Solusyon sa pagwawakas ng pandemya ang pagpapabakuna

ni Bong Revilla - @Anak ng Teteng | June 04, 2021

Unti-unti nang naiibsan ang pangambang dati-rati ay nararamdaman ng marami sa ating mga kababayan dahil sa paulit-ulit na pagbaba at pagtaas ng kaso ng COVID-19 na kumitil na ng maraming buhay sa panahong ito ng pandemya.

Ito ay matapos na ihayag ng Inter-Agency Task Force for the management of Emerging Infectious Diseases (IATF-EID) na ang Pilipinas umano ay nangunguna na sa kasalukuyan kumpara sa limang naglalakihang Asean countries.

Ibinase ito sa throughput per capita na nag-a-average ng 150,000 jabs sa isinasagawang araw-araw na pagbabakuna, ibig sabihin nito ay ang ating mga health workers ang pinakamabilis na magturok ng bakuna sa ating mga kababayan.

Lumalabas na nitong Mayo 28 ay naabot na natin ang halos limang milyong Pilipino na nabakunahan mula nang magsimula tayong magturok ng iba’t ibang brand ng bakuna na nagdatingan sa ating bansa.

Malaking bagay ang nakikitang mabilis na paggalaw ng ating pamahalaan para agad na matugunan ang kinasasadlakan nating sitwasyon dahil muling nabuhayan ang bawat Pilipino na dati-rati ay halos mawalan na ng pag-asa na makaahon pa sa pandemyang ito.

Nakatutuwang makita na kahit hindi sobra-sobra ang dating ng mga bakuna sa ating bansa ay ramdam ng ating mga kababayan ang pagsisikap ng pamahalaan na lahat ng ating mga kababayan ay mabigyan ng proteksiyon laban sa COVID-19.

Ngayong buwang ito ay nasa sampung milyong bakuna mula sa iba’t ibang manufacturer ang inaasahan nating darating sa ating bansa at bultu-bultong bakuna pa ang paparating na inaasahan din natin sa mga susunod na buwan.

Dahil dito ay unti-unti nang nakikita ang liwanag na matagal na nating inaasam sa oras na tuluyan nang magbukas ang ating ekonomiya at magbalik na sa trabaho ang marami sa ating mga kababayan na nabigyan na ng bakuna.

Kasabay nito ay naglaan ang Department of Science and Technology (DOST) ng 133 milyon upang masusing pag-aralan kung magiging epektibo ba ang pagtuturok ng magkaibang brand ng COVID-19 vaccine sa tao.

Ibig sabihin, ibang brand sa unang turok at ibang brand na naman sa ikalawang turok upang matiyak ang kaligtasan at immunogenicity ng magkahalong bakuna na magkaiba ang brand at magsisimula na ang pag-aaral ng mga eksperto ngayong Hunyo hanggang Nobyembre sa taong 2022.

At kaya ngayon pa lamang ay pinag-aaralan na natin ang pagsasama ng magkaibang brand ng bakuna dahil hindi matiyak na pagdating ng partikular na brand ng bakuna sa ating bansa na mas mabuti na nga namang paghandaan ngayon pa lamang.

Pero siyempre, ipinagdarasal natin na sana ay wala namang maging aberya o shortage sa supply ng mga bakuna para tuluy-tuloy ang pagbibigay natin ng proteksiyon sa ating mga kababayan.

Kaya paulit-ulit ang paalala ng ating pamahalaan na dapat huwag nang magdalawang-isip ang mga kababayan nating hanggang ngayon ay hindi makapagdesisyon kung magpapabakuna ba o hindi.

Alalahanin nating hangga’t hindi nagiging malinaw sa marami nating kababayan na ayaw magpabakuna ang kahalagahan nito ay hindi natin makakamit ang hinahangad na herd immunity na ang kaakibat nito ay pagbubukas na ng ating ekonomiya.

Hati kasi ang pagtrato natin sa ating mga kababayan na ayaw magpabakuna dahil nananatiling hindi dapat pilitin ang desisyon ng pamahalaan sa mga ayaw magpaturok dahil sa iba’t ibang kadahilanan.

Pero walang tigil ang kampanya ng Department of Health (DOH) hinggil sa kahalagahan ng bakuna upang maengganyo at maliwanagan ang ating mga kababayan na ang bakuna ang tanging solusyon para makabalik tayo sa dati nating pamumuhay.

