ni Beth Gelena @Bulgary | June 28, 2026
Photo: Jericho at Jermiah Rosales - Circulated
Natagpuan na raw ang kapatid ni Jericho Rosales na si Jeremiah Rosales matapos itong mawala sa loob ng ilang araw.
Ayon sa misis ni Jeremiah na si Jhen Go, nagkausap na ang magkapatid na Echo at Jeremiah.
Umalis daw ang kanyang mister sa kanilang bahay sa Antipolo noong Hunyo 21 nang mabatid na dadalhin siyang muli sa isang rehabilitation facility sa Batangas.
Sa Bicol umano nagpunta si Jeremiah upang magtago at maiwasan ang pagkuha sa kanya.
Nakapag-usap na raw sina Jeremiah at Jericho, ngunit ayon kay Jhen ay hindi pa rin nakikipag-ugnayan si Jeremiah sa kanya at sa kanilang mga anak.
Ayon pa sa misis ni Jeremiah, dati nang ipinasok ni Jericho ang kapatid sa isang pribadong rehabilitation center noong 2024 at ang aktor na rin ang sumagot sa gastusin.
Hindi umano natapos ni Jeremiah ang isang taong programa dahil napaaga ang kanyang paglabas.
Ayon kay Jhen, napagdesisyunan ng pamilya na ibalik siya sa rehab dahil napansin nilang bumabalik umano siya sa paggamit ng ilegal na droga, pag-inom ng alak, at iba pang mapanganib na pag-uugali.
Binigyang-diin niya na ang layunin ng pamilya ay matulungan si Jeremiah na makarekober at hindi upang saktan o kalabanin.
Ang mga pahayag tungkol sa kondisyon at paggamit ng droga ni Jeremiah ay mula sa salaysay ng kanyang misis at hindi pa ito nakukumpirma ni Jeremiah mismo.
SA panayam sa aktres na si Alexa Ilacad sa digital show na Oh My Gan! (OMG!), naging bukas siya tungkol sa kung paano niya hinaharap ang pambabatikos sa kanya sa social media.
Inamin niyang noong mas bata pa siya, halos lahat ng bashers ay pinapatulan niya dahil gusto niyang ipagtanggol ang sarili.
Isa sa mga madalas na ibinabatong akusasyon sa kanya ay ang pagiging ‘malandi’ at ang umano’y pakikipag-flirt sa iba’t ibang aktor.
Aniya, nasasaktan siya noon dahil alam niyang hindi ito totoo.
Ngayon, nagbago na ang kanyang pananaw. Hindi na niya nararamdamang kailangan niyang ipaliwanag o ipagtanggol ang sarili sa bawat negatibong komento.
Nagpapasalamat siya sa kanyang mga tagasuporta dahil sila na mismo ang madalas na sumasagot at dumedepensa para sa kanya.
Natutunan din niyang hindi niya kailangang pasayahin ang lahat ng tao.
Isa sa kanyang mga mensahe, “‘Di ko na kailangang sagutin ka. ‘Di ko na kailangang ipaliwanag ang sarili ko kahit kanino. ‘Di ko na kailangang ipagtanggol ang sarili ko.”
Dagdag pa niya, “Kahit perfect ka na, may masasabi pa rin talaga. So, stop na lang. ‘Di na para mag-please ng people.”
Sa kabuuan, sinabi ni Alexa Ilacad na mas pinipili na niyang pangalagaan ang kanyang kapayapaan ng isip kaysa patulan ang bawat negatibong komento, at mas nakatuon siya ngayon sa kanyang trabaho at sa mga taong tunay na sumusuporta sa kanya.
