Bakuna kontra-tigdas at iba pang sakit, dapat palawakin sa mga barangay

ni Bong Go @Bisyo Magserbisyo | January 17, 2026

Batay sa pinakahuling datos ng Department of Health (DOH), mahigit 5,000 kaso ng measles at rubella ang naitala sa buong bansa nitong nakaraang taon, mas mataas ng humigit-kumulang 30 porsiyento kumpara sa naitalang kaso noong taong 2024. Ayon din sa DOH, mahigit kalahati ng mga tinamaan ay mga batang wala o kulang ang bakuna, karamihan ay limang taong gulang pababa.

Bilang isang health reforms crusader, matagal ko nang binibigyang-diin na prevention is better than cure. Kapag hindi kumpleto ang bakuna, nagiging bukas ang bata sa mga sakit na dati na sanang napigilan. Kapag tinamaan ng measles ang isang bata, maaari itong mauwi sa pulmonya, dehydration, o iba pang komplikasyon. Sa rubella naman, delikado ito lalo na kapag nahawa ang buntis, dahil maaari itong magdulot ng congenital defects sa sanggol.

Ang measles at rubella ay hindi bagong sakit. May bakuna na laban dito sa loob ng maraming dekada. Sa mga health center sa barangay, libreng ibinibigay ang measles-rubella vaccine sa mga sanggol at bata bilang bahagi ng regular immunization program. Sa kabila nito, marami pa ring bata ang hindi naaabot—dahil sa kakulangan ng impormasyon o kaya'y takot sa bakuna. Tandaan po natin na mas mahirap kung magkaroon na ng outbreak ng sakit. Agapan na po natin at dalhin ang bata sa pinakamalapit na health center, sundin ang schedule ng bakuna, at makipag-ugnayan sa mga health worker.

Bilang Vice Chairman ng Senate Health Committee, patuloy kong isusulong ang mga programa para sa kalusugan ng kapwa ko mga Pilipino lalo na ang mga bata at iba pang vulnerable sector.

Samantala, nitong nakaraang mga araw, agad na nagbigay-tulong ang ating team sa mga biktima ng sunog sa Pasay City at Davao City. Tumulong din tayo sa ilang displaced workers sa Alegria at Moalboal, Cebu.

Habang tayo ay nagpapatuloy, kasama ang aking mga kapwa mambabatas, ipaglalaban ko ang mas marami pang inisyatiba sa kalusugan na makatutulong sa ating mga kababayan na nangangailangan, at palagi akong magsisilbi sa sambayanang Pilipino, dahil bisyo ko ang magserbisyo at naniniwala ako na ang serbisyo sa tao ay serbisyo rin sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pagbabantay sa pondo ng bayan hanggang sa huling sentimo

ni Bong Go @Bisyo Magserbisyo | January 9, 2026

Bilang mambabatas, malinaw sa akin na ang pagpirma ng Pangulo sa 2026 national budget ay hindi katapusan ng trabaho. Simula pa lamang ito ng mas masusing pagbabantay. Ang papel ng Kongreso ay hindi lang maglaan ng pondo, kundi tiyakin na tama ang paggamit nito at ramdam ng mga tao ang pakinabang sa araw-araw.

Sa mga deliberasyon, paulit-ulit kong binigyang-diin na bawat pisong inilaan sa budget ay dapat makarating sa mga Pilipino sa pamamagitan ng maayos at maaasahan na mga serbisyo at programa. Kailangang masuri kung ang mga ito ay maipapatupad nang maayos at dapat nasa tamang ahensya ang responsibilidad. Palagi kong paalala sa sarili ko na ang pondo ay galing sa buwis ng mamamayan, kaya may obligasyon tayong bantayan ito hanggang sa huling sentimo.

Samantala, nais ko ring ibahagi ang hindi ko paglagda sa Bicameral Conference Committee Report sa proposed 2026 budget. Bilang Vice Chairman ng Senate Committee on Finance, kinilala ko ang mga repormang isinulong upang gawing mas malinaw at mas bukas ang proseso ng pagba-budget, at suportado ko ang layuning iyon. Kaya nagpapasalamat ako sa ating butihing Senate Finance Committee Chair, Sen. Sherwin Gatchalian. Ngunit may mga bahagi ng panukalang budget na hindi katanggap-tanggap sa akin. May seryoso akong pag-aalinlangan sa patuloy na paggamit ng unprogrammed appropriations na madaling maabuso, at sa kakulangan ng malinaw at hiwalay na pondo para sa PhilHealth, lalo na matapos itong bigyan ng zero allocation noong 2025.

Sa kabila nito, patuloy ang trabaho kahit tapos na ang pirmahan. Dapat patuloy na bantayan ang lahat sa pamamagitan ng pakikipag-ugnayan sa mga lokal na pamahalaan para makita kung nakakarating ba ang tulong sa mga komunidad. Kapag may nakitang problema, kailangan itong itama agad. Kapag may kakulangan, dapat itong ilahad nang malinaw.

May mga sektor na kailangang tutukan, lalo na ang serbisyong pangkalusugan, edukasyon, at tulong sa mga mahihirap. Sa pagpapatuloy ng aking health reforms crusade, palagi kong iniisip kung paano mapapalakas ang primary care at kung paano mas mapapabilis ang access ng pasyente sa serbisyong kailangan nila. Ang pondo ay dapat nagiging konkretong serbisyo, hindi natitigil sa proseso.

