Pagbabasbas ng mga replica ng Itim na Nazareno, sinimulan na

ni Jasmin Joy Evangelista | December 28, 2021

Sinimulan na kahapon ang taunang pagbabasbas sa mga replica ng Itim na Nazareno sa Minor Basilica of the Black Nazarene (Quiapo Church) sa Maynila.

Ayon kay Quiapo Church parochial vicar Fr. Douglas Badong, ginawang 3 araw ang pagbabasbas upang maiwasan ang dagsa ng mga deboto.

"Iyong dating 1 araw lang natin ginagawa, para maiwasan ang ating pagdidikit-dikit at masunod pa rin natin ang physical distancing, ay ginawa nating 3 araw," ani Badong.

Samantala, sinimulan na rin kahapon ang paglabas sa mga imahen ng Nazareno sa Quiapo Church para dalhin sa mga probinsiya.

"Nasa Atimonan, Quezon... at bukas naman ay bibiyahe iyong isang pa-north, papunta naman ng Baguio Cathedral," ani Badong.

Sa Disyembre 30 naman magkakaroon ng thanksgiving procession ang Nazareno sa rutang dinadaanan ng Traslacion.

Sa Disyembre 31, magsisimula naman ng alas-5 ng madaling araw ang mga Misa na idaraos kada oras hanggang alas-6 ng gabi.

Alas-8 ng gabi naman isasagawa ang Misa para sa bisperas ng Bagong Taon sa Quiapo Church.

Imahen ng Itim na Nazareno, nakatakdang ilibot sa iba-ibang simbahan

ni Jasmin Joy Evangelista | December 1, 2021

Nakatakdang ilibot ang imahen ng Itim na Nazareno sa mga simbahan sa iba't ibang panig ng Luzon.

Ito ay sa kabila ng pagkakansela ng taunang prusisyon na Traslacion sa susunod na taon.

Ayon kay Fr. Douglas Badong, parochial vicar ng Minor Basilica of the Black Nazarene o Quiapo Church, bukod sa misa ay ililibot ang imahen sa Baguio City, La Union, Dagupan City, Cabanatuan City sa Nueva Ecija, Pampanga, Tarlac, Atimonan at Lucena sa Quezon, San Pablo City sa Batangas at Imus sa Cavite, at dadaan sa simbahan sa Las Piñas at Baclaran Church sa Parañaque bago bumalik sa Quiapo Church.

Aniya pa, tuloy pa rin ang taunang Thanksgiving procession sa Disyembre 30 pero gagawin ito sa pamamagitan ng motorcade.

Nakatakda ring ilagak ang Poong Nazareno sa Sta. Cruz Church sa loob ng 9 na araw para masulyapan ang imahen.

Matatandaang inanunsiyo ni Badong noong nakaraang linggo na kanselado ulit sa susunod na taon ang Traslacion dahil sa patuloy na banta ng COVID-19.

Mga pasaway na deboto ng Black Nazarene, aarestuhin

ni Ronalyn Seminiano Reonico | January 8, 2021

Aarestuhin ang mga pasaway na deboto ng Black Nazarene na lalabag sa health and safety protocols sa kapistahan nito sa Sabado, January 9, ayon kay Manila Police District (MPD) Chief Police Brigadier General Leo Francisco.

Pahayag ni Francisco, "Sa pagtatalaga ng napakaraming pulis na 'yan, sila ay nandoon para magbantay ng physical distancing, pagsasabihan ang ating mga deboto kung sila ay [lumabag], i-maintain talaga ang physical distancing dahil nandiyan talaga ang panganib ng COVID. Kung sila ay makulit at hindi mapagsabihan, darating tayo sa arestuhan.”

Magpapadala rin umano ng mga bus galing sa Bureau of Jail Management and Penology na magsisilbing pansamantalang detention facility para sa mga lalabag sa health protocols.

Samantala, mahigpit namang ipinagbawal ng National Capital Region Police Office ang pakikiisa ng mga edad 15 pababa at 65 pataas sa naturang pagdiriwang dahil sa pandemya.

Paalala rin ng awtoridad, bukod sa face mask at face shield, kailangan ding magsuot ng footwear ang mga makikiisa sa kapistahan ng Black Nazarene.