Ilabas ang katotohanan — walang labis, walang kulang

ni Bong Go - @Bisyo Magserbisyo | September 22, 2021

Nitong mga nagdaang linggo, naging tampok sa mga balita at imbestigasyon ang alegasyon ng overpricing, ghost delivery o korupsiyon sa mga kontrata ng gobyerno sa pagkuha nito ng kagamitan para sa pagresponde laban sa COVID-19 ng ating bansa. Kaya't gusto nating malaman ang katotohanan.

Kaya naman, hinihimok natin ang ating mga kasamahang mambabatas, na kung sa tingin ninyo ay may atraso ang sinuman, kasuhan na agad. Kaya nga meron tayong Ombudsman, Sandiganbayan at hukuman para mapanagot ang dapat managot. Kapag naresolba ito agad, mas matututukan na muli ng ating mga opisyal sa gobyerno at buong bansa ang pagtugon sa pandemyang ating kinahaharap.

Ilabas natin ang katotohanan—walang labis at walang kulang—para sa kapakanan ng ating mga kapwa Pilipino at para sa ating bansa. Buhay ang nakataya rito. Ibalik natin ang ating focus sa mga bagay na dapat nating pagtuunan ng pansin ngayon dahil sa bawat oras na ating sinasayang, buhay ang katapat!

Pero huwag tayong papayag na gamitin ang imbestigasyon para sa pansariling interes ng iilan lamang. May mga ordinaryong empleyado sa gobyerno na hindi makagalaw dahil takot mapagbintangan base lamang sa maling interpretasyon ng mga taong inuuna ang pulitika. Habang pinahahaba ang diskusyon, mas nadidiskaril ang ating laban kontra COVID-19. Mga inosente at ordinaryong Pilipino ang kawawa rito.

Inihayag pa mismo ng COA na walang nangyaring overpricing o ghost deliveries sa mga transaksiyon. Wala ring korupsiyon na napatutunayan. Dapat hayaan nating matapos ang audit process ng COA para lumabas talaga ang katotohanan kaysa manghusga tayo base sa haka-haka. Itigil na dapat ang pamumulitika at panghuhusga nang walang batayan. Magtiwala tayo sa proseso para mapangalagaan ang kredibilidad ng ating mga institusyon.

Bilang halal na Senador, malaki ang respeto natin sa institusyon na ating kinabibilangan. Kaya kung may nakikita tayong mali, magsasalita tayo! Tungkulin natin 'yan sa taumbayan.

Kasama natin ang mahigit 16 milyong Pilipino na bumoto kay Pangulong Rodrigo Duterte at mahigit pa riyan na sumusuporta at nagtitiwala sa administrasyong ito. Susuportahan natin siya hanggang sa dulo. Hindi natin sasayangin ang oportunidad na ibinigay para magserbisyo. Tanging ang prinsipyo at pangalan ang ating pinanghahawakan at ipinagmamalaki rito.

Sa halip na bumato ng mga batikos, bakit hindi na lang magtulungan para malampasan natin ang krisis na ito at masiguradong walang kahit isang Pilipino ang maiiwan tungo sa ating muling pagbangon bilang nagkakaisa at mas matatag na bansa?

Kahit ano'ng putik ang itapon sa atin, hindi matitinag ang ating prinsipyo na gawin ang tama at ipaglaban ang kapakanan ng bawat Pilipino, lalo na pagdating sa laban kontra pandemya.

Hanggang Setyembre 20, meron nang mahigit 41.79 milyong Pilipino ang nabakunahan kung saan 22.97 milyon ay naturukan ng kanilang first dose samantalang 18.8 milyon naman ang kumpleto na sa bakuna. Patuloy lang ito hanggang maabot natin ang population protection tungo sa herd immunity.

Kasabay naman ng pagbubukas ng bagong school year sa mga paaralan, nagagalak tayo sa pag-apruba ni Pangulong Duterte sa pagpapatupad ng pilot face-to-face classes sa mga lugar na mababa ang bilang ng mga kaso ng COVID-19. Importante ang edukasyon dahil ito ang tanging puhunan natin sa mundong ito. Pero siguraduhin nating hindi mailalagay sa alanganin ang buhay ng mga bata. Proteksyunan natin sila dahil ang kabataan ang pag-asa ng ating bayan.

