5 libong residente, inilikas dahil sa sagupaan ng militar at BIFF

ni Ronalyn Seminiano Reonico | May 9, 2021

Aabot sa 200 armadong miyembro ng Bangsamoro Islamic Freedom Fighters (BIFF) ang nakaengkuwentro ng mga militar sa public market sa Datu Paglas, Maguindanao noong Sabado.

Ayon kay Lt. Col. John Paul Baldomar ng 6th Infantry Division, inokupa ng BIFF na nasa ilalim ng Kagui Karialan faction ang naturang public market at hindi umano pinaalis ng mga rebelde ang mga nagtitinda at sibilyan sa naturang lugar.

Sumuko naman ang mga gunmen noong hapon matapos ang palitan ng putok ng baril at tumakbo sa mga kabundukan ng Maguindanao at Sultan Kudarat. Wala ring naiulat na nasawi sa hanay ng militar.

Kinumpirma naman ni Abu Jihad ng BIFF na ang mga gunmen ay kasapi ng Kagui Karialan faction ngunit aniya ay walang balak okupahin ng grupo ang Datu Paglas.

Saad pa ni Jihad, “Our men were there to rest and were about to return to our camps when soldiers arrived and started firing at us.”

Samantala, ayon kay Mayor Abubakar Paglas, mahigit 5,000 residente ang inilikas habang patuloy na nagsasagawa ng clearing operations sa naturang lugar. Ayon kay Baldomar, natagpuan ang 4 na improvised bombs na kaagad namang na-deactivate ng awtoridad.

Daan-daang motorista at pasahero rin ang na-stranded dahil isinara ang Datu Paglas-Tulunan highway at binuksan lamang matapos makontrol ng tropa ng pamahalaan ang sitwasyon.

7 miyembro ng BIFF, sumuko

ni Lolet Abania | February 21, 2021

Pitong miyembro ng Bangsamoro Islamic Freedom Fighters (BIFF) ang sumuko sa militar sa tulong ng ilang lokal na opisyal ng pamahalaan.

Nagpasyang sumuko ang mga kasapi ng BIFF sa headquarters ng 2nd Mechanized Infantry Battalion na pinamumunuan ni Lt. Col. Omar Orozco sa Barangay Midtimbang, Datu Anggal Midtimbang, Maguindanao.

Ayon kay Orozco, ang ginawang ito ng pitong BIFF ay pagpapatunay na nakikiisa sila sa programang pangkapayapaan ng gobyerno.

Iniharap naman ni Orozco kina 6th Infantry Division Assistant Commander BGen. Jose Narciso, 1st Mechanized Brigade Commander Col. Pedro Balisi at Mayor Midpantao Midtimbang, Jr. ng Guindulungan ang mga nagbalik-loob na BIFF.

Kasama sa isinuko ng mga ito ang isang 60 mm mortar launcher, isang. 50-caliber barret sniper rifle, isang M-16 rifle, isang Garand at isang converted M14 rifle.

Labis naman ang pasasalamat ni 6th ID Chief MGen. Juvymax Uy sa tulong na ibinigay ng mga local officials na naging daan para sumuko ang pitong BIFF.

Umabot na sa 78 miyembro ng BIFF, kabilang ang kanilang mga armas, ang sumuko at nagbalik-loob sa pamahalaan.

Police chief, target sa pag-atake sa Maguindanao

ni Ronalyn Seminiano Reonico | December 4, 2020

Inatake ng armadong grupo ang Barangay Poblacion sa Datu Piang, Maguindanao noong Huwebes nang gabi kung saan target umano ang hepe ng pulisya, ayon sa awtoridad.

Tinatayang aabot sa 50 hinihinalang miyembro ng Bangsamoro Islamic Freedom Fighters (BIFF) at Dawlah Islamiya ang umatake sa naturang lugar, ayon kay Joint Task Force Central Spokesman Lieutenant Colonel Anhouvic Atilano.

Aniya, "Ang grupo na 'to ay nabi-belong sa BIFF at Dawlah Islamiya. More or less 50 sila, nahahati sa dalawang grupo. Ang isang grupo, nag-attempt na mag-harass doon sa headquarters ng Charlie Company, 6th Infantry Battalion at saka 'yung 30 po, nag-attempt na pasukin ang poblacion Datu Piang to target the chief of police of Datu Piang... si Police Captain Israel Bayona."

Ayon kay Atilano, nakasakay umano ang grupo ni Bayona sa police vehicle nang makita nila ang mga armadong kalalakihan kaya nagpasya silang bumaba sa sasakyan at pumunta sa ligtas na lugar.

Kuwento ni Atilano, "Kagabi po, nakasakay po siya roon sa patrol car kasama ang mga kasamahan niya, noong nalaman nila na may parating na malaking grupo na armado at sumasalubong sa kanila, they alighted the vehicle and naiwanan po nila ito malapit doon sa patrol base ng 6th Infantry Battalion kung saan ang patrol base na ito ang nagbabantay sa simbahan at eskuwelahan na magkatabi po ito.

"Ang nagma-man po rito ay apat na sundalo lang po at ang nakasagupa po nila ay 30 members, armed members ng BIFF at Dawlah Islamiya. 'Yung mga police po, they alighted the vehicle at nagtago po sila sa safer place but 'yung tropa ng 6ID, they tried to repel itong mas malaking grupo ng BIFF.”

Aniya pa, "Noong na-overwhelm na po sila, nag-reposition na po sila sa alternate battle position nila for safety at 'yun na rin po ang pagdating ng reinforcement kaya ‘di po natuloy ang pagpasok ng armadong grupo.”

Samantala, inaalam pa ng awtoridad ang dahilan ng pag-target ng mga suspek sa hepe ng pulisya.