Mag-asawang 78 at 79-anyos, patay sa sunog

ni Mary Gutierrez Almirañez | March 25, 2021

Patay ang mag-asawang senior citizen matapos ma-trap sa nasusunog nilang bahay sa Barangay Roxas District, Quezon City kaninang ala-una nang madaling-araw, Marso 25, ayon sa Bureau of Fire Protection (BFP).

Batay sa ulat, bumalik sa ikalawang palapag ang 78-anyos na babae para iligtas ang asawa niyang 79-anyos na bedridden ngunit sa kasamaang-palad ay bumagsak ang sahig na yari sa kahoy at doon na sila tinupok ng apoy.

Sa pagresponde ng mga bumbero ay kinailangan nilang umakyat sa bubong upang maabot ng tubig ang likurang bahagi ng nasusunog na bahay.

Tumagal nang mahigit isang oras ang sunog at sa paghupa nito ay tinatayang mahigit P3 milyon ang halaga ng mga napinsalang ari-arian.

Sa ngayon ay inaalam pa ng BFP ang sanhi ng sunog. Wala namang iniulat na nadisgrasyang residente maliban sa namatay na mag-asawa.

12-wheeler truck, nasunog sa EDSA

ni Ronalyn Seminiano Reonico | March 6, 2021

Nasunog ang isang 12-wheeler dump truck sa EDSA Cubao Southbound lane, Quezon City ngayong Sabado nang umaga.

Rumesponde ang Bureau of Fire Protection at halos isang oras ding isinara ang EDSA southbound sa Cubao dahil sa insidente.

Ligtas naman ang driver at pahinante ng truck at inaalam pa ng awtoridad ang sanhi ng sunog.

2 bumbero, sugatan, P5 M napinsala sa sunog sa Kyusi

ni Mary Gutierrez Almirañez | February 25, 2021

Dalawang bumbero ang sugatan sa pagresponde sa nasunog na warehouse sa Tandang Sora, Ave. Barangay Sangandaan, Quezon City pasado alas-11 nang gabi nu'ng Miyerkules, Pebrero 24.

Ayon sa Bureau of Fire Protection (BFP), umabot sa ika-limang alarma ang sunog at sa sobrang laki ng apoy ay tinatayang dalawampung fire trucks ang kinailangang rumesponde dahil sa kakulangan ng suplay ng tubig at maging ang isang trak ng bumbero ay inabot pa ng apoy ang bahagi ng windshield at side mirror.

Idineklarang fire under control ang sunog matapos ang anim na oras, kung saan mahigit P5 million ang halaga ng mga napinsala.

Maliban sa minor injury na tinamo ng dalawang bumbero ay wala namang residenteng naiulat na nasugatan. Sa paghupa ng apoy ay iba’t ibang grocery items ang na-recover sa warehouse na umano’y dahilan kung bakit mabilis kumalat ang apoy.

Sa ngayon ay inaalam pa ng pulisya ang totoong dahilan ng insidente. Samantala, pansamantala namang tumuloy sa evacuation center ang mga residenteng nakatira malapit sa bodega bitbit ang mga mahahalagang gamit at dokumento.