Habang papalapit ang mga susunod na linggo, kasama rin sa aking isinasaisip ang kapakanan at kaligtasan ng publiko sa mga malalaking pagtitipon. Papalapit na rin ang Kapistahan ng Itim na Nazareno, at mahalagang maging handa ang lahat—mula sa seguridad hanggang sa serbisyong medikal—para maging maayos at ligtas ang paggunita.

Bilang patunay ng aking paninindigan sa serbisyo publiko, sa pagsisimula ng 2026 ay agad tumulong ang aming Malasakit Team sa mga biktima ng sunog sa Pasay City, Mandaluyong City at Makati City. Bukod dito, nagbigay rin ang Malasakit Team ng tulong sa mga biktima ng pagsabog ng granada sa Matalam, North Cotabato.

Sa ating patuloy na pagseserbisyo, nawa’y lalo pa nating patibayin ang diwa ng bayanihan at pagtutulungan bilang isang komunidad. Patuloy akong magsusulong ng mas maraming pasilidad pangkalusugan na makatutulong sa ating mga kababayang nangangailangan, at mananatili akong laging handang maglingkod sa sambayanang Pilipino sa abot ng aking makakaya. Bisyo ko ang magserbisyo at naniniwala ako na ang serbisyo sa tao ay serbisyo rin sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

PhilHealth funds, ibalik sa taumbayan

ni Bong Go @Bisyo Magserbisyo | December 19, 2025

Noong December 13, sa Bicameral Conference Committee meeting para sa panukalang 2026 national budget, muli nating idiniin ang mga problema na kinakaharap ng PhilHealth. Ang sitwasyon ng ahensya ay isang malinaw na "double whammy" o doble-parusa sa pasyenteng Pilipino: ang zero budget ng PhilHealth sa 2025 at ang P60 bilyong excess funds nito na inilipat sa national treasury noong 2024 ay sa 2026 pa maibabalik.

Bilang isang health reforms crusader, isa ito sa mga dahilan kaya hindi ako pumirma sa bicam report para sa 2025 budget. At para naman sa 2026 budget, nananawagan ako sa mga kapwa ko mambabatas na hanapan ng tugon ang double whammy na ito. Napakalaking pondo ang hindi napakinabangan ng napakaraming may sakit na Pilipino dahil dito.

Bilang Chairman ng Senate Health Committee noon, umabot sa 14 public hearings ang ating pinangunahan. Sulit pa rin naman ang ating pangungulit dahil sa ilang repormang ating ipinaglaban na ipinatupad ng PhilHealth. Pero noon pa man, sinabi ko nang hindi dapat nagkaroon ng excess funds ang PhilHealth kung ginamit nito nang wasto ang pondo, at agad na itinaas ang case rates at benefit package. Hindi rin sana na-zero budget ang ahensya.

Alinsunod sa General Appropriations Act of 2024, maaaring kunin at ilipat ng Executive Department (sa pamamagitan ng Department of Finance) ang excess funds ng ilang Government-Owned and Controlled Corporations (GOCC). Pero base naman sa Universal Healthcare Law, malinaw na tanging ang PhilHealth ang puwedeng gumamit ng pondo nito. Kaya sa simula palang, tinutulan na natin ang transfer ng PhilHealth funds – ang pera para sa health ay dapat gamitin sa health ng Pilipino!

Noon pa man, tinawag ko nang imoral ang paglipat sa pondo ng PhilHealth. At ngayon, ayon mismo sa Korte Suprema ay ilegal ang ginawang fund transfer. Ilang pasyente kaya ang natulungan nito? Ilang buhay kaya ang naisalba kung hindi inilipat ang pondo ng PhilHealth?

Sa tulong ng mga kapwa ko mambabatas, patuloy nating ipaglalaban na maibalik ang pondo ng PhilHealth. Dapat malaman ng taumbayan kung saan at paano nila ginamit ang P60 bilyong excess funds.

Samantala, noong Disyembre 11, personal naming tinulungan ang 295 biktima ng sunog sa Caloocan City.

Noong nakaraang linggo, nagtungo rin sa mga komunidad ang ating Malasakit Team upang maghatid ng agarang tulong sa mga biktima ng sunog sa Cebu City, Navotas City at Caloocan City at sa mga biktima ng bagyo sa Nasipit, Agusan del Norte.

Nagbigay rin tayo ng karagdagang tulong para sa mga displaced workers sa Batad, Estancia, at Dueñas sa Iloilo; Loboc, Bohol; Pasig City; Cagayan de Oro City; at Lupon, Davao Oriental. Dumalo rin ang aming team sa turnover ceremony ng bagong Super Health Center sa Pikit, North Cotabato.

Bantayan natin ang budget process, bantayan natin kung paano nila ito gagamitin sa susunod na taon. I am one with the Filipinos in this fight and crusade against corruption. 

Bilang Mr. Malasakit, magpapatuloy akong maglingkod sa aking kapwa Pilipino dahil bisyo ko ang magserbisyo at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.