Marinero vs. ECoOil sa Game 1 ng D-League Finals

ni Anthony E. Servinio @Sports | June 22, 2023

Laro ngayon – Ynares Sports Arena

3:00 p.m. EcoOil vs. Marinerong Pilipino

Isang mahigpitang serye ang aasahan sa paghaharap muli ng defending champion EcoOil at Marinerong Pilipino sa Game One ng seryeng best-of-three para sa 2023 PBA D League Aspirants ngayong Huwebes sa Ynares Sports Arena sa Pasig City simula 3:00 ng hapon. Nagkita ang dalawang koponan noong nakaraang taon kung saan nanaig ang EcoOil, 2-1, kaya gustong-gusto makabawi ng Skippers.

Nilasap ng EcoOil ang kanilang nag-iisang talo ngayong torneo sa kamay ng Marinero, 79-82, noong Mayo 2 matapos ang nagpapanalong three-points ni Peter Alfaro. Mula roon ay nagwagi ng anim na sunod ang EcoOil kasama ang huling dalawa sa semifinals kung saan nila tinambakan ang University of Perpetual Help System Dalta, 107-78 at 108-91.

Mas mahirap ang dinaan ng Marinero at natalo sila sa Game One ng semis kontra Wangs Strikers sa overtime, 87-93, at bumawi sa pagwalis ng sumunod na dalawang laro, 74-51 at 79-65. Tinapos ng Skippers at EcoOil ang elimination na tabla sa 5-1 panalo-talo subalit naging numero uno ang Marinero sa bisa ng panalo nila sa EcoOil.

Naniniwala si EcoOil assistant coach Gian Nazario na maaaring umabot muli ng Game 3 ang serye sa pagdalaw ng mga koponan sa Philippine Sportswriters Association (PSA) Forum noong Martes sa Rizal Memorial Sports Complex. Binubuo ang EcoOil ng mga manlalaro ng De La Salle University sa pangunguna nina Kevin Quiambao at Mark Nonoy. Kinuha ng Skippers ang buong koponan ng San Beda University at aasa sa husay nina Jacob Cortez, Yukien Andrada at James Payosing.

Ang Game 2 ay gaganapin sa parehong palaruan at oras sa susunod na Lunes, Hunyo 26. Kung kailangan, ang Game 3 ay naka-reserba para sa Hunyo 29.

Clarkson sa Gilas pa-China, Giannis, darayo sa 'Pinas

ni MC @Sports | June 22, 2023

Makakasama si Jordan Clarkson sa Gilas Pilipinas sa huling bahagi ng Hulyo para sa pagsabak ng nationals sa pocket tournament sa China sa Agosto, bilang bahagi ng kanilang krusyal na pagsasanay para sa 2023 FIBA World Cup.

Ayon kay Samahang Basketbol ng Pilipinas (SBP) president Al Panlilio, pina-finalize na ng federation at kampo ni Clarkson ang schedule at inaasahan na ang Utah Jazz star ay lalaro sa Gilas Pilipinas sa China.

"We're talking to him. Timing lang talaga. I'm not getting the latest updates but the last time Butch Antonio spoke to them, we're gonna be asking him if he can come to join us in the last week of July because we want him to be part of the games in China," saad ni Panlilio kahapon.

Samantala, sa unang pagkakataon ay darayo sa Pilipinas si "Greek Freak" NBA player Giannis Antetokunmpo. Si Giannis ay nagmula sa bansa kung saan nagsimula ang Olympics at mga sinaunang mandirigma.

Isa si Giannis sa ipinagmamalaking maging bahagi ng FIBA at malagay sa world no. 9 ang national team, naging bahagi ng NBA champion at naging back-to-back Most Valuable Player ang 6-foot-9 forward ng Milwaukee Bucks.

Kilala sa NBA sa buong mundo sa katawagang "Greek Freak," unang tatapak sa Pilipinas si Antetokounmpo sa Agosto 25 hanggang Setyembre sa ilalim ng kanyang home team na Greece kagrupo ang United States, New Zealand at Jordan sa Group C ng preliminaries.

Samantala, igagawad na kay Carlos ‘Caloy’ Loyzaga, ang greatest basketball player ng bansa, sa Agosto 23 posthumous FIBA Hall of Fame sa mismong FIBA World Congress sa Sofitel, dalawang araw bago simulan ang 2023 World Cup kung saan co-host din ang Japan at Indonesia.Kilala sa monicker na “Big Difference” noong dekada 50, si Loyzaga ang ika-2 Pinoy sa FIBA Hall of Fame.

Pinoy Aquino, isa sa pambato ng Japan sa FIBA World Cup

ni Anthony E. Servinio @Sports | June 21, 2023

Sisiguraduhin ng 2023 FIBA World Cup co-host Japan na hindi sila mapapahiya sa sarili nilang tahanan at magbubuo ng palaban na koponan na pamumunuan ng mga NBA player Rui Hachimura ng Los Angeles Lakers at Yuta Watanabe ng Brooklyn Nets. Subalit may isang pangalan sa kanilang listahan na may apelyidong pamilyar sa mga Pinoy.

Kabilang si Matthew Aquino, dating manlalaro ng National University at anak ng alamat na si Marlou Aquino, sa 25 manlalaro na nominado ng Japan Basketball Association. Naging mamamayan ng Japan ang nakababatang Aquino dahil ang kanyang ina ay may lahing Haponesa.

Namana ng 26 anyos na si Matthew ang 6’9” tangkad ng kanyang ama. Dalawang taon na siya naglalaro bilang local player sa Japan B.League para sa Shinshu Brave Warriors. Isa pang pamilyar na pangalan sa mga Pinoy ay si Nick Fazekas na isang naturalized na mamayanan. Naglaro bilang import ng Petron Blaze (San Miguel Beer) sa PBA.

Nabunot ang Japan sa Grupo E kasama ang Alemanya, Finland at Australia. Gaganapin ang lahat ng kanilang laro sa Okinawa Arena. Determinado rin na magpasikat ang mga Aleman. Tinawagan na nila ang kanilang mga NBA player Dennis Schroder ng Lakers, Maxi Kleiber ng Dallas, Daniel Theis ng Indiana at magkapatid na Franz at Moe Wagner ng Orlando.

Ang Australia ay isa pang bansa na may kakayahan na bumuo ng 12 NBA player. Kasama sa unang listahan sina Jack White ng World Champion Denver, Patty Mills ng Nets, Matisse Thybulle ng Portland, Josh Green ng Mavericks, Joe Ingles ng Milwaukee, Jock Landale ng Phoenix, Xavier Cooks ng Washington, Josh Giddey ng Oklahoma City, Dyson Daniels ng New Orleans at Matthew Dellavedova ng Sacramento.