Hindi kailangang maging choosy sa bakuna

ni Bong Revilla - @Anak ng Teteng | May 24, 2021

Hindi dapat ginagawang problema ng pamahalaan ang kung anu-anong problemang nagsusulputan sa isinasagawa nating vaccination rollout dahil malaking balakid lamang ito sa puntirya nating herd immunity sa ating bansa.

Kahit ang resulta ng pinakahuling survey na isinagawa ng Social Weather Stations (SWS) ay lumalabas na 51% lamang ng mga Pinoy ang may kumpiyansa sa isinagawang pagsusuri ng pamahalaan hinggil sa coronavirus vaccines ay hindi ito problema.

Ang survey ay isinagawa mula Abril 28 hanggang Mayo 2 ng taong kasalukuyan at lumalabas na 51% lamang ng 1,200 respondents ang may kumpiyansa sa proseso ng vaccine screening sa bansa.

Nasa 31% umano ang hindi sigurado habang nasa 17% naman ang talagang walang katiwa-tiwala sa pag­sisikap na ito ng ating pamahalaan upang masugpo ang pagkalat pa ng naturang virus sa pamamagitan ng bakuna.

Ang kumpiyansa sa pagsusuri ng COVID-19 vaccine ay pinangunahan ng Mindanao na may 58%, sinundan ito ng Visayas na may 55%, Metro Manila na may 49% at ang Luzon na may 47%.

Sa mga kababayan naman nating nagpahayag ng buong tiwala sa assessment ng pamahalaan hinggil sa isinasagawang pagbabakuna ay umabot sa 58% ang nagpahayag na nais nilang mabakunahan sa lalong madaling panahon.

Ito ay sa kabila ng paulit-ulit na pahayag ng Department of Health (DOH) na ang mga bakunang nagdatingan na sa ating bansa ay ligtas at epektibo, tanging ang mga bakunang binigyan ng Emergency Use Authorization (EUA) ng Food and Drug Administration (FDA) ang papayagang iturok sa ating mga kababayan.

Bago mabigyan ng EUA ay dumaraan muna ito sa proseso ng matinding pagsusuri kabilang na ang Department of Science and Technology, FDA at ilan pang grupo ng mga eksperto sa bakuna sa ating bansa.

Ang bakuna na binuo ng Pfizer-BioNTech, AstraZeneca, Moderna, Sinovac Biotech, Gamaleya Research Institute, Johnson & Johnson at Bharat Biotech ay pare-parehong pinayagan gamit ang emergency use sa ating bansa.

Tinanong din ng SWS ang mga respondents kung payag ba silang turukan ng COVID-19 vaccine na aprubado ng FDA at 32% lamang ang pumayag, 35% naman ang hindi pa tiyak at nasa 33% naman ang ayaw talagang magpabakuna.

Personal na proteksiyon upang ma­ka­i­­was na mahawa sa COVID-19 ang pa­ngunahing dahilan ng mga nais magpa­bakuna samantalang sa mga hindi pa tiyak kung magpapabakuna at sa mga ayaw talagang magpabakuna ay pare-pare­hong nagpahayag ng takot sa side effects.

Dahil dito ay marami sa ating mga kaba­ba­yan ang namimili ng klase ng brand ng bakuna at kahit saan may nagtuturok ng Pfizer ay dinaragsa ito ng marami sa ating mga kababayan na pinangangambahang maging sanhi pa nang pagkakahawa-hawa imbes na makabuti.

Kaya ipinag-utos na ng Palasyo na ang pagtuturok ng COVID na gawa ng Pfizer-BioNTech sa ating bansa ay dapat mapunta sa hanay ng mga kababayang nating mahihirap na hindi na alintana kung ano ang brand basta’t mabaku­nahan lamang.

Siyempre, sa tuwing may mga gani­tong anunsiyo ay palaging dalawa ang panig na naglalabasan, una ay ang pabor sa magandang adhikain ng pamahalaan at ikalawa ay ang mga regular na kumu­kontra para pahirapin ang sitwasyon.

