Muli tayong sasabak sa pagka-senador sa 2025 Election

ni Bong Revilla @Anak ng Teteng | Oct. 9, 2024

​Noong nakaraang Lunes, Oktubre 7 ay pormal na tayong nagsumite ng certificate of candidacy (COC) sa Manila Hotel kasama ang aking buong pamilya at sa kauna-unahang pagkakataon ay sumama rin ang anak kong abogado na si Inah Revilla na lalong nagpalakas ng aking loob para muling sumabak sa aking kandidatura bilang senador sa 2025 midterm elections. 

Tatakbo tayo sa ilalim ng Lakas-Christian Muslim Democrats (Lakas-CMD), ang pinakamalakas at pinakamalaking partido sa kasalukuyan kung saan ako mismo ang chairman. Ako ay kaanib ng Lakas-CMD simula pa noong ako ay unang pumalaot sa pulitika tatlong dekada na ang nakararaan. 

Kaya naman nitong Lunes ay pormal na nating sinelyuhan ang ating kandidatura sa pagka-senador sa darating na halalan. Ang inyong lingkod, na sa loob ng tatlong termino bilang mambabatas sa Senado na pinagkatiwalaan ng sambayanan, ay muling lalaban at titindig para patuloy na maging tagapagsulong ng kapakanan ng bawat isang ordinaryong Pilipino.

Bahagi tayo ng Alyansa Para sa Bagong Pilipinas Senate slate ni Pangulong Ferdinand Bongbong Marcos, Jr. (PBBM) na binubuo ng 12 senatorial candidates mula sa iba’t ibang major political parties sa bansa kabilang ang Lakas-CMD.

Nagpapasalamat ako sa ating Pangulo at kay Lakas-CMD President Speaker Martin Romualdez sa tiwala na pinagkaloob nila sa akin upang maging isa sa mga kandidato na ilalaban ng Alyansa Para sa Bagong Pilipinas. It’s an honor to run under this slate whose great aspiration is to stand up for the welfare, interests, and rights of every Filipino.

Nagsilbi na tayo ng tatlong termino sa Senado (2004-2010; 2010-2016; 2019-hanggang sa kasalukuyan) at naging kasangkapan  sa pagpasa ng maraming landmark laws na direktang magbebenepisyo sa maraming Pilipino hanggang sa kasalukuyan kabilang dito ang “Kabalikat sa Pagtuturo Act” (RA 11997), Expanded Coverage of Centenarians Act (RA 11982), “No Permit, No Exam Prohibition Act” (RA 11984), “Free College Entrance Examinations Act” (RA 12006), Granting Night Shift Differential Pay to Government Employees (RA 11701), at “Permanent Validity of the Certificates of Live Birth, Death, and Marriage Act” (RA 11909). 

Ako rin ang author ng batas upang maging lehitimo na ang mga batang isinilang sa labas ng pagsasama ng legal na mag-asawa at idagdag pa ang motorcycle helmet act, at napakarami pang iba.

Hindi naman sa pagyayabang ngunit ako ay nagtala ng perfect attendance sa Senado at nakapagsumite ng kabuuang 1,979 bills and resolutions, kung saan 339 sa mga ito ay umiiral ng batas.

Sa ating halos dalawang dekadang paninilbihan bilang senador, marami na tayong naipasang mga batas na talagang pinakikinabangan ng ating mga kababayan. Hindi natin sinayang ang tiwala ng sambayanang Pilipino. Sinigurado ko na bawat sentimo na pinapasahod sa akin gamit ang buwis ng taumbayan, naibalik natin sa kanila sa pamamagitan ng pagsusulong at pakikibaka sa pagpasa ng mga makabuluhang batas.

Kaya nang tanungin tayo ng mga sumalubong sa ating media hinggil sa mga balakin natin para sa ikaapat na termino natin sa Senado ay sinabi kong ipagpapatuloy natin ang pakikipaglaban sa social justice, kapakanan ng mga manggagawa, seguridad sa pagkain, public infrastructure, at karagdagang benepisyo pa para sa mga government employee. 

