Barangay captain sa Lipa City, binaril, patay

ni Ronalyn Seminiano Reonico | June 10, 2021

Patay ang barangay captain sa Lipa City, Batangas matapos barilin ng hindi pa nakikilalang riding-in-tandem noong Miyerkules.

Kinilala ng awtoridad ang biktima na si Barangay Pagolingin East Captain Cesar Catibog, 68-anyos.

Ayon sa pulisya, binabaybay ni Catibog at ng kanyang driver ang Torres Street sa Barangay 6 bandang alas-7:40 nang umaga, sakay ng barangay patrol vehicle, nang biglang pagbabarilin ng mga salarin na sakay ng motorsiklo.

Agad naman umanong tumakas ang mga suspek.

Sa noo tinamaan ng bala si Catibog at naisugod pa sa ospital ng kanyang driver ngunit idineklara ring dead on arrival.

Samantala, patuloy namang nagsasagawa ng imbestigasyon ang awtoridad.

Dine-in resto, tourist spots at outdoor sports, oks na sa NCR Plus at iba pang lugar

ni Mary Gutierrez Almirañez | May 14, 2021

Inilabas na ng Inter-Agency Task Force (IATF) ang mga bagong guidelines na ipatutupad sa ilalim ng general community quarantine (GCQ) ‘with heightened restrictions’ sa NCR Plus Bubble at iba pang lugar simula May 15 hanggang 31, ayon sa inianunsiyo ni Presidential Spokesperson Harry Roque kagabi.

Kabilang sa pinahihintulutan ay ang mga sumusunod:

• 20% capacity sa mga indoor dine-in services at 50% capacity sa outdoor o al fresco dining

• 30% capacity sa mga outdoor tourist attraction

• 30% capacity sa mga personal care services, katulad ng salon, parlor at beauty clinic

• 10% capacity sa mga libing at religious gathering

• Pinapayagan na rin ang outdoor sports, maliban sa may physical contact na kompetisyon

Mananatili pa rin namang bawal ang mga sumusunod:

• entertainment venues katulad ng bars, concert halls, theaters

• recreational venues, katulad ng internet cafes, billiard halls, arcades

• amusement parks, fairs, playgrounds, kiddie rides

• indoor sports courts

• indoor tourist attractions

• venues ng meeting, conference, exhibitions

Higit sa lahat, bawal magtanggal ng face mask at face shield kapag nasa pampublikong lugar. Bawal ding lumabas ang mga menor-de-edad at 65-anyos pataas, lalo na kung hindi authorized person outside residency (APOR).

Patuloy pa ring inoobserbahan ang social distancing sa kahit saang lugar at ang limited capacity sa mga pampublikong transportasyon.

Maliban sa Metro Manila, Bulacan, Rizal, Cavite, at Laguna ay isasailalim din sa GCQ ang Apayao, Baguio City, Benguet, Kalinga, Mountain Province, Abra, Cagayan, Isabela, Nueva Vizcaya, Batangas, Quezon, Puerto Princesa, Iligan City, Davao City, at Lanao del Sur hanggang sa katapusan ng Mayo.

Mananatili naman sa modified enhanced community quarantine (MECQ) ang Santiago City, Quirino, Ifugao, at Zamboanga City.

P700,000 halaga ng shabu nasabat, 3 arestado

ni Twincle Esquierdo | December 9, 2020

Timbog ang dalawang lalaki at isang babae matapos makapkapan ng daan-daang libong halaga ng shabu sa buy-bust operation sa Lipa City, Batangas nitong Lunes.

Kinilala ang mga suspek na sina alyas Pakpak, Doc AI at Thalia. Nakuha sa kanila ang siyam na sachets ng shabu na mahigit 100 gramo na nagkakahalaga ng P700,000 at .9mm na baril mula kay Pakpak.

Ayon sa Lipa City Police, dati nang nahuli sina Pakpak at Thalia dahil sa ilegal na droga noong 2016 at nakalaya noong 2018 mula sa tulong ng plea bargaining. Nahaharap naman sa kasong Comprehensive Dangerous Drug Act ang tatlo.