Kalusugan ng bawat Pilipino, patuloy nating pangalagaan

ni Bong Go @Bisyo Magserbisyo | June 12, 2025

Noon pa man sa pag-iikot ko sa buong bansa at hanggang ngayon, bilang Chairman ng Senate Committee on Health, personal kong nakikita kung gaano kabigat ang kakulangan ng hospital beds sa ating mga ospital. Sa isang kama, dalawa o kung minsan ay higit pa ang mga pasyenteng nagsisiksikan. May mga pagkakataong umaabot pa nga sa 400% ang bed occupancy rate. Paano gagaling ang pasyente sa ganitong siksikang kondisyon?

Bilang inyong Senator Kuya Bong Go, patuloy kong tututukan at ipaglalaban ang pangangalaga sa kalusugan ng kapwa Pilipino. Naniniwala akong health is wealth dahil katumbas ng kalusugan ay buhay ng Pilipino. Lagi kong sinasabi, now is the time to invest in health, lalo na sa mga probinsya na kulang ang health facilities. 

Masaya ko namang ibinabalita na nitong June 9 ay nakapasa na sa Third and Final reading sa Senado ang ating mga isinusulong, bilang principal sponsor, ang iba’t ibang panukalang batas na layong makaambag sa pagpapalakas ng ating healthcare system.

Una rito ang House Bill 10885, kung maisabatas na naglalayon na itatag ang San Miguel District Hospital sa Zamboanga del Sur sa ilalim ng provincial government. Batay sa Philippine Health Facility Development Plan ngayong 2025, ang Zamboanga del Sur ay nangangailangan ng 951 kama para sa Level 1, at 387 para sa Level 2 hospitals. Kung maitatayo ang San Miguel District Hospital, mababawasan ang kakulangan sa kama sa Level 1 hospitals sa lalawigan.

Layon naman ng House Bill 11162, kung maaprubahan, na maitatag ang Aurora Medical Center, isang Level 3 hospital sa ilalim ng Department of Health, na magkakaroon ng 200 bed capacity. Ang kakulangan po sa kama sa Level 3 hospital sa Region III o Central Luzon ay nasa 5,349. Kapag maisabatas ang panukalang ito at maitayo ang Aurora Medical Center, masosolusyunan ang problemang ito sa rehiyon. 

Sinuportahan din natin ang House Bill 11163, na naglalayong maitatag ang Liloy General Hospital. Kung tuluyang maging batas ang panukalang ito, layunin nitong magkaroon ng 100-bed Level 2 facility sa Zamboanga del Norte na nasa pangangasiwa ng DOH. Nangangailangan ang probinsya ngayong taon ng karagdagang 390 beds para sa Level 2 hospitals, at ang Liloy District Hospital ay makatutulong para rito. 

Hangad natin na sana ay maging ganap na batas din ang House Bill 10080 para ma-upgrade ang Quirino Province Medical Center at maging Level 3 hospital. Ang probinsya ng Quirino ay kulang ng 1,195 beds para sa Level 3 hospitals. Sana ito na ang magiging tugon doon.

Tayo rin ang principal author at co-sponsor ng Senate Bill No. 2893, o ang Virology Institute of the Philippines Act na aprubado na ng Senado sa ikatlo at huling pagbasa noong February 3. Isinumite rin natin ang Senate Bill No. 195, na naglalayong likhain ang Center for Disease Control. Kailangang handa tayo sa pagsulpot ng mga panibagong sakit para hindi na tayo mabulagang muli.

Hindi maikakaila na hindi naman mayayaman ang nagpapagamot sa mga pampublikong ospital. Karamihan sa kanila ay ang mga kababayan nating walang-wala, mga helpless at hopeless. Panawagan ko sa aking mga kapwa mambabatas, magtulungan tayo na mailapit ang serbisyo medikal ng gobyerno sa ating mga kababayan. Sana ay umabot tayo sa punto na hindi na matatakot ang ating mga kakabayang magpaospital.

