Cebu governor swabbing policy, kapuri-puring inisyatibo

ni Bong Revilla - @Anak ng Teteng | June 11, 2021

Saludo tayo sa naging hakbang ni Cebu Governor Gwen Garcia matapos itong maglabas ng Executive Order na naglalayong ipatupad ang swabbing policy na isang napakagandang hakbang para maibsan ang patuloy na pagtaas ng kaso ng COVID-19 sa kanilang lalawigan.

Kamakailan ay naglabas ng E.O. No. 17 Series of 2021 ang pamahalaan ng Cebu sa pangunguna ni Gov. Garcia at aprubado naman ng Provincial Ordinance No. 2021-04 ng Cebu Provincial Board ang kautusang ipatupad ang Swab-Upon-Arrival Policy sa kanilang lugar.

Isinulong mismo ni Gov. Garcia ang nabanggit na executive order upang atasang isailalim sa RT-PCR swab test ang mga Overseas Filipino Worker’s (OFW’s) at Returning Overseas Filipino (ROF) na nakabase abroad sa oras na bumalik sila sa kanilang probinsiya.

Kung sa loob ng 24-oras ay magiging negatibo ang resulta nito ay agad silang pauuwiin sa kanilang tahanan para sumailalim naman sa 14-araw na quarantine sa ilalim nang pamamahala ng kani-kanilang barangay na alinsunod sa panuntunan ng lalawigan.

Makaraan ang pitong araw ay muli silang isasailalim sa ikalawang swab test na isasagawa naman ng mga representante ng Local Government Unit (LGU) para masigurong wala nang peligro na sila ay makapanghawa pa.

Kaiba ito sa inilabas na panuntunan ng Inter-Agency Task Force for the Management of Emerging Infectious Diseases (IATF-EID) na sa tingin ng mga OFW’s at ROF’s ay nadagdagan ang kanilang sakripisyo, gastos at pagkaantala na makita agad ang kani-kanilang mahal sa buhay.

Base sa IATF-EID ay dapat manatili sa hotel at accredited quarantine facilities nang hindi bababa sa loob ng 10-araw sa oras na lumapag sila sa Cebu at isasailalim lamang sa swab test makalipas ang pitong araw mula nang sila ay dumating.

Dahil dito ay agad tayong nagpadala ng sulat sa tanggapan ni Gov. Garcia upang iparating sa kanya ang ating buong pusong suporta at papuri dahil sa kanyang napakamakataong inisyatibo na bigyang-konsiderasyon ang ating mga OFWs at ROFs na lubhang napakalapit sa ating puso sa gitna ng pandemyang ito.

Ang kanilang pagkabalisa dahil sa kawalan ng seguridad sa kanilang trabaho, pananalapi, kalusugan at kaligtasan habang malayo sila sa kani-kanilang pamilya ay walang katumbas na halaga at ang makauwi at makita ang kani-kanilang pamilya sa pinakamabilis na panahon ang higit na mahalaga.

Kaya ang walang pagsidlang pananabik ng mga OFWs at ROFs ay binigyang tuldok ni Gov. Garcia sa pamamagitan nga nitong “Swab-Upon-Arrival-Policy” na isa talagang kahanga-hangang hakbangin na kinapapalooban hindi lamang ng serbisyo publiko kung hindi ng kabutihan at pagmamahal.

Hindi rin naman sumasalungat sa inalabas na guidelines ng IATF-EID ang swabbing policy na ito ni Gov. Garcia dahil sa halip ay nakatulong pa nga para mapagaan ang sitwasyon ng lahat ng mga bagay-bagay na may kaugnayan sa sitwasyon.

Higit na mahalaga ay nawala na ang dalawang linggong mandatory quarantine sa hotel na talagang napakagastos bukod pa sa sinasabi ng mga eksperto na wala namang pagkakaiba ang swab test sa mismong oras nang pagdating at swab test pagkalipas ng pitong araw na gusto ng IATF-EID.

Isa pa, hindi naman pauuwiin ang mga OFWs at ROFs kung hindi sila negative sa swab test at itutuloy naman nila ang home quarantine, kaya wala namang dapat ipag-alala na sila ay makakapanghawa ng virus.

Bukod sa inyong lingkod ay suportado rin ang swab test policy na ito ng mga Kongresista mula sa pitong iba’t ibang distrito ng Cebu na kahit magkakaiba ang mga paliwanag ay iisa ang pinatutunguhan na sadyang napakaganda umano nito para sa kapakanan ng mga OFWs at ROFs.

