Tatlong doktor mula Israel, ibabahagi ang technical expertise sa pagbabakuna

ni Bong Revilla - @Anak ng Teteng | June 23, 2021

Hanggang sa darating na Biyernes mananatili sa ating bansa ang tatlong doktor mula sa Israel upang ibahagi ang kanyang technical expertise sa pagbabakuna, mula umano sa paghawak ng sensitive shots hanggang sa pagtataas ng kumpinyansa ng publiko hinggil sa bakuna.

Ang grupong ito ng mga doktor mula sa health ministry ng Israel ay dumating sa bansa noong nagdaang Hunyo 20, upang asistihan ang buong bansa sa isinasagawang rollout ng corona virus vaccine.

Mismong ang National Task Force Against COVID-19 ang nagkumpirma sa pagdating sa bansa ng mga doktor na sina Avraham Ben Zaken, Adam Nicholas Segal at Dafna Segol na dumating sa Ninoy Aquino International Airport (NAIA) bandang alas 4:15 ng hapon noong Linggo.

Itinuturing na world leader ang Israel kung pagbabakuna rin lang ang pag-uusapan na ayon sa ipinapakita nilang datos ay halos nasa 59% ng kanilang populasyon ang nabakunahan na laban sa COVID-19 sa pinakahuling tala nila noong Hunyo 18.

Ang kanilang vaccination rate ang pinakamataas sa kasalukuyan sa buong mundo kabilang ang Bahrain, Chile, United Kingdom, Hungary at United States na halos nagbabalik na sa normal nilang pamumuhay.

Napapanahon din ang kanilang pagdating dahil sa nilagdaan na ng pamahalaan ang supply agreement para sa 40 milyong doses ng bakuna na gawa ng Pfizer-BioNTech na sa kasalukuyan ay pinakamalaking deal na ating naisagawa.

Sa unang linggo ng Setyembre inaasahan ang unang delivery nito at umabot na sa kabuuang 113 milyong doses ang ating na-order mula sa iba’t ibang vaccine manufacturer kabilang na ang 26 milyong Sinovac, 10 milyon ng Sputnik V, 20 milyon ng Moderna at 17 milyon mula sa AstraZeneca.

Ang grupong ito ng mga eksperto mula sa Israel ay ituturo umano sa ating pamahalaan ang mga estratehiya upang maipakalat ang highly sensitive vaccine tulad ng Pfizer-BioNTech shots na siya nilang ginamit sa kanilang kampanya sa pagbabakuna.

Inaasahan nating ang mga ekspertong ito ay iiwanan sa ating bansa ang health mechanism na unti-unting magpapabago sa ating mga quarantine restrictions at maiibsan na ang pagtanggi ng marami nating kababayan na ayaw magpabakuna.

Mula kasi nang ilunsad ang COVID-19 vaccination sa bansa noong Marso 1 ay kapansin-pansing napakabagal ng naturang programa dahil sa kakulangan mismo ng bakuna na hindi kayang tugunan ng sapat ang pangangailangan ng priority sectors.

Malaking balakid ang mga itinakdang deliveries ng bakuna mula sa iba’t ibang bansa dahil bukod sa ilang problema sa mismong shipments na kung hindi naantala ay nakansela sa takdang panahon na inaasahan ng ating pamahalaan.

Hindi ba’t ilang buwan pa lamang ang nakakaraan nang magsagawa ng survey ang Pulse Asia at lumitaw na tatlo lamang sa bawat sampung Pinoy ang handang magpabakuna at hanggang ngayon ay wala pang opisyal na ulat kung nadagdagan o nabawasan na ba ang resulta ng naturang survey.

May ilang halal na opisyal mula sa lokal na pamahalaan ang nagsasabing tumaas na umano ang kumpiyansa ng marami sa ating kababayan at kumbinsido nang magpabakuna.