Napakaganda ng estratehiyang ito ng pamahalaan dahil kung hindi masasa­wata ang pagnanasa ng mga ilan sa ating mga kababayan na maturukan ng Pfizer ay hindi na solusyon ang dala ng bakunang ito kung hindi problema dahil ito pa ang dahilan nang pagpapatumpik-tumpik ng marami.

Aminin man natin o hindi ay umiiral sa ating mga kababayan ang ‘pasosyal na mentalidad’ at kasunod din ng mala­king tiwala na gawa ito ng Estados Uni­dos at ngayon pa lamang ay may naba­basa na tayo komento ng ilang irespon­sable sa social media na “Yuck, ang cheap ng bakuna mo, buti ako Pfizer”.

Kaya kung sa mga pinakamamahirap nating kababayan ituturok ang Pfizer ay marami na ang magdadalawang-isip sa bakunang ito dahil kapag tinurukan ng Pfizer ay tiyak na galing ito sa hanay ng mga kababayan nating tinutulungan ng pamahalaan na hindi naman masama pero ayaw ito ng mga pasosyal.

Malaking bagay din kung wala kahit isang opisyal ng pamahalaan ang mag­papaturok ng Pfizer upang tumaas pa ang kumpiyansa ng ating mga kababayan sa iba pang brand ng bakuna upang maibsan ang mga nagdada­lawang-isip na magpabakuna sa ibang brand.

Kung maaari lamang na huwag na tayong mag-angkat ng Pfizer dahil sa nakaaantala ito sa operasyon nang pagbabakuna lalo pa at nasa 2.2 milyong doses ng Pfizer mula sa COVAX ang inaasahan nating darating sa bansa ngayong buwang ito.

Kaso nga hindi naman maaari dahil sa may hinahabol tayong deadline at nitong Mayo 18 ay nasa 786,528 Pinoy pa lamang ang fully vaccinated, na napakalayo pa sa target ng pamahalaan na mabakunahan ang may 58 milyong Pinoy para maabot ang herd immunity.

Nasa 2.5 milyon pa lamang ang natuturukan ng first dose dahil nga sa naantalang pagdating ng bakuna, ayaw magpabakuna, namimili ng brand ng bakuna at iba pang problema.

Tapos ay paulit-ulit pa ang pahayag ng marami na hindi sapilitan ang pagbabakuna lalo pa at malapit na ang eleksiyon at alam ng ilang pulitiko na naghahanap ng kakampi ang mga ayaw magpabakuna kaya dagdag problema rin ito pero hindi dapat problemahin.

Marami ang nagsasabing dapat dagdagan at itaas pa ang kamalayan ng marami upang makumbinsing magpaba­kuna pero santamabak din ang nagsasa­bing hindi sapilitan ang pagbabakuna kaya nahahati ang direksiyon ng mga opinyon.

Sa mga ganitong sitwasyon ay makabubuting huwag nating gawing problema ang hindi dapat problemahin, basta sa mga nais makaligtas sa pan­demyang ito ay magpabakuna tayo kahit anong brand at sa mga ayaw magpaturok ay iwasan n’yo nang lumabas ng bahay para hindi kayo mahawa sa COVID-19 dahil tiyak na problema ‘yan.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Kalimutan pansamantala ang problema ng bansa

ni Bong Revilla - @Anak ng Teteng | May 21, 2021

Inulan tayo ng mga mensahe sa social media matapos na ipalabas noong Sabado ang ikatlong episode ng Agimat ng Agila na tulad ng mga naunang episode ay muling tinutukan at napanatili nito ang mahigit sa 16 points na ratings.

Grabe ang sinapit ni Major Gabriel Labrador, isang forest ranger na aking ginagampanan, dahil matapos paslangin ang kanyang pamilya at sunugin ang kanilang bahay ay siya pa ngayon ang sinet-up at pinagbibintangang may gawa ng krimen.

Maraming ganitong pangyayari kahit sa tunay na buhay na inaakusahan at sinasampahan ng kung anu-anong kaso kahit imbento lamang para wasakin ang pagkatao ng nais nilang alisin sa kanilang landas o balakid sa kanilang masamang balakin.

