Magbibigay-ayuda sa b-day ni Barbie… RICHARD, GAME PASUKIN ANG PULITIKA

ni Beth Gelena @Bulgary | July 15, 2026

Photo: IG _richardgutz

Umamin ang aktor na si Richard Gutierrez na may posibilidad na pasukin niya ang pulitika, pero sa ngayon ay wala pa siyang opisyal na planong tumakbo sa anumang posisyon.

Sa ngayon, mas nakatutok muna siya sa pagtatapos ng kanilang action-drama series na Blood vs. Duty (BVD) kasama ang girlfriend niyang si Barbie Imperial.

Pinaghahandaan din daw nila ang ika-28 kaarawan ng girlfriend sa August 1, kung saan magsasagawa sila ng charity event sa Bicol.

Kasama sa kanilang programa ang pagbisita sa dating public elementary school ng aktres. Magdo-donate sila ng school supplies at iba pang kagamitan.

Magsasagawa rin sila ng medical mission sa tulong ng pinsan ni Barbie na isang doktor.

Ibinahagi rin ni Richard na excited siya sa selebrasyon dahil magiging makabuluhan at emosyonal ito para sa kanyang GF. Nadiskubre rin nila na may mga kamag-anak ang aktor sa Bicol at magkakilala raw noon ang kanyang ama na si Eddie Gutierrez at ang lolo ni Barbie.

---

Labis ang pagmamalaki ni Lorna Tolentino sa kanyang apo na si Tori Fernandez matapos itong magpasiklab sa mga manonood sa culminating activity ng Trumpets, Inc. summer workshop noong Hulyo 10, 2026.

Kinanta ni Tori ang Fairest of Them All mula sa Snow White.

Ayon kay Lorna, pangarap niyang maging world-class musical theater performer ang kanyang apo.

Biro pa niya, “May Lea Salonga na ‘ko.”

Hangad ni Lorna na makapag-aral si Tori sa ibang bansa upang ma-expose sa Broadway o West End. Sinabi pa niyang handa niyang pondohan ang pag-aaral nito.

Gayunman, mas gusto raw ni Tori na manatili muna sa Pilipinas dahil narito ang kanyang mga kaibigan at aktibo siya sa mga choral competition, na nakatutulong sa paghasa ng kanyang talento.

Ayon kay Lorna, matagal na niyang nakikita ang husay ni Tori sa pagkanta at naniniwala siyang namana ito sa kanilang pamilya. Binanggit pa niya ang kanyang pinsan na si Zsa Zsa Padilla bilang isa sa mahuhusay na mang-aawit sa kanilang angkan.

Sa ngayon, sinabi rin ng beteranang aktres na mas nakatuon siya sa pagsuporta sa kinabukasan ng kanyang mga apo at wala na raw sa isip niya ang magkaroon pa ng sariling love life.

---

Wax figure sa HK, magbibigay-saya raw sa mga OFWS… KATHRYN, PROUD NA KA-LEVEL NINA PACQUIAO, PIA, CATRIONA, ANNE AT LEA 

ISA sa pinakamahalagang sandali sa karera ni Kathryn Bernardo ang pag-unveil ng kanyang Madame Tussauds wax figure, na tinawag niyang ‘Kath-twin’.

Regalo raw niya ito para sa kanyang mga fans.

Ayon sa aktres, hindi lang ito personal na milestone kundi tagumpay din ng kanyang mga tagahanga na matagal nang sumusuporta sa kanya.

Inamin niyang naantig siya dahil ang pagkilalang ito ay bunga ng maraming taon ng pagsisikap, sakripisyo, at suporta ng kanyang mga fans.

Matapos ang pagpapakita nito sa Pilipinas, permanenteng ilalagay ang kanyang wax figure sa Madame Tussauds Hong Kong.

Espesyal ang Hong Kong sa aktres dahil doon kinunan ang blockbuster film na Hello, Love, Goodbye (HLG) kung saan isinabuhay niya ang karakter na si Joy na isang Overseas Filipino Worker (OFW). Hangad ni Kathryn na mahikayat ang mas maraming Pilipina, lalo na ang kabataan, na mangarap nang malaki at magsumikap upang maabot ito. 

Umaasa siya na ang kanyang ‘Kath-twin’ ay makapagbibigay ng saya at ginhawa sa mga Pilipinong nagtatrabaho sa Hong Kong, lalo na sa mga hindi madalas makauwi ng Pilipinas.

Ipinagmamalaki rin niyang maging ika-5 Pilipinong may wax figure sa Madame Tussauds, kasunod nina Manny Pacquiao, Pia Wurtzbach-Jauncey, Catriona Gray, Anne Curtis, at Lea Salonga. 

