Infectious Disease Center, tulong sa mga may nakahahawang sakit

ni Bong Revilla @Anak ng Teteng | September 4, 2024

Pinangunahan natin ang groundbreaking ceremony ng Vicente Sotto Memorial Medical Center (VSMMC)-Infectious Disease Center sa Cebu City nitong nakaraang Huwebes, Agosto 29.

Ang VSMMC Infectious Disease Center ay apat na palapag na gusali na magsisilbing pasilidad para sa makabagong laboratory at isolation place upang tukuyin at maiwasan ang pagkalat ng mga nakahahawang sakit.

Sa pamamagitan natin, nakapaglaan ng pondo sa kasalukuyang national budget para sa pagpapatayo ng nasabing gusali.

Dinaluhan din ang nasabing okasyon nina Department of Health (DOH) Secretary Teodoro Herbosa, VSMMC Medical Chief Dr. Gerardo Aquino, Jr., at mga kongresista sa Cebu City.

Ang Infectious Disease Center na ito ay magiging simbolo ng ating dedikasyon, hindi lamang sa paggamot ng sakit, kundi sa pag-iwas at pagpigil dito. Dahil matitiyak nating mas handa tayo sa anumang pagsubok pagdating sa pakikibaka sa problema sa kalusugan. 

Lalo pa at napakaraming nakamamatay na sakit ang nagsusulputan na kailangan talaga nating paghandaan. Sana mula rito ay makita natin ang liwanag ng bagong pag-asa, isang pangarap na nagtutulak sa atin tungo sa isang mas ligtas na bukas.

Napapanahon ang Infectious Disease Center na ito lalo pa at mismong ang World Health Organization (WHO) na ang nag-anunsiyo hinggil sa kailangang paghahanda ng bawat bansa sa patuloy na pagtaas ng kaso ng monkey pox (mpox).

Kinumpirma naman ng DOH na gumaling na ang 33-anyos na lalaking pinakahuling nagpositibo kamakailan sa mpox at pinayuhan na umuwi sa kanilang bahay.

Nabatid na lumang variant ng mpox ang tumama sa lalaki. Hindi umano ito katulad ng clade 1-b variant sa Africa ngayon na nakamamatay.

Binanggit pa ng DOH na hindi na pina-quarantine ang 40 naging close contact ng lalaki maliban na lamang kung magkaroon sila ng sintomas.

Sa ngayon ay negatibo sila sa mpox kahit na ang mga miyembro ng pamilya ng carrier.

Sinabi pa ng DOH na sa 10 tinamaan ng mpox sa bansa, lahat sila ay hindi nakahawa sa mga miyembro ng kanilang pamilya.

Target na sa kasalukuyan ng WHO na magpatawag ng pulong sa expert committee para pag-usapan ang problema ng mpox outbreak sa iba’t ibang bahagi ng daigdig partikular sa Africa.

Simula Setyembre noong nakaraang taon, nagkaroon na ng pagtaas sa kaso ng naturang sakit sa Democratic Republic of Congo na pinaniniwalaang kumalat na rin sa iba pang mga African country -- kinokonsidera nila ang lahat ng factor kung kailangan nang pulungin ang International Health Regulations Emergency Committee para kilusan ang nasabing problema.

Ang mpox ay isang nakahahawang sakit dulot ng virus na naililipat sa mga tao mula sa mga hayop. Posible rin ang human to human transmission sa pamamagitan ng physical contact. Una itong nadiskubre noong 1970 sa Democratic Republic of Congo kung saan ang mga senyales nito ay lagnat, pananakit ng kalamnan, skin lesions at iba pa.

Ang isinagawa nating groundbreaking sa VSMMC - Infectious Disease Center sa Cebu City ay isang malaking tugon sa panawagan ni Pangulong Ferdinand “Bongbong” Marcos Jr. (PBBM) na huwag ipagwalang-bahala ang mabilis na pagkalat ng mga nakahahawang sakit tulad ng mpox upang hindi na lumala, na sa huli ay saka tayo maghahabol kung paano ito mareresolba.

Patunay lamang ito na hindi nagpapabaya ang pamahalaan sa pagkalinga partikular na sa pagpapabuti ng kalusugan ng ating mga kababayan.

Bago pa man nakapasok sa ating bansa ang mpox ay makailang ulit nang nagbigay ng babala ang DOH ng ibayong pag-iingat ngunit sadyang matindi ang mpox dahil ngayon ay nagsisimula nang maminsala sa bansa.

Ngunit ang mahalaga ay gumagawa tayo ng paraan hindi lang sa mpox kundi sa marami pang infectious disease na magpapahirap sa mga kababayan.

Ngayong mayroon nang VSMMC - Infectious Disease Center sa Cebu City ay malaking tulong ito para sa pagsugpo sa mga nakahahawang sakit at malay mo masundan ito sa iba pang lalawigan dahil sa ating pagsisikap — kaya walang makapagsasabi.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Kalagayan ng mga OFW sa HK, tutukan natin

ni Bong Revilla @Anak ng Teteng | August 28, 2024

Personal tayong nagtungo sa Hong Kong noong nakaraang Linggo upang mabisita at makamusta ang napakarami nating overseas Filipino workers (OFWs) doon. 