Sa lahat ng hakbang na ginagawa ng gobyerno, palagi nating inuuna ang pagprotekta sa buhay ng mga Pilipino.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Serbisyo publiko muna bago pulitika

ni Bong Go - @Bisyo Magserbisyo | September 10, 2021

Nitong mga nagdaang araw, inihayag ng ating mga kapartido sa PDP-Laban na ang inyong lingkod ang gusto nilang tumakbo bilang Pangulo sa susunod na halalan.

Napakalaking karangalan na mabigyan ng ganitong pagkilala ng ating mga kasamahan. Patunay din ito ng continuity na inaasam ng nakararami.

Ngunit, inuulit nating muli na hindi tayo interesadong tumakbo sa pagka-Pangulo sa darating na halalan. Nakatutok ang buong puso at isipan ko sa pagseserbisyo at wala tayong balak "makipagkumpitensiya" sa pinakamataas na posisyon sa ating bansa.

Unahin na lang ninyo ang mga may gusto. Ang mahalaga ay makahanap tayo ng katimbang ni Pangulong Duterte upang maipagpatuloy ang nasimulan niya at para mas lalong maramdaman ang tunay na pagbabagong ating natatamasa ngayon.

Kailangan natin ng taong may dedikasyon, determinasyon, at disiplina. Higit sa lahat, kailangan natin ng lider na may political will na buong pusong nagmamahal at may malasakit sa mga Pilipino. Kung sinuman ang ating mapipili, narito tayo para tulungan at suportahan siya.

Dahil sa krisis na ating hinaharap, napakalaking sakit sa ulo ito sa susunod na mamumuno sa bansa. Kaya dapat lamang na ipagpatuloy natin ang bayanihan — anumang partido, posisyon, o paniniwala natin. Kailangan nating magkaisa at magtulungan para masigurong walang maiiwan tungo sa muling pagbangon ng bansa.

Umaapela tayo sa lahat na sana’y respetuhin ang ating desisyon dahil wala naman tayong ibang hangarin kundi magserbisyo sa ating kapwa. Nakatutok tayo sa trabaho bilang mambabatas at tagapaglingkod ng bayan.

Nitong nakaraang linggo lamang, nag-abot tayo ng assistance sa mga pamilyang naapektuhan ng sunog kasama na ang 114 pamilya sa Southcom Village, Zamboanga City; 24 pamilya sa Bgy. Comembo, Makati City; 18 pamilya sa Bgy. Alijis ng Bacolod City; halos 50 pamilya na naapektuhan ng kaliwa’t kanang sunog sa mga barangay Novaliches, Payatas at North Fairview sa Quezon City; isang pamilya sa Bgy. Pulang Lupa Dos sa Las Piñas City; 108 pamilya sa Mandaue City, 16 pamilya sa Sta. Cruz, Cebu City, siyam na pamilya sa Lapu-Lapu City, at pitong pamilya sa Bgy. Talomo, Davao City.

Nabigyan din ng ayuda ng ating tanggapan ang mga nasalanta ng baha, tulad ng libu-libong residente ng Mamburao, Sablayan, at Sta. Cruz sa Occidental Mindoro. Ganoon din ang mga nasa mahigit tatlong libong residente ng Himamaylan City, Negros Occidental.

Nag-abot din tayo ng tulong sa Bohol tulad sa mga bayan ng San Isidro, Clarin, Inabanga, Buenavista, Talibon, Getafe, Dagohoy, Danao, Trinidad, Sagbayan, San Miguel, Bien Unido, Ubay, at sa President Carlos P. Garcia. Sa Medellin, Cebu, nasa 631 na biktima ng baha ang nabigyan din ng tulong.

Iba’t ibang grupo rin ang nabigyan ng tulong na binubuo ng pagkain, food packs, masks, face shields, at vitamins, habang piling beneficiaries naman ang nakatanggap ng sapatos, computer tablets at bisikleta. Dagdag ito sa tulong na naipamahagi na ng mga ibang ahensiya ng gobyerno.