Kapag pinilit ng pamahalaan na magpabakuna ang lahat upang makasiguro tayo na makamit natin ang herd immunity ay tiyak na uulanin naman tayo batikos at kapag minalas-malas ay baka mahaluan pa ng pulitika na mas makapagpalala pa sa sitwasyon.

Hindi tulad ng mga atleta at coaches na nakatakdang nating ilaban sa 31st Southeast Asian Games sa Hanoi, Vietnam ngayong taon ay inobligang magpabakuna dahil kung hindi ay hindi papayagang lumahok sa makasaysayang palaro.

Ang kautusan ay nagmula mismo sa SEA Games Federation na dinaluhan ng ating Philippine Olympic Committee representative at wala tayong magawa kung hindi ang sumunod dahil naiintindihan ng lahat na ito ang tama at ligtas gawin.

Kaya binigyang prayoridad ang mga atleta na mabakunahan sa tulong na rin ng Inter-Agency Task Force for the Management of Emerging Infectious Diseases (IATF-EID) dahil sa patakarang ‘no vaccine, no play’ policy.

Sana ganito na lang sitwasyon ng ating bansa para makasiguro tayo na lahat ay mabakunahan at mailigtas sa nakamamatay na COVID-19 ang mga ayaw magpabakuna nating kababayan, kaso masyadong spoiled ang mga Pinoy.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Pagiging kampeong muli ni Donaire, ipagmalaki natin!

ni Bong Revilla - @Anak ng Teteng | June 02, 2021

Minsan pa ay napatunayan ang kasabihang ‘kalabaw lang ang tumatanda’ makaraang tanghaling pinakamatandang bantamweight champion sa kasaysayan ng boksing sa buong mundo ang Pinoy-pride na si Nonito Donaire, Jr.

Kaya nga agad tayong nagsumite ng resolusyon bilang pagkilala at pagbati sa ipinamalas na husay ng tinaguriang ‘The Filipino Flash’ dahil sa pagkakaagaw nito ng titulo bilang World Boxing Council (WBC) Bantamweight Champion na ginanap noong Mayo 29, 2021 sa Carson, California.

Marami ang namangha sa muling pagbabalik ni Donaire nang humigit-kumulang sa dalawang taon itong nahinto sa paglalaro makaraang pataubin ni ‘Japanese Monster’ Naoya Inoue sa pinakahuli nitong laban noong 2019.

Mistulang batang nagsisimula pa lamang sa boksing ang sabik na sabik magpakawala ng mga suntok ang bagong Donaire na ating nasaksihan dahil sa ipinakita nitong liksi ng mga paa at bilis ng mga kombinasyon ng suntok.

Hindi nakaporma ang lyamado at wala pang talong French-Moroccan fighter na si Nordine Oubaali sa kanilang paghaharap sa Dignity Health Sports Park Stadium sa nabanggit na lugar.

Sa edad na 38-anyos, ang boksingerong Pinoy ay may record na 40 wins, 26 sa mga ito ay knockout na may 6 na talo lamang at halos kinopo nito ang lahat ng round hanggang sa mapabagsak nito ng dalawang ulit sa ikatlong round ang defending champion na si Oubaali.

Si Oubaali na may 17 panalo ay hindi pa nakararanas ng talo at 12 sa mga ito puro knockout kaya marami ang nabigla sa dalawang ulit niyang pagbagsak sa ikatlong round dahil ito pa lamang ang kauna-unahan niyang pagbagsak sa kasaysayan ng kanyang career.

Agad naman itong binilangan ng referee, ngunit nagawa pa rin ni Oubaali na umabot sa ika-apat na round kung saan ay puro malalakas na suntok ang tinamo nito mula kay Donaire na sinundan pa ng mga panibagong kombinasyon hanggang sa ito ay bumagsak dahilan para tuluyan nang itigil ng referee ang laban.

Ang pagkakapanalo ni Donaire ay hindi ordinaryong panalo tulad noong una niyang mapanalunan ang pareho ring titulo noong 2011 nang talunin niya si Fernando Montiel ng Mexico.

Iginuhit ni Donaire ang bagong record sa kasaysayan ng boksing bilang pinakamatandang bantamweight challenger na nakasungkit ng kampeonato at sa pamamagitan pa ng knockout.