Ngunit may mga pahayag ng ilan sa ating mga opisyal na patuloy na nadaragdagan ang bilang ng mga kababayan nating natatakot magpaturok ng bakuna, partikular sa hanay ng mahihirap nating kababayan.

Mataas din ang porsiyento ng mga kababayan nating ayaw magpabakuna mula sa hanay ng mga mahihirap at kulang sa edukasyon dahil mas higit nilang nauunawaan ang paliwanag ng kapwa nila walang muwang sa tunay na layunin ng pagbabakuna.

Ito ang sektor ng mga kababayan nating dahil sa sobrang kahirapan at sobrang wala nang panahon sa ibang bagay kung hindi ang maghanapbuhay ay wala nang panahon para makapanood ng telebisyon o makinig ng balita.

At ang tanging panahon na lamang para makakuha ng impormasyon ay sa oras na lang mismo ng trabaho, kaya kapag sila ay nakuwentuhan ng isang katrabaho na nakuwentuhan din lang ng maling impormasyon ay ito na ang kanilang paniniwalaan.

Ang masakit pa, ang mga padre de-pamilya na nakakuha ng maling impormasyon ay isinasalin pa sa kanyang mahal sa buhay ang takot na kanyang nalaman na nakamamatay ang pagpapabakuna at ito na rin ang nagiging laman ng kanilang kuwentuhan sa mga inuman.

Ang Social Weather Stations (SWS) ay nagsagawa rin ng survey nitong nagdaang Abril hanggang Mayo ay natukoy na hanggang sa kasalukuyan ay marami pa rin ang hindi pa tiyak kung sila ba ay magpapabakuna o hindi dahil sa takot na mamatay sa epekto nito.

Base sa pinakahuling ulat na inilabas ng national vaccine operation center ay nasa 8,407, 342 pa lamang ang kabuuang bilang ng mga naturukan na ng bakuna mula sa iba’t ibang lugar sa buong bansa.

Nasa 6,253,400 na umano ang nakatanggap ng unang dose samantalang nasa 2,153,942 ang indibidwal na nakatanggap na ng ikalawang dose na masasabing kumpleto na ang bakuna.

Target ng pamahalaan na hangga’t maaari ay 50 milyong Pinoy o ang majority ng ating populasyon ang maturukan ng bakuna ngayong 2021 bago nating marating ang inaasam nating herd immunity.

Kaya sa pagdating ng mga eksperto mula sa Israel sa ating bansa ay inaasahang makatutulong ito para mapawi ang pangambang nararamdaman ng marami nating kababayan na ayaw magpaturok ng bakuna.

Sana lang ay mas naunang naimbento ang gamot o tableta laban sa taliwas mag-isip para wala na tayong problema sa pagbabakuna laban sa COVID-19.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Oks na ipatigil na ang paggamit ng face shield

ni Bong Revilla - @Anak ng Teteng | June 19, 2021

Walang pagsidlan ang nararamdaman nating pasasalamat matapos ang utos ni Pangulong Rodrigo Duterte na ipatigil na ang paggamit ng face shield maliban sa mga nais na pumasok ng ospital.

Sulit na sulit ang pagpunta natin sa Palasyo ng Malakanyang kasama ang si Senate President Vicente Sotto, III at ilanga senador at kongresista noong Hunyo 16, kung saan nagkataong ipinahayag ng Pangulo ang kanyang desisyon. Matagal na tayong nananawagan na dapat nang ipatigil ang paggamit ng face shield at pinakinggan naman tayo.

Ilang ulit na kasi tayong nagbigay-pahayag na huwag nang i-require ang publiko sa pagsusuot ng face shield maliban na lamang kung hinihingi ng pagkakataon tulad nga sa mga ospital at para sa mga in-facility frontliners na talagang kailangan ito.

Kahapon ay isiniwalat na ni Sen. Sotto ang naging pahayag ng Presidente at ang intensiyon nitong utusan ang Department of Health (DOH) na agarang ipatupad ang pagpapatigil nang pagsusuot ng face shield, na siya naman kinumpirma ninPresidential Spokesman Harry Roque.

