BOC, DA at DTI, joint force… Smuggled carrots, nasabat sa Divisoria

ni Zel Fernandez | April 20, 2022

Sampung kahon ng smuggled na carrots ang nasabat sa pag-iinspeksiyon ng mga operatiba sa Divisoria, kagabi.

Tinatayang aabot sa halagang ₱8,000 ang mga smuggled carrots na nakumpiska ng Bureau of Customs, kasunod ng isinagawa nitong joint operations kasama ang Department of Agriculture at Department of Trade and Industry sa mga natitinda ng agricultural products sa Divisoria.

Sa mas pinaigting pang kampanya laban sa smuggling, ipinaliwanag ng DA na matagal na nilang tinututukan ang mga nagpupuslit ng mga imported agricultural products upang matulungan ang mga lokal na magsasakang nahihirapang makapagbenta ng kanilang mga aning gulay dahil sa matinding kumpetensiya sa merkado dulot ng mga imported goods.

“Marami na kaming nahuli sa pantalan hanggang dito sa second border. ‘Pag sinabi nating second border, du’n na sa mga cold storage mismo, sinusuyod natin ang mga cold storage,” pahayag ni Serapio Garabiles, Jr., inspection officer ng Department of Agriculture.

Ayon sa BOC, ipinupuslit umano ang mga imported na gulay kasama ng mga aprubadong produkto kaya minsan ay nakalulusot ito sa inspeksiyon sa mga pantalan.

Babala pa ng DA at BOC, hindi sila titigil sa pagsawata sa mga iligal na nagpupuslit ng mga gulay sa bansa upang higit pang maprotektahan ang mga lokal na magsasaka at mga mamimili, “tandaan ninyo ‘yan pati ang mga smuggler inaalam na namin. Dalawang beses na kaming nag-operate sa palengke, pagbibigay ‘to ng warning na hindi kami titigil. Ang pangatlong operation namin may kulong na”, ani Garabiles.

Dagdag naman ni Chief Alvin Enciso, MICP Customs Intelligence and Investigation Service, “pwede ho kayong tumakbo pero hahabulin at hahabulin po namin kayo. Sayang lang ho ‘yung gagastusin n’yo para mailabas. Pagdating mo sa mga palengke, sa mga warehouses, hahabulin pa rin ho namin ‘yon”.

Sasampahan sana ng kaso ang mga mahuhuling may-ari ng mga kumpiskadong produkto ngunit wala nang umangkin sa mga ito.

P600 M puslit na pekeng goods, nakumpiska ng BOC

ni Lolet Abania | April 8, 2022

Nakakumpiska ang Bureau of Customs (BOC) ng mahigit sa limandaang-milyong pisong halaga ng mga pekeng produkto sa Cavite.

Sa isang statement ng BOC ngayong Biyernes, sinabi nitong nasabat ang mga puslit na illegal goods na may estimated value na P600,000,000 sa Kawit, Cavite noong Marso 28, 2022 sa pamamagitan ng kanilang Customs Intelligence and Investigation Service-Intellectual Property Rights Division (CIIS-IPRD).

Ayon sa BOC, ang kanilang implementing team na binubuo ng mga tauhan mula sa CIIS-IPRD, BOC-Port of Manila (POM), BOC Revenue Collection and Monitoring Group (RCMG) – Legal Service, at ng Armed Forces of the Philippines (AFP), ay nagsagawa ng inspeksyon sa isang warehouse na matatagpuan sa Toclong-San Sebastian Road, Kawit, Cavite.

Ang naturang inspection ay alinsunod sa isang Letter of Authority (LOA) na inisyu ng BOC Commissioner Rey Leonardo Guerrero.

“Prior sealing the subject warehouse, BOC examiners, in the presence of CIIS and the AFP operatives, conducted an inventory of the goods comprising of motorcycle accessories, footwears and apparels bearing the brands of Nike, Adidas, and Gucci, among others,” saad ng BOC.

Sa ilalim ng Republic Act No. 10863 o ang Customs Modernization and Tariff Act (CMTA) ay nakasaad, “infringing goods are prohibited articles and should immediately be seized or confiscated.”

Patuloy pa ang imbestigasyon sa posible namang paglabag sa Intellectual Property Code of the Philippines (RA 8293) at ang CMTA, ayon pa sa BOC.

Smuggled gulay na nagkakahalagang P66 M, nasabat sa Port of Subic

ni Jasmin Joy Evangelista | November 22, 2021

Nasabat ng mga awtoridad sa Port of Subic ang dalawang container shipment na may lamang smuggled vegetables na umaabot sa P66 milyon ang halaga.

Nakatanggap umano ang Bureau of Customs ng impormasyon hinggil sa mga nasabing shipment na naka-consign sa JKJ International Co. at EMV Consumer Goods Trading.

Isinailalim ang mga ito sa eksaminasyon at doon ay nakita na ang laman ng shipment ay carrots, sweet oats, broccoli, mushroom at red onions.

Sinabi rin ng intelligence group ng BOC na ilang beses nang nagpalit ng pangalan ang EMV Consumer Goods pero hindi naman ito nakakalusot.

Nag-issue na ng warrants of seizure and detention ang BOC laban sa nasabing shipments dahil sa paglabag sa Department of Agriculture Circular No. 04 Series of 2016 hinggil sa importasyon ng plant products for commercial use at Section 1113 ng Republic Act 10863 o Customs Modernization and Tariff Act.

Patuloy naman ang pagpapaigting ng monitoring laban sa mga smuggled na produkto lalo’t nalalapit na ang holiday season