Habang nilalabanan ang COVID-19, tugunan din ang gutom at kahirapan

ni Bong Go - @Bisyo Magserbisyo | August 05, 2021

Palaging inuuna ng gobyerno ang kalusugan at buhay ng bawat Pilipino sa mga desisyon nito pagdating sa kasalukuyang pandemya. Ito ang dahilan kaya nagpasya ang IATF na isailalim ang NCR sa heightened GCQ hanggang August 5, 2021, at ECQ naman mula August 6 hanggang August 20 dahil sa bantang dulot ng Delta variant ng COVID-19.

Bilang Chair ng Senate Committee on Health, nirerespeto natin ang desisyon ng gobyerno at mga eksperto na higpitan pansamantala ang kasalukuyang community quarantine protocols sa NCR upang maagapan ang pagkalat ng Delta variant bago ito lumala. ‘Ika nga, patayin na ang maliit na apoy bago pa lumaki at kumalat. Huwag hayaang umabot sa puntong mapuno ang ating mga ospital at mas mahirapan tayo, lalo tulad ng nangyayari sa ibang bansa.

Maliban sa istriktong quarantine guidelines, mas paigtingin din natin ang border control at travel restrictions sa bansang maraming kaso ng Delta variant. Hinihimok natin ang pamahalaan na mas palakasin pa ang contact tracing at genome sequencing sa bansa. Patuloy din nating dagdagan ang kapasidad ng mga healthcare facilities at, higit sa lahat, mas pabilisin ang pagbabakuna.

Huwag nating sayangin ang magandang takbo ng vaccine rollout ngayon. Tulad ng sabi ng Pangulo, posibleng maging mas maluwag ang restrictions kapag protektado ng bakuna.

Masaya tayong ibinabalita sa ating mga kababayan na noong Agosto 2, nakapagtala na tayo ng mahigit 20 million doses administered; 11,747,581 sa mga ito ay first dose, habang ang 9,115,963 naman ang nakatanggap na ng second dose at fully vaccinated na.

Habang nilalabanan ang COVID-19, dapat tugunan din ang gutom at kahirapan na epekto nito. Kaya nagpapasalamat tayo kay Pangulong Rodrigo Duterte sa pagtugon sa ating apela na magbigay-ayuda sa mga pinakamahihirap na maaapektuhan ng ECQ sa NCR.

Sa pamamagitan ng ayudang ito, matutulungan natin ang mahihirap nating kababayan na maitawid ang kanilang pamilya habang apektado ang kanilang kabuhayan dahil sa ECQ, lalo na ang mga daily wage earners. Mahigit 13 milyon ang populasyon sa NCR, at nasa 80% nito o mahigit 10.8 milyong indibidwal ang mabibigyan natin ng ayuda ayon sa DBM, NEDA, at iba pang ahensiya.

Ang apela natin naman sa mga lokal na pamunuan ay siguraduhing maibibigay agad ang ayuda sa mga tamang benepisaryo sa isang maayos, mabilis at ligtas na paraan na walang katiwalian.

Patuloy nating hinihikayat ang ating mga kababayan na huwag tayo masyadong magkumpiyansa. Pakiusap, sumunod tayo sa mga patakaran at magpabakuna upang maprotektahan ang inyong mga sarili at ang buong komunidad.

Tandaan na ang disiplina at kooperasyon ay makapagliligtas ng buhay ng ating mga kapwa. Kaunting sakripisyo ito katumbas ang mga buhay na mapoproteksiyunan natin.

Dagdag pa rito, umaapela rin tayo na bigyang-importansiya ang contact tracing na malaki ang parte sa ating overall COVID-19 response efforts. Marami sa ating mga kababayan ang gustong tumulong. Puwede silang maging contact tracers kung bibigyan sila ng karampatang training at kompensasyon bilang kabuhayan na rin sa mga nawalan ng trabaho.

Magtulungan tayo at makisama sa bayanihan bilang pagmamalasakit sa ating kapwa, at pagiging parte ng solusyon para malampasan ang mga pagsubok na hinaharap ng ating bansa!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Tunay na pagbabago tungo sa maginhawang buhay ng mga Pinoy

ni Bong Go - @Bisyo Magserbisyo | July 28, 2021

Noong Lunes, Hulyo 26, 2021 ay nagbigay ang ating Pangulo ng huling SONA ng kanyang katungkulan bilang ika-16 na Pangulo ng Republika ng Pilipinas.

Ramdam ang sinseridad ni Pangulong Rodrigo Duterte sa kanyang huling SONA. Alam ng Pangulo na marami pa ang dapat gawin at nananatili siyang tapat na maisakatuparan ang kanyang mga pangako hanggang sa huling araw ng kanyang termino.