Nakatanggap agad tayo ng napakaraming text messages na nagpapahayag ng kanilang pasasalamat dahil dininig ng Pangulo ang kahilingan ng napakarami nating kababayan na hindi mapigilan ang pagdaing dahil sa sakripisyong kanilang dinaranas sa paggamit ng face shield.

Alam naman ng ating mga tagasubaybay na mismong sa pitak na ‘to ay tinalakay ang hinaing ng ating mga kababayan na ayaw nang gumamit ng face shield kaya isa ang inyong lingkod sa unang-unang natuwa dahil hindi nasayang ang pagpupuyat sa pagsulat ng artikulo hinggil dito.

Palakas na kasi nang palakas ang dumarating na reklamo tungkol sa sapilitang pagpapasuot ng face shield sa kabila ng napakarami nating kababayan ang naghihigpit na ng sinturon dahil sa kasalukyang pandemya.

Marami ang nawalan ng hanapbuhay at marami rin ang literal na namamalimos na para maitawid lang ang maghapon tapos imbes na isusubo na lamang ay ibibili pa ng face shield para lamang makasunod sa pinaiiral na health protocol.

Ang masakit pa, natuklasan nating baka wala naman palang magandang dulot ang pagsusuot ng face shield na ito sa pagpigil ng community transmission ng COVID-19 at katunayan sa napakaraming bansa sa buong mundo ay tanging ang bansa lamang natin ang gumagamit nito.

Bukod sa karagdagang gastos ay marami tayong kakilala sa ibang bansa ang nagpapadala ng mga negatibong komento hinggil dito at ang iba naman ay tahasang pinagtatawanan ang ating mga kababayan dahil sa paggamit ng face shield.

Pero siyempre, hindi naman puwedeng basta-basta na lamang tayo magpapadala sa mga negatibong komento at kuwentuhang wala namang basehan kaya iilang ulit tayong nakipag-ugnayan sa ilang eksperto hinggil dito.

Sa katunayan, ilang doktor ang ating nakaugnayan na nagpahayag ng kanilang agam-agam sa positibong kontribusyon sa paggamit ng face shield laban sa community transmission ng COVID-19.

Marami sa mga ito ang nagpahayag na wala umanong matibay na ebidensiya tungkol dito, at sa kabaliktaran ay maaari pa nga umano itong magdulot ng problema dahil sa epekto nito sa tamang bentelasyon at paghinga.

Nakakataba lang ng puso dahil sa lahat ng ating ipinunto para matigil na ang paggamit ng face shield ay siya ring dahilan ng Pangulo kung bakit dapat nang itigil ang paggamit ng face shield.

Base sa pahayag ng Pangulo, tanging sa mga ospital na lamang dapat ipatupad ang pagsusuot ng face shield, maging hospital worker o hindi na papasok sa ospital ay obligado pa rin na magsuot nito at maliban doon ay wala nang ibang lugar o establisimyentong binanggit pa para gamitin ang face shield.

Hindi lamang sa pitak natin hinimay ang mga karaingan ng maraming nating kababayan hinggil sa dapat nang ipatigil ang pagsusuot ng face shield dahil nitong nakaraang pagdinig sa Senado ay muli natin itong binanggit bago bumitiw sa pagtatanong.

Sa isinagawang pagdinig ng Committee of the Whole ay nagkaroon tayo ng pagkakataong tanungin ang mga representante ng Inter Agency Task Force for the Management of Emerging Infectious Disease (IATF-EID) at muli nating binuksan ang problemang ito sa face shield.

Tulad ng dapat asahan ay mariin pa rin itong ipinagtanggol ng mga repesentante ng IATF-EID at kabilang sa kanilang depensa ay ang doble umanong dulot nito para sa kaligtasan ng bawat-isa na hindi mahawa sa COVID-19.

