Tips para feeling at looking young

ni Mabel G. Vieron - OJT @Life & Style | April 22, 2023

Problemado ka rin ba kung paano mo mapapaganda ang iyong kutis? Hindi na kailangang gumastos nang malaki para gumanda. Narito ang 9 tips na puwedeng gawin ng mga nagnanais maging feeling at looking young.

1. UMINOM NG MARAMING TUBIG. Ang pag-inom ng 8 basong tubig araw-araw ay paraan upang mapanatili ang ating malambot na balat.

2. SAPAT NA ORAS NG PAGTULOG. Ang benepisyo ng pagkakaroon ng sapat na oras ng pagtulog ay naaalis ang mga sobrang likido sa katawan. Kailangan mo ang ‘beauty sleep’ upang hindi magka-eye bags. At para sa mga problemado r’yan, subukang mag-relax bago matulog.

3. IWASANG MA-STRESS. Ika nga nila, “Huwag kang magalit, at tatanda ka agad.” Ang madalas na pagbusangot ay pangit, ‘di ba? Nagsasalubong ang kilay at nakangiwing mga labi. Tumawa ka at ika’y gaganda. Ang pagngiti ay isang natural na paraan ng face lift. Nakapagpa-facelift ka nang walang gastos at nakapagbigay ka pa ng pabor sa iba.

4. GUMAMIT NG SUNBLOCK. Ayon sa dermatologists, ang paggamit ng sunblock ay nakakatulong upang ‘di masunog ang ating mukha. Ang araw ay nagpapakulubot ng balat, nagdudulot din ito ng freckles at posibleng magka-skin cancer dahil sa UV light. Iwasan ang labis na oras ng paglantad ng balat sa sikat ng araw. Ang ilang minuto ay sapat na para makuha ang bitaminang kailangan ng katawan mula sa araw.

5. IWASAN ANG MAUUSOK AT MAALIKABOK NA LUGAR. Polusyon ang malaking problema natin, kaya kung may budget, mag-aircon bus ka na lang.

6. IWASANG MANIGARILYO AT UMINOM NG ALAK. Madaling makatanda ang bisyo. Ang paninigarilyo ay mapanganib sa kalusugan. Ang bisyong ito, kasama ng nakagawiang pag-inom ng mga nakalalasing na inumin ay nakakapagpataas ng tsansa na makapag-develop ng sakit sa baga, atay at cancer. Ang alak ay isa sa mga nakakapagpakulubot ng ating balat. Samantala, ang usok mula sa paninigarilyo ay nakatatanda naman sa ating mukha.

7. GUMAMIT NG MOISTURIZER. Malaki ang natutulong sa pagpapakinis ng mukha ang moisturizer o lotion. Siguraduhing maghilamos muna ng mukha bago maglagay nito. Hindi naman kailangang bumili ng mamahaling brands, ngunit maging wais sa pagpili dahil nagkalat na ang mga fake products.

8. HEALTHY EATING. Mga pagkain gaya ng sariwang prutas, gulay, isda, at karne na ‘di nilagay sa lata o hinaluan ng anumang kemikal ang sikaping kainin araw-araw. Ang mga processed food ay dapat iwasan hangga’t maaari. Umiwas sa pagkaing matataba, mamantika at mga sitsirya.

9. MAG-EXERCISE. Ang paglalakad ang pinakasimpleng uri ng ehersisyo, subalit napaka-epektib. Ang ehersisyong nakapagbibigay, hindi lamang ng malakas na katawan kundi maging matalas na isipan. Kapag energetic ang iyong pagkilos, ang pakiramdam mo ay bata ka pa rin.

Kahit ano pa ang hitsura mo, maging mukhang bata o matanda ka man sa paningin ng iba, ang pinaka-importante ay may tiwala ka sa iyong sarili. Be confident, mga ka-BULGAR!

Okie?

Fil-Am R’Bonney Gabriel, waging Miss Universe 2022

ni Lolet Abania | January 15, 2023

Nakamit ni Miss USA R’Bonney Gabriel ang korona bilang Miss Universe 2022, kung saan hindi lamang siya ipinagmamalaki ngayon ng Amerika maging ng Pilipinas din.

Isang Filipino-American beauty queen, tinalo ni R’Bonney ang 82 kandidata sa coronation night ng Miss Universe pageant, kung saan ang bagong owner nito ay si Anne Jakapong Jakrajutatip, na ginanap sa New Orleans, Louisiana, ngayong Linggo (oras sa Pilipinas).

