Matapos ang NBA victory, Jokic at Murray sa FIBA Cup

ni Anthony E. Servinio @Sports | June 15, 2023

Patuloy pa rin ang selebrasyon ng Denver Nuggets ng kanilang unang kampeonato sa NBA at ngayon pa lang ay laman ng usapan ang pagtatag ng bagong dinastiya sa liga.

Ang kanilang kapalaran ay nakasalalay sa tambalan nina Finals MVP Nikola Jokic at Jamal Murray at mga kakamping wala pang 30-anyos.

Sinong mag-aakala na isang hindi kilalang manlalaro galing Serbia na pinili sa ika-41 puwesto sa 2014 Rookie Draft ay tuluyang magiging isa sa pinakamahusay ng kanyang henerasyon. Hindi naglaro agad sa NBA si Jokic at nagpahinog ng isa pang taon sa Europa bago pumirma ng kontrata noong 2015.

Inspirasyon ang pagbangon ni Murray mula sa malubhang pilay sa tuhod, dahilan ng kanyang pagkawala ng mahigit 18 buwan at bumalik lang noong nakaraang Oktubre. Parang walang nangyari at nagtala siya ng 20.0 puntos bawat laro kumpara sa 21.2 bago mapilay.

Sa edad na 28, lumalabas na kuya si Jokic sa mga kakamping sina Aaron Gordon (27), Bruce Brown (26), Murray (26) at Michael Porter Jr. (24). Sa kabilang banda, ang kampeonato ay nararapat na gantimpala para sa mga beteranong sina Jeff Green (36), Ish Smith (34) at DeAndre Jordan (34) na nasa takip-silim na ng kanilang mga karera.

Nasundan ni Coach Michael Malone ang yapak ng kanyang ama Coach Brendan Malone na assistant coach sa dalawang kampeonato ng Detroit Pistons noong 1989 at 1990.

Magpapahinga saglit ang mga bituin ng NBA bago katawanin ang kanilang mga bansa sa 2023 FIBA World Cup ngayong Agosto sa Pilipinas, Japan at Indonesia. Susubukan nina Jokic ng Serbia, Murray ng Canada, Vlatko Cancar ng Slovenia, Reggie Jackson ng Italya at Jack White ng Australia na dagdagan ng isa pang tropeo ang kanilang koleksiyon.

Brownlee, Clarkson at Kouame Gilas list sa FIBA

ni Gerard Arce / VA @Sports | June 8, 2023

Naglabas ng 21-man pool ang Gilas Pilipinas para sa FIBA Basketball World Cup sa pangunguna nina Filipino-American Jordan Clarkson at dalawa pang naturalized players na sina Justin Brownlee at Ange Kouame.

Hindi naman mawawala sa listahan sina Gilas mainstays at 7-foot-3 center Kai Zachary Sotto, na abala sa kanyang mga dinadaluhang mini camp sa Estados Unidos sa NBA, habang parte rin ang iba pang Fil-Americans na sina Chris Newsome ng Meralco Bolts, Jamie Malonzo ng Brgy. Ginebra at dating NCAA 1 player mula Toledo na si AJ Edu.

Nananatiling matatag sa Gilas sina six-time PBA MVP June Mar Fajardo ng San Miguel at 2022 PBA MVP Scottie Thompson ng Ginebra, gayundin ang mga beteranong sina Japeth Aguilar ng Gin Kngs, CJ Perez ng Beermen at Poy Errma, Roger Pogoy at Calvin Oftana ng TNT Tropang Giga.

Nakalista pa rin ang mga overseas players mula sa Japan B.League at Korean League na sina Dwight Ramos ng Levanga Hokkaido, Kiefer Ravena ng Shiga Lakestar, Jordan Heading ng Nagasaki Velca, Bobby Ray Parks Jr ng Nagoya Diamond Dolphins, Carl Tamayo ng Ryukyu Golden Kings at Rhenz Abando ng Anyang KGC.

Siniguro ni Sotto na maaari siyang maglaro sa national squad kahit na maraming ispekulasyon na puwede itong mabakante dahil sa pagka-abala sa kanyang NBA dream, habang pagpipilian naman kina Clarkson, Brownlee at Kouame ang mapapasama sa pinal na listahan na lalaro para sa bansa.

Simula Agosto 25-30 ay nakatakdang ganapin ang mga laro ng sabay-sabay sa Pilipinas, Japan at Indonesia, habang ang final phase ay nakalatag simula Setyembre 5-10.

Nakatakdang makatapat ng Pilipinas sa Group A kasama ang Angola, Dominican Republic at Italy.

Kai Sotto, nasa mini camp ng Jazz para makapasok sa NBA

ni Gerard Arce @Sports | June 1, 2023

Hindi magpapaawat sa pagtupad ng kanyang pangarap si 7-foot-3 Filipino stalwart Kai Zachary Sotto para makapasok sa premyadong liga ng National Basketball Association (NBA).

Ito’y kasunod ng panibagong post sa kanyang Instagram story na nagpapakita ng tanawin ng Salt Lake City sa Utah, kung saan naglalaro ang kapwa kababayan na si Filipino-American Jordan Clarkson.

Nakatakdang sumabak sa isang minicamp ang 21-anyos mula Hiroshima Dragonflies sa Japan B.League kasama ang ibang free agents at international prospects kahapon at bagyong araw (oras sa Pilipinas).

Kasalukuyang nagbabalasa ng line-up ang Utah Jazz at naghahanap ng big man, kung saan tinatarget rin nila ang serbisyo ni Deandre Ayton ng Phoenix Suns sa isang trade, habang mayroon na ring mahusay na big man ang Jazz sa katauhan ni Walker Kessler, na napabilang sa All-Rookie Team.

Ayon sa inilabas ng The Salt Lake Tribune, nasa proseso umano ang Jazz ng rebuilding at naghahanap ng mga manlalarong maaaring kumuha ng mga mababakanteng puwesto, gayundin ang pagsandal sa kanilang picks sa 2023 NBA Draft picks sa first round kabilang ang No. 9, 16 at 28. “No less than Justin Zanik [general manager] noted that there could be a lot of change coming this offseason. There are key guys with player options who could decide not to return. There are three draft picks in hand. And with a haul of picks owed to them down the road, there’s the possibility of making some big trades,” ayon sa inilathala ni Eric Walden nitong Lunes (oras sa Amerika).

Pagdating naman kay Sotto, nabigo itong mapili ng anumang koponan sa nagdaang 2022 NBA Draft, upang maging free agent ito at undrafted, dahilan para bumalik sa dating koponan sa Australian NBL.