Pero ngayong nagbigay na ng pahayag ang Pangulo ng bansa ay parang nabunutan na ng tinik ang marami sa ating mga kababayan na walang tigil sa pagpapaabot sa atin ng reklamo hinggil sa dusang dinaranas nila sa pagsusuot ng face shield.

Sa puntong ito ay makikita natin kung gaano kasensitibo ang ating Pangulo sa hinaing ng bawat Pilipino at patunay lamang ito na nasa puso’t isip niya ang kapakanan at ikabubuti ng lahat.

Ngayon ay mas maluwag at mas maaliwalas na tayong makagagalaw ngunit huwag tayong aabuso dahil dapat pa rin nating sundin ang pagsusuot ng facemask, paghuhugas ng mga kamay at pagsunod sa physical distancing, dahil kung hindi ay tiyak na maglalaho ang ating buhay!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Guidelines para sa pandemic elections

ni Bong Revilla - @Anak ng Teteng | June 14, 2021

Malaking pagbabago ang maaaring kaharapin mga kandidatong nais lumahok sa darating na halalan sakaling hindi natin maabot ang mithiing herd immunity sa panahon ng kampanya dahil sa pandemya.

Isa sa pangunahing dapat pagtuunan ng pansin ng Commission on Election (Comelec) ay maagang paglalabas ng panuntunan kung paano ipatutupad ang isasagawang halalan upang mas maagang makapaghanda ang mga kababayan nating nais bumoto.

Lalo pa at pinag-iisipan na ng Comelec ang declustering ng mga presinto mula 1000 botante kada presinto na maging 800 na lamang kaya siguradong magbabago ang mga listahan kung saang presinto dapat bumoto.

Idagdag pa ang sitwasyon ng mga botante kung handa bang mabilad sa initan ang mga mayayaman, beauty conscious, may hypertension at iba pang karamdaman na kapag nainip o hindi komportable ay tiyak na mag-uuwian na malaking kabawasan sa turnout ng inaasahang boto.

Hindi sapat na basta na lamang iaanunsiyo ng Comelec na daragdagan ng ilang oras ang mismong araw ng botohan dahil mas makabubuting ngayon pa lamang ay maging malinaw na ito sa nakararami lalo pa at marami sa ating kababayan ang ngayon pa lamang ay napakarami na ng tanong kung paano na ang sistema sa darating na eleksiyon habang nasa gitna ng pandemya.

Makabubuting makipag-ugnayan ang Comelec sa Inter-Agency Task Force for the Management of Emerging Infectious Diseases (IATF-EID) upang hindi magkaroon nang banggaan ang ipatutupad nilang kautusan para sa tamang pagboto sa panahong lahat tayo ay nakakaramdam ng takot na makihalubilo sa ibang tao.

Dapat linawin ang bawat detalye upang hindi na magkaroon ng kaguluhan sa mismong araw ng halalan na kung titingnan ay may katagalan pa pero napakabilis lamang ng panahon at matapos ang pagsusumite ng kandidatura ng bawat aspirante ay parang hinahatak na ang araw ng eleksiyon.

Hindi ba’t ngayon pa lamang ay ramdam na ang galaw ng napakaraming nais kumandidato at may mga pasimple nang nag-iikot para makasigurong mapuntahan nila ang maraming lugar na pagkukunan nila ng sapat na boto para manalo.

Kaya napapanahon na ang sinasabi natinng guidelines para maaga ring matutunan ng mga botante kung paano sila boboto dahil sa hindi naman maaaring tulad pa rin ng dati ang sistema sa pagboto dahil patuloy pa rin ang pagtaas ng kaso ng COVID-19 sa kabila nang umaandar na ang pagbabakuna.

Una ay dapat nang tukuyin kung anong oras magsisimula at magtatapos ang eleksiyon at kung sinu-sino ang dapat mauna tulad sa pagbabakuna na binigyang prayoridad ang mga senior citizen, may comorbidities at person with disability (PWD) na nilagyan ng kategorya.