Patuloy din nating ipinaglalaban na mabayaran na ang nalalabing PhP 8.1 bilyon na hindi pa nababayarang Health Emergency Allowance (HEA) ng mga kuwalipikadong health workers na nagserbisyo at nagsakripisyo noong pandemya. Isa tayo sa may-akda at co-sponsor ng Republic Act No. 11712, na nagkakaloob ng HEA. Services rendered ‘yan, pinagpawisan at pinaghirapan na ng ating mga healthcare workers. Sila ang hero ng pandemya at hindi ako titigil hangga’t hindi sila nababayaran.

Samantala, noong June 4 ay naging guest of honor at keynote speaker tayo sa ginanap na Vice Mayors’ League of the Philippines National Executive Board Regular Quarterly Meeting sa paanyaya ni VMLP National President Dean Domalanta. 

Dumalo tayo noong June 5 sa League of Vice Governors of the Philippines 100th National Assembly sa imbitasyon ni Laguna Vice Governor Karen Agapay. 

Samantala, personal nating binisita at binigyan ng tulong noong June 8 ang 518 naging biktima ng insidente ng sunog sa Brgy. 384, Quiapo, Maynila katuwang si Brgy. Chairwoman Omia Sharief. Dumalo rin tayo sa Thanksgiving celebration ng ating kapwa mambabatas na si Sen. Ronald dela Rosa.

Ipinadala ko ang ating Malasakit Team para maghatid ng tulong sa ating mga kababayan at naalalayan ang mga naging biktima ng insidente ng sunog — 13 pamilya sa Tanauan, Leyte; 15 sa Tagbilaran City, Bohol; at 269 sa Mandaue City, Cebu.

Nahatiran din ng tulong ang 70 pamilyang nawalan ng tahanan sa Balanga City at Limay sa Bataan; at ang 12 sa Padre Burgos, Southern Leyte. Nakatanggap din ang mga ito ng tulong pinansyal para maipaayos ang kanilang tahanan mula sa pamahalaan sa ilalim ng programang ating isinulong at sinuportahan.  

Pumasok na ang tag-ulan. Mag-ingat tayong lahat at alagaan natin ang ating kalusugan. Bilang inyong Mr. Malasakit, patuloy akong magseserbisyo sa inyo sa abot ng aking makakaya dahil bisyo ko ang magserbisyo, at naniniwala akong ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Isantabi na ang pulitika, magtrabaho na tayo!

ni Bong Go @Bisyo Magserbisyo | June 5, 2025

Hindi maikakaila na ang nakaraang eleksyon ay naging mitsa ng pagkakawatak-watak ng taumbayan dahil sa batuhan ng mga isyu at batikos. Bilang inyong Senador Kuya Bong Go, nananawagan ako sa aking mga kasamahan sa gobyerno: Isantabi na natin ang pulitika at magtrabaho na tayo. Ako naman, ipagpapatuloy ko pa rin ang naumpisahan kong pagseserbisyo at pagmamalasakit sa ating kapwa Pilipino. 

Sa pagkakataong ito, hayaan niyong pasalamatan ko ang pahayagang BULGAR para sa pagkakataong maibahagi sa inyo ang ating mga programa at inisyatiba.

Kasunod naman ng ating makasaysayang panalo sa nakaraang eleksyon kung saan nakamit natin ang mahigit 27 milyong boto, muli akong nagpapasalamat sa Panginoon at sa sambayanang Pilipino para sa pagkakataong ipagpatuloy ang pagseserbisyo.

Walang humpay din ang ating pasasalamat sa aking mentor at inspirasyon sa public service na si dating Pangulong Rodrigo Duterte. Tatandaan ko ang kanyang payo: Gawin ang tama at unahin ang interes at kapakanan ng kababayan nating Pilipino!

Maraming salamat ding muli kay Vice President Sara Duterte para sa suporta sa aming mga Duter-TEN senatorial candidates. Kasama ako ng buong bansa sa panalangin na nawa’y makauwi na si Tatay Digong.