Tuwang-tuwa rin si Sen. Juan Edgardo ‘Sonny’ Angara sa pagsisikap na ito ng pamahalaan ng Cebu dahil sa napakalaking tulong at kaluwagan umano ito para sa panig ng mga kababayan nating galing sa ibang bansa partikular ang mga OFWs.

Maging si Senate President Vicente Sotto, III ay nagpahayag na ang inisyatibong ito ay “win-win” situation para sa OFWs, ROFs at sa panig ng pamahalaan partikular ang IATF-EID na nag-aatas ng obligadong quarantine at swab test.

Kaya hindi na tayo nagdalawang-isip na suportahan ito at agad tayong nakipag-ugnayan sa tanggapan ni Health Secretary Francisco Duque, III na siyang Chairman ng IATF upang maresolba na ang mga malilit na detalye na maaring maging hadlang para sa polisiyang ito.

Sa ngayon ay nagpahayag na ng pasasalamat ang maraming OFWs at ROFs dahil sa pagmamalasakit na ito ng provincial governor ng Cebu at walang tigil ang kanilang panalangin na sana ay maipatupad na ito agad-agad nang wala ng anumang problemang kakaharapin.

Buo ang ating pag-asa na ang kabutihan at kahalagahang dulot ng swab policy na ito ay mapapansin ng IATF-EID, sana lang ay tama ang pagkakasuot nila ng facemask para sakto lang sa bibig, ilong at hindi masakop ang mata upang makita nila nang maliwanag ang magandang dulot ng polisiyang ito.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Sa kabila ng pandemya, angat naman tayo sa sports

ni Bong Revilla - @Anak ng Teteng | June 09, 2021

Lalanghap lang tayo sandali ng hangin at saglit muna nating iiwan ang pagtalakay sa COVID-19 dahil marami na sa ating mga kababayan ang bagot na bagot na sa problema sa pandemyang ito.

Pero kahit nasa kasagsagan tayo nang pakikibaka para labanan ang nakamamatay na virus ay may magagandang balita naman na talagang magtataas ng ating moral bilang Pilipino.

Nanaig ang husay ng kababayan nating Bulakenya na si Yuka Saso sa 2021 LPGA US Women’s Open Tournament. Siya ang itinanghal na 76th US Women’s Open Champion na nangibabaw sa kanyang mga kapwa naghuhusayang mga katunggali.

Ibinaon nang husto ni 2018 Asian Games double gold medalist na si Saso ang dalawang birdie sa huling apat na hole upang burahin ang apat na stroke na pagkakaiwan tungo sa pagkapit nito sa isa pang hole na nag-ungos sa kanya sa U.S. Women’s Open sa San Francisco, California.

Relax na relax ang 19-anyos na si Saso at hindi pinansin ang maagang dominasyon ng kapwa nito teenager at 17-anyos na amateur na high school junior sa New Jersey na si Megha Ganne.

Tutok na tutok ang ating pambato bago nito ipinasok ang krusyal na dalawang birdie sa natitira na apat na hole upang kumpletuhin ang ikalawang round sa total na 67.

Dahil dito ay nanatili na lamang si Ganne sa even-par 71 sa second round ng torneo na ginanap sa Olympic Club noong Biyernes at dalawang shot itong napag-iwanan ni Saso.

Si Saso ay unang nagtala ng 69 noong Huwebes bago idinagdag ang 67 sa ikalawang round na pinakitaan nito ng impresibong save par matapos ang tee shot nito ay mapunta sa malalim na damuhan sa ikatlong pagkakataon nito sa huling hole.

Medyo nag-alala ng bahagya si Saso, ngunit ginawa nito ang kanyang pinakamahusay na tira at laking tuwa nito nang magawa niyang maiahon ang bola sa fairway na medyo may kalayuan at kalagkitan ang mga damo.

Samantala si Jeoungeun Lee na 2019 champion ng South Korea ay nagawang i-birdie ang tatlo sa kanyang huling apat na hole para sa 67 at tumapos na isang shot sa likuran ni Saso sa Lake Course.

Tumambla naman ang American na si Megan Khang sa ikatlong puwesto at si Ganne naman ay sa 4-under bumagsak kaya sa kabuuan ay ang Pinoy na naman nag-uwi ng karangalan.

Hindi ba’t noong nakaraang linggo lamang ay nagtala ng bagong record ang Pinoy-pride na si Nonito Donaire, Jr. makaraang tanghalin itong pinakamatandang bantamweight champion sa kasaysayan ng boksing sa buong mundo.

Knockout sa ika-apat na round ang lyamado at wala pang talong French-Moroccan fighter na si Nordine Oubaali sa kanilang paghaharap sa Dignity Health Sports Park Stadium sa Carson, California.