Gaano ba karami ang dapat na papasuking botante sa bawat presinto at gaano rin kahaba ang pila na dapat para sa mga lugar na pagdarausan ng botohan at kailangan bang magsuot pa ng face shield o sapat na ang facemask.

Para hindi dumagsa ang mga tao at maiwasan ang kumpulan ay dapat bang hati-hatiin ang bawat sitio ng barangay at magkaroon ng partikular na oras para hindi bumuhos ang dating ng mga tao sa isang pagkakataon at maiwasan ang pagkakahawa-hawa sa COVID-19?

Kung walang nakatalagang oras para sa isasagawang klasipikasyon ay hindi malayong mangyari na dumagsa sa umaga ang mga botante at lumuwag naman sa gabi o dahil sa takot na mahalo sa maraming tao ay magkasabay-sabay naman ang dating sa gabi o bandang hapon.

Paano ang sistema sa paghahanap ng mga nawawalang pangalan o naliligaw na presinto ng mga botante at sinu-sino lamang ang maaaring gumala sa loob ng mga paaralan kung saan isinasagawa ng botohan.

Napakarami ng dapat isaalang-alang at bigyang-konsiderasyon na kung hindi agad natin sisimulan ay posibleng humantong sa kalituhan o kaguluhan dahil sa magkahalong kautusan ng Comelec at IATF dulot ng pandemya.

Dapat na ring agad na maglabas ng kautusan hinggil sa sistema ng kampanya dahil posibleng payagan ang face-to-face campaign activities para sa nalalapit na 2022 elections, ngunit tiyak na may istriktong ipatutupad ang pamahalaan hinggil sa pagsunod ng bawat isa sa umiiral na health protocol.

Dahil sa darating na Oktubre pa naman ang pagsusumite ng kandidatura ay hindi na sakop ng ilalabas na panuntunan ang mga kandidatong ngayon pa lamang ay umikot na at hindi na alintana ang patuloy na pagtaas ng kaso ng COVID-19.

May umiiral na physical distancing, pagsusuot ng facemask at face shield ngunit, baka sa mas maagang panahon ay mas higpitan pa ito kung ang isasagawang pag-iikot ay may kaugnayan sa pangangampanya ng mga kandidato.

Sa mismong kampanya ay hindi maiiwasan ang pagdumog ng mga tao sa kandidato na gusto nila kaya posibleng mahirapan ang awtoridad sa pagpigil sa sitwasyon kung walang umiiral na panuntunan na sadyang para sa kampanya at halalan lamang.

Ilang libo katao ba ang dapat payagan para sa isang lugar na pupuntahan ng kandidato para magtalumpati ng kaniyang plataporma at dapat nakasuot lahat ng facemask o mariin itong ipagbabawal.

Maraming bagong kandidato ang kailangan nilang mag-ikot para makilala dahil hindi sila makakakuha ng boto kung hindi sila kilala at hindi naman sapat na iasa na lamang sa radyo, telebisyon at social media ang kampanya.

Ayon din sa Comelec, nasa pitong milyong botante ang deactivated na ang accounts at pitong daang libong indibidwal lamang umano ang muling nabalik sa talaan ng Comelec at panibagong apat na milyong bagong botante ang inaasahang magpapatala para sa darating na halalan.

Ibig sabihin, malaki ang bilang ng mga bagong botante na wala pang kamuwang-muwang sa pulitika na kailangang maabot ng bawat kandidato para maipaabot nila ang kanilang balakin kaya nais nilang tumakbo sa halalan.

Bilang halal na opisyal ay hindi natin nanaising maligaw ang kaisipan ng ating mga botante na aasa na lamang sa social media kaya pinupursige natin na hangga’t maaga ay maglabas na nang panuntunan para hindi maging biktima ng fake news at black propaganda.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com