Sa nalalabing mga araw ng aking unang termino at sa paparating na 20th Congress, kabilang sa ating prayoridad ang pagpapalakas sa healthcare system, paglikha ng mga trabaho, pagtiyak na may pagkain sa bawat mesa, abot-kayang edukasyon at iba pang pro-poor programs. Gagawin natin ang lahat ng ating makakaya, kasama ang aking mga kapwa mambabatas, para isulong ang mga ito.

Bilang Chairperson ng Senate Committees on Health and Demography, on Sports, at on Youth, masaya kong ibinabalita na noong May 29, kabilang sa mga ginawang prayoridad ng Legislative-Executive Development Council (LEDAC) ang mahahalagang panukala na ating isinulong: amendment sa Universal Health Care (UHC) Act, E-Governance Bill, Judicial Fiscal Autonomy Bill, Virology Institute of the Philippines Bill, ang panukalang magtatakda sa termino ng Barangay at Sangguniang Kabataan officials sa apat na taon, at ang ating panukalang pagba-ban at pagdedeklarang ilegal sa POGO.

Nitong June 3, nagpatuloy ang public hearing natin sa Senate Committee on Health. Sa ika-14 hearing natin, mahalagang updated ang mga Pilipino sa estado ng ating healthcare system habang patuloy nating inilalaban na mapaganda ang mga benepisyong medikal at maibaba ang gastusin ng ating mga pasyente. Nagsisimula ang lahat ng ito sa kaalaman ng bawat Pilipino na alinsunod sa UHC, lahat tayo ay miyembro ng PhilHealth. 

Kaya naman labis ang pasasalamat natin nang ibalita ng PhilHealth ang improvement sa ID system nito. Patuloy natin itong babantayan at titiyaking mapapakinabangan ng mga Pilipino.

Muli nating pinaalalahanan ang mga health-concerned agencies na wala dapat pasyenteng matatanggihan, lalung-lalo na ang mga hopeless, helpless at ‘yung mga kababayan nating walang malapitan. 

Sa isyu naman ng impeachment complaint laban kay VP Sara, nananatili ang aking pananaw na kung walang malinaw na ebidensya, walang dahilan para pahabain pa ang

paglilitis. 

Pagod na ang mga Pilipino sa maruming pulitika at intrigahan. Wala dapat nasasayang na sandali dahil marami ang nangangailangan ng serbisyo. Kaya naman matapos tayong maiproklama noong May 17, agad nating binisita ang mga naging biktima ng insidente ng sunog sa Tondo, Manila. Personal nating pinangunahan ang Malasakit Team sa paghahatid ng pangunahing pangangailangan ng mga apektadong pamilya. 

Samantala, dumalo tayo noong May 28 sa 3rd National Convention ng National Department of Health Employees’ Association (NADEA) sa paanyaya ni National President Dr. Louella Lao. Doon ay tiniyak natin ang ating buong suporta sa lahat ng health department employees.

Naimbitahan din tayo sa Philippine Councilors’ League — Iloilo Chapter Term-End Assembly sa paanyaya ni outgoing President at ngayon ay Vice Mayor-elect Ramon Monsik Sullano.

Noong May 31, nakausap natin sa pamamagitan ng video call ang ating mga kababayang OFWs para sa birthday celebration ni VP Sara. Sa pagtitipon, naipakita ng ating mga kababayan ang kanilang pagmamahal at suporta kay Tatay Digong. Kung nakikita lang niya ang mga kaganapang ito, tiyak akong masayang-masaya ang ating dating pangulo.

Naghatid naman ang aking Malasakit Team ng tulong sa 85 na mga biktima ng sunog sa Parañaque City; 27 sa Muntinlupa City; at 289 na mga market vendors sa Sta. Cruz, Laguna.

Napagkalooban din natin ng tulong ang 27 biktima ng Tropical Depression Kabayan sa Caraga, Davao Oriental. Nakatanggap din ang mga ito ng karagdagang tulong mula sa national government para maipaayos ang kanilang nasirang tahanan.