Hindi ko napansin ang malayong paglalakbay para makarating ng Hong Kong dahil sa unang pagdating pa lamang ay libu-libong kababayan na natin ang sumalubong at lahat ay tuwang-tuwa sa ating pagdating — marami rin ang naluluha dahil sa kaligayahan. 

Ilang grupo ng ating mga kababayan sa Hong Kong ang nakipag-ugnayan sa atin para sa isang meet and greet na agad nating pinagbigyan at hindi nga tayo nagkamali ng pagpapaunlak dahil ramdam na ramdam natin ang kanilang pangungulila sa ating bayan at lalo na sa kanilang mga mahal sa buhay. 

Nawa ay naibsan natin kahit bahagya ang lungkot na nararanasan nila sa kanilang pananatili sa ibang bansa para lamang maitaguyod ang kani-kanilang pamilya dahil hindi biro ang maghanapbuhay abroad — kaya nga sila tinawag na bayani ng makabagong panahon dahil sila ang mga mandirigma na nagbubuwis ng buhay para labanan ang kahirapan. 

Sa totoo lang ay may opisyal tayong lakad sa lugar na iyon nang makipag-ugnayan sa atin ang ilan sa mga kababayan kung saan marami sa mga OFW ang day off at nagtitipun-tipon lang sa isang kilalang lugar sa HK. 

Hindi na tayo nagdalawang-isip at agad nating tinungo ang naturang lugar kung saan nagkukumpulan ang ating mga kababayan at mula doon ay walang humpay na ang ingay at lahat ay sumalubong, yumakap at humalik na daig pa ang kanilang kamag-anak na hindi nila nakita sa napakahabang panahon. 

Bahagya tayong tumigil at nakipagkuwentuhan sa mga kababayang OFW at doon ay medyo napaluha tayo sa iba’t ibang kuwento na kanilang ibinahagi, ngunit sa kabuuan ay maayos naman ang kanilang kalagayan -- lamang ay hindi maiiwasan na may iba tayong kababayan na hindi pinalad sa kanilang pinapasukan at nais na lumipat ng trabaho. 

Inipon naman natin ang lahat ng kanilang mga sumbong at sisikapin nating maiparating sa kinauukulan ang kanilang mga kahilingan sa legal na paraan. 

Sa ilang sandaling pakikipagniig natin sa mga OFW ay kita-kita natin ang kanilang pananabik at dahil dito ay tiyak na muling mauulit ang pagbisita nating ito sa kanila hindi lang sa Hong Kong kundi sa napakarami pang bansa para mabigyan din natin sila ng pagkalinga kahit sandali. 

Ang mga kababayang umiiyak sa ating pagdating ay pawang mga nakangiti na sa kanilang pag-alis na tila punumpuno ng lakas para sa panibagong pakikibaka sa kanilang pananatili roon bilang manggagawa. 

Dahil sa pangyayaring iyon ay nabuo sa aking isipan na ang pagdalaw ko sa kanila ay nagbigay ng malaking kasiyahan at kahit paano ay naibsan ang kanilang pangungulila, kaya sisikapin kong maulit pa ito basta’t itutulot lang ng pagkakataon.

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Tuloy ang pag-abot ng tulong kahit walang kalamidad

ni Bong Revilla @Anak ng Teteng | August 27, 2024

Marami ang nagtatanong sa atin kung kailan tayo magtutungo sa kanilang lugar para mamahagi ng tulong at ang lagi nating pagtitiyak ay huwag silang mainip dahil siguradong maaabot natin sila.

Ito ay matapos nilang mabalitaan na patuloy pa rin tayo sa pagbibigay ng tulong sa iba’t ibang bahagi ng bansa at ang pinakahuli nating dinayo ay ang mga bayan ng Tiaong, Candelaria at Sariaya, na lahat ay nasa lalawigan ng Quezon.

Sa tulong ng aking staff sa Bayanihan Relief ay regular natin itong ginagawa na tila isang caravan sa maraming lugar sa bansa partikular sa mga naging biktima ng kalamidad na hanggang sa kasalukuyan ay nahihirapang umahon.

Sa pamamagitan ng Assistance to Individuals in Crisis Situation (AICS) ay inayudahan natin ang maraming mahihirap na lahat ay tumanggap ng pantawid-panggastos sa kanilang pang-araw-araw na pamumuhay.  

Mahigit sa 6,000 katao ang nabiyayaan sa pagtungo natin sa naturang lugar at nakatakda pa tayong maglibot sa marami pang barangay na regular naman nating ginagawa may kalamidad man o wala.

Nakakatuwa na sa mga lugar na ating pinupuntahan ay hindi pa rin nawawala ang init ng pagsalubong sa atin ng marami nating kababayan na lalong nagbibigay sa atin ng inspirasyon sa pagpapatuloy ng ginagawa nating serbisyo-publiko.