Magkahalong tuwa at bahagyang kalungkutan ang ating naramdaman dahil sa iba’t ibang reaksiyon ng ating mga tagasubaybay hinggil sa nagiging takbo na ng istorya ng Agimat ng Agila.

Marami ang nagpadala ng mensahe na bitin umano ang Agimat ng Agila dahil sa hindi umano sapat ang isang oras para sa isang linggo nilang pag-aabang bukod pa sa napakarami ng advertisements.

Sana ay maintindihan ng ating mga tagasubaybay na kaya maraming advertisements ang Agimat ng Agila dahil sa napakataas ng ratings nito at isa ito sa basehan na napakarami ng mga nanonood sa ating programa.

May mga nalungkot sa sinapit ng mag-ina ni Major Labrador na maihahambing pa naman sana sa isang halos perpektong pagsasama ng isang buhay may asawa ang kanilang sitwasyon kapiling ang kanilang nag-iisang anak.

Nakakatuwa ring malaman na maraming bata ang umiyak dahil sa pag-aakalang patay na rin si Major Labrador, ngunit agad ding nagsitahan nang makita nilang iniligtas ito ng Agila na si Mulong sa tulong ni Nanay Berta na ginampanan ni Elizabeth Oropesa.

Tuwang-tuwa rin ang marami sa mga eksenang nakikipag-usap si Nanay Berta sa Agilang si Mulong at nakumpirma nitong si Major Labrador nga ang tamang tao para pagkalooban ng Agimat ng Agila.

Panghihinayang naman ang mga mensahe ng ilan na nalungkot dahil sa pagkasawi ng maybahay ni Major Labrador na si Dr. Myrna Labrador na ginampanan ni Sheryl Cruz dahil sa hindi na nito natanggap ang sorpresang kuwintas na dapat ireregalo sa kanya sa kanilang wedding anniversary.

Takang-taka naman si Alejandro Dominguez na ginampanan ni Roi Vinzon, isang negosyante na kinatatakutan dahil sa pagiging crime lord dahil sa kabila ng mga tama ng baril ni Major Labrador ay hindi na ito matagpuan sa pinangyarihan ng krimen.

Marami rin ang excited dahil sa unti-unti nang nadidiskubre ni Major Labrador ang bisa ng kanyang agimat kabilang na ang pagsinag ng kanyang mga mata na tulad ng isang Agila at napakaganda ng visual effects nito.

Lumakas at lumayo rin ang distansiya nang inaabot ng kanyang pandinig na tulad ng isang agila at dito nga niya naulinigan na ang mismong pagkasawi ng kaniyang mag-ina ay sa kanya pa mismo ibinibintang ng mga pulis.

Sabik na rin ang marami sa ating mga taga-subaybay dahil bago pa nagtapos ang nakaraang episode ay nais nang ipakilala ni Nanay Berta ang agilang si Mulong kay Major Labrador at muli silang magkakadaupang-palad.

Hindi ba’t unang iniligtas ni Major Labrador ang agilang si Mulong nang matagpuan ito na sugatan at pinakawalan lamang ng lubusan nang gumaling at hindi pa alam ni Major Labrador na iniligtas din siya ni Mulong nang pagbabarilin naman siya kasama ang kaniyang mag-ina.

Ito na ang ilan sa mga eksenang pinananabikan ng ating mga tagasubaybay na panay ang reklamo na bitin dahil nais nilang makita ang mga susunod na pangyayari at napakabliis ng phasing.

Isa pa sa pinakamaraming komento ay ang pagtatagpo na namin ng aking leading lady na si Maya Lagman na ginampanan ni Sanya Lopez na hindi akalain ng marami ang bigla kong ginawa kay Maya kung ano ang kahihinatnan.