Kabilang sa mga sectoral groups na ito ang 6,359 beneficiaries ng Victorias City at 3,947 sa Bacolod City; 2,000 sa Don Salvador Benedicto, 3,009 sa Cauayan, 1,678 sa Sipalay, at 11,049 sa Hinoba-an, Negros Occidental. Aabot naman sa 262 college students sa Rodriguez, Rizal; 1,500 indigent recipients sa Calumpit, Bulacan; 1,000 na residente sa Davao City; 5,157 na mga residente ng Botolan, Zambales; at hindi bababa sa 10,000 benepisaryo na kinabibilangan ng TODA drivers, laborers, fisherfolks at vendors ang nabigyan ng tulong sa bayan ng Maimbug, Parang, Omar, Panglima Estino at Lugus sa Sulu. Nasa halos 10,000 micro-entrepreneurs din ang nabigyan ng ayuda ng aking opisina sa mga bayan ng Southern Leyte, partikular sa Silago, Hinundayan, St. Bernard, Liloan, Sogod, Malitbog at Limasawa.

Nagbukas din tayo ng ika-138 na Malasakit Center sa bansa na matatagpuan sa Sulu Sanitarium sa Jolo kung saan namahagi rin tayo ng tulong para sa 20 na indigent patients at 281 health workers.

Patuloy rin ang ating laban kontra pandemya. As of September 7, meron na tayong 36.64 milyong doses ng mga bakuna na naiturok sa mamamayan kung saan meron nang 21.09 milyong Pilipino ang may first dose at 15.54 milyong kababayan naman natin ang nakakumpleto na ng kanilang doses ng bakuna.

Para sa atin, ang tunay na pagseserbisyo ay hindi nakasalalay sa kung ano ang iyong posisyon. Kahit sa anong paraan o kakayahan, patuloy po nating tulungan ang kapwa natin dahil kailangan ang pakikiisa ng bawat Pilipino sa laban na ito.

Nakikiusap rin po ako, patuloy nating suportahan at mahalin si Pangulong Duterte na totoong nagmamahal sa ating kapwa Pilipino.

Having said these, again, I leave my fate to God, to the Dutertes, and to the Filipino people — hindi ko mararating kung ano ako ngayon kung hindi dahil sa kanila. Ibabalik ko sa inyo ang serbisyong dapat at ipapasa-Diyos ko na lang po ang lahat.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Patas na pagdinig, patas na serbisyo para sa bawat Pilipino

ni Bong Go - @Bisyo Magserbisyo | September 08, 2021

Nagsimula na ang “-ber months” at mainit nating tinanggap ang papalapit na Kapaskuhan sa ating bansa. Nakalulungkot man na dumarami pa rin ang COVID-19 cases, mabuting balita namang karamihan dito ay mild o asymptomatic lamang dahil marami na rin sa ating mga kababayan ay bakunado na.

Patuloy ang ating pagbabakuna upang maprotektahan ang ating populasyon at matigil ang chain of severe infection. Sa tulong nito, nababawasan natin ang malubhang epekto ng COVID-19 o hindi naman kaya ay pagkamatay.

Kaya nananawagan tayo sa mga kabilang sa mga priority groups na magpabakuna na laban sa virus alinsunod sa ating national vaccination program. Ang pagbabakuna ay ang pinakaepektibo nating panlaban kontra sa COVID-19.

Hinihiling natin sa gobyerno na baka puwedeng tingnan ang pagbibigay-insentibo sa mga taong nabakunahan na tulad ng mas maluwag na restrictions o di kaya ay ang pag-iimplementa ng vaccine bubble sa piling mga lugar. Kapag mas dumami sa ating populasyon ang nabakunahan, mas mabilis nating maaabot ang population protection at pati na rin ang herd immunity.