Samantala, ibinulgar ng aktres na marami pa siyang proyektong nakahanay para sa natitirang bahagi ng 2026, kabilang ang kanyang bagong serye na Someone, Someday (SS) at iba pang mga proyektong nakatakdang ipalabas sa mga susunod na buwan.

Kumalat, fake news daw… MAYOR VICO, PINALAGAN ANG PREVENTIVE SUSPENSION ORDER DAW NG OMBUDSMAN

ni Beth Gelena @Bulgary | July 14, 2026

Photo: Vico Sotto - FB

Mariing pinabulaanan at tinawag na fake news ni Pasig City Mayor Vico Sotto ang mga naglalabasang ulat na papatawan umano siya ng preventive suspension order mula sa Office of the Ombudsman dahil sa isang umuusbong na isyu.

Ayon sa mga kumakalat na mapanirang impormasyon, ang nasabing reklamo umano ay dahil sa hindi paglabas ng P1,500 one-time cash allowance para sa mga kawani ng Pasig City Hall noong nakaraang founding anniversary ng lungsod.

Sa pamamagitan ng isang matapang at malinaw na Facebook (FB) post nitong Sabado, Hulyo 11, tahasang ipinahayag ng butihing alkalde na ang mga ganitong uri ng propaganda ay posibleng pinopondohan ng mga taong may pansariling interes.

Ayon sa kanya, matagal na siyang nakakatanggap ng sumbong na binibili ang mga FB page para sa ganitong uri ng gawain.

Hinimok din ni Mayor Vico ang publiko na i-report ang nasabing page na “I Love Pasig” na umano’y nagpakalat ng maling impormasyon. 

Nagpaalala rin siya na maging mapanuri sa mga nababasa at nakikita sa social media.

Matatandaang hindi ito ang unang beses na siniraan si Mayor Vico ng mga social media page. Noong Abril, 2025, kumalat ang isang video kung saan makikitang isang 77-anyos na babaeng person with disability (PWD) ang pinilit at tinuruan kung ano ang sasabihin upang dungisan ang pangalan ng alkalde.

Si Vico ay kilala bilang isa sa mga pinakabatang alkalde sa Metro Manila na naging popular dahil sa kanyang transparency at anti-corruption stance. Simula nang maupo bilang mayor ng Pasig City, madalas siyang target ng fake news at propaganda sa social media.

---

Mister na si Zoren, red flag daw… 

CARMINA, AMINADONG ‘DI TATAGAL SA TOXIC RELATIONSHIP

MATAPANG na sinagot ng aktres na si Carmina Villaroel ang mga nagsasabing ‘red flag’ ang mister niyang si Zoren Legaspi. 

Guest sa digital show ng ABS-CBN na Hot Takes (HT) ang aktres at natanong tungkol sa mga pinakamasakit na kritisismo online na ibinato laban sa kanyang mister at sa kanilang matagal nang pagsasama.

Ani Carmina, hindi niya pinapansin ang mga matitinding kritisismo dahil hindi naman talaga alam ng mga tao ang tunay na ugali ng kanyang mister.

Mariin niyang sinabi na kung talagang toxic partner si Zoren, malamang ay lumayo na rin siya.

Ang pamumuhay ng kanilang pamilya ay lantad sa publiko, pero patuloy pa rin ang paghuhusga mula sa mga netizens. 

Wika niya, “There was a time na nasabihan si Zoren na red flag. Wala, dedma lang din ako.”

Paliwanag ni Carmina, ang pananaw ng publiko ay kadalasang lubos na naaapektuhan ng nakikita sa kanilang mga social media.

Aniya, “Kasi, like I said, you don’t know him. Kilala ko ‘tong taong ‘to, nakilala mo lang s’ya dahil sa napanood ninyo, sa napanood ninyo na unedited pa na ‘di ninyo alam kung saan nanggaling. ‘Di ninyo kilala ‘yung tao so how can you say na red flag s’ya?”

Nilinaw din ng aktres na hindi siya ‘yung tipo ng taong hahayaang magkaroon ng toxic relationship.

“Kami? Kilala namin ‘yung isa’t isa and kung red flag si Zoren, hello, matagal na akong wala sa marriage na ‘to, darling,” pagsisiwalat pa niya.

Pinuri rin ng maraming netizens si Carmina dahil sa kanyang hindi matitinag na katapatan sa asawa, pagiging mature sa pagharap sa mga isyu, at kumpiyansa sa kanilang relasyon.

