Kapakanan at kaligtasan ng mga Pinoy ang iprayoridad

ni Bong Go - @Bisyo Magserbisyo | May 07, 2021

Itong nagdaang taon, ipinakita ng pandemyang dulot ng COVID-19 ang importansiya ng serbisyong pangkalusugan. Kailangang mas maisaayos ang mekanismo at kakayahan upang rumesponde sa mga ganitong klaseng krisis at maproteksiyunan, lalo na ang buhay ng bawat Pilipino.

Kaya bilang Chairperson ng Senate Committee on Health, isinulong natin ang Senate Bill No. 2158 na naglalayong magtayo ng Center for Disease Control and Prevention, at ang SB No. 2155 na layunin namang magtatag ng Virology Science and Technology Institute. Hindi natin masabi kung may pandemya pa na darating sa ating buhay. Mabuti na maging mas ‘proactive’ tayo. Matuto tayo sa ating pinagdaanan upang mas maging handa sa anumang krisis na darating.

At para naman matugunan ang pangangailangang medikal ng ating mga kababayan sa kasalukuyan, patuloy ang pagbubukas ng mga Malasakit Centers. Nagbukas na sa Leyte Provincial Hospital at Schistosomiasis Control and Research Hospital sa Palo, Leyte noong nakaraang linggo; sa Don Jose Monfort Medical Center Extension Hospital sa Barotac Nuevo, Iloilo naman noong Martes; at sa Conner District Hospital sa Apayao at Luis Hara Memorial Hospital sa Mountain Province ngayong Biyernes. Sa kabuuan, mayroon na tayong 108 na Malasakit Centers sa buong bansa na magpapadali sa pagkuha ng tulong pampagamot mula sa gobyerno, lalo na sa mahihirap nating kababayan.

Maliban dito, patuloy pa rin ang ating pagtulong, malasakit at bayanihan sa ating mga kababayang nasa gitna ng krisis ngayon.

Nitong linggo, patuloy ang ating tulong sa mga nasunugan tulad ng 1,243 katao sa Bgy. Cupang, Muntinlupa City; 615 katao sa Tugatog, Malabon City; 167 sa Bataraza, Palawan; 210 sa Bgy. Singcang at Bgy 23-13 sa Bacolod City, Negros Occidental; 210 na pamilya sa Bgy. Ilang, Davao City; limang pamilya sa Bgy. Sauyo, Quezon City; at 126 pamilya sa Taytay, Rizal.

Nagbigay din tayo ng tulong sa mga naging biktima ng mga nakaraang bagyo tulad ng 2,085 na katao sa Lanuza, Surigao del Sur; 3,117 katao sa Prosperidad, Agusan del Sur; at 1,500 na biktima ng mga pagbaha sa Palo, Leyte.

Tinulungan din natin ang ating mga kababayang lubhang naapektuhan ang mga kabuhayan dahil sa pandemya tulad ng mga 2,877 PWDs, TODA members at indigent families sa Mexico, Pampanga; 89 vendors sa Agdao District, Davao City; at 145 indigents sa Digos City, Davao del Sur; 80 hospital staff at 87 pasyente sa ospital sa Barotac Nuevo, Iloilo; 1,987 magsasaka at Bantay Bayan sa Mexico, Pampanga; 135 golf staff sa Fernando Airbase Golf Club House, Lipa City, Batangas; 1,000 construction workers, utility, drivers at indigent families sa Tarlac City; 2,069 katao mula sa Talisay City, Negros Occidental na mga nabiktima ng pagbaha, market vendors, at jeepney drivers; 2,000 katao na binubuo ng mga magsasaka, solo parents, senior citizens, OFWs at mga TODA members sa Sta. Ana, Pampanga; 110 na magsasaka at indigenous peoples sa Cateel, Davao Oriental; 209 displaced workers ng Laoag, Ilocos Norte; at 200 vulnerable workers sa Bayombong, Nueva Vizcaya.

Sa lahat ng ito, namahagi tayo ng pagkain, food packs, vitamins, masks, face shields, sapatos, bisikleta at mga computer tablets. Naroon din ang ibang ahensiya ng gobyerno para mamahagi ng kani-kanilang programa. Siniguro naming nasunod ang mga health protocols sa bawat lugar upang maiwasan ang pagkalat ng COVID-19 at iba pang sakit.

Sa usaping COVID-19, patuloy ang pagbabakuna sa bansa. Bukas ay inaasahan nating darating na ang 1.5 milyong doses ng Sinovac. Pinaghahandaan na rin ang posibleng pagdating ng dalawang milyong doses ng AstraZeneca mula sa COVAX Facility sa Sabado.

Ginagawa natin ang lahat para sa kapakanan at kaligtasan ng bawat Pilipino. Patuloy ang malasakit at serbisyo.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

2 M doses ng AstraZeneca vaccine, darating sa May 8 — Go

ni Lolet Abania | May 6, 2021

Naghahanda na ang pamahalaan sa posibleng pagdating ng 2 milyong doses ng AstraZeneca COVID-19 vaccines mula sa COVAX Facility sa Sabado, May 8.