Sa bawat yakap at halik na ipinagkakaloob ninyo sa akin ay mabilis na napapawi ang aking pagod at maraming salamat sa inyong lahat dahil hindi kayo nagbabago sa akin — kaya makaaasa kayong hinding-hindi rin ako magbabago.

Napakainit ng pagtanggap sa atin ng mga taga-Quezon. Hindi sila magkamayaw sa ating pagdating, nagsisigawan sila sa tuwa na parang sabik na sabik sa atin kaya naman lahat ay pinaunlakan nating makapagpakuha man lamang ng larawan kahit siksikan.

Isa rin ito sa nakatutuwa sa regular nating pag-iikot sa iba’t ibang bahagi ng bansa dahil sa tuwing maluwag ang ating schedule ay sinisikap nating mapuntahan ang mga lugar na naapektuhan ng mga kalamidad — tulad ng bagyo, lindol at iba pa.

Pero, kung wala namang nagdaang kalamidad ay umiikot pa rin tayo para puntahan ang iba pa nating kababayan na nangangailangan gaya nga ng ginawa natin sa lalawigan ng Quezon kung saan ang babait ng mga residente roon.

Hindi pa uso ang pamamahagi ng ayuda ay ginagawa na natin ito, kaya huwag mainip ang iba pa nating kababayan dahil isang araw ay bigla na lamang kaming darating sa inyong mga lugar para mamahagi ng tulong.

Wala naman akong ibang gusto pa sa buhay ko kundi ang mapasaya kayong lahat dahil kapag nakikita ko kayong masaya ay mas dobleng kasiyahan ang aking nararamdaman.

Isa rin ito sa paraan ko para makapagpasalamat sa Panginoon — ang kalingain ang mga kababayan kong mahihirap dahil hindi Niya ako pinababayaan at ang aking pamilya.

Mula bata pa ay biniyayaan na ako ng mapagmahal na magulang na silang nagtaguyod sa akin upang maging artista hanggang sa makilala ako at ngayon ay iniluklok pa ninyong senador kaya marapat lamang na bumawi ako dahil kung hindi sa inyong suporta ay wala ako ngayon sa aking kinalalagyan.

Kaya itong ginagawa kong pag-iikot sa tulong ng aking Bayanihan Relief (BR) ay lalo ko pang paiigtingin para lahat ay aking maabot at mabigyan ng ayuda kahit pa walang kalamidad.

Araw-araw ang aking mga staff sa Bayanihan Relief ay nag-iimpake ng mga relief goods sa panahong hindi kami nakakapag-ikot upang sakaling may dumating na kalamidad ay handa kami anumang oras na may mangailangan ng tulong -- ganyan lang umiikot ang aking buhay.

Kapag may pasok sa Senado ay maaga tayong dumadalo sa mga pagdinig at kung wala naman ay abala tayo sa pagtugon sa ating mga kababayan.

Kung may extra pa tayong oras ay doon lamang natin naisisingit ang paggawa ng palabas sa TV at iba pang showbiz activities dahil may obligasyon din tayo sa ating mga tagasubaybay bilang artista at para may maipamahagi naman tayong ayuda sa iba pa nating kababayan.

Ang pinakapahinga natin sa bahay ay ang paggawa ko ng mga panukalang batas para makatulong naman sa mga manggagawa tulad ng teacher at mga overseas Filipino workers (OFWs) upang madagdagan din ang kanilang mga benepisyo.

Tayo rin ang may-akda na hindi dapat palaging kumukuha ng bagong birth certificate ang sinumang mangangailangan nito — ibig sabihin kahit luma ay may bisa ang dokumentong ito.

Sa dinami-dami ng iniakda natin patungkol sa pakinabang na dapat makuha ng mga senior citizen ay nag-iisip pa tayo ngayon kung paano mapapalakas ang kanilang discount card dahil sa piling mga bayarin lamang ito gumagana, at karaniwan ay binabalewala pa sila ng ibang establisimyento na ayaw magbigay ng diskuwento.

Pangarap ko lang sa ngayon ay maisaayos ko lahat ng mga benepisyo at iba pang maaaring pakinabangan ng mga kababayan sa pamamagitan ng pagsusumite ng mga panukalang batas at sana ay huwag tayong magkaroon ng karamdaman para maisagawa natin ito.

Sa mga manggagawa sa showbiz industry ay hindi rin naman tayo nagpapabaya. Umiiral naman na ang Eddie Garcia Law na nagpalakas nang husto sa karapatan ng mga manggagawa sa showbiz, na atin ding tinutukan.

Marami-rami na rin naman ang iniakda nating batas na ngayon ay pinakikinabangan ng ating mga kababayan at marami pa ang nakasumite na kasalukuyan nating inilalaban ng pukpukan sa Senado. Naniniwala ako na tulad ng mga lumusot nating panukala ay magiging batas din ang mga ito sa tamang panahon.

Sana magkita-kita tayo ‘pag nagawi na ako sa inyong lugar.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com