Road Warriors pinalusot ni Selden sa quarterfinal seat

ni Clyde Mariano @Sports | March 3, 2023

Sinagasaan ng NLEX Road Warriors ang Terrafirma Dyip, 142-125, at pormal na inangkin ang pangatlong quarterfinal seat at sumama sa sister team at league leading Talk ‘N Text at San Miguel Beer sa PBA Governors Cup sa Smart Araneta Coliseum.

Ito ang pinaka lopsided na panalo ng NLEX sa siyam na laro at ipinakita ng Road Warriors ang kanilang malakas na determinasyon ba masungkit ang unang PBA title sa kamay ni coach Frankie Lim na pumalit kay long time coach Yeng Guiao na lumipat sa dati niyang koponang Rain or Shine na binigyan niya ng PBA title.

Ang 142 points ang pinakamataas at ang 267 combined output ang pinakamataas sa on-going Governors Cup. Hindi makawala ang NLEX sa unang 24 minutes at nagawang lumayo sa second half nang pinaulanan ang Terrafirma ng mga tirada mula sa gilid na ikinalungkot ni coach Johnedel Cardel.

Tinalo ng NLEX ang Terrafirma ng dalawang beses, 105-102, at 116-86, at muling pinanindigan ng Road Warriors ang pagdomina sa Car Makers.

“They played well balanced game offensively and defensively. They’re really determined to win. I’m elated to their game. Hopefully, they sustain their in the next round,” sabi ni coach Frankie Lim.

Pinamunuan ni import Wayne Selden ang mainit na opensiba ng NLEX kasama si Kevin Alas, Don Trollano at Anthony Semerad.

Tinalo ni Selden si Jordan Williams sa match up. Pinalitan ni Selden si NBA veteran Jonathan Simmons at matagumpay na dinala ang NLEX sa quarterfinals at hindi nagkamali si coach Lim sa pagkuha sa kanya bilang bagong import.

NBL at WNBL, sasabak na; Delta at Republicans, ganado

ni Anthony E. Servinio - @Sports | May 14, 2022

Magbabalik ang 2022 National Basketball League (NBL) President’s Cup handog ng Converge ngayong Sabado at Linggo sa Bren Z. Guiao Convention Center sa San Fernando, Pampanga. Tampok dito ang inaabangang tapatan ng mga paboritong Pampanga Delta at DF Bulacan Republicans sa Linggo simula 6:00 p.m..

Matapos humataw sa simula ng torneo, galing ang Delta sa magkasunod na talo sa kamay ng Quezon Barons (94-77) at Taguig Generals (79-75). Inaasahan na gagawin nina Michael Jeffrey Garcia at CJ Gania ang lahat upang pamunuan ang Pampanga pabalik sa panalo.

Ganado ang Republicans at pumulot ng 2 sunod na panalo sa Laguna Pistons (96-82) at Narvacan Panthers (105-100). Sasandal muli ang Bulacan sa shooting ni Marlon Monte at depensa sa ilalim ni Joseph Celso upang mapabuti ang daan patungong semis.

Maghaharap din ang Parañaque Aces at Pistons kung saan nakataya ang pag-asa ng dalawang koponan na pumasok sa semis. Huling naglaro ang Aces noong Abril 24 kung saan nalusutan sila ng isang puntos ng Pampanga, 80-79.

Puno rin ng aksiyon ang 2022 Women’s National Basketball League (WNBL) sa apat na laro na magwawakas sa kanilang double round elimination. Susubukan ng Taguig Lady Generals na manatiling numero uno sa laban nila kontra Army Lady Battalion sa Sabado at Go For Gold Navy sa Linggo na parehong magsisimula nang 4 p.m..

Sa kabilang banda, hahanapin ng STAN Quezon Lady Spartan ang unang panalo laban sa PSI Air Force sa Sabado simula ng 2 p.m. Kung papalarin, mabubuhay ang pag-asa nila sa semis at kailangang magwagi muli sa Army sa Linggo sa parehong oras.

Marami sa mga bituin ng WNBL ang hindi makalalaro dahil nasa Vietnam sila para sa 31st SEAG. Kabilang sa Gilas Pilipinas sina Janine Pontejos at Chak Cabinbin ng Army at Andrea Tongco ng Navy at mga beterana ng WNBL at WNBL 3x3 na sina Clare Castro, Kate Castillo at Trina Guytingco.

Knights vs. Cardinals sa Finals; Alas, atras sa Gilas SEA Games

ni GA - @Sports | May 12, 2022

Matapos ang matagal na paghihintay, muling makakabalik ang Mapua Cardinals sa Finals na huling naramdaman noong 1991 matapos pabagsakin ang San Beda Red Lions sa iskor na 70-67, kahapon sa do-or-die match up ng Final Four sa 97th NCAA men’s basketball tournament sa FilOil Flying V Centre sa San Juan City.

Kumana ng matibay na double-double performance si Arvin Gamboa sa 13pts. Nag-ambag din ng puntos para sa Cardinals sina Brian Lacap sa 13pts at Paolo Hernandez na bumuhos ng 7 sa 11 puntos, habang kumamada rin si Team Captain Warren Bonifacio ng 8pts.

Dahil sa nakuhang panalo, naitulak ng Mapua ang masasabing “Battle of Intramuros” kontra sa defending champion na Letran Knights na nagawang makapasok sa Finals sa ikalawang sunod na pagkakataon nang pataubin ang Perpetual Help Altas noong nagdaang Linggo nang hapon sa 77-75.

Samantala, hindi na tutuloy si NLEX Road Warriors guard Kevin Alas sa 31st Southeast Asian Games ng Gilas Pilipinas national basketball team matapos itong umatras upang alagaan at bantayan ang may sakit na asawang si Selina Dagdag-Alas na mayroong rare cancer na Gestational Trophoblastic Neoplasia.

Papalitan siya ni Jaybee Tungcab bilang final line up sa Hanoi, Vietnam.

Mga laro sa Linggo (Mayo 15) (FilOil Flying V Centre) Game 1 – best-of-three championship series 3:00 n.h. – Letran Knights vs. Mapua Cardinals.