Ito ang kinumpirma ni Senate health committee chairman Senador Bong Go sa isang pagdinig ngayong Huwebes.

“Pinaghahandaan na rin ang posibleng pagdating ng dalawang milyong doses ng bakunang AstraZeneca mula sa COVAX facility ngayong darating na Sabado nang hapon,” ani Go.

“Malaking tulong lalo na ang AstraZeneca dahil marami sa ating mga medical frontliners, senior citizens, at ‘yung merong comorbidities ang nabigyan na po ng first dose nito at naghihintay na lang maturukan ng kanilang second dose,” dagdag ni Go.

Matatandaang noong April, umasa ang Department of Health na kahit naantala ang pagdating ng AstraZeneca vaccines, mangyayari ito sa huling linggo ng Mayo para maibigay ang second dose sa mga naturukan na ng unang dose nito.

Hindi nai-deliver ang mga inaasahang bakuna ng AstraZeneca dahil sa logistical problems.

Dagdag ni Go, bukod sa 2 milyong doses ng AstraZeneca jabs, mayroong 1.5 milyong doses ng Sinovac COVID-19 vaccine ang darating naman sa Biyernes.

Makiisa sa laban kontra COVID-19!

ni Bong Go - @Bisyo Magserbisyo | May 05, 2021

Mga kababayan, patuloy pa rin ang laban natin kontra COVID-19 at hindi tayo susuko hangga’t malampasan nating lahat ito. Bukod sa mga pinaigting na hakbang kontra sa pandemya, ginagawa rin ng gobyerno ang lahat upang maging mas mabilis, maayos at maaasahan ang mga serbisyong pangkalusugan kahit saan mang parte ng bansa.

Nitong nakaraang linggo lang, binuksan na ang tatlong karagdagang Malasakit Centers sa Visayas — sa Cebu Provincial Hospital sa Carcar City, Cebu; at Leyte Provincial Hospital at sa Schistosomiasis Control and Research Hospital sa Palo, Leyte. At nitong Martes naman, binuksan natin ang Malasakit Center sa Don Jose Monfort Medical Center Extension Hospital sa Barotac Nuevo, Iloilo.

Sa loob ng tatlong taon, nakapaglunsad na tayo ng 106 Malasakit Centers sa buong bansa. Sa kabuuan, halos dalawang milyong katao na ang ating natulungan at dahil naisabatas na ito, tiyak tayong darami pa ang makikinabang na mga Pilipino sa darating na panahon.

Dahil sa Malasakit Centers, hindi n’yo na kailangang pumila at umikot pa sa iba’t ibang opisina upang makakuha ng tulong mula sa gobyerno. Nasa iisang kuwarto nalang sa loob ng pampublikong ospital na malapit sa inyo ang mga ahensiyang handang magbigay ng tulong pampagamot lalo na sa mahihirap na Pilipino.

Bilang Chair ng Senate Committee on Health and Demography, titiyakin nating prayoridad palagi ang proteksiyon ng buhay ng bawat Pilipino habang unti-unting binubuksan muli ang ating ekonomiya sa ligtas na paraan. Binabalanse natin palagi ang kalusugan at kabuhayan ng ating mga kababayan upang maiwasan hindi lamang ang sakit, kundi pati rin ang gutom at kahirapan.

Ikinatutuwa nating ibahagi ang patuloy na pagdating ng mga bakuna sa ating bansa. Nitong Mayo 1, nakatanggap tayo ng unang batch ng Sputnik V na bakuna mula sa Russia. Bukod pa rito, may inaasahan tayong 1.5 milyong bakuna mula sa Sinovac ngayong Mayo 7. Patuloy lang ang pagdating ng bakuna hanggang sa matapos ang taon para makamit natin ang herd immunity pagdating ng 2021.

Nananawagan tayo sa ating mga kababayan na huwag matakot sa bakuna. Mas matakot kayo sa COVID-19. Bakuna ang solusyon para malampasan ang pandemyang ito at ang susi tungo sa muling pagbalik natin sa normal na pamumuhay. Sa katunayan, mismong si Pangulong Rodrigo Duterte ay nagpabakuna na noong Lunes upang maipakita sa mga Pilipino na ligtas at epektibo ang mga ito.

Panahon ito ng pagtutulungan, pagmamalasakit at pakikiisa sa bayanihan. Hindi ito panahon para magsiraan, magsisihan o manlamangan pa.

Mag-ingat tayo hindi lamang sa sakit na kumakalat, kundi pati rin sa mga nagkakalat na mga fake news. Huwag hayaang manaig ang mga may maitim na budhi at mayroong masamang saloobin. Sa mga nagpapakalat ng fake news, ano’ng mapapala ninyo? Masaya kayo sa panloloko ninyo? Hindi na nga nakatutulong, dagdag-problema pa sa kapwa.

Lahat tayo ay may papel na ginagampanan sa laban na ito. Maging parte tayo ng solusyon kaysa dumagdag pa sa problema. Kayang-kaya natin itong lampasan kung tayo ay magkakaisa para sa kabutihan ng buong bansa!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.