Dagdag pa riyan ay umaapela rin tayo sa gobyerno na mapalawak na ang vaccine rollout upang marating ang iba pang sektor ng ating populasyon na hindi pa kabilang sa prayoridad. Marami sa kanila ay naghihintay na lamang ng kanilang panahon na puwede ng mabakunahan kung kaya’t huwag natin sayangin ang oras. Bakunahan na natin ang mga puwedeng bakunahan upang mas marami pa tayong maproteksiyunan at mailigtas na buhay.

Habulan ang laban na ito. Huwag nating hayaang maunahan pa sila ng COVID-19 bago sila mabakunahan. Maging patas tayo sa mga gustong magpabakuna.

Maliban pa rito, bigyan natin ng sapat na suporta ang medical frontliners. Bawat araw ay nasa panganib ang kanilang buhay. Siguraduhin nating mabibigyan ang lahat ng qualified health workers ng Special Risk Allowance (SRA) at iba pang insentibo o benepisyo na naaayon sa batas.

Lahat naman ng health workers na naka-duty ay maituturing na exposed sa banta ng COVID-19. Hindi nakikita ang kalaban kung kaya’t mahirap paghiwalayin pa kung sino ang exposed at sino ang hindi. Kaya tayo umaapela na maging flexible sa pag-iimplementa ng nakasaad sa batas at kung kakayanin ng pondo ay bigyan na ang lahat nang qualified ng fixed na amount ng SRA kaysa bilangin pa natin ang kanilang pag-duty bawat araw.

Tandaan natin na bukod sa mga pasyenteng inaalagaan nila, may mga pamilya rin silang binubuhay. Maging patas tayo sa mga health workers na dapat makatanggap ng benepisyo.

Sa usaping Senado naman, buo ang ating suporta sa mga imbestigasyon tungkol sa tamang paggamit ng ating pondo laban sa COVID-19. Wala silang lugar sa administrasyong ito. Kung may mapatunayan man na may katiwalian ngang nagawa ang isang tao, kahit sino man ‘yan, dapat sampahan agad ng kaso upang maparusahan.

Ang hiling lang natin, sana ay gawin ito sa paraang patas at walang halong pulitika. Kawawa naman ang mga kawani ng gobyerno na matinong nagseserbisyo pero pilit na nadadamay dahil sa intriga lamang. Kung may kasalanan, panagutin at ikulong! Pero kung haka-haka lamang, mas mabuting bigyan muna ng oportunidad na linawin ang mga isyu upang malaman ang katotohanan. Maging patas tayo sa pagdinig at sa panghuhusga.

Huwag din nating hayaang maapektuhan ng intriga at pulitika ang ating pangkalahatang hangarin na malampasan ang krisis at pandemya. Buhay ng tao ang nakasalalay rito kaya dapat tuluy-tuloy lang ang pagpapatupad ng mga programa tungo sa ating muling pagbangon bilang nagkakaisang bansa.

At habang patuloy ang ating kampanya laban sa korupsiyon, kriminalidad at ilegal na droga, patuloy naman tayo sa pagsusulong ng mga panukalang-batas para mas lalong mapalakas ang ating mga serbisyo para sa tao lalo na ‘yung mga kababayan nating hirap na at walang ibang matakbuhan. Maging patas din tayo sa pagbibigay-serbisyo.

Kaya noong Setyembre 6, 2021 ay pinangunahan ko ang isang hearing ng Senate Committee on Health upang talakayin ang iba’t ibang panukala, katulad ng pagpapatayo ng limang ospital, pag-upgrade ng 12 local hospitals at pag-renationalize ng walong ospital. Tinalakay rin ang mga panukala hinggil sa traditional and alternative healthcare system bilang tugon sa panawagang mas mapabuti ito at mas maproteksiyunan ang mga kababayan natin, lalo na sa mga liblib na komunidad na malayo sa pormal na mga pagamutan.

Bilang inyong Senador at lingkod bayan, ipinapangako nating walang Pilipino ang maiiwan sa laban na ito. Patuloy tayong magmamalasakit, lalo na sa mga nangangailangan upang makapagbigay ng patas na serbisyo para sa lahat tungo sa mas komportableng buhay at mas masaganang kinabukasan para sa bawat Pilipino!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.