Si Donaire na four-division world boxing champion ay isa ring World Boxing Hall of Fame “Most Outstanding Boxer of the Year” sa 2007, at naging “Fighter of the Year” din noong 2012 bago pa muling nagbalik sa larangan ng boksing.

Marapat lang na kilalanin natin ang pagsisikap na ito ni Donaire dahil sa hindi ito tumigil sa kanyang mithiin na maging undisputed bantamweight champion ng buong mundo at patuloy ang kanyang pagsisikap para maipakita ang kanyang pagmamahal sa larangang ito.

Maituturing na inspirasyon si Donaire na sa kabila nang mga kabiguan sa larong ito ay hindi siya natinag at hindi naging hadlang maging ang kanyang edad para makapag-uwi ng karangalan sa ating bansa.

Sa puntong ito ng career ni Donaire ay nagising niya ang natutulog na pag-asa ng maraming manlalaro na labis ding naapektuhan ng kasalukuyang pandemya at muling tumaas ang moral ng mga atletang Pinoy na makapag-uwi rin ng karangalan sa bansa.

Ang pinakahuling tagumpay ni Donaire ay malaking karagdagan para sa kanyang mga narating sa larangang ito bilang mahusay na boksingero at malaking dahilan din para minsan pa nating ipagmalaki na tayo ay Pilipino.

Kaya nga taos mula sa aking puso ang isinumite kong resolusyon sa Senado para bigyang-pagkilala ang napakalaking karangalang inihandog ni Donaire sa ating bansa na muli tayong magkaroon ng WBC Bantamweight Champion.

May nakuha tayong impormasyon na plano ni Donaire na balikan ang tinaguriang ‘Japanese Monster’ na si Inoue, ang boksingerong nagpatumba sa kaniya at halos magpatigil na sa kaniyang pagiging boksingero.

Sakaling magkaroon ng katuparan ang pangarap ni Donaire ay makaaasa siyang nasa likod niya ang sambayanang Pilipino na hindi lang suporta ang kayang ihandog kung hindi ang mataimtim na panalangin na sana ay mapagtagumpayan niya ang inaasam-asam na labang ito.

Muli ay ipinagmamalaki at ikinararangal natin ang ‘The Filipino Flash’ na si Nonito Donaire, Jr. ang ating kampeon. Congratulations Junjun!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Walang tigil na operasyon ng mga ‘COVID-19 transporter’, dahilan kaya ‘di matapus-tapos ang hawaan!

ni Bong Revilla - @Anak ng Teteng | May 31, 2021

Iniulat ng Department of Health (DOH) na nasa 32 hospital sa iba’t ibang lalawigan sa bansa ang dumaranas ngayon ng mga pagsisikip at kakulangan nang paglalagakan ng mga pasyente dahil sa patuloy na pagtaas ng kaso ng COVID-19.

Nabatid na maraming bayan sa iba’t ibang lalawigan ang dati-rati ay wala kahit isang kaso ng COVID-19, ngunit ngayon ay nagsasagawa na ng mga barangay lockdown dahil hindi na mapigilan ang pagkalat ng naturang virus.

Isa sa mga nakikitang dahilan ay ang walang tigil na operasyon ng mga ‘COVID-19 Transporter’ na siyang responsable sa pagpapalusot ng mga walang dokumentong pasahero na negatibo sa COVID-19 kapalit ng malaking halaga.

Matatandaang kamakailan ay nadiskubre ng operatiba ng Department of Transportation (DOTr) ang ilegal na operasyon ng mga kolorum na sasakyang ginagamit para mailusot ang mga pasaherong ayaw nang gumastos at maabala sa swab test.

Napakaraming pasahero ang kanilang nasakote na lulan ng mga kulorum na sasakyang patungong Bicol Region mula National Capital Region (NCR) kabilang na ang Bulacan, Rizal, Cavite at Laguna o ang NCR Plus bubble.

Umabot sa 12 van ang naaktuhang bumibiyahe ng walang prangkisa na siyang responsable sa pagpapasok sa Bicol Region ng mga pasaherong walang kaukulang papeles o swab test at 80 sa mga ito ang positibo sa COVID-19.