Sa kabila ng maraming nagawa ng administrasyon, the President will not “rest on his laurels”. Hindi pa siya nakukuntento dahil alam niyang marami pa siyang puwedeng gawin. Kaya mahalagang patuloy tayong magkaisa. Magtulungan para malampasan ang krisis at maibigay ang mas komportableng buhay sa bawat Pilipino.

Sa pagkakataong ito, nais nating purihin at pasalamatan ang Pangulo dahil sa kanyang walang humpay na serbisyo, walang pagod na pagbibigay ng totoo at pangmatagalang pagbabago para sa ikauunlad ng bansa, at sa walang hanggang pagmamahal sa mga Pinoy.

Sa ilalim ng kanyang liderato, naisakatuparan ang ating adbokasiya na mabigyan ng maayos, mabilis at epektibong serbisyong medikal ang bawat Pilipino sa pamamagitan ng Universal Health Care Law at Malasakit Centers Act. Marami ring kabataan ang nabigyan ng bagong pag-asa dahil sa Free Tertiary Education sa mga kolehiyo at unibersidad. At sa ilalim naman ng Build, Build, Build program, natapos ang ilang proyekto, tulad ng LRT 2 East Extension, Metro Manila Skyway Stage 3, Clark International Airport, Sorsogon City Coastal Bypass Road at marami pang iba.

Marami pang punto ang inilatag ng ating Pangulo sa kanyang SONA, tulad na lamang ng matagumpay na paglaban sa NPA sa pamamagitan ng NTF-ELCAC at paglalatag ng pundasyon sa pangmatagalang kapayapaan sa Mindanao sa pagpasa ng Organic Law for the Bangsamoro Autonomous Region in Muslim Mindanao. Napabilis naman ang proseso ng gobyerno at pagsisimula ng negosyo sa pamamagitan ng Ease of Doing Business Act, pagtatatag ng Philippine Identification System Act o Philsys ID at Central Business Portal.

Sa patuloy na paglaban sa COVID-19, napabilis ang pagtatayo ng mga laboratoryo at naparami ang testing centers sa bansa; nakapagtayo ng daan-daang COVID-19 monitoring, quarantine at treatment facilities; at napaigting ang national vaccination program sa bawat sulok ng bansa, kasama na ang pagkakaroon ng sapat na bakuna na sunud-sunod na ang pagdating linggu-linggo para sa proteksiyon ng bawat Pilipino.

Kaya kaisa tayo sa panawagang magpabakuna at patuloy na sundin ang mga health protocols.

Marami ng plano ang inilatag ng Pangulo upang maibalik ang sigla ng ekonomiya sa bansa at makabalik na tayo sa normal na pamumuhay. Magtulungan tayo para malagpasan ang COVID-19 bilang nagkakaisa at mas matatag na bansa.

Sa pagsapit ng huling taon ng Duterte Administration, iisa lang ang sigurado tayo: babangon, uunlad at uusbong tayo. Naniniwala tayong mabilis nating makakamit ito kapag tayo ay nagbabayanihan at nagmamalasakit sa isa’t isa.

Ilaan natin ang ating kakayahan para mapagsilbihan at mapabuti ang kalagayan ng ating kapwa. Huwag itong haluan ng pulitika dahil iisa lamang ang ating pangarap — ang mabigyan ng magandang kinabukasan at komportableng buhay ang bawat Pilipino.

At pagkatapos naman ng SONA ni Pangulong Duterte, natamo ng Pilipinas ang pinakaunang Olympic gold medal. Nakikiisa tayo sa buong sambayanang Pilipino sa pagsaludo sa husay at galing ni Hidilyn Diaz! Ang kanyang pagsisikap, disiplina at tagumpay ay nagbibigay-inspirasyon sa ating lahat, lalo na sa mga kabataang nagnanais na maging atleta rin na tulad mo. Mabuhay ka, Hidilyn Diaz, at ang lahat ng mga atletang Pilipino! Mabuhay ang ating pinakamamahal na bansang Pilipinas!

Nais nating ipagbigay-alam sa lahat ng ating atleta, na tulad ng ating pakikipag-ugnayan kay Hidilyn Diaz, ang inyong ay handang tumulong. Bilang Chair ng Senate Committee on Sports, palaging bukas ang ating opisina sa inyong pangangailangan. Iisa lang ang hangarin natin at ‘yan ay ang magbigay ng karangalan sa ating bansa.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Panahon ngayon ng pagtutulungan at pakikipagbayanihan, hindi pagsisihan

ni Bong Go - @Bisyo Magserbisyo | July 23, 2021

Kahit papalapit na ang susunod na eleksiyon, hindi dapat mawala ang focus natin sa laban kontra COVID-19 at sa hangarin na mabigyan ng mas komportableng buhay ang bawat Pilipino. Unahin natin palagi ang buhay at kapakanan ng bawat Pilipino. Dahil kung hindi natin malalampasan ang krisis, baka wala na tayong pag-uusapan pang pulitika.

