Huby umulit sa TOL Stage 12, ahunan sa Pangasinan sinisiw

ni Elyssa Nichole @Sports | May 12, 2026

Photo: Hawak ni Ronnilan Quita ang Individual Mountain Classification (KOM) (7RP) sa pagtatapos ng Stage 11 MPTC Tour of Luzon 2026 kahapon. (mptcpix)

Mangatarem, Pangasinan - Muling pinatunayan ni Frenchman Antoine Huby ng 7-Eleven Cliqq Roadbike Philippines ang husay nito sa akyatan matapos  dominahin ang Stage 12 ng Tour of Luzon 2026 kahapon na nagsimula sa Agoo, La Union at nagtapos sa Daang Kalikasan Mangatarem View Deck dito.

Nakapagtala si 25-year-old, Huby ng tiyempong tatlong oras, 17 minuto at 37 segundo sa 146.40 kms na may 7.4-kilometerong mahirap na akyatan habang pangalawang tumawid sa meta ang may suot ng yellow jersey na si Russian rider Nikita Shulchenko.

Bakas sa mukha at galaw ni Huby ang sobrang pagod pero kumpiyansa siyang mahusay ito sa akyatan kahit na matarik ang daan. “I'm a good climber. It was really hard, my teammate did a great job," saad ni Huby na mula pangatlo ay umakyat na ito sa second spot sa Individual General Classification.

Nakainan ni Huby ng isang minuto at 20 segundo si Shulchenko ng LCW UAE Cycling team sa IGC kaya mas magiging mainit ang labanan sa huling 2 laps.

Ilalarga ngayon ang penultimate stage 13 kung saan ay papadyak ang mga siklista sa 20-kilometer individual time trial na magsisimula at magtatapos sa Pangasinan Baywalk. Dumating na tersero si Erickson Delos Santos ng Dreyna Orion Cement, pang-apat si Nash Joshua Lim ng MPT Drivehub Cycling team habang pumang-lima si Junrey Navarra ng Standard Insurance Philippines.

May kabuuang 36:16:21 si Shulchenko para sa IGC sapat para manatili sa kanya ang pagsuot ng Yellow Jersey, 2 minuto at 30 segundong lamang sa segundang si Huby.

Lumagpak sa pangatlo sa IGC si Syrian rider Ibrahiem Yousef Alrefai ng LCW UAE Cycling team, naghahabol ito ng apat na minuto at 29 segundo kay Shulchenko.

Sprint champ cyclist Honorica sagot na ng FP ang suporta

by MC @Sports News | May 12, 2026

Photo: Ang mga nagpa-abot ng buong suporta kay cyclist rising start Zedric Ivan Honorica (gitna) na sina Lew Lopez, Director of Public Affairs & Public Relations; Patricia Jacinto, Director of Growth and Marketing; Leopoldo De Castro Jr, Finance Director; at Andalib Hasan, Director of Logistics upang maipagpatuloy ang training at makumpleto sa mga gagamitin sa kompetisyon. (Gen Villota)

Sinusuportahan na ngayon ng isang delivery service company ang record-breaking cyclist na si Zedric Ivan Honorica na dati nilang delivery rider at ngayon ay working student na nagtala ng 10.865 segundo sa men’s elite flying 200-meter sprint sa nagdaang Asian Cycling Confederation Track and Para Track Cycling Championships sa Tagaytay City Velodrome.

Itinakda niya ang bagong Philippine record at mabasag ang 20 taong marka sa nasabing event. Mas naging kahanga-hanga ang kanyang tagumpay dahil nakamit niya ito gamit lamang ang simpleng bike setup, malayo sa mamahaling kagamitan na ginagamit ng karamihan sa kanyang international competitors. Ginamit ni Honorica ang kinita bilang delivery rider upang i-upgrade ang bisikleta. 

Matapos ang breakout performance, agad na nakipag-ugnayan ang foodpanda upang magbigay ng suporta para sa kanyang training at competitive journey, bilang bahagi ng layunin nitong suportahan at bigyan ng oportunidad ang kanilang riders kahit lampas sa delivery platform. Kabilang sa support package ang financial assistance, isang taong supply ng groceries mula sa pandamart, pati na cycling gear at equipment upang mas makapag-focus siya sa training at mga susunod na kompetisyon. “Zedric’s story is a powerful example of the talent and determination within our rider community. At foodpanda, we create opportunities for our Ka-panda riders to go beyond the road and pursue what matters most,” sambit ni Patricia Jacinto, Growth and Marketing Director ng foodpanda Philippines. 

Nakatuon ngayon si Honorica sa paghahanda para sa international competitions at target na makapag-uwi ng mga medalya.  Nakatakda siyang sumali sa mas marami pang road races bilang bahagi ng kanyang paghahanda, habang target niyang muling maging kinatawan ng Pilipinas sa international competitions, kabilang ang Southeast Asian Games. 

Dae Joo nasilo ang Stage 11, Pinoy Quita Mountain King

ni Elyssa Nichole @Sports | May 11, 2026

Photo: Hawak ni Ronnilan Quita ang Individual Mountain Classification (KOM) (7RP) sa pagtatapos ng Stage 11 MPTC Tour of Luzon 2026 kahapon. (mptcpix)

San Juan, La Union - Kahit tirik na tirik ang araw ay hindi ito naging dahilan para manghina si defending champion Korean rider Dae Yeong Joo kaya naman nasilo nito ang panalo sa Stage 11 kahapon sa MPTC Tour of Luzon 2026 na nagsimula sa Candon City Arena at nagtapos sa San Juan Town Hall dito.

Inirehistro ni 29-year-old Joo, pambato ng Gapyeong Cycling Team ang tiyempong tatlong oras, 19 na minuto at 16 na segundo sa 151.7 km distance race sa event na suportado ng Metro Pacific Tollways Corp., Manny V. Pangilinan Group of Companies at Philippine Sports Commission, (PSC) sa pamumuno ni chairman Patrick "Pato" Gregorio.

Mag-isang tumawid sa finish line si Joo, bumaba ito sa kanyang bisikleta at saka yumuko at hinawi ang kanyang kamay pababa hudyat ng pasasalamat sa mga Filipino fans na nanood ng live.

Muling sumakay sa bisikleta niya at saka nakipag-high five habang dumadaan sa harapan ng mga manonood.

Dumating na segundo si Saniy Syahmi Mohd Safiee ng Malaysian National Team, (3:19,27) habang pangatlong tumawid sa meta si Ovt. Dominic Perez (3:19:28) ng Pangasinan.

Dumating na pang 52nd place si Russian cyclist Nikita Shulchenko ng LCW UAE Cycling Team pero mananatili sa kanya ang pagsuot ng yellow jersey ngayong araw paglarga ng 146.40 kms Stage 12 Agoo - Mangatarem.

Nakalikom si Shulchenko ng 32 oras, 57 minuto at 30 segundo sapat upang upuan ang top spot sa Individual General Classification, pangalawa ang teammate nitong si Syrian rider Ibrahiem Yousef Alrefai, tatlong minuto at 41 segundo ang hinahabol nitong oras.

Naka-puwesto sa tersero si Stage 10 Candon City - Bessang Pass ruler Antoine Huby ng 7Eleven Cliqq Roadbike Philippines, naghahabol ito ng tatlong minuto at 54 segundo.