Kaya nga agad tayong nagsumite ng resolusyon bilang pagkilala at pagbati sa ipinamalas na husay ng tinaguriang ‘The Filipino Flash’ dahil sa pagkakaagaw nito ng titulo bilang World Boxing Council (WBC) Bantamweight Champion na ginanap noong Mayo 29, 2021 sa nabanggit na lugar.

Siyempre panibagong resolusyon din bilang pagkilala at pagbati ang ating inihanda para naman kay Saso dahil sa ipinakita nitong husay na sa kabila ng pagiging teenager ay nakapag-uwi na ng karangalan sa bansa.

Ang ating mga atleta ay inaasahang kalahok sa 2020 Summer Olympics sa Tokyo na na-postponed dahil sa pandemya kaya nakatakda itong isagawa sa darating na Hulyo 23 hanggang Agosto 8 ng taong kasalukuyan.

Una tayong sumali sa 1924 Paris Olympics kung saan nanalo tayo ng kabuuang 10 sampung medalya, 3 silver at 7 bronze. Ang unang bronze medal ay una nating nasungkit noong 1928 sa pamamagitan ng swimmer na si Teofilo Yldefonso.

Ang pinakahuli naman nating Olympic medalist na tumangay ng silver medal sa 2016 Rio Games ay ang weightlifter na si Hidilyn Diaz at hanggang sa kasalukuyan ay pangarap pa rin natin ang makasungkit ng gintong medalya.

Sa ngayon ang Philippine Olympic Committee ay nakatakdang magpadala ng kahit 16 na atleta sa Tokyo Olympics at sa pinakahuling ulat ay anim na atletang Pinoy na ang kuwalipikado at inaasahang madadagdagan pa ito.

Nakalulungkot na kinapos ng suwerte ang ating pambato sa Windsurfing na sina Charizanne Napa, Yancy Kaibigan, Gaylord Coveta at Renz Angelo Comboy sa 2021 Mussanah Open na ginanap sa Oman noong nakaraang Abril 1 hanggang 8.

Ang ating Canoe-kayak bets ay umatras naman sa Asian Olympic Qualifier sa Thailand matapos na magpositibo sa COVID-19 ang isa sa ating delegado.

Hindi na rin makalalahok ang pambato natin sa cycling na sina Daniel Caluag at Ariana Dormitoryo sa Olympic slots matapos na bumagsak ang kanilang pinananatiling world ranking para maging kuwalipikado.

Ang ating mga fencer na sina Samantha Kyle Catantan, Nathaniel Perez, Hanniel Abella, Noelito Jose, Jr., Jylyn Nicanor at Christian Jhester Concepcion ay hindi rin nakapasa sa FIE Olympic Zone Qualifying Events for Asia & Oceania na ginanap sa Tashkent, Uzbekistan noong nakaraang Abril 25 hanggang 26.

Ang ating men’s 3x3 basketball team ay bigo ring makaabante sa knockout stages ng FIBA Olympic Qualifying Tournament sa Graz, Austria at si Patrick Bren Coo ay bigo ring makausad 2021 UCI BMX Race World Cup Rounds 3-4 sa Bogota, Colombia.

Maging ang ating pambato sa surfing ay bigong umabante sa ISA World Surfing Games sa El Salvador.

Pero dahil sa ipinakita ni Saso ay napawi ang lahat ng mga kalungkutang ito at buo pa rin ang ating pag-asa na ang mga atleta nating makalulusot sa Tokyo Olympic ay mag-uuwi ng napakailap na gintong medalya na matagal nang minimithi ng ating bansa.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Faceless at nameless sa recruitment ng PNP

ni Bong Revilla - @Anak ng Teteng | June 07, 2021

Isa sa pinakamagandang hakbanging inilunsad ng pamunuan ng Philippine National Police (PNP) ay ang bago nilang sistema na ‘faceless and nameless’ recruitment na kung magtutuluy-tuloy ay kinakikitaan ng malaking pagbabago sa hanay ng kapulisan.

Kakaiba ang naturang sistema dahil wala umanong mukha o pangalang lalabas habang ipinuproseso pa ang isinumiteng aplikasyon ng isang nais pumasok na maging pulis at tanging ang credentials lamang ng aplikante ang pagbabasehan kung tanggap siya sa PNP.

Tanging ang mga aplikante na nais maging pulis na karapat-dapat at pinakakuwalipikado lamang umano ang tatanggapin base sa inilunsad na Comprehensive Online Recruitment Encrypting System (CORES) sa Camp Crame.