Sa kabuuan ng mga natatanggap nating komento ay kitang-kita na nagugustuhan talaga ng ating mga tagasubaybay ang Agimat ng Agila at buong puso natin itong ipinagpapasalamat sa inyong lahat

Ganundin ang pagpupugay natin kay Direk Rico Gutierrez dahil sa kaniyang husay sa paggawa ng napakagandang obrang ito at maging ang GMA Network ay buong pagmamalaking inihahandog ang animo’y pelikulang teleseryeng ito.

Siyempre hindi magiging magandang-maganda ng Agimat ng Agila kung wala sina Allen Dizon bilang Capt. Gerry Flores, second-in-command ng Task Force Kalikasan; Michelle Dee bilang Serpenta, isang evil shadow creature.

Kasama rin sina EA Guzman sa papel na Julian at kababata ni Maya; Miggs Cuaderno bilang Bidoy, isang ismarteng bata na napalapit kay Major Labrador; Ian Ignacio bilang Malvar at kasama din sina King Gutierrez, Jhong Cuenca, Mike Lloren, Althea Ablan, Dentrix Ponce, Yuan Francisco, at Seth Dela Cruz.

Ang action-packed fantasy na ito ay pumalo sa 16.3 ang ratings sa unang episode na ang ibig sabihin ay mahigit sa 14 milyong telebisyon sa mga tahanan ang tumutok sa ating palabas ayon mismo sa opisyal na ulat ng Nielsen Phils.TAM NUTAM People Ratings.

At nasundan pa ito ng mas mataas pang ratings na 16.7, isang indikasyon na mas nadagdagan pa ang mga sumusubaybay at sa huling segmet ng Agimat ng Agila ay pumalo pa ang ratings nito sa 18.5.

Kaya sa dami ng kinahaharap na problema ng bansa, sa dami ng mga naglipanang fake news sa social media ay malaking bagay ang Agimat ng Agila upang kahit sandali ay maibsan ang ating stress at pagkainip dulot ng pandemya.

At hindi fake news na maganda talaga ang Agimat ng Agila kaya sa mga hindi makasabay sa ating tinatalakay ay makabubuting tumutok na bukas, Sabado, ganap na alas 7:15 ng gabi sa GMA.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Maraming Pinoy ang mas takot pa sa bakuna kaysa COVID-19

ni Bong Revilla - @Anak ng Teteng | May 19, 2021

Matapos ang ilang linggong pagdaluyong ng COVID-19 sa iba’t ibang bahagi ng bansa ay nakaranas na naman nang paghihigpit ang National Capital Region (NCR) Plus bubble at iba pang lugar sa bansa upang maiwasan ang pagkakahawa-hawa.

Sa pinakahuling anunsiyo ng pamahalaan ay ibinalik na naman ang NCR Plus sa General Community Quarantine (GCQ) na may Heightened Restriction simula Mayo 15 hanggang 31 na kinabibilangan ng Metro Manila, Bulacan, Cavite, Laguna at Rizal.

Ito ang napagkasunduan ng mga nakakasakop na mayor sa pinakahuling pagpupulong dahil sa pakiusap na rin umano ng napakaraming negosyante at mga manggagawa na nais nang magsibalik sa paghahanapbuhay.

Wala namang bagong kautusan dahil ang lahat ng ito ay nagawa na noon at muli lamang ibinabalik sa paghihigpit kapag tumataas na naman ang kaso ng COVID-19 at kapag humuhupa ay muli na namang luluwagan.

Siyempre, lahat naman tayo ay nangangarap na sana isang araw ay matapos na ang pandemyang ito para makabalik na tayo sa dati nating pamumuhay, ngunit napakarami talaga ng mga dapat ayusin para tuluyan na itong masawata.

Maging ang mga desisyon ng pamahalaan hinggil sa quarantine ay tila hindi na ganun kaintertesado ang marami sa ating mga kababayan at tila ayaw nang magbasa o makinig kapag tungkol sa COVID-19 ang pag-uusapan.

Sa katunayan ay libu-libo araw-araw ang nahuhuling lumalabag sa napakasimpleng pagsusuot lamang ng tamang facemask at dahil walang malinaw na panuntunan kung paano papanagutin ang mga lumabag ay hindi nakararamdam ng takot ang marami sa ating mga kababayan.