Naalalayan din natin ang 12 pamilyang nasira ang tahanan sa Jose Abad Santos, Davao Occidental. Tumanggap din sila ng post-disaster shelter assistance para maipaayos ang kanilang tirahan mula sa programa ng national government na ating isinulong at sinuportahan. Katulad na tulong ang naipagkaloob sa 529 benepisyaryo sa Casiguran katuwang si Board Member-elect Jennifer Araña, at 132 pa mula sa Dilasag kaagapay si Mayor Lea Gorospe, parehong sa Aurora Province.

Bilang inyong Mr. Malasakit, lalo ko pang pagbubutihin ang aking trabaho at hinding-hindi ko sasayangin ang tiwalang ipinagkaloob ninyo sa akin. Bisyo ko ang magserbisyo, at naniniwala akong ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Laging unahin ang pagseserbisyo sa kapwa Pilipino

ni Bong Go @Bisyo Magserbisyo | Feb. 9, 2025

Bago pa man ninyo ibinigay noong 2019 ang tiwala sa isang simpleng probinsyanong tulad ko ay adhikain ko na ang laging unahin ang kapakanan ng ating mga kapwa Pilipino, lalung-lalo na ang mga mahihirap at ang higit na nangangailangan. At bilang inyong Senator Kuya Bong Go na kinatawan ninyo sa Senado, tiniyak natin na palaging bukas ang ating opisina para magbigay ng serbisyo, habang ang mga komite naman na ating pinamumunuan ay nagsisilbing boses ng taumbayan.

Pero sa lumipas na anim na taon, higit na mas malaking oras ang nagugol natin sa labas ng opisina. Bilang inyong Mr. Malasakit, naniniwala akong mas magagawa ko nang tama ang pagseserbisyo kung mismong ako ang naghahatid at personal kong naririnig ang hinaing at pangangailangan ng ating mga kababayan.

Bagyo, sunog, lindol, pagputok man ng bulkan, at iba pang krisis o sakuna, gumagawa tayo ng paraan para makatulong sa abot ng ating makakaya at makiramay sa mga nasalanta. Saan mang sulok ng bansa, basta’t kaya ng aking oras at katawan, handa kong puntahan para makapaghatid ng kaunting ngiti sa gitna ng inyong dalamhati. Walang pinipiling panahon ang pagtulong dahil anumang oras ay may Pilipinong nangangailangan. 

Ilapit natin ang serbisyo ng pamahalaan sa taumbayan, partikular na ang serbisyong medikal. Hindi dapat pinahihirapan ang naghihirap na nangangailangan ng ating tulong at malasakit.

Tandaan natin na anumang tulong mula sa pamahalaan ay galing sa kaban ng bayan. Pera ninyo ‘yan na ibinabalik lang sa inyo sa pamamagitan ng serbisyong tapat, at dapat na mabilis at maaasahan.  

Sa rami ng pagsubok na ating kinakaharap bilang isang bansa, hindi natin dapat sayangin ang oras para makapagserbisyo at makahanap ng iba’t ibang paraan para mailapit ang tulong sa mga nangangailangan. Kaya nga kahit naka-recess ngayon ang buong Kongreso ay patuloy nating isusulong at babantayan ang mga repormang hinihintay ng taumbayan, partikular sa sektor ng kalusugan. 

Bilang Chairperson ng Senate Committee on Health ay patuloy nating tututukan kung paano gagamitin ng PhilHealth ang bilyun-bilyong pisong reserve funds nito sa ilalim ng bagong pamunuan. Ang PhilHealth ay hindi negosyo at hindi bangko na nakatutok sa pag-iimbak at pagpapalago ng pondo. Ang trabaho ng PhilHealth ay tiyaking may maayos na medical insurance ang bawat Pilipino na maaari nilang sandalan kapag nagkasakit. Hangad nating lahat na balang-araw, hindi na kailangang dumukot ng mga Pilipino sa sarili nilang bulsa para gumastos ng pampaospital dahil ang pera ng PhilHealth ay para sa health!  