Nais nating klaruhin na walang interes ang inyong lingkod na tumakbo sa anumang posisyon sa 2022. Kung anuman ang magiging kapalaran sa mundong ito, ipinauubaya natin ‘yan sa Diyos, sa mga Duterte na napakalaki ng aking tiwala at paghanga, at sa mga Pilipino na nagbigay ng pagkakataong makapagserbisyo. Kaya hindi natin sasayangin ang oportunidad na makapaglingkod sa sambayanang Pilipino.

Kaya pakiusap, sana ay patuloy ninyong suportahan ang administrasyon na walang ibang hangarin kundi ang kabutihan ng lahat. Panahon ito ng pagtutulungan at pakikipagbayanihan. Hindi ito ang panahon para magsiraan at magsisihan.

Kaysa pag-usapan ang pulitika, kasalukuyan tayong nakatuon sa pagtulong sa mga nangangailangan. Nitong nakaraang linggo, nagbigay tayo ng tulong sa 12 pamilyang nasunugan sa Las Piñas City; 12 din sa Maynila; tigdalawang pamilya sa San Jose, Batangas at Cabuyao City, Laguna; at 36 na pamilya sa Pateros. Personal nating inabutan ng tulong ang 400 na nasunugan sa Matina Aplaya, Davao City.

Nag-abot din tayo ng tulong sa 277 na pamilyang biktima ng flashfloods sa Bgy. Talomo River, Calinan District; at 1,191 na pamilya naman sa Bgy. Lasang, parehong sa Davao City din.

Maliban dito, hindi natin kinalimutan ang mga pinakaapektado ng pandemya. Tinulungan natin ang 178 TODA members at stranded seafarers sa DSWD Central Office sa Quezon City ngayong linggo. Nagpunta rin ang ating team sa Cagayan upang tulungan ang 257 na residenteng apektado ng pandemya sa Gonzaga; 88 sa Sta. Ana, 369 sa Aparri, at 243 naman sa Camalaniugan.

Sa probinsiya ng Zamboanga del Sur, nag-abot tayo ng tulong sa 1,500 pandemic-hit workers sa Tambulig; 1,500 din sa Aurora, at 1,812 naman sa Pagadian City. Tinulungan din natin ang 855 na PWDs sa Maasin City, Southern Leyte; 5,247 na kababayan nating apektado ng pandemya sa Lingayen, Pangasinan; at libu-libong kababayang mula sa indigent na sektor sa Bayambang, Pangasinan.

Maliban pa riyan, ang ating opisina ay nagtungo rin sa Tudela, Misamis Occidental upang magbigay ng ayuda sa 1,313 small vendors; 2,025 na mangingisda sa Santa Fe, Bantayan Island, Cebu; at 1,790 na TODA members at market vendors mula sa Naval at Kawayan sa probinsiya ng Biliran; 1,000 TODA members sa Caloocan City; at 289 kababayang lubhang naapektuhan ng pandemya sa Parañaque City.

Kahapon, Hulyo 22, 2021 ay binuksan din natin ang ika-130 na Malasakit Center sa bansa sa Mariano Marcos Memorial Hospital and Medical Center sa bayan ng Batac, Ilocos Norte.

Hindi tayo mapapagod na tumulong sa mga nangangailangan. Patuloy tayong magtatrabaho hanggang sa huling araw ng termino.

Sa huling State of the Nation Address sa susunod na linggo ni Pangulong Rodrigo Duterte, inaasahan nating babanggitin ng Pangulo ang ilan sa mga priority measures upang mapalakas ang ating laban kontra COVID-19, at pati na rin ang patuloy na laban kontra korupsiyon, ilegal na droga, at kriminalidad tungo sa pagbibigay ng mas komportable at mapayapang buhay sa ating mga kababayan at sa susunod na mga henerasyon.

Inaasahan din nating matatalakay ng Pangulo ang mga magagandang pagbabago at accomplishments na nagawa ng gobyernong ito sa nakaraang limang taon. Hayaan na nating ang taumbayan ang humusga kung masaya sila sa mga ginawa sa terminong ito at kung nais pa nilang maipagpatuloy ang mga nasimulan ng ating Pangulo.

Sa ngayon, tutok muna tayo sa pagseserbisyo. Lampasan muna natin ang mga pagsubok na ating kinahaharap. Bakuna muna bago pulitika. Magkaisa tayo at tulungan natin ang ating kapwa para masigurong walang maiiwan tungo sa ating muling pagbangon bilang isang nagkakaisa at mas matatag na bansa!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.