklo.

Sana sampulan uli ng naturang ahensya na makatimbog ng hacker at unahin nila ang mga umatake sa Senado para makampante na ang mga empleyado nito.

Sabagay hindi lang naman bansa natin ang may problema sa hacking dahil buong mundo ay dumaranas nito. Ang pagkakaiba lang nareresolba agad sa ibang bansa hindi tulad sa atin na parang pinaglalaruan ang ating mga ahensya ng mga kawatang ito.

Kailangan talagang kumilos, sa ngayon kasi ay talamak pa rin ang text scam at dagsa sa tanggapan ng Anti-Cyber Group ng Philippine National Police (ACG-PNP) ng nagtutungo para magsampa ng reklamo kasi nga wala namang nahuhuli.

Sa kabila kasi ng rehistrado na ang lahat ng SIM card sa bansa ay umaatake pa rin ang mga scammer dahil lantaran ang bentahan ng mga ito at kamakailan lamang ay napakaraming nakumpiska ng pulisya na registered SIM card na ipinagbibili sa murang halaga.

Ang sinasabi natin, kailangan talaga na tutukan ang problemang ito — kung kinakailangang magsagawa ng massive operation para maubos ang mga naturang sindikato ay gawin natin — hindi ‘yung magpepresenta ng huli kapag mainit ang sitwasyon para lang maipakitang nagtatrabaho, pero paghupa ng sitwasyon balik na naman sa panloloko ang mga scammer.

Kung tuluy-tuloy ang pagtugis sa mga hacker at maya’t maya ay may nahuhuli, tiyak na darating ang panahon na titigil na ang mga ‘yan lalo pa at marami na ang nakakasuhan.

Naniniwala naman ako na darating ang panahon na matutukoy na ng DICT ang mga hacker, sana lang ay makipag-ugnayan sila sa NBI para mapabilis ang trabaho.

Sa mga kababayan nating may kaalaman hinggil sa ginagawang ito ng mga hacker ay mangyari lamang na ipagbigay alam sa tanggapan ng mga otoridad upang mapanagot sila sa batas at tuloy ay makatulong sa pagsugpo ng kasamaan sa mundo.

Mabuti at medyo malakas ang ating cybersecurity group sa Senado at agad na natiktikan ang galawan ng mga hacker kaya kahit paano ay nakaporma ang information technology system ng Senado at ngayon ay lalo pa nilang pinalakas ang sistema para hindi magtagumpay ang mga ito.

‘Yung mga na-stress dahil sa hacking na ito ay medyo kumalma na dahil tiyak na ilang araw lang  ay masasakote rin ang mga ‘yan dahil hindi naman tatantanan ‘yan ng pamahalaan.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Sa paglobo ng kaso ng Leptospirosis, San Lazaro at National Kidney Hospitals problemado

ni Bong Revilla @Anak ng Teteng | August 21, 2024

Hindi gaanong napagtutuunan ng pansin at maging ang mainstream media ay matamlay ang pagtrato hinggil sa sitwasyon ng leptospirosis sa bansa ngunit dapat na tayong maalarma dahil sa kinakapos na ng staff ang San Lazaro Hospital at National Kidney and Transplant Institute (NKTI) dahil sa paglobo ng mga pasyenteng tinamaan ng nasabing sakit. 

Kinumpirma ng SLH sa Maynila na umakyat na sa 57 ang pasyente na dumating nitong Sabado at 23 pang iba mula sa Metro Manila at kalapit na lalawigan.

Bagama’t hindi pa napupuno ang 65-bed capacity ng leptospirosis wards ng ospital, kulang naman sila ng medical staff para asikasuhin ang mga pasyente, maging ang mga nurse umano ay kinakapos na rin. 

Nagkukulang na rin umano ang suplay ng gamot at pinoproblema nila ang mga pasyenteng kailangang sumailalim sa dialysis. Bagama’t mayroong apat na hemodialysis machines ang ospital, tatlong nurse lang umano ang may kakayahan na mag-operate nito.

Nagpasaklolo na ang NKTI sa Department of Health na magpadala ng karagdagang nurse at doktor dahil sa dumarami nilang pasyenteng may leptospirosis.

Lumobo ang bilang ng tinamaan ng leptos matapos ang matinding pagbaha sa Metro Manila at iba pang panig ng bansa noong Bagyong Carina.

Simula nang sumirit ang kaso ng leptospirosis hanggang ngayon ay patuloy ang pagsusumikap ng pamahalaan kung paano ito lalabanan dahil umabot na sa siyam katao ang nasawi sa Maynila sa naturang sakit mula Hulyo 16 hanggang Agosto 5 ngayong taon.

Ang sintomas na ipinakita ng mga naitalang kaso ay mataas na lagnat, sakit ng katawan at hirap sa pag-ihi.

Dahil dito, nagdagdag ng mga pagamutan at  nakahanda na ang Ospital ng Maynila Medical Center (OMMC) para sa posibleng pagtaas pa ng mga kaso ng leptos ngayong panahon ng tag-ulan.