I am happy to say that because of the people’s trust, I was able to deliver my pact with the people. Ngayon, muli kong iniaalok ang aking kakayahan sa ating mga kababayan para patuloy silang paglingkuran.

While we have accomplished so much, work never ceases and there is still much to be done. Kagaya ng pagtugon sa pagtaas ng presyo ng bilihin, paghahatid ng pagkain sa bawat hapag, mga programa para sa mga magsasaka at mangingisda, pagbibigay solusyon sa baha, pagbubuo ng makabagong Philippine Building Code, pagsasaayos ng retirement system sa hudikatura, dagdag benepisyo para sa mga barangay worker, nurses, guro, at iba pa. Ayan ang ating mga isusulong kung tayo ay muling mabibigyan ng pagkakataon upang makapaglingkod para sa ating ikaapat na termino.

Ang midterm election ay nakatakda sa Mayo 12, 2025 kung saan 12 senador ang kailangang ihalal.

Kung ibabase natin sa track record ay kitang-kita naman na hindi tayo nagbutas lang ng upuan sa Senado. Posibleng mapalawak pa natin ang tinatamasang benepisyo ng ating mga senior citizen na tayo rin naman ang may akda.

Kaya naniniwala akong hindi naman tayo pababayaan ng ating mga tagasuporta. Sabagay matagal pa naman ang campaign period at hindi ko kailangang isa-isahin pa ang ating mga nagawa sa Senado pero halos dalawang libong bills at resolusyon lahat ‘yan — hindi na masama.

Wala naman tayong ibang hangad kundi ang mapabuti ang kalagayan ng ating mga kababayan at hindi na ito pangako dahil nagawa na natin ang marami sa mga ito at napakarami ko pang nagawang panukala na hindi pa naisusumite.

Ito rin ang dahilan kaya nais ko na muling tumakbo bilang senador dahil gusto kong ipagpatuloy ang santambak na inihanda ko pang panukala para sa kapakanan ng ating mga kababayan.

Mahirap lang kasing magsalita, pero kung ihahambing sa iba pang senador ang ating mga nagawa — hindi man tayo nangunguna ngunit sigurado akong hindi tayo nahuhuli dahil halos 400 batas ang ating naipanalo na ngayon ay pinakikinabangang batas na ng bawat Pilipino.

Ayoko namang ipamukha sa taumbayan ang aking mga nagawa — ngunit dinaluhan natin lahat ng mga lugar na naging biktima ng kalamidad at nabahaginan natin ng ayuda tulad ng food packs at cash assistance sa tulong ng ating Bayanihan Relief (BR) staff na araw at gabing naghahanda para makapagbigay ng tulong sa ating mga kababayan.  

Matapos ang napakaraming pagsubok — heto at nabigyan tayong muli ng pagkakataong mapasama sa Alyansa Para sa Bagong Pilipinas Senate slate ni PBBM na may pinakamalinaw na adhikain kung paano isasaayos ang bansa at kung paano mapapalawak pa ang benepisyo ng ating mg kababayan. Saan pa ba tayo? Alam na this!

Anak Ng Teteng! 

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Tagumpay ang pagbisita natin sa Mindanao

ni Bong Revilla @Anak ng Teteng | Oct. 3, 2024

​Bilang bahagi ng ginagawa nating pagbisita sa mga lugar na nangangailangan ng tulong ay nagtungo tayo sa Mindanao. Inalam natin ang kalagayan ng ating mga kababayan doon at namahagi tayo ng ayuda na regular nating ginagawa simula nang muli tayong mahalal bilang senador.

​Sa tulong ng aking staff sa Bayanihan Relief (BR) Team ay dumating kami ganap na alas-7:30 ng umaga sa Cotabato airport at agad kaming nagtungo sa oath taking para sa mga bagong miyembro ng Lakas-CMD kung saan doon na rin kami nag-breakfast.