Masuwerte kung ang isang nasakote na lumabag sa health protocol ay may umiiral na ordinansa kung saan siya naaresto pero kung wala ay walang mangyayari dahil maging ang mga pulis ay takot mabatikos sakaling may mangyaring masama sa mga violator.

Paulit-ulit, pabalik-balik at ‘yan ang ating magiging sitwasyon habang hindi pa natatapos ang pagtuturok ng bakuna sa mga kababayan nating nais magpabakuna ngunit hindi pa kabilang dito ang mga kababayan nating ayaw magpabakuna.

Napakataas ng porsiyento ng mga ayaw magpabakuna kung pagbabasehan natin ang pinakahuling survey ng Pulse Asia kamakailan, ngunit ayon naman sa pinakahuling pahayag ng Inter-Agency Task Force on Emerging Infectious Disease (IATF-EID) ay nadagdagan na umano ang bilang ng mga nais magpabakuna.

Dapat huwag nang magpatumpik-tumpik pa ang ating mga kababayan at habang may pagkakataon ay magpaturok na agad ng bakuna laban sa COVID-19 dahil papalapit na ang napakaraming balakid na maaaring magpabagal sa pagtuturok ng bakuna.

Nand’yan ang paisa-isa nang pagpasok ng bagyo na sinimulan na ng bagyong Crising na nagdala ng malalakas na pag-ulan at pagbaha sa ilang lugar sa Kabisayaan at Mindanao, partikular sa Davao Region at natural lamang na mas unahin ang pagtugon sa kaligtasan laban sa kalamidad.

Idagdag pa rito ang hindi maayos na supply ng kuryente sa mga lalawigan na posibleng makaapekto sa pag-iingat natin sa bakuna na nangangailangan ng tamang temperatura para huwag masira.

Marahil ay napapansin n’yo rin na marami sa mga nais tumakbo sa darating na eleksiyon ay nagsisimula nang magparamdam at gumagawa na ng mga eksena para mapansin at posibleng makadagdag-abala ito sa pagtutok ng ilan nating nanunungkulan na may ibang agenda.

Dagdag-pressure rin ang dumating na bakuna na dalawang milyong AstraZeneca na may expiry date na Hunyo at Hulyo 2021 dahil nasa 1.5 milyong doses ang mag-i-expire sa Hunyo habang sa Hulyo naman ang 500,000 doses.

Kaya dapat mapabilis ang pagtuturok nito dahil kung hindi ito maisasagawa agad ay tiyak na puputaktihin ito ng kabi-kabilang batikos na dagdag-abala na naman para sa mas mabilis na pagtugon laban sa pandemyang ito.

Sa ngayon ay tuluy-tuloy na ang pagdating ng bakuna sa ating bansa mula sa mga bansang China, Russia, United States at Europa at kahit ano pa ang tatak ng bakuna ay atin na itong sunggaban dahil lahat ito ay mabisa laban sa COVID-19.

Ang bansang Israel na ikunokonsiderang may pinakamaraming nabakunahan na sa bilang ng kanilang populasyon ay nakatakda ring magbahagi ng bakuna sa ating bansa para makatulong.

Pinaghahandaan na rin ng pamahalan ang pondo para sa aangkatin pang bakuna para naman sa mga may edad 17 hanggang 1 dahil kailangan talagang mabakunahan ang lahat para magbalik na tayo sa dati nating pamumuhay.

Kaya hangga’t wala pang nangyayaring kalamidad, delubyo o anumang sakuna na posibleng makaaantala sa pagbabakuna — na huwag naman sana ay huwag na tayong magdalawang-isip pa na magpabakuna.

Huwag na tayong dumagdag sa problema ng bansa, dahil ang pagpapabakuna laban sa COVID-19 ay hindi lang pagmamahal sa sarili kung hindi pagpapakita rin nang pagmamahal sa iyong mga kaanak at kababayan.

Marami kasing takot sa bakuna, pero sa COVID-19 na milyon na ang namamatay sa buong mundo ay hindi sila takot.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com