Ibig sabihin ay mawawala na ang sistema ng palakasan at padrino na karaniwang nauuwi sa hindi patas na pagpili sa mga aplikante at nawawalan pa ng pagkakataon ang mga aplikante na talagang nais magsilbi ng buong puso sa ating bayan.

Sa bibig na mismo ni PNP chief, Gen. Guillermo Eleazar nanggaling na panahon na umano para wakasan ang bulok na sistema ng ilang aplikante na kumakapit sa matataas na opisyal ng PNP para lamang makapasok sa organisasyon at dito na umiiral ang korupsiyon.

Kamakailan lamang ay isang Staff Sgt. ng PNP ang inaresto dahil sa tumanggap ito ng marked money mula sa operatiba ng Integrity Monitoring and Enforcement Group (IMEG) na aktong tinatanggap ang halagang P100,000 mula sa isang aplikante na nais maging pulis sa Caloocan City.

Kapalit umano ng naturang halaga na makakapasa ang aplikante at tiyak na makakasama sa listahan ng mga magsasanay na bilang bagong pulis at halos kasabay nito ay isa pa ang nasakote sa Taguig City na may kahalintulad ding kaso.

Marami ring aktibong pulis na sa kasalukuyan ang aminadong maging sila ay biktima rin ng ‘lagayan’ para madaling makapasok sa organisasyon at marami rin ang nagsasabing hindi sila naging pulis dahil sa umiiral na lagayan at padrino system.

Sa bagong recruitment scheme ay gagamitin na ang QR (quick response) Code System sa bawat aplikante at wala ng ID na gagamitin sa pagpasok sa loob ng Camp Crame maliban dito.

Tanging ang credentials ng aplikante na lamang ang susuriin kung kuwalipikado ito at nararapat na makapasok sa police force upang pantay-pantay ang magiging pagkakataon ng bawat aplikante at hindi sila masisingitan ng mga ‘bata’ ng mga matataas na opisyal ng PNP.

Sa QR Code System na lamang na ibinigay sa bawat aplikante ipuproseso ang aplikasyon kabilang na ang Body Mass Index at agility test, drug, and neuropsychiatric test, maging ang physical, medical, at dental examinations.

Sa ganitong paraan ay malaya nga namang makapipili ng karapat-dapat na nais maging pulis ang mga opisyal na nakabase lamang sa kuwalipikasyon at hindi nakikita ang mukha at pangalan.

Kasabay nito ay inatasan din ni Eleazar ang IMEG na maglagay ng complaint desk sa lahat ng lugar sa buong bansa kung saan isinasagawa ang recruitment upang madaling mamonitor kung may mga anomalya pa ring nangyayari.

Para sa mga magsusumbong umano sakaling may mga tiwaling pulis na pinahihirapan ang mga aplikante o sinisekretong tutulungan kapalit ng salapi ay agad magpadala ng mensahe sa Facebook Page: Integrity Monitoring and Enforcement Group at Twitter account: @imeg2017 at makakaasang hindi mabubulgar ang inyong pagkakakilanlan.

Sa isinasagawang recruitment sa kasalukuyang taon ay inaprubahan ng National Police Commission ang may 17,134 slots para sa PNP upang mapalitan ang mga nasawing personnel, mapalakas pa ang puwersa, mapalawak ang presensiya ng pulis at paigtingin ang police-to-population ratio para mapanatili ang peace and order sa komunidad.

Kung sa umpisa pa lamang ay masisimulan ng tama ang isinasagawang pagpili sa mga nais pumasok maging pulis ay tiyak na tataas din ang porsiyento ng mga magsasanay at lalabas na mabubuting pulis.

Hindi ba’t kamakailan lamang ay isang pulis na naman ang walang awang binaril sa ilalim ng panga ang isang 52-anyos na babae sa kabila nang pagmamakaawa nito dahil lamang umano sa kalasingan at muling nanumbalik ang dati nang galit ng pulis sa nasawing biktima.

Nauna rito ay isang pulis din ang kasalukuyang nakapiit dahil sa harap-harapan ding pagbaril sa isang nanay at anak nito na ang pinagmulan ay simpleng alitan lamang sa kanilang lugar.

Nitong nakaraang araw ay isang pulis din ang binaril at napatay ng kapwa niya pulis dahil sa tinalo lamang siya sa bunong-braso at hindi umano nito matanggap ang kanyang pagkatalo.

Kung sa pag-a-apply pa lamang ng isang pulis ay dumaranas na siya ng katakut-takot na pangongotong ay hindi malayong gawin niya rin ito sakaling maging isa na siyang pulis.

Kaya sa ginagawang ito ng PNP ay magandang simula ito para muling ibangon ang imahe ng PNP. Ituloy n’yo ang pagbabago!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com