Bandang alas-8:30 ng umaga ay namahagi na kami ng tulong sa bayan ng Sultan

Kudarat sa Maguindanao del Norte sa pamamagitan ng Assistance to Individual in Crisis Situation (AICS) ng DSWD na dinaluhan din nina Cong. Dimple Mastura at Vice Mayor Shameem Mastura kung saan ay umabot sa mahigit 2,500 katao ang nakinabang sa ipinagkaloob na P2,000 sa bawat isa.

​Kasunod nito ay bumiyahe na kami patungong Datu Odin Sinsuat sa Maguindanao del Norte pa rin at doon ay namahagi kami ng AICS na umabot sa kabuuang P4 milyon at nabiyayaan ng tig-P2,000 ang bawat dumalo na nakasama natin si Mayor Lester Sinsuat.

​Bandang alas-11:30 ng umaga ay bumiyahe na kami patungong Datu Abdullah Sangki sa Maguindanao del Sur, kung saan sinalubong kami ni Gov. Bai Mariam Mangudadatu at sabay-sabay na kaming nananghalian.

​Ala-1:00 ng hapon ay nagtungo na kami sa DOME Sports Complex at muli ay namahagi tayo ng karagdagang P4 milyon at tumanggap uli ng tig-P2,000 ang bawat benepisyaryong dumalo.

​Agad tayong nagtungo pagkatapos ng pamamahagi sa lalawigan ng Sultan Kudarat at doon kasama si Gov. Datu Pax Ali Mangudadatu ay panibagong P4 milyon ang ating ipinagkaloob sa mga kababayan na nakinabang ng tig-P2,000.

​Makaraan ito ay lumipad na tayo patungong Water Camp Resort sa Kawit, Cavite dahil dumalo naman tayo sa oath taking ng mga bagong miyembro ng Lakas-CMD sa unang distrito ng Cavite na dinaluhan din ng kanilang kinatawan sa Kamara na si Cong. Jolo Revilla.

​Nakalulungkot nga lamang dahil panahon na ng galawan ng mga kandidato at ang matagal na nating aktibidades na tulad nito ay hindi maiiwasang makulayan ng pamumulitika ngunit sa maraming bayan na napuntahan na natin ay alam nilang matagal na natin itong ginagawa ng buong puso at ang intensyon ay ang pagtulong.

​Mayroon tayong team ang Bayanihan Relief na walang ibang ginawa araw-araw kundi ang magbalot ng mga food packs na ipamamahagi sakaling may dumating na kalamidad bilang paghahanda. Ito ang dahilan kung bakit napakabilis ng ating pagtugon sa mga nasalanta ng kalamidad dahil palagi tayong nagpe-prepare.

​Kung wala namang kalamidad ay binibisita natin ang mga lugar na alam nating maraming nangangailangan ng tulong kaya tayo napadpad sa Mindanao nitong nakaraang Setyembre 30 at nagpapasalamat nga tayo sa mainit na pagtanggap ng mga residente dahil ramdam na ramdam natin ang kanilang pagmamahal.

​Sa ngayon ay maraming lokal na pamahalaan ang nakikipag-ugnayan sa ating tanggapan dahil humihiling na bisitahin din natin sila kaya ngayon ay nakahanay na ang mga lugar na ating pupuntahan sa mga darating na araw.

​Habang tinitipa ko ang artikulong ito ay doble na naman ang ating paghahanda dahil sa

Bagyong Julian na may dalang malakas na ulan at sana ay wala namang grabeng masalanta lalo pa at nalalapit na ang Kapaskuhan.

Napakabigat sa loob na tingnan habang namamahagi tayo ng tulong sa ating mga kababayan na grabeng nasalanta ng kalamidad — mahirap isipin na marami ang nagsasaya ngunit may mga iba na nagdurusa sa sitwasyon.