---

Super idol niya, na-meet nang personal…

ECHO, NAGPA-FAN SIGN KAY CHRISTOPHER NOLAN SA POPCORN BOX

NAGPAKA-FANBOY si Jericho Rosales sa pagdalo niya sa premiere ng The Odyssey (TO) sa Mumbai, India, kung saan personal niyang nakita at nakasalamuha sina Matt Damon at award-winning director na si Christopher Nolan.

Ibinahagi ng aktor ang naging experience sa premiere. Aniya sa video caption na kanyang ipinost, “Warning: this video contains strong emotions to a great movie!”

Aniya, “Oh, my Godddd!” Wala siyang kiber kahit mabingi ang kanyang katabi sa sigaw niya.

“What an experience,” na tatlong beses niyang sinabi, at ilang beses din daw siyang napaiyak sa kuwento ng pelikula.

Iyon din ang kauna-unahang public audience screening ng pelikula kaya espesyal ang okasyon.

Una nang sinabi noon pa ng aktor, “I’m a long fan of Christopher Nolan and it’s an honor na maimbitahan sa premiere.”

Ramdam daw niya ang laki at kalidad ng pelikula sa IMAX.

“Thank you so much, Universal Pictures @universalpicturesph. The Odyssey opens July 5 in Philippine cinemas,” ang pasasalamat ni Echo.

Nagkaroon din siya ng pagkakataong makasalamuha sina Nolan, Matt at iba pang miyembro ng cast sa red carpet at premiere event.

Ibinahagi rin niya ang popcorn box, na habang kinakain ay may pagmamalaking sinabing, “Christopher Nolan signed this for me.” 

Isa raw ‘yung souvenir na labis niyang ipinagpapasalamat bilang matagal nang fan ng direktor.

Kaya naman, sobrang tuwa rin ang mga kapwa-celeb at netizens para sa kanya.

Napa-“OMG!” na lang si Bea Alonzo sa kanyang komento.

“OMGGG! Christopher Nolan!!! Matt Damon!!! That popcorn box,” na nilagyan ng tatlong heart emojis, wika naman ng aktres na si Iza Calzado.

“Your enthusiasm and excitement makes me so happy.”

“Lucky man.”

“So happy for you, sir.”

Umiiyak na nagpe-pray sa banyo… KAYE, AKALA LIGTAS NA, CANCER BUMALIK

ni Beth Gelena @Bulgary | July 13, 2026

Photo: IG _kayeabad

Nagsalita ang aktres na si Kaye Abad tungkol sa kung paano siya ginabayan ng kanyang pananampalataya sa paglaban niya sa kanser.

Pahayag niya, “Magtiwala ka lang sa Panginoon, ‘wag magduda.”

Ayon kay Kaye, lalo lamang lumakas ang kanyang pangamba nang bumalik ang kanyang kanser sa suso simula nang ideklara siyang survivor. Ibinahagi niya ito sa isang mahaba at prangkang pag-uusap kasama ang aktor, matagal nang kaibigan ng pamilya, at dating co-star sa Tabing Ilog na si Paolo Contis sa Kaye & Paul Jake vlog sa YouTube (YT).

Sinabi ni Kaye na madalas iniisip ng mga tao na ang pagdedeklarang wala nang kanser ay nangangahulugan na tapos na ang pinakamahirap na bahagi, ngunit para sa kanya, hindi iyon ang nangyari.

“‘Pag idineclare na you’re a survivor, parang tapos na, natanggal na. The journey doesn’t end there. Actually, mas ngayon ko na-feel na parang mas takot ako ngayon,” saad niya.

Sumasailalim siya sa mga scan kada ilang buwan para tingnan ang anumang senyales na bumalik o kumalat ang kanser. 

“Dormant lang,” dagdag niya.

Nang tanungin kung umabot na ba siya sa puntong gusto na niyang sumuko habang ginagamot, sinabi ni Kaye na hindi iyon kailanman naging opsiyon para sa kanya, at ang sagot niya ay bumalik sa kanyang mga anak.

“Not an option, dahil muli, gusto kong makitang lumaki ang mga anak ko,” sabi niya.

Naalala niya kung gaano kahirap umupo at dumalo sa mga programa sa paaralan ng kanyang mga anak na lalaki, at pigilan ang sariling mapaluha sa mga simpleng sandali tulad ng panonood sa kanila na magtanghal sa entablado.

“Ito na ‘yung last time na makikita ko silang mag-perform. Binubura ko sa utak ko, ‘Hindi,’ kaya lalaban ako,” lahad niya.