Isinilang si R’Bonney sa Houston, Texas. Habang ang kanyang ama na si Remigio Bonzon “R. Bon” Gabriel ay ipinanganak naman sa Pilipinas at tubong Manila. Sa edad na 25, nag-migrate si Remigio sa Washington, USA, habang ang ina ni R’Bonney na si Dana Walker ay nagmula sa Beaumont, Texas.

Bukod sa nagwaging Miss Universe, si R’Bonney ang kauna-unahang Fil-Am na kinoronahang Miss USA.

Sa ngayon, si R’Bonney ay 28-anyos na. Nagmarka sa mga hurado ang isa sa mga interview questions sa kabuuan ng coronation night ang tungkol sa kung anong mga pagbabago o changes ang kanyang gagawin para sa Miss Universe competition.

Tiwalang sinagot ni R’Bonney ito na kanyang itataas ang age limit ng pageant.

“I do not believe age defines us,” pahayag ni R’Bonney. At sinundan pa niya ng sagot ng kanyang favorite quote na, “If not now, then when?”

Sa batang edad na 15, fashion ang minahal nang husto ni R’Bonney. Nagtapos siya mula sa University of North Texas na may bachelor’s degree in Fashion Design noong 2018.

Si R’Bonney ay isang fashion designer, model, at kasalukuyang CEO ng kanyang sariling sustainable clothing line, ang R’Bonney Nola.

Para sa kanyang naggagandang outfits sa Miss Universe pageant, nakipag-collaborate naman si R’Bonney sa mga Filipino fashion designers.

Ang kanyang evening gown sa ginanap na mga preliminaries at coronation night ay ginawa ni Rian Fernandez, habang ang kanyang national costume ay gawa naman ni Patrick Isorena.

Gayundin, si R’Bonney ang siyang lead sewing instructor sa Magpies & Peacocks, isang Houston-based non-profit design house na kilala sa kanilang commitment para sa tinatawag na sustainability at community impact. Nagtuturo din ang Miss Universe 2022 ng sewing classes sa mga babae na naging biktima ng human trafficking at domestic violence.

JENNY RAMP, 'DI MAPUNTAHAN ANG NAMATAY NA PADIR DAHIL SA LABAN SA MISS EARTH 2022

ni Reggee Bonoan - @Sheet Matters | October 18, 2022

Ngayong Nobyembre na gaganapin ang Miss Earth 2022 at ang ating kinatawang si Jenny Ramp na nanalong Miss Earth Philippines ay nagsasanay na sa nalalapit nitong pagsabak para makuha ang international title.

Pero masamang balita dahil namatay ang daddy ni Jenny two days ago na nasa ibang bansa at hindi naman siya makaalis para masilip ito dahil sa nalalapit na kompetisyon.

Sa Instagram post ni Jenny, nandu'n ang mga larawang kasama niya ang ama mula noong bata siya hanggang nu'ng manalo siyang Miss Earth Philippines.

Ang caption ng 19-year-old lass from Tarlac City, “Rest easily, daddy. If you had just held on for a little longer you would’ve seen me complete my dreams, representing our Philippines on the international stage. I hope to make you proud up there on all my future endeavors. I love you.”

Kamakailan ay nakatsikahan namin ang Fil-Am beauty queen bilang special guest sa ginanap na launching ng GLUTANEX Skincare mula Korea na dinala rito nina Ms. Mary Grace Juliano, CEO of PINK VENTURES INC. (The Exclusive Distributor of GLUTANEX in the Philippines) at Mr. Alain Chan, vice-president.

Ang endorser ng nasabing produkto na si Korean actress Song Ji Hyo ay nakatakdang pumunta ng Pilipinas sa 1st quarter ng 2023 sa pakikipagtulungan ng NEXUS PHARMA/GLUTANEX TEAM na binubuo nina Sung Seung Je (president),

Hyun Yoo Jin (CEO Global Business), Jene Hong (Marketing head), Jee Yun Lim (Sales Manager of Asia); Jeon Wong Kim (Sales Manager of Asia) at Seoho Hyo (Sales Representative for Asia).

Going back to Jenny, aminado siyang bilang beauty queen ay kailangang alagaan niya ang kanyang skin at inaming sumubok ng maraming produkto pero ang Glutanex ang pinaka-effective sa kanya.

Aniya, “Skincare is a priority because there will be lots of restless nights. Every day there’s going to be an activity. We’re going to be sweaty, we will feel dirty, and we’re going to be wearing a lot of makeup, so it’s really important to have a proper skincare routine."

Dagdag pa niya, “Wear a lot of makeup and on some days, it’s heavier than what I am wearing now. So It’s really important to take care of my skin and I use these amazing products from Glutanex. I'm so thankful that skincare products like this exists."