​Kaya dapat ay araw-araw tayong naghahanda — tulungan natin ang barangay sa paglilinis ng kapaligiran lalo pa’t panahon ng tag-ulan para hindi magbara ang mga basura at hindi na magbaha.

​Sa ganitong paraan ay walang maaapektuhan at sama-sama tayong sasalubong sa Pasko ng masaya at walang nasalanta. Sakaling bumisita ako sa inyong lugar sa mga darating na araw ay nais ko kayong datnan na nakangiti at bibigyan ko kayo ng biyaya na karagdagan na lamang sa pagdiriwang natin ng Kapaskuhan at hindi dahil sa biktima kayo ng kalamidad.

​Pansamantala ay aasikasuhin natin ang pagpa-file ng ating candidacy upang makapangampanya tayo ng legal kapag panahon na ng pagpapatupad nito — dahil muli tayong tatakbo bilang senador at napakarami pa nating isinumiteng panukalang batas na hindi pa natin natatapos para sa kapakanan ng ating mga kababayan.

​Kailangan talagang mag-asikaso dahil medyo mahigpit ngayon ang Commission on Elections at bawal na ang substitution maliban na lamang kung namatay o nadiskuwalipika ang isang kandidato.

Napakarami nating tagasuporta ang malulungkot kung hindi natin masisiguro ang ating kandidatura para sa darating na eleksyon ngunit hindi naman ito magiging dahilan para maantala ang ating isinasagawang pagbisita sa iba’t ibang bahagi ng bansa para mamahagi ng ayuda.

​Tinatawagan din ang ating mga tagasuporta at iba pang supporters na sumasama sa filing ng candidacy ng kani-kanilang kandidato na huwag masyadong magpadala sa emosyon na posibleng humantong sa kaguluhan, dahil minsan ay mayroong nangyayaring asaran sa magkakaibang grupo na madalas ay nauuwi sa kaguluhan.

​Alalahanin nating isang araw lang ang eleksyon at makabubuting ligtas tayo upang masaya nating makasama ang ating pamilya ng walang pangit na nangyari lalo pa’t malapit na nga ang Pasko. Mas maganda pa ring makita kayong ligtas at sa balota n’yo na lamang ipakita ang inyong suporta.

​Anak ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Mga Kabitenyo, nabiyayaan sa Bagong Pilipinas Serbisyo Fair

ni Bong Revilla @Anak ng Teteng | Sep. 30, 2024

Umusad na sa lalawigan ng Cavite ang Bagong Pilipinas Serbisyo Fair (BPSF) ni Pangulong Ferdinand Bongbong Marcos Jr. (PBBM), kung saan umabot sa halos isang bilyong halaga ng iba’t ibang programa ng pamahalaan ang ipinamahagi sa mahigit 120,000 Kabitenyo sa dalawang araw na pagtitipon.

Ayon kay House Speaker Ferdinand Martin G. Romualdez, ang naturang hakbangin ay flagship program ni PBBM upang maipagpatuloy ang direktang serbisyo ng gobyerno sa milyun-milyong Pilipino sa 24 na lugar na binisita na ng nasabing service caravan.

Ang inyong lingkod, kasama ang aking maybahay na si Cong. Lani Mercado-Revilla, ang nag-host ng pinakahuling pagtitipon. Pinangunahan ito ni Speaker Romualdez kasama ng mahigit 200 kongresista at ng 65 na iba’t ibang ahensya ng gobyerno ang paghahatid ng 235 essential programs at services sa higit 120,000 Kabitenyo.

Inihayag ng leader ng 300-plus-strong House of Representatives na ang BPSF ay patunay na walang maiiwan sa Bagong Pilipinas ng ating Pangulo. Dito, mabilis, maayos, maginhawa at masaya ang serbisyong hatid natin sa bawat Pinoy.