Sinabi rin ni Kaye na halos mag-isa siyang nagdarasal sa banyo, isa sa iilang pribadong espasyo na mayroon siya noong ginagamot, at nananalangin siya nang malakas sa halip na tahimik.

“Nagdarasal ako sa banyo dahil malakas ang aking panalangin. Kinakausap ko Siya. Parang isang pag-uusap. Umiiyak ako tuwing nagdarasal ako.

“Sana nga, masaya ako sa buhay ko ngayon. Kuntento na ‘ko. ‘Wag Mo naman akong kunin. Gusto kong makitang lumaki ang mga anak ko,” paggunita niya sa kanyang panalangin sa Diyos.

Panatag na raw siya sa anumang resultang naghihintay sa kanya, kahit patuloy siyang lumalaban para sa ibang resulta.

“Kung ‘di ako makakarating, tatanggapin ko kung ‘yun ang plano Niya sa buhay ko. But then, I wanted to live. Kaya gagawin ko ang parte ko,” diin niya.

Inilarawan niya ang isang sandali bago pa man siya masuri, matapos sabihin ng isang doktor na hindi na siya maaaring operahan dahil nakarating na ang kanser sa kanyang atay at kilikili. 

Aniya, tuluyan siyang bumigay bago siya nakaramdam ng kapanatagan.

“Parang biglang ipina-feel ko sa ‘yo na, ‘‘Wag kang mag-alala. Nandito lang ako, aalagaan kita,’” kuwento niya.

Sa buong panahon ng kanyang paggagamot, nanalig siya sa mga debosyon kina Santa Rita, Santo Niño at Padre Pio, na ipinagdarasal gabi-gabi para sa paggaling at lakas. Sinabi pa ni Kaye na ang karanasan ay mas nagpalalim ng kanyang pananampalataya sa halip na niyanig ito.

“Relihiyosa ako, pero ngayon, mas grabe akong naging relihiyosa. Naniniwala talaga ako na nand’yan Siya. Mahina ako, iyakin akong tao. Mahina ang loob ko lagi. Konting sugat lang, like inoperahan ako nang maliit lang, grabe ko ‘yan ingatan kasi takot ako baka bumuka,” paliwanag niya.

Pagmamalaki niya, “With this one, nagulat ako sa sarili ko na parang ngayon ang tapang ko. Nakuha pa nga nating mag-joke. Kasi naramdaman ko na ang tapang ko. Binigyan Niya ako ng tapang para lumaban.”

Payo naman ni Kaye sa mga katulad niyang may kanser, “Just trust the Lord, don’t question. Kung ano man ang plano Niya, just trust Him. Wala naman Siyang ibibigay na ‘di natin kaya.”

---

Na-bash dahil walang ‘K’...

MARIEL, NAGSUOT NG DOCTORAL REGALIA, COSPLAY COSTUME RAW

BINATIKOS ang kasuotan nina Vice Ganda at Mariel Rodriguez matapos silang maging guest speakers sa graduation ng University of the Philippines (UP) College of Media and Communication at ng isang criminology school sa Batangas.

May post sa social media na ang topic ay ang pagiging guest speaker ni Vice Ganda, kung saan naka-formal attire lang daw ang comedian-TV host.

Sey ng isang netizen, “Kasalanan din ng school, ‘di nila alam ‘yung graduation protocol. Calling CHED to sanction the school.”

Ito ang post kung saan na-bash sina Vice at Mariel, “Actress and TV host Mariel Rodriguez-Padilla faced online criticism after appearing in doctoral-style academic regalia during a graduation ceremony in Batangas.

“She attended the event on behalf of Sen. Robin Padilla, who was unable to personally address the Criminology graduates last June 26.

“Critics questioned whether she had the academic credentials or institutional role to wear the attire, saying doctoral regalia carries symbolic weight and should not be treated as a costume.”

Ang mga komento sa outfit ni Mariel…

“Mariel Rodriguez, nag-cosplay na may PhD.”

“Mariel Rodriguez Padilla, naka-doctoral regalia kahit walang doctorate?”

Opinyon naman ng ibang netizens tungkol kay Vice, walang pampublikong patakaran na nagsasabing kailangang magsuot ng toga o partikular na kasuotan ang lahat ng guest speakers sa UP.

Well, kadalasan ay ang unibersidad o kolehiyo ang nagtatakda ng dress code para sa kanilang mga panauhin.

Wala ring kumpirmadong pahayag na nagsasabing may paglabag ang UP o may hakbang ang Commission on Higher Education (CHED) upang parusahan ang paaralan dahil sa insidenteng ito.