Nagbigay naman ng anunsiyo ang bagong chief ng OMMC na si Dr. Aileen Lacsamana — para sa lahat ng division chief na ihanda ang ospital pati na ang bed capacity nito para sa mga pasyente.

Base sa datos ng OMMC Department of Internal Medicine, may 37 leptospirosis patient ito simula noong Bagyong Carina.

Nabatid na karamihan sa mga pasyente ay mula sa ikalimang distrito ng Maynila.

Batay naman kay DOH Secretary Teodoro Herbosa, may apat katao na ang ini-report sa kanila na nasawi dahil sa leptospirosis. 

Mataas ang mortality ng leptospirosis lalo na kung late na sila na-diagnose kaya ang warning ng DOH, early on pa lang, o nilalagnat, make sure na matingnan na sila ng doktor.

Kinumpirma na rin ng DOH na mayroong epidemya ngayon ng leptospirosis dahil marami ang hindi naiwasang lumusong sa baha noong kasagsagan ng bagyo.

Kaugnay nito, iminungkahi ng ahensya sa mga local government unit na magpasa ng ordinansa para ipagbawal ang pagligo sa baha upang makaiwas sa panganib na tamaan ng sakit.

Dagdag ng kalihim, kakausapin niya ang pamunuan ng Metropolitan Manila Development Authority (MMDA) upang i-regulate at ipagbawal ang pagligo ng mga bata, maging ng mga matatanda sa baha upang hindi magkaroon ng outbreak sa leptospirosis.

Tumaas umano ang mga kaso ng leptospirosis bunsod ng pagiging pasaway ng publiko na sa halip manatili sa bahay kapag bagyo o baha ay lumalabas pa para maligo sa maruming tubig. 

Sa ngayon, patuloy ang pagtaas ng kaso nito sa Metro Manila at ilang kalapit lalawigan. 

Sinabi rin ni DOH Assistant Secretary, at spokesperson Albert Domingo na inaasahan na nila ang mga kaso ng leptos dahil ang incubation period nito ay hanggang dalawang linggo o maaaring umabot ng 30 araw.

Batay sa updated data ng DOH, simula August 8-13 ay nakapagtala ng 523 na mga pasyenteng may leptospirosis, 423 sa mga ito ay matatanda at 100 ay mga bata.

Ayon pa kay Domingo, mayroong naitalang 43 nasawi, kung saan 41 sa mga ito ay matatanda at dalawang bata.

Karamihan umano sa mga pasyenteng may leptos na naka-admit sa mga ospital sa Metro Manila ay nagda-dialysis kung saan ang tinamaan ay ang kanilang kidney, at walo sa mga ito ay nasa mechanical ventilator dahil nasapul ang kanilang baga ng bacteria.

Ibig sabihin, ganyan katindi ang problema sa leptospirosis na parang binabalewala lamang ng marami nating kababayan dahil sa kakulangan ng kaalaman at walang takot pa rin kung lumusong sa baha.

Kahit alam na ng ating mga kababayan ang tungkol dito, kailangan pang paigtingin ang pagpapakalat ng impormasyon kung gaano ito kadelikado dahil nagtatampisaw pa rin sa baha at hindi nagpapa-check-up pagkatapos lumusong.

Available ang mga gamot sa mga center ng barangay kontra leptos at sakaling hindi naiwasang mapalusong tayo sa baha, ang kailangan lang ay agad na kumonsulta bago pa makaranas ng sintomas.

Maliban na lamang kung talagang nais n’yo nang iwan ang mundong ito — ibang usapan na ‘yan!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Carlos Yulo, hindi lang isang kampeon, isa nang alamat!

ni Bong Revilla @Anak ng Teteng | August 19, 2024

Ngayong araw, Lunes (August 19) ay nakatakdang salubungin ng buong Senado ang ating golden boy na si Carlos Yulo kasama ang ibang Pinoy Olympians na nagpakitang gilas sa 2024 Paris Olympics kasunod ng inihain nating resolusyon patungkol sa pagbibigay parangal sa mga ito.

Noong August 5, 2024 ay nagsumite tayo ng Senate Resolution No. 1097 na naggagawad ng parangal kay Carlos Yulo sa pag-uwi ng 2 gintong medalya sa bayan, at Senate Resolution No. 1128 na kumikilala sa ipinamalas na galing ng buong delegasyon ng Philippine Team na sumabak sa 2024 Paris Olympics.

Sa Senado, tayo ang kauna-unahang may akda ng mga nasabing resolusyon kung kaya’t ikinagalak nating tumindig sa bulwagan noong nakaraang Miyerkules nang kilalanin ng kapulungan ang tagumpay ni Caloy at buong Philippine Team. Bilang principal author ng Senate resolutions na na-adopt at nilagdaan din ng Senado noong August 14, 2024, masaya nating kinilala ang husay, giting at puso nila, na siya namang naging daan upang makamit nila ang pangarap para sa sarili at bayan.