Ang mga katagang ito ay umalingawngaw sa libu-libong Kabitenyo na dumalo at nakatanggap ng biyaya sa naturang pagtitipon. P451 milyong cash aid at 255,500 kilo ng bigas ang ipinamahagi sa lahat ng benepisyaryo sa buong lalawigan.

Ang tagumpay ng BPSF ay isang halimbawa ng ating pagkakaisa para tiyakin na maramdaman ng bawat Pinoy ang presensya ng pamahalaan.

Ang mga pangunahing ahensya ng gobyerno, kabilang na ang Department of Social Welfare and Development (DSWD), Department of Labor and Employment (DOLE), at Technical Education and Skills Development Authority (TESDA), ay nakilahok sa naturang caravan. 

Ang DOLE, sa pamamagitan ng kanilang TUPAD program, ay namahagi rin ng short-term employment sa maraming residente, habang ang TESDA naman ay nag-alok ng scholarship program at iba pang training opportunities sa mga Kabitenyo.

Sa pamamagitan nga naman ng mga programang ito, natutulungan natin ang mga kababayan na makabangon at makahanap ng trabaho o kabuhayan.

Ang BPSF ay isang konkretong halimbawa kung paano natin makakamit ang tagumpay lalo pa kung sama-sama at tulung-tulong tayo. Sa pagkakaisa ng lahat, mas mabilis nating nadadala ang serbisyo ng gobyerno sa bawat tahanan.

Kaya nga nais din nating pasalamatan ang kinatawan ng mga lokal na pamahalaan na umalalay upang maging matagumpay ang programang ito ng Presidente sa mga nangangailangan.

Napagtuunan ng pansin sa caravan na ito ang Commission on Higher Education (CHED) Tulong Dunong scholarships, na nagbigay ng pagkakataon sa mga estudyante at ang Ayuda para sa Kapos ang Kita Program (AKAP) ng DSWD na namahagi ng cash assistance sa 70,000 indibidwal.

Hindi lang sa caravan na ito magwawakas ang pagbibigay ng tulong pinansyal dahil patuloy pang iikot sa iba’t ibang lalawigan sa buong bansa ang BPSF upang mas marami ang maabot na mga kababayan.

Sabi nga ni PBBM, dito sa Bagong Pilipinas, walang maiiwan. Patuloy tayong magbibigay ng tulong at serbisyo sa bawat sulok ng bansa.

Ang Cavite BPSF ay bahagi lamang ng nationwide caravan na sinimulan ni Speaker

Romualdez, na may planong bisitahin ang may 82 lalawigan sa buong bansa. 

Umabot na pala sa 23 lugar ang naikot na ng BPSF at nasa P13 bilyong tulong ang naipamahagi sa 2.8 milyong pamilya.

Sinabi ng Pangulo na hindi umano sila titigil hangga’t hindi nararamdaman ng bawat Pinoy ang pamahalaan na hindi lang basta presensya kundi magkaroon ng epekto na magpapabago sa buhay ng bawat isa.

Kaugnay nito, ang Pagkakaisa Concert sa NOMO Parking Grounds sa Bacoor, ay dinaluhan ng libu-libong Kabitenyo upang ipagdiwang ang tagumpay ng BPSF.

Patunay ito ng isang pagkilala sa pagsisikap ng pamahalaan sa pagbibigay ng serbisyo sa publiko.

At sa pagpapatuloy ng misyon ng BPSF ay inaasahang mas malayo pa ang mararating at tiyak na maaabot ultimo ang pinakamaliit na barangay sa buong bansa. 

Magkaisa tayong lahat para sa isang bagong Pilipinas, at sama-sama nating iparamdam sa bawat Pinoy ang malasakit at serbisyong handog ng pamahalaan.

Para sa lahat, ang BPSF ay wala palakasan at walang pipiliin kaya nga walang Pilipinong maiiwan ang adhikain ng pamahalaan.

Anak ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com