Samantala, hindi naman tayo tumitigil sa paghahatid ng serbisyo. Binalikan natin at muling binigyan ng tulong noong February 5 ang 350 residenteng nawalan ng tahanan sa Brgy. 649 BASECO Compound, at Brgy. 20 Islang Puting Bato sa Manila City.

Nakatanggap din sila ng emergency housing assistance mula sa NHA na ating isinulong para may pambili ang mga benepisyaryo ng mga materyales sa pagpapaayos ng kanilang bahay na nasira ng sakuna o kalamidad. Personal din nating pinangunahan ang pamamahagi ng tulong sa 600 TODA officers ng Pasay City katuwang si NCR TODA President Ace Sevilla.   

Sa pamamagitan ng aking Malasakit Team ay pinangasiwaan natin noong February 6 ang paghahatid ng karagdagang tulong sa 68 residenteng nawalan ng tirahan sa Navotas City — na sa ating inisyatiba ay nabigyan din ng emergency housing assistance mula sa NHA. 

Personal naman nating sinuportahan kasama ang 47 na kooperatiba sa San Fernando City, Pampanga ang paglulunsad ng Malasakit sa Kooperatiba program ng Cooperative Development Authority sa Gitnang Luzon. Bumisita rin tayo sa Candaba at namahagi ng tulong para sa 1,673 mahihirap na residente mula sa transport sector, na sa ating pakikipagtuwang sa lokal na pamahalaan ay nabigyan din ng tulong pinansyal. Sa ikalawang pagkakataon ay naging guest host tayo noong araw na iyon sa Wil To Win program ng aking kaibigang si Willie Revillame. 

Noong February 7, agad kaming tumulong sa higit 80 residente ng Brgy. Matandang Balara, Quezon City na nasunugan. Kinumusta ko sila sa pamamagitan ng video call. 

Personal tayong bumisita sa Ilocos Sur at pinangunahan ang pamamahagi ng educational assistance para sa 1,000 mahihirap na estudyante ng Vigan City katuwang sina Gov. Jerry Singson, Vice Gov. Ryan Singson at Mayor Bonito Singson. Kasama rin namin ang CDA para suportahan ang 45 na kooperatiba sa ilalim ng Malasakit sa Kooperatiba program. 

Ipinadala natin ang aking Malasakit Team sa iba’t ibang komunidad para maalalayan ang mga kababayan nating nangangailangan. 

Tinulungan nating makabangong muli katuwang ang NHA ang mga nawalan ng tahanan sa Cotabato kabilang ang isang residente ng Libungan, 17 sa Midsayap, tig-isa sa Matalam at Makilala, at dalawa sa Aleosan. May 51 naman sa Opol, Misamis Oriental; 177 sa Paco, Maynila; at 149 sa Maco, Davao de Oro na aking kinamusta sa pamamagitan ng video call. 

Bukod sa pansamantalang trabaho na ating isinulong, naalalayan din ang mga naghihirap na manggagawa gaya ng 390 sa Island Garden City of Samal, katuwang si Coun. Sonny Lanorias; at 98 sa Tabaco City, Albay kaagapay si BM Vic Ziga. 

Dagdag na tulong din ang hatid natin sa mga student scholars at napagkalooban ang 149 sa Albay; at 70 sa Sorsogon. Tuluy-tuloy din ang ating palugaw initiatives sa mga ospital na may Malasakit Center para sa mga pasyente, kanilang bantay at hospital staff. 

Tandaan natin na minsan lang tayo dadaan sa mundong ito, kaya kung anumang kabutihan na puwede nating gawin ay gawin na natin ngayon. Bilang inyong Mr. Malasakit, umasa kayo na patuloy akong magseserbisyo sa kapwa Pilipino sa abot ng aking makakaya. Bisyo ko ang magserbisyo, at ako ay naniniwala na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.