Nais ko ring ibahagi ang ilan sa nilalaman ng aking sponsorship speech nang lumusot sa Senado ang mga nasabing resolusyon, narito: 

“Sa pagkakataong ito, taas-noo nating sinasaluduhan ang isang partikular at natatanging atleta na sadyang kahanga-hanga ang ipinakitang husay at galing – si Carlos “Caloy” Yulo.

Huli nating nakapiling si Caloy dito sa bulwagan ng Senado just a few months ago. Hindi naman sa pagyayabang – pero noon pa lang naramdaman ko na, na maaabot niya ang tugatog ng tagumpay.

Carlos “Caloy” Yulo, ngayon, hindi ka lamang isang kampeon, isa ka nang alamat. 

Parang isang kawayang hindi nabali ng hampas ng hangin… hindi napayuko ng ano mang balakid; bagkus ay sumayaw, lumundag at umimbay sa himig ng tadhana upang makamit ang pinakamataas na tagumpay hindi lamang para sa sarili kung hindi para sa buong bayan.

Nakakatindig-balahibo nang tugtugin ang Pambansang Awit ng Pilipinas na nasaksihan ng buong daigdig – not once but twice. 

Ang sarap sambitin ang mga kataga sa Lupang Hinirang dahil alam nating buhay na buhay sa puso ni Carlos ang alab ng pagkamakabayan sa bawat paglukso at pagsirko. The fire burned so fiercely in his heart for all the world to see, and it brought immense joy and pride to us Filipinos.

‘Yung isang gintong medalya nga ay sapat nang rason ng pagbubunyi. But Caloy did not stop… did not falter… did not tire… even when he already proved himself worthy of recognition. 

Dalawang beses pang tumaginting ang titik at himig ng ating sinisintang bayan upang masaksihan ng buong mundo. 

You are truly our golden boy. Subalit sa kabila ng kinang ng ginto, alam namin ang mga sakripisyo mo na siyang naging kabayaran upang makamit mo ang inaasam-asam na tagumpay. 

Today we honor the pain and struggles that propelled you to the top. At kinikilala rin natin ang bawat segundong iginugol, bawat sakripisyong inialay, at ang mga sugat at pasang natamo sa training na siya namang naging bagwis ng mga pakpak ng iyong pangarap… upang makalipad sa tugatog ng iyong tagumpay.

Kung susumahin ang lahat ng hakbang na nagdala sa iyo sa araw na ito, alam nating dugo, pawis at luha ang naging kabayaran. But you are an epitome of the great Filipino spirit of resilience… never wavering, never bending, never cowering… always ready to soar towards the achievement of your dreams.  

Tunay ngang nananalaytay sa iyo… ang dugo ng Pilipinong malakas, matapang at masikap. At ito mismo ang paulit-ulit mong ipinamalas sa buong daigdig.

Sa araw na ito, nagpapasalamat kami sa iyong pagpupunyagi upang patunayan sa buong mundo na ang Pilipino ay may angking kakayahan na hindi lamang makipagsabayan, kung hindi ang magwagi ano mang hamon, kahit sino ang katunggali.”

Wala na tayong ibang maitatawag kay Carlos Edriel Yulo kundi bayani ng palakasan at kayamanan ng bansa dahil sa kanyang natatanging ipinamalas na galing sa men’s floor exercise final kaya nakapag-uwi ng gintong medalya mula sa 2024 Paris Olympics.

Para naman sa buong Philippine Team, ito ay bahagi rin ng aking talumpati: 

“Alam po natin ang hirap ng training na pinagdaraanan ng ating mga atleta. Madalas naisasantabi ang kanya-kanyang mga personal na pangangailangan upang matutukan ang pagsasanay. 

Upang pandayin ang kanilang mga talento at kakayahan, madalas higit pa sa panahon ang kailangang ialay. Dugo at pawis ang puhunan ng mga kumikinang na medalya at pagkilala.

Ito ang kapalit ng lahat ng iyon… at masasabi naman nating sulit dahil hindi lamang personal na tagumpay ang inyong nakamit kung hindi isang testamento sa buong mundo na ang Pilipinas ay hindi pahuhuli.

In the global stage, you have proven how the Filipino resilient spirit will always shine through… no matter the challenges and hurdles thrown your way. Against the odds, you have not only etched your legacy, you have paved the way for aspiring Filipino athletes to follow in your footsteps.”

Sila ay panghabambuhay na magsisilbing inspirasyon na siya namang tutularan ng mga susunod sa kanilang mga yapak. Ang kuwento nila ang pinakamalinaw na pruweba na ang Pilipinong masikap at mahusay ay Pilipinong nagtatagumpay.

Ang makasaysayang ambag nila sa ating bayan ay nararapat lamang kilalanin at bigyang papuri dahil ang tagumpay nila ay tagumpay ng buong bayan. 

Kaya tiyak na hero’s welcome ang mag-aabang sa kanila ngayong Lunes sa nakatakda nilang pagdating sa Senado. At muli, sa araw na ito, sasaluduhan natin ang tibay ng dibdib na ipinamalas nina Caloy at ng buong Philippine Team.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com