Hind lamang van ang ginagamit ng mga COVID-19 Transporter dahil ultimo Sedan, at luxury vehicle ay ginagamit na rin dahil sa dami nang nawalan ng kabuhayan ngayong pandemya at kailangan nilang kumita nang paghulog sa kani-kanilang sasakyan.

Matapos na madiskubre at mailathala ang naturang ilegal na opesayon ay panandalian itong nahinto, ngunit makalipas ang ilang araw ay patuloy na naman ang operasyon na nagresulta na sa pagtaas ng mga kaso ng COVID-19.

Ang resulta, ang lalawigan ng Albay na dati ay halos zero ang kaso ng COVID-19 mula noong Marso noong nakaraang taon ay biglang dumami ang kaso sa loob lamang ng napakaikling panahon tulad na lamang ng Legaspi City, Daraga, Guinobatan, Ligao City, Tabaco City, Bacacay, Libon Oas, Tiwi at Pio Duran.

Hindi lamang ang Albay ang tumataas ang kaso dahil maging ang iba pang bahagi ng Bicol Region tulad ng Camarines Norte at Sur ay kapansin-pansin na rin ang pagtaas ng kaso ng COVID-19.

Isinisisi rin ang pagtaas ng kaso sa ilan nating kababayan na pumapatol din sa ilegal na operasyon ng COVID-19 Transporter para samantalahin ang pagkakataon na makauwi o makaluwas nang madalian at walang swab test, partikular ang mga may nilalakad na papeles sa Maynila.

Sa kasalukuyan ay suspendido pa rin ang biyahe ng mga provincial buses kabilang na ang Albay kaya ang dating mga van na nawalan din ng biyahe sa mga bayan-bayan ay liminya na sa ilegal na gawaing ito.

Bukod pa sa mga pribadong sasakyan tulad ng kotse at SUV na namamasada na rin ay may mahigit 300 van na nakatala sa mga iba’t ibang samahan sa naturang lalawigan ang regular na bumibiyahe ng ilegal.

Mas dumami pa ang online booking at lantaran itong namo-monitor ng mga taga-Albay sa social media at suwabe ang isinasagawang operasyon dahil sa hindi naman pansin ang mga sasakyang ito na wala namang pagkakakilanlan.

Package na ang iniaalok ng mga kulorum at hindi na kailangan pa ng swab test ng mga pasahero dahil sa halagang P3,000 hanggang P5,000 depende sa layo ng ruta ay ihahatid pa ang pasahero sa kani-kanilang destinasyon.

Protektado ang napakalaking operasyon ng mga kulorum dahil centralized na ang online booking at mula alas-3: 00 ng hapon hanggang alas-7: 00 gabi ay walang hinto ang pag-alis ng sasakyan mula NCR plus.

Organisado at walang makikitang terminal ang kanilang operasyon dahil isa-isa nilang sinusundo ang mga pasahero sa mga bahay-bahay base sa mando ng operator online na siyang nakikipagtransaksiyon sa mga nais bumiyahe nang walang problema patungong Albay.

Tinatayang nasa 300 hanggang 400 sasakyan ang labas-masok sa Albay at kung bawat isa ay magbibigay na lamang ng P2,000 para sa lahat na ng check point sa buong lalawigan kada-biyahe ay tumataginting na P800,000 ito sa kabuuan araw-araw.

Dahil may variant na kasalukuyang nakakalat na sa bansa bukod pa sa may community transmission na ay inaasahang lolobo ang mga kaso ng COVID-19 sa mga darating na araw kung hindi pa rin masasawata ang operasyon ng mga transporter na ito.

Ngayong bago na ang pamunuan ng Philippine National Police (PNP) sa pamumuno ni PNP chief Lieutenant General Guillermo Eleazar ay inaasahang matutuldukan na ang matagal nang inirereklamong operasyong ito ng mga COVID-19 Transporter.

Kung noong una pa lamang sana na unang madiskubre ang operasyong ito ay agad nang nahinto ay hindi na sana umabot sa ganitong sitwasyon na dumami pa ang kaso ng COVID-19 dahil sa maya’t mayang paglabas-masok ng mga pasaherong kinukonsinte ng mga nais kumita.

Malaki ang papel ng PNP sa mga checkpoint sa mga boundaries ng bayan-bayan at huwag na ninyong hintaying sorpresahin pa kayo ni Eleazar para lamang matigil ang delikadong sistemang ito.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com