Sen. Bong Go, nag-withdraw na sa pagtakbo sa pagka-pangulo

ni Jasmin Joy Evangelista | November 30, 2021

Inanunsiyo ngayong araw ni Sen. Bong Go na siya ay magwi-withdraw na sa pagtakbo sa pagka-pangulo.

Ito ay halos isang linggo matapos niyang sabihin na siya ay naghihintay pa ng “sign from God” kung ipagpapatuloy ang kanyang presidential bid.

“In the past few days, I realized in my heart and my mind are contradicting my actions. Talagang nagre-resist po ang aking katawan, puso, at isipan. Tao lang po ako, nasasaktan at napapagod din,” pahayag ni Go sa isang interview.

“Sa ngayon po, ‘yun ang mga rason ko. That is why I am withdrawing from the race,” dagdag niya.

Bong Go, tatakbuhang posisyon, puwedeng magbago

ni Lolet Abania | November 9, 2021

Ipinahayag ni Senador Christopher Bong Go na posibleng magkaroon pa ng mga pagbabago sa kanyang planong pulitikal para 2022 national at local elections.

“Itong kandidatura ko bilang bise presidente, ay maaaring magbago. Hindi po maiiwasan na may mga changes po sa pulitika na sabi ko nga na napakadumi,” ang emosyonal na pahayag ni Go sa isang event sa Antipolo City ngayong Martes.

Nabanggit din ng senador ang tungkol sa “problema sa substitution” subalit hindi na siya nagbigay pa ng detalye ukol dito.

“Alam niyo itong problema about the substitution dito sa pulitika, maaaring may magbabago sa tatakbuhang position sa mga darating na araw. Ang problema po diyan, kailangan ko umiwas. Gustuhin ko man magsilbi sa inyo bilang bise presidente dahil sa kagustuhan ng ating mahal na Pangulo, kailangan ko pong umiwas. Malalaman niyo po ‘yan sa mga darating na araw,” sabi pa ni Go.

Ginawa ng senador ang pahayag ngayong araw kasabay ng pagwi-withdraw ni Davao City Mayor Sara Duterte ng certificate of candidacy (COC) para sa reelection bid nito sa 2022 national at local elections, kung saan papalitan naman si Sara ng kanyang kapatid na si incumbent Vice Mayor Sebastian “Baste” Duterte na tatakbo nang mayor.

Para sa 2022 elections, ang substitution period ay hanggang Nobyembre 15, 2021.

Anuman ang kulay sa pulitika, dapat prayoridad ang pagtugon sa pandemya!

ni Bong Go - @Bisyo Magserbisyo | October 13, 2021

Sa gitna ng mga usaping pulitika ngayong papalapit na halalan, pinapaalalahanan natin ang ating mga kapwa opisyal — anuman ang kulay sa pulitika — iisa pa rin dapat ang layunin: ang malampasan ang pandemya at muling maibangon ang ating ekonomiya mula sa pagkalugmok dulot ng mga epekto nito.

Hindi tayo makakabuo ng mga solusyon sa mga suliraning ating kinahaharap kung hindi tayo nagkakaisa. Kaya hinahamon natin ang mga nagnanais na maluklok sa puwesto: magsama-sama at magtulungan tayo para maiahon sa kahirapan ang ating mga kababayan, lalo na ang mahihirap at pinakanangangailangan na walang matakbuhan kundi ang gobyerno.

Hindi ito ang panahon para magsiraan o maglamangan; bagkus, panahon ito para magtulungan. Isantabi ang pulitika dahil kung hindi natin malalampasan ang krisis, baka wala na tayong pulitikang pag-uusapan sa susunod na taon.

Nananawagan din tayo sa mga lokal na opisyal na siguraduhin ang maayos na pagpapatupad ng mga pandemic response measures, tulad ng rollout ng mga bakuna, sa kabila ng inyong paghahanda para sa halalan. Siguraduhin nating makakaabot ang mga bakuna sa mahihirap at hirap lumabas ng bahay, tulad ng matatanda, persons with disabilities (PWDs) at nakatira sa mga liblib na lugar.

Ang bakuna ang pinakamabisang paraan upang maproteksiyunan ang ating mga kababayan laban sa COVID-19. Kapag bakunado ang tao, mas maliit ang tsansa na siya ay malubhang magkakasakit o maoospital. Kaya para mabawasan ang bilang ng mga malubhang kaso ay ginagawa ng ating gobyerno ang lahat upang matiyak na may sapat na supply ng ligtas at epektibong bakuna para sa mga Pilipino.

Sa kasalukuyan, may higit 87.7 milyon doses na ang nai-deliver sa bansa at may karagdagang limang milyon pa ang nakatakdang dumating sa mga susunod na linggo. Nitong Oktubre 11 ay nakapagturok na tayo ng higit 50 milyon na doses at nasa 26.7 na milyong Pilipino na ang nakatanggap ng unang dose habang may 23.3 milyon naman na “fully vaccinated”.

Kung pagkakataon n’yo nang makapagpabakuna, huwag nang mag-alinlangan pa! Gawin na ito para mabawasan ang pagkalat ng sakit at makabalik na tayo sa mas normal na pamumuhay. Libre ang bakuna para sa mga Pilipino. Pinaghirapan natin ito upang maproteksiyunan ang populasyon, marating ang herd immunity, at walang naiwan sa ating muling pagbangon.

Bukod sa bakuna, sinisikap din nating maibalik ang sigla ng ekonomiya at mabigyan ng sapat na trabaho ang mga nawalan ng kabuhayan habang sinisiguro nating walang magugutom. Higit sa lahat, hindi natin pababayaan ang mga mahihirap. Sila ang prayoridad natin, kapakanan nila ang ipinaglalaban ko rito!

Kahit may krisis, sinusolusyunan natin ang hirap at gutom dahil importante na maalagaan ang tiyan ng bawat Pilipino. Kaya walang tigil ang ating aksiyon upang nakakakuha ng mabilis, maayos at abot-kayang serbisyo, lalo na sa pangkalusugan ang mga komunidad kahit saan mang sulok ng bansa.

Kaya paalala, bakuna muna bago pulitika! Unahin ang tungkulin sa bayan bago ang halalan.

Makakaasa kayo na patuloy pa rin ang serbisyong totoo, tapat at nararapat mula sa inyong lingkod na walang ibang bisyo kundi ang magserbisyo!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.