Mala-gangster... BYUTING AKTRES, PINALAYAS SA DRESSING ROOM NG MADIR NG SIKAT NA AKTRES

ni Janiz Navida @ShowbizSpecial | August 13, 2023

BLIND ITEM:

Nalungkot kami sa kuwentong nakarating sa amin na mukhang umakyat na sa ulo ng mga nakapaligid sa young actress ang kasikatang tinatamasa niya ngayon.

Marami nang pinagbidahang serye ang aktres at in fairness, sikat na sikat na talaga siya dahil may napatunayan na hindi lang sa pag-arte kundi maging sa pagiging product endorser, kaya nga mabentang-mabenta rin siya sa mga commercials.

Ganito ang eksena. One time, nasa dressing room ang isang byuting aktres na kasabayan ng sikat na young actress. Pareho silang guests sa isang TV show kaya pinagsama sila sa dressing room.

Pagpasok ng madir ng sikat na young actress, hindi raw nito nagustuhan na may ibang kasama sa dressing room ang kanyang anak kaya nag-dialogue ito ng "Akala ko ba, solo lang ng anak ko ang dressing room na 'to?"

Nagulat ang byuting aktres sa narinig at napaiyak na lang sabay labas ng dressing room.

Walang nagawa ang byuting aktres dahil hindi niya kasama that time ang kanyang manager na sana ay nakapagtanggol sa kanya sa pagpaparinig ng madir ng sikat na young actress.

Napatanong tuloy kami sa source namin kung alam kaya ng sikat na aktres ang ginawa ng kanyang madir na may pagka-gangster pala ang asal, at kibit-balikat na lang ang isinagot ng aming kausap.

Hay, sana lang 'wag masira ang aktres kung ganito pala ang asal ng nanay, ha?!

SIKAT NA YOUNG ACTOR, MAY KAKAIBANG TOPAK, REKLAMADOR PA, KAYA INAAYAWAN

ni Ambet Nabus @Let's See | August 9, 2023

BLIND ITEM:

Hindi kami makapaniwala na may kakaiba palang topak itong kilalang young actor.

Noon pala kasing kasagsagan ng promo ng isang teleseryeng kanyang pinagbibidahan, may ilang insidente palang nakuwestiyon ang pagiging propesyonal, mabait at marespeto nito.

Una na riyan ang insidente sa isang weekend show na nag-promote ito. May mga spiels kasi itong ayaw basahin o banggitin dahil ayon sa mga sources natin, “Nahahabaan,” daw ito. Considering umano na tungkol sa series, names ng mga co-stars at places abroad lang ang babasahin ni sikat na aktor, ha?

Nauwi nga raw sa generic na “Abangan” at pagbanggit sa ilang names ng co-actors niya ang sinabi ni young actor na ikinadismaya ng mga nasa produksiyon.

Then, another incident happened when in another show ay nag-request ang same young actor na huwag siya ang patawagin sa mga co-lead stars niya to appear on stage.

May tsika pa umano ito na hindi naman siya dapat gawing host o interviewer dahil bida rin siya sa series, kundi man siya ang pinaka-bida. Hindi man daw masyadong natutuwa ang mga nasa produksiyon sa sinasapit ng series ngayon dahil sa lackluster performance nito sa TV ratings despite ng mga bonggang promo, in a way daw ay nagdarasal silang mabilaukan ang sikat na young actor.

Sa medyo chararat daw kasing pag-attitude nito during promo ay tila nag-translate sa ‘poor’ ratings ang mga inasal nito. Sa totoo lang, mga Ka-BULGAR, nakaka-shock ito dahil sa maamong mukha pala ni sikat na young actor ay may kakaiba itong asal.

Ang madalas na pag-viral ng mga videos at posts ni young actor ang best clue na maibibigay namin! Kuha ninyo?

SIKAT NA MALE TV HOST, PARA LIMOT-PROBLEMA, SUKI NA SA CASINO

ni Melba Llanera - @ Insider | July 6, 2023

BLIND ITEM:

Gaano kaya katotoo ang balitang nakarating sa amin na laman daw ng casino ang isang sikat na male TV host?

Heto nga raw ang dahilan kung bakit balitang nabaon siya sa utang at naging dahilan kaya nagkaroon sila ng tampuhan ng kaibigan niya na isa ring sikat na TV host.

Nakakalungkot lang kung iisipin dahil ‘di matatawaran ang galing nito, hindi lang sa pagho-host, kundi pati sa pagkanta at pagsasayaw.

Mabait, approachable at magaling ding makisama ang naturang male TV host sa lahat, lalo na sa press.

Iniisip namin na baka ito ang naging outlet niya dahil may mabigat siyang pinagdaanan kamakailan, pero sana ay makontrol nito ang sarili na iwasan na ang pagsusugal, na baka hindi lang niya ikasira kundi maging ng kanyang pamilya.

Naalala namin ang isang yumaong kapwa manunulat na nakasama ng isa ring yumaong manager-columnist sa casino at namamalagi sila rito sa loob nang ilang araw dahil may libre kang hotel accommodation ‘pag regular ka nang nagsusugal sa kanila.

Ayon sa kapwa namin manunulat, ‘pag nasa loob ka raw kasi ng casino ay malilimutan mo ang paglipas ng oras at ‘di mo namamalayan na ilang araw ka na palang ‘di umuuwi at nakababad ka na rito.

Pagkukumpara pa nga sa amin ng manunulat na ito ay para kang nasa isang fantasy world na limot mo na may buhay kang dapat harapin at mga responsibilidad sa buhay na dapat isipin.

Hiling namin, hangga’t kaya pa ay matauhan na sana ang naturang male TV host na walang kapupuntahan ang lahat ng pagsisikap niya sa mga proyektong ipinagkakatiwala sa kanya kung ‘di niya maiiwasan ang pagsusugal.

At kung lumala pa ito ay maaaring mauwi na nga sa addiction tulad ng droga at alak.